Matu 26

Ba eere ba ku Yezu

(Maki 14.1, 2; Luki 22.1, 2; Yɔn 11.45-53)

1Ti la iŋɛ, ti Yezu en tɔgɛ yele ana woo ba'ahɛ la, a yele a zahereba la yeti, 2#Yɛh 12.1-27 “Ya mi' ti dabeha ayi' han tole, azɔɛtole de'eŋo la en ye' na. Ba wan koohe Asaala Dayua la tihɛ ti ba kpa' en.”

3Malema kiinduma, la yizuto kiinduma la, lagehɛ la malema nɛŋadaana la ti ba yi'ira Kaifase la yire , 4nyaa ku nuurɛ, ti ba wan doohe yɛmbɛ'ɛlega sore nyɔkɛ Yezu la ba ku en. 5Gee ba yele ba mɛhi yeti, “Tu kan tum dɛ azɔɛtole saŋa la, la ta'am tari gbirege wa'am nɛreba la puan na.”

Bɛtani tiŋa bi'ihegɔ

(Maki 14.3-9; Yɔn 12.1-8)

6Yezu en ta bɔna Bɛtani, Simɔn insageŋɔ daana la yire la, 7#Luk 7.37-38 ti pɔka wa'am a zi'an na, tara lila ti ba dikɛ kugesuma yagum ka, ti kaam da'a n kpe'em bɔna ka puan. Ti pɔka la ka'ɛ kaam la yeele Yezu zuo, se'em ma'a ti a zi'a dɛla, dia puan la. 8Gee Yezu zahereba la n nyɛ ŋwana la, ba suya nyiie mɛ paaɛ paaɛ ti ba yeti, sageŋɔ kuna wa vuurɛ? Kaam wa ŋwana? 9“Kabuna wa wan ta'am koohe lagekãtɛ, dikɛ bo' naheduma.” 10Gee Yezu en baŋɛ ŋwana wa la, a yele ba yeti, “Ŋwani ti ya daana pɔka wa? A tum la tunsunɛ bo' mam 11#Tii 15.11 Naheduma la boi la ya mɛ saŋa woo, gee mam kan bɔna la ya saŋa woo. 12Se'ere n sɔi la Pɔka wa n ka'ɛ kaam wa yeele mam iŋa wa, a maahum mam mɛ n bala gura n laarɛ. 13N yeti ya la yelemɛŋerɛ wa, ti zɛ'sɛka woo timpaberɛ wa zuo ti ba muulɛ faarɛ yelefum wa, ba wan tɔgɛ pɔka wa n iŋɛ se'em wa tiiha ka yele.”

Yezu di azɔɛtole dia la a zahereba la

(Maki 14.10, 11; Luki 22.3-6)

14Yezu zahereba pia la bayi' la, ayima, se'em ti ba yi'ira Yudasi Isikariyɔte la, kiŋɛ la malema kiinduma la zi'an, 15#Zɛk 11.12 ta yeti, “Ya wan bo' mam la beni n han koohe en bo' ya?” Ti ba yɔ en salempɛɛlega kila pihitã. 16Yehe hankaŋa, a pɔhɛ ɛɛra la fole se'ere ti a wan koohe Yezu.

17Boroboro zaŋa de'eŋo pɔhega daarɛ la, ti Yezu zahereba la wa'am a zi'an na yele en yeti, “Bɛha ti fum bɔta ti tu maahum azɔɛtole de'eŋo dia la bo' fum?” 18Ti a yele ba yeti, “Kiŋɛ ya kɛ̃ tinkãtɛ wa puan, la ya kiŋɛ buraa kayima zi'an, ta yele ka yeti, ‘Pa'ala la yeti, Mam saŋa paaɛ ya. Mam la n zahereba wan di azɔɛtole de'eŋo la fum yire.’ ” 19Ti a zahereba la tum wuu Yezu en yele ba se'em la, maahum azɔɛtole la.

20Zaanuurɛ en ta paaɛ la, ti Yezu zi'ire a zi'irego zi'an la zahereba pia la bayi' la, 21ti ban boi bini dita la, ti a yele ba, yeti, “N yeti ya la yelemɛŋerɛ wa, yamam ayima wan koohe mam.” 22Ti ba suure sagum paaɛ paaɛ, ti ba pɔhɛ sɔkera en ayima ayima yeti; “Mam mi' ti la dagi mam n Daana?” 23#Yoo 41.9 Ti a lerege ba yeti, “Se'em n kɔ'ɔm tum laa wa puan la mam la, en wan koohe mam. 24Asaala Dayua la wan ba'afum kiŋɛ wuu ban pun gulehɛ se'em la, gee yele boi se'em daana en koohe en la zuo! La wan ani ni suŋa bo' en, ba han pun ka dɔgɛ buraa kana wa.” 25Ŋwana ti Yudasi, se'em en wan koohe en la yeti, “Mam mi' ti la dagi mam n Daana?” Ti Yezu lerege en yeti, “Fum yele la bala.”

Daana tuulum dia la pi'ileŋo

(Maki 14.22-26; Luki 22.14-20; 1 Korintiduma 11.23-25)

26Ban boi bini dita la, ti Yezu dikɛ boroboro, bo' purɛ sum. En purɛ sum bahɛ de zuo ba'ahɛ la, a figehe de mɛ, dikɛ bo' zahereba la, yeti, “To'e ya, la ya obe. Mam iŋa n ŋwana.” 27Ti a dikɛ wula, bo' fara ba'ahɛ, dikɛ bo' ba yeti “Nyu ya de puan, ya za'a, 28#Yɛh 24.8; Yɛr 31.31-34 Mam nɔpu'ulegɔ ziim n bala, wan ka'ɛ bo' nɛreba zo'e zo'e yelebe'ero sugeri dia. 29N yeti ya mɛ wa, ti mam kan malum nyu tia wula daam wa, gura dabeherɛ la, ti n wan ta nyu bu paalega la ya n Sɔ sɔ'ɔlum la puan.”

30Ban yuum na'ahegɔ yuunɛ ba'ahɛ la, ba yehe mɛ kiŋɛ Olive Zoore la zuo.

Yezu tɔgɛ Pita ki'ihegɔ yele

(Maki 14.27-31; Luki 22.31-34; Yɔn 13.36-38)

31 # Zɛk 13.7 Ti Yezu yele ba yeti, “Ya za'a wan ta pirɛ lu ha, se'ere en sɔi la, la gulehɛ yeti,

‘N wan damɛ dunkiina la,

ti piihi la za'a yiregɛ.’

32 # Mat 28.16 Gee n han vo'e, n wan bɔna ya nɛŋa yɛ'a Galilii.” 33Ti Pita yele en yeti, “La ba za'a n pun wan ta pirɛ lu fum zuo, mam kan malum pirɛ lu.” 34Gee Ti Yezu yele en ti, “N yeti fum la yelemɛŋerɛ wa, ti yu'uŋɔ kuna wa puan, gee ti nɔdɔɔ baŋɛ kaahɛ la, fum wan ki'ihɛ mam sugum nuuren butã.” 35Ti Pita yele en yeti, “La han pun dɛna mam ki la hɔ, mam kan ki'ihɛ hɔ.” Ti zahereba la za'a yele bala mɛa.

Yezu pu'uhi Gɛtesemane va'am puan

(Maki 14.32-42; Luki 22.39-46)

36Ti Yezu kiŋɛ la a zahereba la ta paaɛ zi'an ti ba yi'ira Gɛtesemane la. Ti a yele ba yeti, “Zi' ya ka'lam gee ti n tole nɛŋa ha ta pu'uhɛ.” 37Ti a doohe la Pita, la Zebedii dayɔɔhi siyi la yɛ'a, ti a suure pɔhɛ Sagena, ti a giila kɔ'ɔha. 38Ti a yele ba yeti, “Mam suure n ba' sagum ti la ana wuu n yeti n ki mɛ la kum. Boi ni ya ka'lam, da biha ya.” 39En kiŋɛ fii la, a lu la tiŋa a liko pu'uhɛ yeti, “N Sɔ, la han wan ta'am iŋɛ, bahɛ ti wandina wa tole gee bahɛ mam, gee dagi mam boti se'em, gee fum n boti se'em.” 40Gee lebena paaɛ a zahereba la ti ba gihi mɛ, ti a soke Pita yeti; “Bala yamam kan ta'am gu'uhi mam gogo kaareŋa buyina ma'a? 41Da gihi ya, gee pu'uhi ya ti ya da kɛ̃ makerɛ puan. Sia la kɔ'ɔm bɔta mɛ gee inganɛ la la n tari tɔregɔ.” 42Ti a le lebe buyi' puan ta pu'uhɛ yeti, “N Sɔ, wanɛ wa han kan ta'am tole gee bahɛ mam gee dɛna la n nyu de puan, fum sumboolum tum.” 43Ti a le lebe na, nyɛ ti ba gihi mɛ, se'ere en sɔi la, guum n vilegeri ba. 44Ti a le bahɛ ba, gee kiŋɛ ta pu'uhɛ pa'ahɛ sugum nuuren butã, pu'uhɛ pu'uhi kuŋɔ mɛa. 45Gee nyaa lebe a zahereba la zi'an na yele ba yeti, “Yamam kelum giha mɛ gee sũna? Bihɛ ya, saŋa la paaɛ ya, gee ba pun koohe Asaala Dayua la iŋɛ be'emduma nu'uhen. 46Ihege ya ti tu kiŋɛ. Bihɛ ya, se'em n ‘koohe mam la ŋwana.”

Yezu ŋma'a, la a nyɔkerɛ

(Maki 14.43-50; Luki 22.47-53; Yɔn 18.3-12)

47En nan boi bini tɔgera la, ti Yudasi, n de a zahereba pia la bayi' la puan la paaɛ na, la nɛrekuuŋɔ, en zãli sɔ'ɔhi la dɔya, ti malema kiinduma duma, la yizuto kiinduma la tum ba na. 48Se'em n koohe en la, bo' ba la daalehum yeti, “Se'em ti n mɔgɛ a nuurɛ la, eŋa n bala nyɔkɛ ya en.” 49Bilam bilam ti a paaɛ Yezu nɛŋan na, yele en yeti, “Rabi, fum fara fara,” gee mɔgɛ a nuurɛ. 50Ti Yezu yele n yeti, “N zɔ, tum fum wa'am na ti fum tum se'ere la.” Ti ba nyaa paaɛ na gi' Yezu, nyɔkɛ en. 51Ba yeti ba bihɛ ti Yezu zahereba la a yima gurɛ a sɔ'a fooe kɛ̃' malema nɛŋa daana da'aberɛ tuberɛ fike. 52Ti Yezu yele en yeti, “Dikɛ fum su'a la lebe su' ka su'an zi'an, se'ere en sɔi la, se'em woo n dikɛ su'a kiiri la su'a puan. 53Fum ti'ihɛ ti mam kan ta'am yele n Sɔ mɛ, ti a me kan gu'um gee tum suŋereba n en de pɛntiireba tansuga pia la ayi' me yoi? 54Gee gulehɛgɔ la yeti ku iŋɛ la ŋwani wa'am asira na, lan gulehɛ yeti, la yeti la tum doohe la ŋwana la?” 55#Luk 19.47; 21.37 Sankaŋa puan, ti Yezu yele nɛrekuuŋɔ la yeti, “Yamam yehe me na la sɔ'ɔhi la dɔya ti ya nyɔkɛ mam woo n dela nageyiga? Beere n yilegeri woo mam ni zi'a la pu'uhegɔ yire la pa'ala, ti yamam ka nyɔkɛ mam. 56Gee yele ana za'a tum ti, nɔtɔgeheba gulehɛgɔ la n wa'am yelemɛŋerɛ na.” Bilam ti a zahereba la za'a bahɛ en gee zɔ.

Yezu paaɛ malema kiima nɛŋan

(Maki 14.53-65; Luki 22.54, 55, 63-71; Yɔn 18.13, 14, 19-24)

57Sɛba n nyɔkɛ Yezu la, tari en kiŋɛ la malema kiima daana Kaifase yire, zi'an ti gɔnmi'ineba la yizuto kiinduma lagehɛ la. 58Gee Pita boi la zaaɛ zaarɛ dɔla ba poore fiifiihe wa'am na paaɛ malema kiima la yire zinzakan la, wa'am na zi'a la sɛba n guri yire la, gee biha lan yeti la ba'ahɛ se'em. 59Malema kiinduma la, la kiinduma la nyaa eere la pumpɔrum seko ti ba wan parum bo' Yezu ti ba ta'am doohe bilam ku en. 60Gee ba ka nyɛ pumpɔreŋɔ kuŋɔ taaba, la pumparenduma zo'e zo'e n pun yehe na parum la. Pooren ti ba bayi' yehe na 61#Yɔn 2.19 yeti, “Nɛrekana wa yeti, eŋa wan ta'am gbi' Yinɛ pu'uhegɔ yire wa bahɛ gee lebe mɛ dɛ dabeha atã puan.” 62Ti Malema kiima la vaaɛ ihege saazuo yeti, “Fum ka tari sɛla wan lebehe? Beni yɛla n bala ti ba tɔgera baha fum zuo wa?” 63Gee Yezu ka lerege ba se'ere. Ti Malema kiima la yele en yeti, “Mam pɔ la Yinɛ vua wa ti fum han sirum dɛna la Kiresta la, Yinɛ Dayua la, yele tu.” 64#Dan 7.13 Ti Yezu lerege en yeti, “Fum yele la bala wa. Gee n yeti fum mɛ wa,

Ti hankana yɛ'a ha, fum wan ta nyɛ Asaala Dayua la,

ti a zi'a paŋa zuɔ nu'o

ze'ele saazuo sagbama wa puan kina na.”

65 # Malm 24.16 Ti malema kiima la aafum a futo gee yeti, “A tu Yinɛ! Ŋwani ti ya le kelum ɛɛra aze' nyɛ daana? Bihɛ ya nyaa wum a tuuri la. 66Yamam ku la deni?” Ti ba yeti, “A kɔ'ɔm dɛna la a ki.” 67#Aza 50.6 Ti ba tubeha nɔtuurum ma'ara a nɛŋa, gee ŋmɛ'ɛra en, ti sɛba me lɔbera a pɛgɛhi, 68gee ni yeti, “Purɛ pa'alɛ tɔ Kiresta wa, se'em n lobe fum pɛka wa la?”

Pita ki'ihɛ Yezu

69Sankana puan la, ti Pita zi' la yiŋa zinzakan la puan, ti pugebila n de da'aberɛ wa'am a zi'an na yele en yeti, “Fum me ni dɔla mɛ la Yezu Galiliiŋa la.” 70Gee Pita ki'ihɛ mɛ ba za'a nɛŋan yeti, “Mam ka mi' fum tɔgeri sɛla wa yele.” 71Pita n ze'ele bɔ'paka la puan yehe na la, pugela n me n de da'aberɛ me nyɛ en, gee yele nɛreba la n ze' la yeti, “Buraa kana wa ni lagum bɔna mɛ la Yezu n de nazaareŋa la.” 72Ti Pita le ki'ihɛ la pɔtɛ yeti, “Mam ka mi buraa wa.” 73Ti la iŋɛ fii wa ti nɛreba la n ze' la paaɛ Pita zi'an yele en yeti, “Yelemɛŋerɛ fum dela ba ayima. Fum tugum n pa'alɛ.” 74Ti Pita pɔhɛ pɔta baha a mɛŋa zuo yeti, “Mam ka mi' buraa wa.” Sankaŋa puan la, Bilam bilam ti nɔdɔɔ kaahɛ. 75Bilam ti Pita tiɛ Yezu n yele ni yeti. “Gee ti nɔdɔɔ wan kaahɛ la, fum wan ta ki'ihɛ mam butã la.” Bilam ti a yehe ta kele nintam ma'aha.

Currently Selected:

Matu 26: GBTP

Highlight

Copy