Luk 1
1
Luum Jöö Mana Ö Luki Na Göör Wëëlö Ki Gø Jï Thïëpöla
1Kawaane jiy mo thööth anø tägö ki man göörge gïïa tïïc Jwøki na nø thur karge dïwa, 2ni göörge ka køør luup moa wïnyge baŋ jøøa neen gïïögø ki nyeŋge na nut dïkwøŋ kanya täk gïïögø, na køpge gø. 3'Ba ï na nyigwaak#1:3 Nyigwaak beeye nyeŋ wödö kiper ŋat mo kare dwøŋ. ma Thïëpöla, yaa caarø, ni doo beer jïra thuwø ki man gööda ki wëëlö jïrï ki køør mana bëëda naa neeta tiet gïïögø døøc ki kanya täkge yie, ni gööra ni yaa cïïmmö, 4nee adïëri mar gïïa pwöny ïïni ki ge nee ŋäyï.
Kanya Ö Nyïïatwiel Maalli Na Buuk Lwaar Mano Lwaarø Ki Jøøn Ki Gø
5'Ba ki yïth nïr Eerat na bëëdö na nyeny Judia, kaaca da dïlämi mo nyeŋŋe cwøl ni Dhekaraya, na käl dhi øt Abaaja.#1:5 Luum Abaaja di joodø yi 1 Luup Nyeye 24:10 Eni jïre da dhaagø mo käla dëët jø dhi øt Aran, mo nyeŋŋe cwøl ni Ilidhabeth. 6'Ba gena jiy mo beyø nyïm Jwøk karge riet, ni ge caatha køør moa näk ocem Wuue ki ciik moe bëët, ni bäŋ gïn mo ege baaø rege. 7'Ba jïge bäŋ nyilaal, kiper Ilidhabeth bwøc, ni geno nø jalø karge riet.
8'Ba kanya tïm tïïci ni ena ceŋ dïlämme mo dhi øtø mana käl Dhekaraya yie, ni Dhekaraya tïïö na dïlämi nyïm Jwøk, 9døny Øt Jwøk Mana Dwøŋ mar Wuuö ki nyep gïï wø jïcge ŋwääi ni met, apäth cere, keda man wø tïïc dïlämme. 10'Ba lwaa dhaanhø bäre lämö wøk yi kar caanna nyep gïï wø jïcge ŋwääi ni met. 11'Ba kanyøgøøni nyïïatwiel maal mar Wuuö dëëre anyoodhe jï Dhekaraya ni cuŋŋa bäät cwïïc kar gïn wø waaŋ gïï wø jïcge ŋwääi ni met bääte. 12'Ba na ö Dhekaraya na neen gø, ena bwøk ni jït cwïnye ki lwär. 13'Ba nyïïatwiel maal manøgø aköö jïgø, ni «Kärï lwäyö, Dhekaraya, kiper lam marï awïnynyi. 'Ba cïïï ma Ilidhabeth ojïti ki nyilaal ma cïïŋŋö.#1:13 Cïïŋŋö beeye nyeŋ wödö kiper nyilaar dïcwøø. 'Ba nyeŋŋe ocwølï ni Jøøn. 14'Ba yiï omïnni ni kanynyï, ni ö jiyi mo thööth ni mïn yïthge kanyo lwaarø ki gø. 15Kiper eno tïmö na ŋat mo dwøŋ nyïm Wuuö Jwøk, ni eni ba mädhö ki køøŋ nyïïomøki wala køøŋø mo keec. 'Ba eno bëëdö ni päŋ ki Jwïëc Jwøk na en kur keere, ki mano täge ni ena yi menni. 16'Ba eni wäät Icriel mo thööth oløø baŋ Wuuö Jwøk na näk Jwøk marge. 17'Ba eno cäädhi nyïm Wuuö Jwøk ki teeŋ bëët Ilaaja ki teek mare, ni løø cwïny wëëe baŋ obwöre moge,#Milkiya 4:6 ni løø wïth jøøa wïthge teek baŋ acaac jøøa marge beyø, ni tïïc jiy na jiy mo ojiiŋŋø kiper Wuuö Jwøk.»
18'Ba Dhekaraya aköö jï nyïïatwiel maal manøgø, ni «?Gïnögø oŋääa gø nidïï? Kiper aana jaal, ni cïïa onø jalø thuwø.»
19'Ba aløk nyïïatwiel maalli jïre, ni «Aana Geebriel, ni wø cuŋŋi nyïm Jwøk; naa jääŋŋi kaper niï cäänna, naa køpa luummi ni met en jïrï. 20'Ba neenï, ïïno bëëdö niï lïŋö, niï ba maar luupö, gøøc dïcäŋo thur gïïögø karge, kiper na kärï luupa jïëö, luupo thur karge dïcäŋo näk kare.»
21'Ba jiy abëëdö ni ge køya Dhekaraya, ni thäŋ yïthge kiper mana ruue Øt Jwøk Mana Dwøŋ. 22'Ba na ö wøk, ena tïmö ni ba maar luubö ki geni, ni ŋecge gø ki man näk mo da gïn mo ee neenø baŋ Jwøk yi Øt Jwøk. Ni luube ki ge ki lweete ni put bëëtö ni ba cäänö.
23'Ba kanya thum nïr tïïci mare, ena døø paare. 24'Ba køør nïrögø, cïïe ma Ilidhabeth agämmö ki dhaanhø, ni ö eni ni kan dëëre ki dwäde abïïc, ni kööe, 25ni «Wuuö Jwøk gïn atïïe dëëra na enønø, kanya nyooth met ec mare jïra, ni wëënna laac wïc mara dï jiy.»
Kanya Ö Nyïïatwiel Maalli Na Køp Lwaar Mano Lwaarø Ki Jecu Ki Gø
26'Ba na tïme na køør dwäde abïciel, nyïïatwiel maal ma Geebriel ajääŋ Jwøki yi pääny Galili na cwøl ni Nadhareth, 27baŋ nyakøønna näk omiek dïcwøø mo cwøl na Jocep, na käl dhi øt Deebit. 'Ba nyeŋ nyakøønnøgø cwøl ni Meeri. 28Ni ö Geebriel ni ö baŋ Meeri ni kööe, «Ïïna määth, ï na mëër Jwøki ki gø. Wuuö ena buutï.» 29'Ba Meeri yie athäŋŋö døc kanya wïny luummögø, ni cääne ki cwïnye, ni man a teeŋ määdhe mo nyïëdi cøøn. 30'Ba nyïïatwiel maal aköö jïgø, ni «Kärï lwäyö, Meeri, kiper ïïna jïtö ki mëër baŋ Jwøk. 31'Ba neenï, yiï ojïti ki dhaanhø ni lwaarï ki gø na cïïŋŋö, 'ba nyeŋŋe ocwølï ni Jecu. 32'Ba kare otïmö ni dwøŋ, ni cwøli ni O Jwøa Dwøŋ ni en Maal. 'Ba eno wëëk Kwäärö ma Jwøk wäl kwari ma Deebit, 33ni ö jø dhi øt Jeekap ni bëën eni na bäre bäre, ni bëët buye ni bäŋ cuŋŋe.»
34'Ba Meeri aköö jï nyïïatwiel maal, ni «?Gïnögø otäge nidïï, kiper jïra bäŋ dïcwøø?»
35Ni kö nyïïatwiel maalli jïgø, ni «Jwïëc Jwøk na en kur keere öö bäätï, ni ö teek Jwøa Dwøŋ ni en Maal ni rïëp ïïni. Kiper manøgønø, nyilaaro lwaarø ki gø, ocwøl ni ena kur keere na O Jwøk. 36'Ba neenï, wadu ma Ilidhabeth na näk onø jalø ajïtö ki dhaanhø thuwø ma cïïŋŋö. 'Ba man beeye bïcier dwäde jïre, eni na wara cwøl ni bwøc. 37Kiper bäŋ gïn mo dhäthi jï Jwøk.»
38Ni kö Meeri, ni «Kare møn, a ena cer Wuuö Jwøk; beerra man täge dëëra kaawat mana caanï enø.» Ni ö nyïïatwiel maalli ni aae buut gø.
Kanya Ö Meeri Na Liim Ilidhabeth
39'Ba yïth nïrögø Meeri aö maal, ni aae ni rwäänhnhö, ni cøøa po kïte, pääny mo ena Judia. 40Ni ci po Dhekaraya, ni määth Ilidhabeth. 41'Ba na ö Ilidhabethi na wïny määdhe mar Meeri, nyilaal apäär maal yi gø. Ni ö Ilidhabethi ni pääŋe ki Jwïëc Jwøk na en kur keere. 42Ni put köö ki dwøl mo päl, ni «Bee ï na gwïëth dï mään, ni gwïëth ena dëër nyey ni en yiï enø. 43?Aŋø, gïn owëëk aani nidïï, ki man ö mii Kwääya na dee ö baŋa? 44Kiper ennø, kanya wïnynya määdhe marï kiree, nyilaal ni en yia en, aput päär maal ni yie omïnnö. 45Ni meta yi nyaana jïëy, ni mana caan Wuuö jïre doo thura kare.»
Duut Pwøc Mana Wär Meeri
46Ni kö Meeri,
ni «Aani, jwïëya jiema Wuuö,
47ni ö cwïnya ni mïnne ki Jwøk na näk Pïëmi mara.
48Kiper eni canna, a na laŋŋe, aneene.
'Ba kawaane, køør man en nø,
beenhnhe bëët aano cwølge ni beeye aani na gwïëth.
49Kiper eni na teek, gïï mo døøŋŋø atïïe jïra,
'ba eni, nyeŋŋe ena kur keere.
50Ni ö mëërri mare ni wø ba jøøl ni bëëde bäät jø wø lwäär ki eni,
ni ö ki ri beenhnhi nø, ni pööth ri beenhnhø maya.
51Eni bade bäär ni teege ee nyoodhø,
ni keeth jø wø töödö ki yïth cwïnyge.
52Eni jøøa kwörge døøŋŋø wø dwøge piny ki bäät wäle moge,
ni røøny jøøa can.
53Ni ö eni ni cïp gïï mo beyø jï jøøa näk obup,
ni cöör jøøa näk okwär wøk ki ceŋge jaak.
54'Ba eni jiye ma jø Icriel akønye,
ni eni nyootha mëër mare,
55kaawat mana caan gø jï kwäyø,
ni beeye Eeberam ki nyïïkwaaye, këël bäre bäre.»
56Ni ö Meeri ni bëëde ki Ilidhabeth ki kany mo jïtö ki dwäde adäk, ni døø paare.
Lwaar Mana Lwaarø Ki Jøøn
57'Ba kanyøgø kar lwaar apïï dëër Ilidhabeth, ni lwaare ki nyilaal ma cïïŋŋö. 58Ni ö jøøa en buute ya atut ki tuuŋge ni wïnyge gø ni ena nyuunh Wuue ki køny mo dwøŋ døc, ni mïn yïthge ki eni na aciel. 59'Ba na tïme na bäc nïne, gena ö kuna daŋge nyilaal. Ni ge manynya man cakge nyeŋ gø ni Dhekaraya kaamar wänni. 60'Ba mii nyilaal aköö, ni «Patha eni. Eno cwøl ni Jøøn.» 61'Ba gena köö jïgø, ni «Bäŋ dhaanhø aciel dëët tuuŋu mo ocwølø ki nyeŋŋøgø.» 62Ni cäänge ki wää gø ki lweetge, ni ge pëënynya eni, ki man näk mo nyeŋ nyilaal ocak gø na ŋa. 63Ni ö eni ni pëëny gïn wø gööt bääte, ni göör gø, ni «Nyeŋŋe Jøøn.» Ni rëëm yïthge bëët. 64'Ba kanyøgø dhee ree aput jap, ni pät leebe, ni cäänne ni pwøya Jwøk. 65Ni ö jøøa en buute bëët ya atut ni jït cwïnyge ki lwär. Ni ö tiet mïëc Judia bëët moa en bäät kïte ni tïmge ni ge caana gïr gïïögø. 66'Ba jøøa wïny gïïögø bëët akange cwïnyge, ni köge, ni «?Nyilaarøgø otïme na ŋø?» Kiper mana bëët cer Wuue bääte.
Dwør Jwøk Mana Caan Dhekaraya
67Ni ö wänni ma Dhekaraya ni päŋe ki Jwïëc Jwøk na en kur keere, ni caan luumma nyooth Jwøki jïre, ni kööe,
68ni «Pwøc en jï Kwäärö Jwøk, Jwø Icriel,
kiper ena lïïmmö ni wïïl jiye wøk,
69ni thïïŋŋe ko oteeø na dïpïëmi kiperø,
yi po dhaanhnhe ma Deebit,
70keda mana caan gø dhøk nyïïkuk moe na en kur keerge ya acääŋŋe cøøn,
71ni ø doo piemø ceŋ nyïïmännø,
ki ceŋ jøøa män ki øøni bëët,
72nee mëër mare nyoodhe jï kwäyø,
ni lääŋŋa luumme na en kur keere na tuude ki geni,
73ni beeye kööŋ mana kööŋe ki gø jï kwarø ma Eeberam,
74nee ø pieme ceŋ nyïïmännø,
nee lønyø jïïø ki man tïnynyø eni ni bäŋ lwär,
75nøø bëëdö ni ø ena kur keerø, ni marø beer nyïme
ki yïth nïne 'moø bëët.
76'Ba ï na nyilaal, ïïno cwøl ni ïïna nyikuŋ Jwøa Dwøŋ ni en Maal,
kiper ïïno cäädhi nyïm Wuuö niï jiiŋŋa uutjïëthe moe,
77niï nyutha jiye pïëm man piem geni ki gø,
kiper mano wec raay moge,
78ki køør met yi Jwøk marø na jwør can marø,
ni ö bäätø ki maal kaawat man wø cööt øwi,
79nee tar cïbe jï jø wø bëëdö yi muudhö, ni bëëdö dhi thøø,
ni bwøth øøni ki waŋjöör bëët-mëër.»
80Ni ö nyilaalli ni piidhe ni tïme ni cwïnye da cer; ni eni bëëdö paap këël dïcäŋa nyooth ree jï jø Icriel.
Currently Selected:
Luk 1: AnyuB
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia
