Maki 14

Ba zigeri la Yezu kua

(Matu 26.1-5; Luki 22.1-2; Yɔn 11.45-53)

1 # Yɛh 12.1-27 La wa gee la dabeha ayi' la azɔɛtole la boroboro zaŋa de'eŋo la paaɛ. Malema kiinduma la gɔnmi'ineba la, ɛɛra ba wan iŋɛ se'em nyɛ Yezu tuure la ba ta'am nyɔkɛ en ku, 2Ba yele taaba yeti, “Tu kan nyɔkɛ en azɔɛtole daarɛ la, tu han iŋɛ bala nɛrekuuŋɔ la wan gbirege la tɔ.”

Yezu bi'ihego Bɛtani timpaberɛ

(Matu 26.6-13; Yɔn 12.1-8)

3Yezu en ta bɔna Bɛtani Simɔn se'em iŋa n wa tabelɛ sagum la yire la, ti Yezu lagum zi'a la nɛreba yire la puan, dia saŋa ti pɔka tara dugela la kaam en tari nyuunsuŋɔ ti bu da'a kpe'em, ti ba yi'ira bu alabasita kaam wa'am na ka'ɛ yeele a zuo. 4Ti nɛreba basɛba boi bini ti ba suure nyiie, ti ba yɛta taaba yeti, “Ŋwani ti pɔka wa sagum kaam wa bahɛ bala? 5Kaam wa wan ta'am dikɛ ni koohe ti ligeri la paaɛ wuu ŋmarehi sitã yɔɔrɛ, dikɛ ni bo' naheduma.” Ti ba nyaa zɛregɛ pɔka la. 6Gee Yezu yele ba yeti, “Bahɛ ya en bããlam ŋwani ti ya daana en? A tum la sɛla n ani suŋa bo' mam. 7#Tii 15.11 Se'ere en sɔi la, naheduma la wan kelum bɔna la ya saŋa woo, ti se'em ma'a ti ya bɔta ya ta'am iŋɛ sum bo' ba. Gee mam kan bɔna la ya saŋa woo. 8Pɔka wa tum la sɛla ti ka wan ta'am tum, a te'ele bi'ihɛ la mam iŋa wa gura ka pi'a. 9N yeti ya la yelemɛŋerɛ wa, zi'a woo timpaberɛ wa zuo, ti ba ta muula faarɛ yelehum wan tiiha tɔgera sɛla ti ka iŋɛ wa yele.”

Yudasi sakɛ ti a koohe Yezu

(Matu 26.14-16; Luki 22.3-6)

10Ti Yuuduma Isikariyɔte se'em n lagum pa'ahɛ Yezu zahereba pia la bayi' la, kiŋɛ malema kiinduma zi'an ti a koohe Yezu bo' ba. 11Ban wum Yudasi puti'irɛ la, ba puurɛ pee mɛ, ti ba biŋe nuurɛ ti ba bo' en ligeri. Bala ti Yudasi nyaa malum ɛɛra sose'ere ti a wan doohe koohe Yezu.

Yezu di azɔɛtole la a zahereba

(Matu 26.17-25; Luki 22.7-14, 21-23; Yɔn 13.21-30)

12Boroboro zaŋa dia de'eŋo pɔhega daarɛ la, azɔɛtole pebila la kaabegɔ saŋa la, ti Yezu zahereba la yele en yeti, “Bɛha ti fum bɔta ti tu kiŋɛ ta maahum bo' fum ti fum di azɔɛtole la?” 13Bala ti a tum a zahereba bayi', yele ba yeti, “Kiŋɛ ya timpaberɛ la puan, ya wan ta nyɛ buraa n ziiri yoore la ko'om, dole ya en, 14Ti en ta kɛ̃' yise'ere puan la, ya kɛ̃' bini la ya soke yidaana la yeti, ‘Pa'ala la yeti, bɔ'ɔ kuni ti mam la n zahereba la wan kɛ̃' bini di azɔɛtole dia la?’ 15A wan pa'alɛ ya bɔkãtɛ en boi a yire la zuo, pun maahum zɛ'a maahum ya sɛla woo bo' tu.” 16Bala ti a zahereba la yehe kiŋɛ timpaberɛ la puan ta nyɛ sɛla woo wuu en pun yele ba se'em la. Ti ba nyaa maahum azɔɛtole dia la sɛla woo bilam.

17Yinɛ ta ma'ɛ, ti Yezu la a zahereba pia la bayi' la wa'am yire la puan. 18Ti ban zi'ire ba'ahɛ dita la, ti Yezu yele ba yeti, “N yeti ya la yelemɛŋerɛ wa, ti ya puan ayima en yeti a koohe mam. Se'em en naaɛ la mam dita wa.” 19Ti ba suure sagum ti ba sɔkera en ayima ayima yeti, “La dela mam yo'?” [“Ti ayima me yeti, mam ka ti'ihɛ la dela mam.”] 20Ti a yele ba yeti, “La dela ya pia la bayi' la puan ayima, se'em n fike boroboro kɔ'ɔm tuna laa puan la mam wa. 21La de asira ti Asaala Dayua la wan ki doohe la ban gulehɛ a yele se'em beŋe la, gee yele bu fum se'em daana n koohe Asaala Dayua tihɛ la zuo. La ani ni suŋa ti ba pun da dɔgɛ ni en.”

Yezu zi'ire azɔɛtole dia puan

(Matu 26.26-30; Luki 22.14-20; 1 Korintiduma 11.23-25)

22Ban boi bini dita la, ti Yezu dikɛ boroboro purɛ sum bahɛ de zuo gee fike de buyi' bo' a zahereba la, gee yele ba yeti, “To'e ya la ya obe, mam iŋa n ŋwana.” 23Ti Yezu le dikɛ wula la daam, n bo' Yinɛ fara ba'ahɛ la, a dikɛ bo' ba mɛ ti ba za'a nyu de puan. 24A yele ba yeti, “Mam nɔpu'ulegɔ ziim n ŋwana, wan ka'ɛ faaɛ nɛreba zo'e zo'e bahɛ. 25N yeti ya la yelemɛŋerɛ wa, mam ka le makɛ nyu tiihi wala daam wa la ya gura daanse'ere daarɛ ti n wan ta nyu bu paalum paalum Yinɛ sɔ'ɔlum la puan.”

Yezu pun yele Pita ki'ihegɔ yele

(Matu 26.31-35; Luki 22.31-34; Yɔn 13.36-38)

26Ban yuum pu'uhegɔ yuuma ba'ahɛ la, ti ba yehe kiŋɛ ta zom Olive Zoore zuo. 27#Zɛk 13.7 Ti Yezu yele ba yeti, “Ya za'a wan ta bahɛ mam, se'ere sɔi la, ba gulehɛ yeti,

‘N wan ŋmɛ dunkiina la,

gee ti piihi la yirum.’

28 # Mat 28.16 Gee n han ta vo'e n kum la puan la, n wan diŋɛ ya nɛŋa kiŋɛ Galilii.” 29Ti Pita yele Yezu yeti, “Ba za'a han pun ta bahɛ hɔ, gee mam kan bahɛ hɔ.” 30Ti Yezu yele en yeti, “Yelemɛŋerɛ ti n yɛta fum, ti zina daarɛ wa, yu'ukuna wa, nɔdɔɔ ta kaahɛ buyi' la, ti fum pun ki'ihɛ mam la butã.” 31Ti Pita lebehe Yezu la ninmu'urɛ yeti, “La han pun dɛna la n ki la hɔ. Mam kan bahɛ fum.” Ti a zahereba la me woo lagum yele bala.

Yezu pu'uhɛ Gɛtesemane

(Matu 26.36-46; Luki 22.39-46)

32Ba kiŋɛ la zi'an kayima ti ba yi'ira Gɛtesemane, ti ban paaɛ la, Yezu yele ba yeti, “Zi' ya ka'lam gee ti n kiŋɛ ta pu'uhɛ.” 33A looe la Pita la Yemesi la Yɔn, ti ba kiŋɛ fii wa, ti a iŋa kɔ'ɔhɛ ti a suure sagum. 34Ti a yele ba yeti, “N suure n ba' sagum zo'e ana wuu n ki mɛ la. Ze' ya ka'lam gura mam, biheri ya da gihere ya.” 35En nyaa kiŋɛ nɛŋa fii la ti a lu timpaberɛ pu'uhɛ yeti, la han wan ta'am iŋɛ, bahɛ ti namehegɔ kuna tole gee bahɛ mam. 36A yeti, “Aba, di vuurɛ dela n Sɔ, fum zi'an sɛla ka boi n kan ta'am tum, to'e namehegɔ wanɛ wa n zi'an gee dagi mam sumboolum gee fum sumboolum tum.” 37Gee lebe na paaɛ, nyɛ ti a zahereba la gihi mɛ, ti a yele Pita yeti, “Simɔn, yamam gihere mɛ? Yamam kan ta'am piga paaɛ gogo mune ma'a? 38Niiɛ ya, la ya pu'uhɛ ti ya da lu pã'ahebe'o saŋa wa puan. Sia la kɔ'ɔm bɔta mɛ gee inganɛ la en tari tɔregɔ.” 39Gee le kiŋɛ lebe ta pu'uhɛ, le yele en pun yele ni se'em mɛa. 40Gee le lebe na paaɛ ti ba gihere mɛ, se'ere en sɔi la, ba nini n vilegeri. Ti ba me ka mina ban wan yele en se'em. 41Ti a kiŋɛ gee le lebe butã puan na yele ba yeti, “Ya kelum giha mɛ gee sũna? La seke ya! Saŋa la paaɛ na. Ba koohe Asaala Dayua la bo' la be'em duma. 42Ihege ya, bahɛ ya ti tu kinɛ ya, bihɛ ya, se'em n koohe mam la n ŋwana.”

Yezu nyɔkerɛ

(Matu 26.47-56; Luki 22.47-53; Yɔn 18.3-12)

43Ban kelum bɔna bini tɔgera la, bilam bilam ti Yudasi en lagum pa'ahɛ pia la bayi' la en bala en paaɛ na la nɛrekuuŋɔ, ti ba zãla sɔ'ɔhi la dɔya ze'ele malema kiinduma, gɔnmi'ineba, la yizuto kiinduma la ze'a na. 44Ŋma'ara la bo' ba la daalehum buyina yeti, “Se'em ti n ta kɔkɛ la, eŋa en bala, nyɔkɛ ya en bo' gureba la ti ba tari en kiŋɛ.” 45Bala, Yudasi n wa'am na paaɛ la, bilam bilam ti a tɔ Yezu, kiŋɛ paaɛ a zi'an yeti, “Pa'ala!” Gee kɔkɛ en. 46Ti ba nyaa paaɛ Yezu zi'an nyɔkɛ en. 47Ti nɛreba la n ze' la Yezu la, ayima nyaa fooe a su'a kɛ̃' malema kiinduma la ayima yameŋa tuberɛ bahɛ. 48Ti Yezu yele ba yeti, “Ŋwani ti ya yehe na la sɔ'ɔhi la dɔya ti ya nyɔkɛ mam wuu n dela nageyiga? 49Daarɛ woo mam boi mɛ la ya pu'uhegɔ yire la puan pa'ala, ti ya ka nyɔkɛ mam. Gee ŋwana wa wan bahɛ ti gulehegɔ la dɛna asira.” 50Ba za'a bahɛ en mɛ gee zɔ. 51Ti budibele paalega kayima n lobe a fugɔbesuŋa ma'a pi' a mɛŋa dɔla Yezu poore ti ba ta gurɛ en, 52ti a zugum pilege fugɔbesuŋa la bahɛ ba gee zɔ la beele.

Yezu paaɛ kiinduma nɛŋan

(Matu 26.57-68; Luki 22.54-55, 63-71; Yɔn 18.13-14, 19-24)

53Ti ba nyaa tari Yezu kiŋɛ Malema nɛŋadaana la zi'an, bala ma'a ti malema kiinduma, yizuto kiinduma, la gɔnmi'ineba pun lagehɛ mɛ maahum zi'an bini. 54Ti Pita me bɔna pooren pooren ha dɔla Yezu fifihe, wa'am na lagum kɛ̃' malema nɛŋa daana la zinzaka puan, lagum zi'a la tuntuneba la ɔɔha bugum. 55Ti malema nɛheduma la kiinduma la za'a nyaa biha se'em n wan ta'am parum yelese'ere bo' Yezu ti ba doohe bilam ku en. Gee ba ka nyɛ se'ere bala. 56Se'ere en sɔi la, nɛreba zo'e zo'e yehe na parum mɛ gee ba pumpɔreŋɔ la ka naaɛ. 57Basɛba yehe na parum bo' en yeti, 58#Yɔn 2.19 “Tumam wum n yeti ‘N wan gbi' pu'uhegɔ yire wa ti asaala mɛ wa bahɛ gee malum mɛ kuyima ti asaala ka mɛ dabeha atã puan.’ ” 59Gee bamam me n yele se'em la kelum ka naaɛ. 60Ti Malema nɛŋadaana la ihege saazuo ba nɛŋan soke Yezu yeti, “Fum ka tari se'ere n wan lerege? Beni yɛla n bala ti ba tara bɔ'ɔra fum wa?” 61Ti Yezu sina, ka yɛta se'ere. Ti malema nɛŋadaana la le soke n yeti, “Fum en de Kiresta la? Fum en de sum za'a daana Dayua la?” 62Yezu yeti, “Mam en bala, gee

‘ya wan nyɛ Asaala Dayua la

ti a zi'a paŋadaana la zuɔ nu'o

bɔna saazuo sagbama puan kina na.’ ”

63Ti Malema nɛŋadaana la ihege aahum a mɛŋa futo gee yele nɛreba la yeti, “Ŋwani ti tu kelum ɛɛra se'em ti a wa'am na yele se'ere. 64#Malm 24.16 Ya wum n tu Yinɛ se'em, Yamam puti'irɛ dela deni?” Ti nɛrekuuŋɔ la za'a tahera ti Yezu galum mɛ, nara a ki. 65Ti sɛba pɔhɛ tubeha nɔtuurum ma'ara en, ti sɛba me pi' a nini gee ŋmɛ' en, gee yele yeti, “Bukɛ ani n ŋmɛ fum wa.” Ti gureba la mɛ sooe ŋmɛ en paaɛ paaɛ.

Pita ki'ihɛ Yezu

(Matu 26.69-75; Luki 22.56-62; Yɔn 18.15-18, 25-27)

66Pita en kelum zi'a Malema nɛŋadaana la zinzakan la, ti Malema nɛŋadaana la tuntuna en de pugela wa'am zinzakan la na. 67Eŋa n nyɛ ti Pita ɔɔhi bugum la, ti a bihɛ Pita zii gee yeti, “Fum me daa lagum bɔna mɛ la Yezu en de Nazareti nɛra la.” 68Ti Pita ki'ihɛ yeti, aayi. “Mam ka mi' en, bii n bɔkɛ fum tɔgeri se'ere wa.” Gee ihege kina tɔɔra zanɔren bɔba ha, ti nɔdɔɔ kaahɛ. 69Ti Pugela wa en de tuntuna wa la, le nyɛ Pita nyaa pɔhɛ yɛta sɛba n ze' bilam la yeti, “Burakana wa dela Yezu nɛreba la ayima.” 70Ti Pita le ki'ihɛ. Ti la iŋɛ fii wa ti sɛba en ze' bini la ayima yele Pita yeti, “Yelemɛŋerɛ fum sirum dela ba puan ayima se'ere en sɔi la, fum dela Galiliiŋa.” 71Ti Pita pɔhɛ pɔta gee yeti, “Mam ka mi' buraa wa ti fum yɛta wa.” 72Sankana ma'a la ti nɔdɔɔ le kaahɛ pa'ahɛ buyi'. Ti Pita tiɛ ti Yezu pun yele en yeti, “Nɔdɔɔ ta kaahɛ pa'aha buyi' la, ti fum pun ki'ihɛ eŋa la butã.” Ti a suure sagum ti a kele.

Currently Selected:

Maki 14: GBTP

Highlight

Copy