Matu 19

Pɔgelebehego la sire bahega

(Maki 10.1-12)

1Yezu en tɔgɛ yele ana ba'ahɛ la, a bahɛ Galilii mɛ gee kiŋɛ Yudiya n boi Yɔɔdan yakenɛ ha la. 2Ti Nɛrekuuŋɔ doohe a poore, ti a tibɛ ba bilam.

3Ti Farasii basɛba wa'am a zi'an na, ban boti ba makɛ en bihɛ la, ti ba soke en yeti, “La de ma'a, ti buraa lebehe a pɔga yele se'ere puan?” 4#Pi'il 1.27; 5.2 Ti Yezu lebehe ba yeti, “Yamam ka kãalɛ lan gulehɛ yeti ‘Se'em en naam ba pi'ileŋo puan na la naam ba la buraa la pɔka.’ 5#Pi'il 2.24 Gee le yeti, ‘Dina wa zuo la, buraa wan bahɛ ka sɔ la ka ma gee naaɛ la a pɔga, ti ba bayi' la dɛna inganɛ deyina’? 6Bala, ba ka le dɛna bayi', ba nyaa dela inganɛ deyina. Bala, sɛla ti Yinɛ dikɛ naaɛ taaba, nɛra de welege.” 7#Tii 24.1-4; Mat 5.31 Ti ba yele en yeti, “Gee ŋwani ti Moose bo' tu nuurɛ ti tu ta'am bo' ka sa'arɛ gɔŋɔ gee nyaa lebehe ka?” 8Ti Yezu yele ba yeti, “Ya sukãberɛ la zuo ti Moose bo' ya sore ti ya lɛbeha ya pɔgeba, gee pi'ileŋo puan na la, la dagi bala. 9#Mat 5.32; 1 Kor 7.10-11 Gee n yeti ya mɛ wa, ti se'em woo en lebehe a pɔga han gee tee di pɔga han dagi ka galum mɛ zuo, tum la kabohi.”

10Ti Yezu zahereba la yele en yeti, “La han dɛna bala sira la pɔga tiŋasuka, la ye ani suŋa ti nɛra da di pɔga bii ele sira.” 11Gee Yezu yele ba yeti, “Dagi nɛra woo en wan ta'am to'e pa'ali kuna wa, gee sɛba ma'a ti Yinɛ dikɛ pa'ali kuna bo' ba la. 12Se'ere en sɔi la, sɛba kɔ'ɔm dɛna la bula ba maduma puuren na, ti sɛba me dɛna bula doohe la nɛreba en iŋɛ ba, ti sɛba me iŋɛ ba mɛhi dɛna bula saazuo sɔ'ɔlum la zuo. Se'em n wan ta'am bɔkɛ yele dina wa la, a bɔkɛ.”

Yezu iŋɛ kɔma sum

(Maki 10.13-16; Luki 18.15-17)

13Pooren ti ba tari kɔmbibehi wa'am a zi'an na, ti a dikɛ a nu'uhi pagelɛ ba zuo pu'uhɛ bo' ba. Ti Yezu zahereba la tahera sɛba en tari kɔma la wa'am na la. 14Gee Yezu yele ba yeti, “Bahɛ ya ti kɔma la wa'am n zi'an na. Da gu'uri ya ba, se'ere en sɔi la, sɛba en ani wuu kɔma wa la, n sɔi saazuo sɔ'ɔlum la.” 15Gee nyaa dikɛ a nu'uhi pagelɛ kɔma la zuto gee kiŋɛ.

16Bilam bilam ti nɛra ayima wa'am a zi'an na yeti, “Pa'ala, itesuŋɔ kuni ti en wan tum tara vom kamba'ahɛ?” 17Ti Yezu yele en yeti, “Ŋwani ti fum sɔkera mam ti sum yele? Nɛra ayima ma'a n de suŋa. Fum han bɔta ti fum kɛ̃' vom puan, gurɛ nɔze'elego la suŋa suŋa.” 18#Yɛh 20.13-16; Tii 5.17-20 Ti a soke en yeti, “Aŋa bɛɛ?” Ti Yezu yele en yeti, “Fum da ku ka'ɛ ziim Fum da tum kabohi, fum da zu, Fum da dɛna aze' nyɛ pumparema, 19#Yɛh 20.12; Tii 5.16; Malm 19.18 Na'aha fum sɔ la fum ma; gee me nɔŋɛ hɔ mabia wuu fum nɔŋɛ fum mɛŋa se'em la.” 20Gee budibele paalega wa yele Yezu yeti, “Mam pun ita yele ana za'a mɛ n biilemen na; beni ti en kelum gee?” 21Ti Yezu yele en yeti, “Fum nyaa han bɔta ti fum bi'ɛ kahegɛ, nyaa kiŋɛ ta koohe fum lɔgerɔ la, dikɛ ligeri la bo' naheduma, ti fum tarega la nyaa bɔna saazuo ha, gee ti fum nyaa wa'am na dɔla mam.” 22Bumbile-paalega wa n wum ŋwana la, a kiŋɛ mɛ la susageŋɔ, se'ere en sɔi la, a ba' pãrɛ mɛ.

23Ti Yezu nyaa yele a zahereba la yeti, “Yelemɛŋerɛ ti n yɛta ya wa, ti la wan kpe'em mɛ bo' buntata ti a kɛ̃' saazuo sɔ'ɔlum la puan. 24N le yele pa'ahɛ, la de naana bo' yugenɛ ti de doohe fupiho yoko puan tole, gana buntata kɛ̃' Yinɛ sɔ'ɔlum la puan.” 25A zahereba la n wum dina wa la, la iŋɛ ba la pakerɛ paaɛ paaɛ, ti ba yeti, “Ani n yi wan nyɛ faarɛ?” 26Ti Yezu bihɛ ba, gee yeti, “Saaleba zi'an la kan ta'am tum. Gee Yinɛ zi'an sɛla woo wan ta'am tum.”

27Ŋwana ti Pita lerege Yezu yeti, “Bihɛ, tumam bahɛ sɛla woo mɛ gee dɔla la fum. Beni nyuurɔ ti tu wan nyɛ de puan?” 28#Mat 25.31; Luk 22.30 Ti Yezu yele ba yeti, “N yeti ya la Yelemɛŋerɛ wa ti, sɛla woo paalega saŋa la han ta paaɛ, ti Asaala Dayua la zi'ire a suŋa na'am kuka la zuo ba'ahɛ, yamam sɛba en doohe mam la me wan zi'a na'am kugehi pia la tuyi' me bihera Izirale buuri pia la ba yi' la. 29Se'em woo n bahɛ yiya, suurɔ, bii tapa, sɔ bii ma, kɔma, bii vatɔ mam yu'urɛ wa zuo, wan lebehe nyɛ ba kɔbehi, gee me wan to'e vom kamba'ahɛ. 30#Mat 20.16; Luk 13.30 Gee sɛba zo'e zo'e en diŋɛ nɛŋa, wan ta yee pooren ti sɛba en yee pooren ta diŋɛ nɛŋa.

Currently Selected:

Matu 19: GBTP

Highlight

Copy