Aromduma 4

Aberaham Yele

1Beni ti tu wan ta'am yeti Aberaham en de tu yaaba inganɛ puan la, yuum nyɛ a mɛŋa tuuma puan? 2Aberaham yuum han di buurɔ la a tuuma puan, a tari sɛla ti a wan ta'am dikɛ ŋmɛ' a nyu'ɔ, gee dagi Yinɛ nɛŋan. 3#Pi'il 15.6; Gal 3.6Gee Gɔŋɔ la yeti boo? “Aberaham nam la Yinɛ, ti Yinɛ bihɛ nyɛ ti a dɛna tuuntɔɔ.” 4Se'em woo en tum, ba ka bihɛ nyɛ a yɔɔrɛ la ti de dɛna bo'olum, gee la dela sɛla ti a tum to'e. 5Gee se'em en ka tum, gee yeen nam la se'em n bo'ori be'em duma buurɔ la, sakerɛ dinɛ taaba ti ba bahɛ nyɛ ti a dela tuuntɔɔ daana. 6Bala mɛa ti naba Deviti tɔgɛ doohe sum sebo en boi bo' sɛba ti Yinɛ bihɛ nyɛ ti ba dɛna tuuntɔɔ duma gee dagi la Yinɛ bihɛ nyɛ la ba tuuma la yeti,

7 # Yoo 32.1-2 “Sum boi mɛ la sɛba duma ti ba bahɛ ba tuure bo' ba,

la sɛba ti Yinɛ pi' ba be'em bahɛ la.

8Sum boi mɛ la se'em ti Daana la ka bihɛ nyɛ a be'em la.”

9Sum buna wa purɛ bo' la sɛba en ŋma la ma'a, bii bu ta' sɛba en ka ŋma la me mɛ? Se'ere en sɔi la tu yeti,“Sakerɛ zuo ti Yinɛ bihɛ nyɛ Aberaham ti a dɛna tuntɔɔdaana.” 10Yinɛ daa bihɛ nyɛ Aberaham ti a de tuuntɔɔ nɛra la ŋwani? La dela en daa nan ka ŋma la bii en daa ŋma ba'ahɛ la? La dela en daa nan ka ŋma la, gee dagi en daa ŋma ba'ahɛ la. 11#Pi'il 17.10Aberaham daa to'e ŋmaa daalehum la mɛ ti la dɛna sɛla n pa'alɛ a tuntɔɔnɛ la ti a to'e la sakerɛ la, ti a nan ka ŋma. Iti kuna wa dela, la iŋɛ ti a dɛna yaaba bo' sɛba woo en nam gee ka ŋma la, n yeti la sɛba ti Yinɛ bihɛ nyɛ ba ti ba dɛna tuuntɔɔ duma la. 12Gee me kelum dɛna yaaba bu sɛba en ŋma la, dagi ba ŋmaa la ma'a, gee sɛba en tari sakerɛ se'ere taaba ti tu yaaba Aberaham yuum tara gee nyaa baŋɛ ŋma la.

Yinɛ nɔbiŋere la en boi sakerɛ puan se'em

13 # Pi'il 17.4-6; 22.17-18; Gal 3.29 Nɔbiŋere la n biŋe ti Aberaham la a yaahi ti ba wan sɔna timpaberɛ wa za'a la yuum ka tɔgɛ bo' Aberaham bii a yaahi la la doohe la ze'elego la puan, gee la doohe tuntɔɔnɛ en ze'eti sakerɛ puan. 14#Gal 3.18 La han dɛna la sɛba en dole ze'elego la n wan ta dɛna asooesɔna duma, sakerɛ yi dela zaŋa, ti nɔbiŋere la me bahɛ yoo. 15Se'ere en sɔi la, ze'elego la tari la Yinɛ sunsunyiim kina na. Gee zi'an ti ze'elego ka bɔna, galeŋɔ me pun ka bɔna.

16 # Gal 3.7 Ŋwana zuo, la dela sakerɛ en bahɛ ti nɔbiŋere la, doohe zu'uhegɔ puan paaɛ Aberaham yaahi woo, dagi la sɛba ma'a n dole ze'elego la, gee sɛba me en tari Aberaham sakerɛ la taaba la. (A dela tu za'a sɔ, 17#Pi'il 17.5wuu lan gulehɛ gɔnɔ la puan se'em yeti, “Mam iŋɛ hɔ ti fum dɛna la tihi zo'e zo'e sɔ”) — Yinɛ se'ere ti Aberaham nam la nɛŋan. Yinɛ se'ere en bo'ori kum vom, gee baha ti sɛla en ka boi bɔna la. 18#Pi'il 15.5 La en pun bɔna bɔnsɛka en ka tare beere puti'irɛ la, gee doohe beere puti'irɛ puan a nam mɛ ti eŋa wan ta wa'am na dɛna “tihi zo'e zo'e sɔ,” wuu eŋa en wum se'em yeti, “Fum yaahi yeti ba wi'ɛ la bala la.” 19#Pi'il 17.17A sakerɛ la ka kɔ'ɛ, la en yuum bihɛ ti a mɛŋa inganɛ la ba'ahɛ la za'a yɛ'a yɔɔen la, (se'ere en sɔi la, a yuum ye' la yuuma kɔbega). Bii eŋa en yuum bihɛ Saara kundɔgenɛ la en paaɛ se'em la. 20Bumbu'um yuum ka boi bahɛ ti a miim la Yinɛ nɔbiŋere la, gee a tugum malum kpe'em mɛ la a sakerɛ, pɛgera Yinɛ. 21Kɔ'ɔm lu' a suure kankaŋi, ti Yinɛ wan ta'am tum en biŋe nuurɛ ti a tum se'em la. 22Bala zuo, “Yinɛ bihɛ nyɛ a sakerɛ la mɛ ti a dɛna tuuntɔɔ daana.” 23Gulehegɔ en yeti, “Yinɛ bihɛ nyɛ en mɛ la,” ka gulehɛ la eŋa ma'a zuo, 24gee tumam me. Yinɛ wan bihɛ nyɛ tumam me ti tu dɛna tuntɔɔduma, tumam sɛba woo en nam se'em daana en vo'e Yezu tu Daana kum puan la. 25#Aza 53.4-5Se'em ti Yinɛ dikɛ en tihɛ na ti a ki tumam tuure zuo, gee daa vo'e en tumam buurɔ zuo la.

Currently Selected:

Aromduma 4: GBTP

Highlight

Copy