Aromduma 5

Buurɔ nyuurɔ

1Bala zuo, tumam en to'e buurɔ doohe sakerɛ puan la, tu tari suma'ahum mɛ la Yinɛ, suma'ahum buna wa ze'ele la tu Daana Yezu Kiresta puan na. 2Se'em puan ti tu doohe nyɛ yɔ'ɔ doohe (sakerɛ) puan ti tu tara zu'uhegɔ seko ti tu yaga ku zuo wa, gee me ŋmɛ'ɛra nyu'ɔ la tumam beere wan lagum nyɛ Yinɛ suŋa la. 3La dagi bala ma'a, gee tu me ŋmɛ'ɛri nyu'urɔ mɛ la tu namehegɔ la, gee mina ti namehegɔ wa bo'ori tu la ŋmibega, 4ti ŋmibega bɔ'ɔra tu aŋa en bi'ɛ, ti aŋa en bi'ɛ la bɔ'ɔra tɔ beere puti'irɛ, 5ti beere puti'irɛ wa me kan diihe tu vi, beni zuo, Yinɛ ka'ɛ la nɔŋerɛ bahɛ tu suya puan, doohe Fa'a Sia la ti a bo' tu la puan.

6Se'em ma'a ti tumam daa nan dɛna tɔregɔ duma la, sansɛka en daa nari la puan, ti Kiresta ki be'em duma wa zuo. 7Yelemɛŋerɛ, la kpe'em mɛ ti tu ti'ihɛ ti nɛra wan ki bo' nɛre tuuntɔɔ. Han dɛna la nɛresuŋɔ, daanse'ere nɛra ta'am sirum maahum ti a ki. 8Gee Yinɛ pa'alɛ tumam la a nɔŋerɛ, la tumam en daa kelum bɔna tu be'em puan la, ti Kiresta ki bo' tu. 9Sɛla en gani bala dela, tumam en nyaa to'e buurɔ Kiresta ziim la puan la, tu nyɛ la faarɛ a puan, yehe Yinɛ susuntuulega la puan. 10Se'ere en sɔi la, tumam nyaa daa han tugum dɛna Yinɛ dinduma, gee ti a dikɛ tu naaɛ la a mɛŋa, doohe a dayua kum la puan, sɛla en nyaa gani bala dela, en dikɛ tu naaɛ a mɛŋa la, tu wan nyɛ faarɛ a vom la puan. 11Gee sɛla en pun gana bala dela, tu ŋmɛ'ɛri la nyu'ɔ Yinɛ puan, tu Daana Yezu Kiresta zuo, se'em zuo ti tu nyaa nyɛ naarɛ la Yinɛ wa.

Adam la Kiresta

12 # Pi'il 3.6 Bala zuo, wuu be'em en wa'am tiŋa wa zuo na, doohe buraa kayima puan na se'em, ti kum me doohe be'em na, ti kum taaɛ nɛra woo se'em la, beni zuo, nɛra woo tum la be'em. 13Be'em pun bɔna tiŋa wa zuo mɛ gee ti ze'elego la baŋɛ wa'am na, gee ba ka bihɛ nyɛta be'em zi'an ti ze'elego ka bɔna. 14Gee la bala za'a, kum pa'alɛ a paŋa mɛ ze'ele Adam, ta paaɛ Moose, pun ta ta' sɛba be'em en ka ani wuu Adam tuure la, Adam kana wa ani wuu se'em en ye' na la.

15Gee se'em ti Yinɛ dikɛ bo' tu zaŋa la ka ani wuu se'em en tari tuure la. Se'ere en sɔi la, nɛreba kekeko la han ki doohe la nɛre yinɛ tuure la zuo, yelemɛŋerɛ, Yinɛ zu'uhegɔ la, la a bo'olum ti a bo' zaŋa la, doohe la zu'uhegɔ seko ti a zu'uhɛ buraa kayima Yezu Kiresta wa la, zu'uhegɔ kuna wan bɔna zo'e zo'e bo' nɛreba zo'e zo'e. 16Bo'olum la ti a bo' tu zaŋa la, ka tari too seko taaba ti nɛre yinɛ tuure la tara la. Se'ere en sɔi la, gakerɛ la doohe la tuure deyina zuo tari sageŋɔ wa'am na, gee zaŋa bo'olum la en bo' doohe tuure zo'e zo'e zuo la, tari la buurɔ wa'am na. 17La han dɛna la nɛre yinɛ tuure la zuo ti kum doohe bilam sɔna sɛla woo la, yelemɛŋerɛ, sɛla en gani bala dela, sɛba en to'e zu'uhegɔ kãtɛ la, la tuuntɔɔ zaŋa bo'olum kãtɛ la tari la vom paŋa, doohe buraa kayima Yezu Kiresta wa puan.

18Bala zuo, wuu nɛre yinɛ tuure en tari sageŋɔ wa'am saaleba woo zuo se'em na la, bala mɛa ti nɛre yinɛ tuuntɔɔ tuunɛ la me bo' nɛreba woo buurɔ, la vom. 19Wuu nɛre yinɛ pobiriga zuo ti zo'e zo'e dɛna be'em duma se'em la, bala mɛa ti nɛre yinɛ naŋa la zuo, ti zo'e zo'e wan dɛna tuntɔɔduma. 20Gee ze'elego wa'am na ti ku bahɛ ti tuure kekeko en malum niiɛ pa'aha , gee zi'an ti tuure malum niira pa'aha la, zu'uhegɔ me malum niira pa'aha gana la bala, 21bala, be'em n pa'ali a paŋa kum puan se'em la, bala mɛa ti zu'uhegɔ wan pa'alɛ a paŋa doohe buurɔ, yu'ura sore bɔ'ɔra vom kamba'ahɛ sebo en boi Yezu Kiresta tu Daana puan la.

Currently Selected:

Aromduma 5: GBTP

Highlight

Copy