Matu 20

Tuntuneba n boi va'amen

1“Saazuo sɔ'ɔlum la ani wuu va'am daana en tari a tiihi wala va'am nyaa yehe bulika yu'uŋɔ yu'uŋɔ ti a ta ɛ tuntuneba ti ba tum a va'am puan. 2En tɔgɛ la tuntuneba la ba dabeherɛ yɔɔrɛ la en de dinaari ayima ku la, a tari ba kiŋɛ la a va'am la puan. 3En le ta yehe gogo kaareŋa buwai' bɔba la, a nyɛ ti tuntuneba basɛba n zɛ'a yoo da'a la puan, 4ti a yele ba yeti, ‘Yamam me kiŋɛ n tiihi wala va'am la puan ta tum, n wan yɔ ya la nari se'em.’ Ti ba kiŋɛ. 5Ti a le ta yehe wuu wuntɛɛŋa en boi zuo tiŋasuka, la gogo kaareŋa atã puan iŋɛ la bala mɛa. 6Ti la le ta dɛna wuu gogo kaareŋa bunuu zaanuurɛ bɔba, ti a le yehe ta nyɛ ti basɛba zɛ'a, ti a yele ba yeti, ‘Ŋwani ti ya zɛ'a ka'lam yoo beere n yilegɛ daarɛ?’ 7Ti ba yeti, ‘Nɛra ka dikɛ tɔ.’ Ti a yele ba yeti, ‘Yamam me kiŋɛ n tiihi wala va'am la puan.’ 8#Malm 19.13; Tii 24.15 Yinɛ n ta ma'ɛ la, ti va'am daana la yele se'em n biheri a tuuma la yeti, ‘Yi' tuntuneba la, la fum bo' ba, ba yɔɔrɛ. Pɔhɛ sɛba n wa'am pooren na la ta paaɛ yia duma la.’ 9Sɛba n wa'am gogo kaareŋa bunuu zaanuurɛ bɔba la n paaɛ la, a bo' ba za'a la dabeherɛ yɔɔrɛ dabeherɛ yɔɔrɛ en dinaari ayima. 10Lan paaɛ sɛba n wa'am yia la, ba ti'ihɛ ti bamam wan to'e ni gaŋɛ poorenduma la, gee ba za'a to'e la dabeherɛ yɔɔrɛ mɛa en de dinaari ayima ayima. 11Ban to'e la, ba gɔgeni mɛ la va'am daana la, 12yɛta yeti, ‘Poorenduma wa tum la gogo kaareŋa buyina ma'a gee ti fum bahɛ ti ba zuna la tumam, tumam n tugum tum ni bala la bulikan ha na, ti wuntɛɛŋa wuŋɛ tu.’ 13Gee va'am daana la lebehe ba ayima yeti, ‘N zɔ, mam ka tuue ya, ya ka ku ni nuurɛ la mam la dabeherɛ yɔɔrɛ en de dinaari ayima? 14Tari ya sɛla n de ya dinɛ la kina. Mam mɛŋa n boti n yɔ poorenduma wa ti la zuna wuu mam bu ya se'em la. 15N ka tari sore ti n iŋɛ mam boti se'em la n mɛŋa bunɔ? Bii ya yuunɛ mɛ la n bu'a la?’ 16#Mat 19.30; Mak 10.31; Luk 13.30 Bala, sɛba n tole nɛŋa wan ta yee pooren, ti sɛba n yee pooren wan ta wa'am na tole nɛŋa.”

Yezu le tɔgɛ a kum la a vo'ore

(Maki 10.32-34; Luki 18.31-34)

17Yezu en wa yɛ'a zɔna Yerusalɛm la, a doohe la a zahereba pia la bayi' la ma'a, ban ye' la, ti a yɛta ba sore la zuo yeti, 18“Bihɛ ya, tu ye' zɔna la Yerusalɛm wa. Ba wan ta dikɛ Asaala Dayua wa iŋɛ malema kiinduma la gɔnmi'ineba nu'uhen, ti ba gakɛ en ti a dela a ki. 19Ba nyaa wan dikɛ en iŋɛ sɛba n dagi Yuuduma la nu'uhen, ti ba ɛregɛ en, gee ŋmɛ' en, gee tari en ta kpa'. Gee dabeha atã daarɛ, a wan vo'e.”

Yɔn la Yemesi ma suhega

(Maki 10.35-45)

20Ti Zebedii dayɔɔhi ma wa wa'am Yezu zi'an na la a dayɔɔhi la, paaɛ na kpa' duma Yezu nɛŋan, suhɛ en ti a iŋɛ se'ere bo' en. 21Ti Yezu soke en yeti, “Fum boti la beni?” Ti pɔka wa yeti, “Bu sore ti n dayɔɔhi siyi wa, ka yima ta zi'ire fum zuɔ nu'o ti kayima me ta zi'ire fum gɔbega nu'o fum sɔ'ɔlum la puan.” 22Ti Yezu lerege yeti, “Ya ka mi' sɛla ti ya sɔkera wa. Yamam wan nyaŋɛ nyu wula wa ti mam bɔna bini ti n nyu ka puan wa?” Ti ba yeti, “Tu wan nyaŋɛ.” 23Ti Yezu yele ba ti, “Ya sirum wan nyaŋɛ nyu mam wula wa puan. Gee ya zi'ire n zuɔ nu'o la n gɔbega nu'o bɔba dagi mam n wan bo' bala. Bilam dela sɛba ti mam Sɔ maahum ka ti ka dɛna ba dinɛ la zi'an.”

24Zahereba pia la n wum dina wa la, ba suure n nyiie mɛ la ba suurɔ tu yi' la. 25#Luk 22.25-26Gee Yezu yi ba mɛ paaɛ a zi'an na yele ba yeti, “Ya mi ti, sɛba n dagi Yuuduma nɛheduma tari la yɛla ɔ̃bela ba nɛreba, ti ba nɛrekãreba la me pɛregera ba bala mɛa me. 26#Mat 23.11; Mak 9.35 Gee la kan dɛna bala yamam puan, gee se'em en boti a dɛna nɛrekãtɛ ya puan, dela a dɛna ya yameŋa. 27Ti se'em me n boti a bɔna ya nɛŋa, a dɛna ya da'aberɛ, 28Wuu Asaala Dayua la n ka wa'am na ti ba tuna bɔ'ɔra en, gee a tugum tuna bɔ'ɔra, pun ta dikɛ a vom yɔ to'e nɛreba zo'e zo'e se'em la.”

29Ban baheri Yeriko la, ti nɛrekuuŋɔ zo'e zo'e n doohe a poore. 30Bilam bilam Ti Fɔɔhi siyi zi'a sore nuuren. Ban wum ti Yezu n dole bilam tɔla la, ba voole mɛ yeti, “Daana, zɔ tu nimbu'ɔ, Deviti dayua wa.” 31Ti Nɛrekuuŋɔ la tahɛ ba la ninmu'urɛ yeti, ŋmɛkɛ ya nɔya la, gee ba tugum malum voole gaŋɛ la bala yeti, “Zɔ tu nimbu'ɔ, Daana, Deviti dayua wa.” 32Ti Yezu teke ze'ele su'u, gee yi ba yeti, “Ya boti n iŋɛ la beni bo' ya?” 33Ti ba yeti, “Daana, bahɛ ti tu nini wa nyɛta.” 34Ti la ve'e Yezu paaɛ paaɛ, ti a paaɛ kalum ba nini la. Bilam bilam ti ba nini la nyɛta ti ba doohe en.

Currently Selected:

Matu 20: GBTP

Highlight

Copy