Maki 15

Yezu paaɛ Naba Palete nɛŋan

(Matu 27.1-2, 11-14; Luki 23.1-5; Yɔn 18.28-38)

1Beere n ta yilegera la, bilam bilam ti malema kiinduma lagum la kiinduma za'a la gɔnmi'ineba la, maahum ba puti'irɛ, nyaa lu' Yezu nu'uhi tari en ta bo' Palete. 2Ti Palete soke Yezu yeti, “Fum n de Yuuduma naba la?” Ti Yezu lerege en yeti, “La dela fum yele se'em n bala.” 3Ti Malema nɛheduma parum yɛla zo'e zo'e bo' Yezu 4Bala ti Palete soke en yeti, “Fum kan lerege? Bihɛ ban yele yɛla zo'e zo'e se'em bahɛ fum zuo.” 5Gee Yezu ka lebehe en se'ere, ti la iŋɛ Palete pakerɛ.

6Azɔɛtole de'eŋo saŋa woo, Palete ni yehe la nɛra ayima paka deo la bahɛ, ban soke en ti a yehe se'em woo. 7Bala buraa kayima yu'urɛ n wa yi'ira Barabase bɔna paka deo la a tuunfi'iha taaba, n tum tuunfi'iha ta ta' la nɛreba kua tingbiregere zaberɛ puan la. 8Bala ti nɛrekuuŋɔ la lagehɛ na pɔhɛ yɛta Palete yeti, tum fum ni tuunɛ se'em la bo' tu. 9Ti Palete soke ba yeti, “Ya boti n yehe la Yuuduma naba la bo' ya?” 10Se'ere en sɔi la, Palete mi' ti la dela nintɛrega zuo ti Malema kiinduma la nyɔkɛ Yezu wa'am na bo' en. 11Gee Malema kiinduma la nyaŋɛ pa'ahɛ nɛrekuuŋɔ la mɛ ti ba yeti, ba boti la a tugum yehe Barabase bo' ba. 12Palete le tɔgɛ la ba yeti, “Gee ya boti n iŋɛ buraa wa ti ya yi'ira Yuuduma naba wa la ŋwani?” 13Ti ba voole bahɛ na yeti, “Kpa' ya en pumpuuredɔɔ la zuo!” 14Ti Palete soke ba yeti, “Ŋwani, a iŋɛ la beni taalɛ?” Ti ba malum voole gaŋɛ bala yeti, “Kpa' ya en pumpuuredɔɔ la zuo!” 15Palete n boti a iŋɛ ti nɛrekuuŋɔ la puurɛ pee la zuo ti a yehe Barabase bo' ba, gee bahɛ ti ba ŋmɛ Yezu, gee nyaa dikɛ Yezu bo' ba ti ba tari ta kpa' en pumpuuredɔɔ la zuo.

Pɛntiireba ɛ̃regeri Yezu

(Matu 27.27-31; Yɔn 19.2-3)

16Ti Pɛntiireba la tari Yezu kɛ̃' naba zinzaka la puan (ka'lam dela timbihega zuo zi'an n bala) gee nyaa yi' taaba lagehɛ, ba tansuga la za'a. 17Ti ba dikɛ fumɔlegɔ yɛ Yezu gee pã'am gu'uhi muŋa vuge a zuo. 18Nyaa pɔhɛ ti bamam na'aha en mɛ nyaa yɛta yeti, “Naa Yuuduma Naba wa! Bɔna wuuha!” 19Gee ŋmɛ'ɛra a zuo la dɔya, tubeha nɔtuurum ma'ara a nɛŋa, kpa'ara duma wuu ba na'ahɛ en mɛ la. 20Ban ɛregɛ en ba'ahɛ la, ba yɛɛ fumɔlegɔ la mɛ, gee tee a mɛŋa futo yɛ en gee tari en kiŋɛ ti ba ta kpa' en pumpuuredɔɔ la zuo.

Yezu kpa'a Pumpuuredɔɔ zuo

(Matu 27.32-44; Luki 23.26-43; Yɔn 19.17-27)

21 # Arom 16.13 Ban boi sore zuo yɛ' la, ba tu'uhɛ la buraa kayima n kinɛ ka kinɛ ti ka yu'urɛ yi'ira Simɔn, yehe Saarin timpaberɛ na, dɛna Alɛgezanda la Arufuse duma sɔ, ti ba pɛregɛ en ti a zi Yezu pumpuuredɔɔ la. 22Ba tari Yezu wa'am na paaɛ la zi'an ti ba yi'ira Gɔlegɔta (di vuurɛ dela zuowama zi'an). 23Bilam ti ba dikɛ daam ti mɛɛ bɔna bini bo' en ti a zagehɛ. 24#Yoo 22.18Ti ba kpa' en pumpuuredɔɔ la zuo, gee nyaa ŋmɛ gbaŋa ti ba tɔrɛ a lɔgerɔ la.

25La wa dɛna la gogo kaareŋa awai bulika ti ba kpa' Yezu. 26Ti ba nyaa gulehɛ yelese'ere zuo ti ba kpa' en la yeti, “Yuuduma Naba.” 27Gee ba me kpa' la fãareba bayi' la en, ti ayima bɔna a zuɔ ti ayima me a gɔbega. 28#Aza 53.12[Ŋwana ti ban gulehɛ Yinɛ yeti, Ba kãalɛ en pa'ahɛ la be'em duma puan la wan wa'am yelemɛŋerɛ na]. 29#Yoo 22.7; 109.25; Mak 14.58; Yɔn 2.19 Ti sɛba n dole tɔla, lɔbera ba zuto gee tuura yeti, “Iiie! Fum se'em n wan gbirege pu'uhegɔ yire gee mɛ ku dabeha atã la n bala, 30to'e fum mɛŋa bahɛ gee ze'ele pumpuuredɔɔ wa zuo sigena!” 31Bala mɛa ti Malema kiinduma la gɔnmi'ineba la ɛregera Yezu bɔ'ɔra taaba yeti, “A faari la basɛba gee kan ta'am faaɛ a mɛŋa. 32Bahɛ ya ti se'em n de Kiresta la, dɛna Izirale naba la ze'ele pumpuuredɔɔ la zuo sige nananawa na, ti tu nyɛ gee sakɛ.” Ti sɛba ti ba kpa' ba la Yezu la me ɛregera en bala me.

Yezu kum

(Matu 27.45-56; Luki 23.44-49; Yɔn 19.28-30)

33Ti la ta paaɛ gogo muma pia la ayi', wuntɛɛŋa ti lika wa'am na pi' timpaberɛ la za'a gareti tara bala la gogo atã. 34#Yoo 22.1 Gogo atã la puan ti Yezu kaahɛ supi yeti, “Eloi Eloi lama sabakitani?” De vuurɛ dela, “N Yinɛ N Yinɛ, ŋwani ti fum bahɛ mam?” 35Ti nɛresɛba n ze' bini gee wum la yeti, “Kelehe ya, a yi'ira la Elia.” 36Ti nɛra ayima zɔ ta dikɛ soosoo tum dami'ihego puan, dikɛ vile dɔɔ, nyaa zɛkɛ dikɛ tuhera a nuuren, ti a bihɛ a wan nyu, “Bahɛ ya ti bihɛ ya Elia wan wa'am na faaɛ en pumpuuredɔɔ la zuo sige na.” 37Bilam ti Yezu kaahɛ supi', gee vo'ohe a vo'ohum za'a. 38Ti Yinɛ deo tanɛ la n beŋe fa'a saraa la ahegɛ buyi' ze'ele de zuo ta paaɛ timpaberɛ. 39Ti Pɛntiireba nɛŋa daana se'em n biheri pɛntiireba kɔbega la n ze' gura Yezu la, n nyɛ ti a vo'ohum la ba'ahɛ se'em la ti a yeti, “Asira, buraa wa dela Yinɛ dayua!” 40#Luk 8.2-3 Ti Pɔgehi sise'ehi me zɛ'a zaaɛ zaaɛ ha gee biha na. Pɔge se'ehi n pa'ahɛ si puan dela Mɛɛri Magedalin, la Mɛɛri se'em n de Yemesi bila, la Yose ma, la Salome. 41Nɛreba wa daa ni dɔla en mɛ gee bihera en, se'em ma'a ti a bɔna Galilii, la pɔgehi kekeko n doohe en zom Yerusalɛm na.

Yezu laarɛ

(Matu 27.57-61; Luki 23.50-56; Yɔn 19.38-42)

42Yinɛ n ta ma'a la, ti daanse'ere n de maaheŋɔ daarɛ la, dabehe se'ere n gee bɔ'ɔra vo'ohego dabeherɛ la, 43ti Arimatiya buraa yu'urɛ n yi'iri Yosefe dɛna zuodaana pa'ahɛ kiinduma la puan gee me dɛna se'em n me daa guri ti a nyɛ Yinɛ sɔ'ɔlum la. Eŋa n kãbɛ suure kiŋɛ Palete zi'an ta suhɛ ti a bo' en sore ti a dikɛ Yezu iŋa la laaɛ. 44Ti Palete bu'ura nyaa Yezu pilum ki mɛ, bala ti a yi' Pɛntiireba nɛŋa daana se'em n biheri pɛntiireba kɔbega la la n ze' ni gura Yezu la soke en nyaa Yezu ki ti la yuue? 45Ti en wum Pɛntiireba nɛŋadaana n biheri se'em n biheri pɛntiireba kɔbega la zi'an ti Yezu ki mɛ la, ti a bo' Yosefe sore ti a dikɛ kum la. 46Ti Yosefe nyaa da' tansunɛ nyaa kiŋɛ ta nyakɛ Yezu iŋa la pɔbɛ tansunɛ la ti a da la puan, tari ta laaɛ yɔɔ ti n kerehe kɔ taŋa puan gee bilege kugere lige yɔɔ la nuurɛ. 47Ti Mɛɛri Magedalin la Yosefe ma Mɛɛri nyɛ ba gã'arɛ Yezu zi'an.

Currently Selected:

Maki 15: GBTP

Highlight

Copy