Luk Luubö Mo Cäänö Kaper Wëël Luk
Luubö Mo Cäänö Kaper Wëël Luk
Wëël Luk beeye dää weeli moa na aŋween moa täk Luumma Nyään Na Met Mar Jecu Krictø ki gø, ni weetøgø cäänö kaper bëët Jecu Krictø bäät piny, ki luum Jwøk mana købe, ki tïïe moe, ki pwöc moe, ki thøø mare bäät jaadha no odëëdö, ki duunne wøk ki yi thøø. Luup moa göör Luki gööre ka køør luup moa wïnynye baŋ jøøa neen gïïögø ki nyeŋge, ni gööre ni ee cïïmmö. (1:1-4)
Røk jøøa göör weeli moøgø kiper Jecu, jiy adäk beege jø Juuth; 'ba Luk keere patha ŋat Juuth. Ena ŋat Gïrïïk, ni ena akïïm. Luup mo thööth moa göör Luki poot na aciel ki luup moa göör Mathiew ki Maak. 'Ba luup møøk gööra eni keere.
Luup moa göör Luki nyootha gø ni Jecu ööa kuna piem jiy bëët. Jecu acäänö kiper dëëre, ni kööe, ni «Wär Dhaanhø öönynya kuna many jøøa näk orwäänyö nee pieme.» (19:10) Ena öö kiper jøøa can (4:19), ki jø täwe (5:12-13), ki jø raay (7:36-50), ko obwöre (10:21, 19:15-17), ki mään (13:10-13), ki jøøa näk orwäänyö (15:1-32). Luup mo thööth agööre kiper Jwïëc Jwøk, ni gööde thuwø kiper laam mo Jecu.
'Ba ki køør pwöc moe moa näk nyootha atade mar dïbwöthe mo jø Juuth, dïbwöthe atïmö ni ge män ki eni, këël mana jïtge ki jöö man 'näkge gø ki gø. 'Ba ki køør mana 'näkge gø bäät jaadha no odëëdö, ena tïŋ Jwøki maal ki yi thøø, ni døø maal baŋ Jwøk, ni poot bëëdö ni kwøw këël dïcäŋi. Eni bääge aköömme nee luumme køpge bäät piny bäre.
Wëëlö maya mana göör Luki beeye Moa Tïïc Nyïïatwieli. Wëëlö manøgø cäänö kaper bääk Jecu kanya kïthge ciik mar Jecu bäät tïïc ki man køpge luumme bäät piny bäre. Kwaan Moa Tïïc Nyïïatwieli 1:1-4.
Luup moa no ogöörö yi wëël Luk beege ii:
Luum gïïa tägö dïkwøŋ (Tielø 1:1—4:13)
Gïna göör wëëlö man kipere (Tielø 1:1-4)
Lwaar mana lwaarø ki Jøøn na näk dïlööy, ki lwaar mana lwaarø ki Jecu ki gø (Tielø 1:5—2:52)
Luumma køp Jøønni na näk dïlööy na nyuudhi na nyuudhi (Tiel 3:1-20)
Kanya lwøk Jecu na nyuudhi (Tiel 3:21-22)
Luum kwäre mo Jecu Krictø (Tiel 3:23-38)
Luum päänynyö mana pääny Jecu (Tiel 4:1-13)
Luum tïïe moa tïïc Jecu ki pwöc moe (Tiel 4:14—19:27)
Kanya mïn yïth jiyi ki Jecu ki køør gïïa tïïe ki pwöc moe (Tiel 4:14—9:50)
Kanya män dïbwöthe mo jø Juuth ki Jecu ki køør gïïa tïïe ki pwöc moe (Tiel 9:51—19:27)
Luum gïïa tägö yïth aŋuun nïne moa beet Jecu bäät piny (Tiel 19:28—24:53)
Kanya ö Jecu na døny yi Jerucalem ni ena bäät nya arëën (Tiel 19:28-44)
Kanya ö Jecu na pööe yi Jerucalem (Tiel 19:45—21:38)
Luum cam mana näk aŋuudi na cäm Jecu ki bääge, ni aa Gecemeni kuna läme (Tiel 22:1-46)
Kanya ö Jecu na cïbi ceŋ nyïïmän, ni maai, ni ŋøl luum thøø bääte, ni nääi bäät jaadha no odëëdö, ni koonyi (Tiel 22:47—23:56)
Kanya tïŋ Jecu maal ki yi thøø, ni nyooth ree jï bääge, ni kïthi maal baŋ Jwøk (Tiel 24:1-53) ø
Currently Selected:
Luk Luubö Mo Cäänö Kaper Wëël Luk: AnyuB
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia