Luki 2

Yezu dɔgum

(Matu 1.18-25)

1Dabeha aŋa puan la, ti Kaiza Agastus bo' nuurɛ ti ba gulehɛ Arome sɔ'ɔlum nɛreba za'a yu'ura. 2Gulehegɔ kuna en de yia, ti ba iŋɛ, se'em ma'a ti Kurinos dɛna Siriya timbihega nɛŋadaana la. 3Nɛra woo kule la a tiŋa a tiŋa ti ba ta gulehɛ ba yu'ura. 4Ti Yosefe me ze'ele Nazareti en boi Galilii sɔ'ɔlum puan la, yɛ'a Yuda, kula Deviti tinsɛka en yi'iri Bɛtelehɛm la puan, se'ere en sɔi la, Yosefe ze'ele la Deviti buuri puan na. 5A ye' kula ti a ta gulehɛ la a yu'urɛ, eŋa la Mɛɛri se'em ti ba maahena ti a di en, gee ti a me pun gee dɔgum la. 6Ban paaɛ bini la, ti Mɛɛri saŋa paaɛ ti a dɔgɛ a bia la. 7Ti Mɛɛri dɔgɛ a saresare bia en de budibela, pɔbɛ bia la la futo, dikɛ ka gã'arɛ duhi dia dɔɔ puan, se'ere en sɔi la, zi'an ka boi bo' ba ga'aregɔ yire la puan.

Dunkiima la Suŋereba

8Tinkana wa puan, dunkiima basɛba en boi muuen ha la gu'ura ba piihi yu'ukuŋɔ mɛa puan. 9Ti Daana la suŋera en bala zɛ'a ba nɛŋan, ti Daana suŋa niiɛ bilam piim kaaɛ ba bahɛ tiŋasuka, ti ba pabegɛ. 10Ti suŋera la yele ba yeti, “Da zoti ya dabeem, bihɛ ya, mam tari la yelesunɛ en tari nyɛɛma kãtɛ yɛ'a ya zi'an na, ti n bo' nɛreba woo. 11Zina dabeherɛ wa, Deviti sɔ'ɔlum wa puan, ba dɔgɛ faara la en de Kiresta la, dɛna Daana la. 12Dina en wan dɛna daalehum bo' ya. Ya wan ta nyɛ bia la, ti ba pɔbɛ ka mɛ la futo, dikɛ ka gã'arɛ duhi dia dɔɔ zuo.” 13Bilam bilam ti suŋereba kekeko en bala en ze'ele saazuo na lagum suŋera ayima la, ti ba pɛgera Yinɛ yeti,

14“Pɛka paaɛ Yinɛ, se'em en boi saazuin zuin ha wa,

gee ti timpaberɛ wa me zuo, suma'ahum bɔna la saaleba ti a zu'uhɛ ba la!”

15Suŋereba la en bahɛ dunkiima wa gee lebe zom saazuo la, ti dunkiima wa yele taaba yeti, “Bahɛ ya ti tu kiŋɛ Bɛtelehɛm nananawa, la tu ta bihɛ yele dina wa en iŋɛ, ti Daana la lilege pa'alɛ tu wa.” 16Ti dunkiima la ihege kabela yɛ'a, ta paaɛ nyɛ Mɛɛri la Yosefe, gee nyɛ bia la me ti ka gã'a duhi dia dɔɔ la puan. 17Ban nyɛ ŋwana la, ti ba nyaa yele bamam en wum se'ere doohe bia wa puan, 18ti sɛba woo en wum dunkiima wa la, la iŋɛ ba la pakerɛ. 19Gee Mɛɛri to'e ban yele sɛla woo la mɛ la nimu'urɛ, gee nyaa ti'iha a suuren. 20Ti dunkiima wa lɛbera, gee na'aha gee pɛgera Yinɛ, la sɛla ti ba wum gee nyɛ, wuu suŋereba la en yele ba se'em la.

Yezu yu'urɛ sika

21 # Malm 12.3; Luk 1.31 Dabeha anii en tole la, bia la buraanɛ ŋmaaɛ saŋa en bala, ti ba sigɛ ka yu'urɛ Yezu, yu'se'ere ti suŋera la yuum bo' en gee ti ba baŋɛ nyɔkɛ ka puurɛ la.

22 # Malm 12.6-8 Peere malema saŋa la en ta paaɛ la, wuu Moose pa'alegɔ la en de se'em la, ti ba tari Yezu kiŋɛ Yerusalɛm, ti ba ta dikɛ en bo' Daana la, 23#Yɛh 13.2, 12 (wuu lan gulehɛ se'em bɔna Daana la pa'alegɔ la puan yeti, “Bidiiŋa woo en de bundɔɔ dela tuulum lɔkɔ bo' Daana la”), 24ti ba nyaa kaabɛ kaabegɔ doohe lan gulehɛ se'em bɔna Daana pa'alegɔ la puan la‘, “Naduma dayɛma ayi', bii barebale'ero bibehi tuyi'.”

25Bala ma'a ti buraa kayima en boi Yerusalɛm ti ka yu'urɛ yi'ira Simeyɔn, dɛna tuuntɔɔ, kaabɛ a mɛŋa bo' Yinɛ, gee gura Izirale sumbugelegɔ dabeherɛ la. Ti Fa'a Sia pirɛ en. 26Fa'a Sia la tabelɛ lilege pa'alɛ en mɛ yeti, “A kan ki, gura ti a nini ta nyɛ Daana la en de Kiresta la. 27Ti Fa'a Sia la tari Simeyɔn wa wa'am pu'uhegɔ yire la puan na, ti Yezu dɔgereba tari Yezu kɛ̃ pu'uhegɔ yire la puan na, ti ba malum a malema wuu pa'alegɔ la en pa'alɛ se'em la, 28ti Simeyɔn to'e bia la a nu'uhen pɛgera Yinɛ yeti,

29“N Daana, nyaa bahɛ mam fum yameŋa wa ti n vo'ohe bala la suma'ahum,

wuu fum en yele se'em la.

30Se'ere en sɔi la, mam nini nyaa nyɛ fum faarɛ la,

31ti fum maahum dɛ nɛreba woo nɛŋan la.

32 # Aza 42.6; 49.6; 52.10 Se'em en de niihum wan niiɛ ti sɛba n dagi Yuuduma nyɛta la.

Se'em en wan tari pɛka wa'am fum nɛreba Iziraleduma zuo na la.”

33Ti bia la sɔ la ka ma yari zɛ'a yɛli, la ban tɔgeri bia la yele se'em la. 34Ti Simeyɔn ka' sum bo' bia la dɔgereba la, gee yele bia la ma Mɛɛri yeti, bihɛ, “Bikana wa zuo ti nɛreba zo'e zo'e wan lu ti nɛreba zo'e zo'e wan ihege, ka wan dɛna daalehum ti nɛreba zo'e zo'e kan sakɛ bo' ka Izirale puan, 35ti la bahɛ ti yele sɛ'a en sugɛ nɛreba zo'e zo'e suya puan ha la niiɛ na, gee ti su'a lu' fum mɛŋa me.”

36Nɔtɔgeha ayima me en da boi ti a yu'urɛ yi'ira Anna, dɛna Fanuyel en de Asere buuri la poyua. A wa ba' kuregɛ mɛ. A pɔgesa'aren na ti a ele ta paaɛ yuuma ayopɔi ti a sira a ka wa bɔna. 37Ti en pun dɛna pokuurɛ en de woo yuuma pihinii la anaahi la, a ka baheri pu'uhegɔ yire la puan, a kɔ'ɔm bɔna la bilam la nɔlurɛ gee suha Yinɛ yu'uŋɔ la wuntɛɛŋa za'a. 38Sankaŋa mɛa puan ti ka me kɛ̃ pu'uhegɔ yire la puan na, pɔhɛ pɛgera Yinɛ, gee tɔgera bia la yele bɔ'ɔra sɛba woo en guri Yerusalɛm faarɛ la.

Yezu la a dɔgereba lebe Nazareti

39 # Mat 2.23 Ban doohe malema la en de se'em Daana ze'elego la puan ba'ahɛ la, ba lebe la ba mɛŋa tiŋa Nazareti en boi Galilii puan. 40Ti bia wa zɔ'ɔra, kpe'em, pirɛ la yɛm, ti Yinɛ zu'uhegɔ bɔna ka zuo.

Yezu yee pu'uhegɔ yire

41 # Yɛh 12.1-27; Tii 16.1-8 Nananawa,Yuunɛ woo, Yezu dɔgereba ni kiŋɛ la Yerusalɛm ta di azɔɛtole de'eŋo la. 42Ti Yezu en ta dɛna yuumpia la ayi' la, ti eŋa la a dɔgereba la kiŋɛ zom de'eŋo la, wuu ban ni pun kina se'em la. 43De'eŋo la dabeha en ta ba'ahɛ la, ti a dɔgereba la yɛ'a lɛbera ba tiŋa la, Yezu en nan de bumbila la, yee la Yerusalɛm, ti a dɔgereba la ka baŋɛ. 44A dɔgereba la ti'ihɛ ti a lagum bɔna la nɛrekuuŋɔ la puan, gee kiŋɛ daanyinɛ kinɛ. Ti ba pɔhɛ ɛɛra bia la ba mabiihi la ba zɔduma zi'an. 45Ti ban ka nyɛ bia la, ba lebe la Yerusalɛm, ta ɛɛra en. 46Ti la iŋɛ ti Dabeha atã ta tole, ti ba nyɛ en pu'uhegɔ yire la puan, ti a zi'a la pa'aleba la, kɛleha ba, gee sɔgeha ba yɛla. 47Ti la iŋɛ sɛba woo en kelehe en la pakerɛ, la a bɔkerɛ, la a leregere la. 48A dɔgereba la en wa'am na nyɛ en la, la iŋɛ ba la pakerɛ, ti a ma yele en yeti, “Bia wa, ŋwani ti fum iŋɛ tu ŋwana? Bihɛ, fum sɔ la mam eere fum mɛ bala la ninmu'urɛ.” 49Ti a yele ba yeti, “Ŋwani ti ya ɛɛra mam bala? Yamam ka mi' ti n suni ti n bɔna n Sɔ yire la puan?” 50Gee a dɔgereba la ka bɔkɛ en yele ba sɛla la vuurɛ. 51Ti a doohe ba kule Nazareti, ta kɛ̃'ɛ̃ra la a dɔgereba la, gee nana ba. Ti a ma dikɛ yele ana wa woo suŋa suŋa a suuren.

52 # 1 Sam 2.26; Tɔg 3.4 Ti Yezu zɔ'ɔra la yɛm, kahegerɛ, Yinɛ zu'uhegɔ la saaleba zu'uhegɔ.

Currently Selected:

Luki 2: GBTP

Highlight

Copy