Luki 1
1
Gɔŋɔ wa gulehɛ bo' la Tiyofilose
1Lan de ti nɛreba zo'e zo'e maahum ti ba gulehɛ ti la doohe taaba, yele sɛ'a en wa'am asira na tumam tiŋasuka la, 2wuu ban dikɛ a se'em bo' tumam la, bamam sɛba en daa boi pi'ileŋo puan na, dɛna aze'nyɛ duma gee dɛna yamehi bo' yelehum la. 3Mam me iŋɛ n puti'irɛ, doohe mam ma'ɛ n mɛŋa viihɛ sɛla woo en pɔhɛ se'em la yia na la, ti n gulehɛ doohe taaba taaba bo' fum, zuodaana Tiyofilose, 4ti la bahɛ ti fum mina yelemɛŋerɛ se'ere en boi yele sɛ'a woo ti ba pa'alɛ fum la puan.
Yɔn Ko'sɔɔra la dɔgum Yɛla
5 #
1 Yel 24.10
Dabeha sɛ'a puan ti Hɛrɔd dɛna Yuda naba la, ti malema daana ayima en boi, ti a yu'urɛ yi'ira Zekariya, yehe malema daana Abiya yizuo la puan na, ti a pɔga dɛna Aron yaaŋa, ti ka yu'urɛ yi'ira Elizabɛte. 6Ba bayi' la dela tuuntɔɔ duma Yinɛ nɛŋan, ti ba vom tigɛ Yinɛ nini, dɔla Daana la nɔze'elego la a kiha woo puan. 7Gee ba ka tari bia, se'ere en sɔi la, Elizabɛte dela kundɔgerɛ, ti ba za'a me kuregɛ.
8Saŋa kayima ti Zekariya wa tuna a malema daana tuuma Yinɛ nɛŋan la, bamam wele la kaabegɔ saŋa en paaɛ, 9ti ba ŋmɛ' gbaŋa looe en, wuu malema duma la itegɔ en de se'em la, ti a kɛ̃ tuulum saraa la puan ta nyɔ' nyuuŋo suŋɔ zu'uhi bo' Yinɛ. 10Se'em ma'a ti a ta nyɔ'ɔra nyuuŋo suŋa zu'uhi kaabegɔ la, ti lageŋɔ la nɛreba la za'a ze' la yiŋa pu'uhera. 11Ti Daana la suŋera niiɛ a mɛŋa a nɛŋan, zɛ'a zu'uhi nyɔ'a bimbine la zuɔ bɔba. 12Zekariya en nyɛ en la, a paleŋa ɛkɛ mɛ, ti dabeem kɛ̃' en paaɛ paaɛ. 13Gee suŋera la yele en yeti, “Da zɔta dabeem Zekariya, Yinɛ wum fum pu'uhegɔ la. Fum pɔga Elizabɛte wan dɔgɛ bibudibila bo' fum, ti fum sigɛ ka yu'urɛ Yɔn. 14Fum wan tara pupeelum la nyɛɛma, ti nɛreba zo'e zo'e me wan nyɛɛna bia wa dɔgum zuo, 15#Kãl 6.3 se'ere en sɔi la, ka yeti ka dɛna la nɛre kãtɛ, Daana la zi'an. Ka da makɛ nyu daam bii sɛla en kpe'em. Ba ta dɔgera ka la, ti ka pun pirɛ mɛ la Fa'a Sia la. 16Ka wan ŋmɛregɛ Izirale nɛreba zo'e zo'e suya lebe Daana la en de ba Yinɛ la ze'a na. 17#Mal 4.5-6; Sir 48.10-11 A wan bɔna a nɛŋa la Sɛsɛka, la pansɛka en yuum boi Elia puan la, ti a ŋmɛregɛ dɔgereba suya lebe ba kɔma puan na, gee ŋmɛregɛ sɛba en ka nane suya lebe tuntɔɔnɛ duma yɛm puan na, gee maahum nɛreba bo' Daana la.” 18Zekariya yele suŋera la yeti, “N wan iŋɛ la ŋwani baŋɛ ti la ti dɛna wa dela bala, mam kuregɛ, ti n pɔga me yuuma ka pɔ'ɛ wa?” 19#Dan 8.16; 9.21; Tɔb 12.15 Ti suŋera la lerege en yeti, “Mam dela Gaberɛl.” Mam ze' la Yinɛ nɛŋan, gee ti a tum mam na, ti n tari yelesunɛ wa na bo' fum. 20Gee nananawa, fum en ka nam mam yelehum la en yeti bu wa'am na tum bu saŋa puan la zuo, fum wan maam kan tana tɔgera, gura daanse'ere ti yele ana wa wan tum.
21Ŋwana woo la, ti nɛreba la guri Zekariya mɛ, ti'iha sɛla en bahɛ ti a yuura bala tuulum deo la puan ha. 22En ta yehe na la, a ka tã tɔgera wan tɔgɛ bo' ba. Ti nɛreba la mɛŋa baŋɛ ti a nyɛ la lilegere tuulum deo la puan, ti a tara a nu'uhi yibeha pa'ala ba, gee kan ta'am tɔgɛ. 23A malema tuuma dabeha la en ta ba'ahɛ la, a lebe kule la a yire.
24Dabeha aŋa pooren ti a pɔga Elizabɛte yee sia, sugera a mɛŋa ŋmarehi sinuu. A yeti, 25“Daana en iŋɛ sɛla bo' mam en ŋwana. Dabeha ana puan, a bihɛ mam mɛ la zu'uhegɔ gee yehe nyanɛ se'ere ti n nyɛta n nɛreba wa puan bahɛ.”
Yezu Dɔgum
26Yuunɛ puan, ŋmarehi siyoobe puan, ti Yinɛ tum a Suŋera Gaberɛl Galilii en boi Nazareti tiŋa puan, 27#Mat 1.18 pɔgesa'kaherɛ ti ba maahum ti de ele buraa yu'urɛ en yi'ira Yosefe, en de naba Deviti yire puan. Pɔgesa'kaherɛ wa yu'urɛ yi'iri la Mɛɛri. 28Ti Suŋera la wa'am a zi'an na, pu'uhɛ en yeti, “Fum fara fara, zusuŋɔ daana wa, Daana la boi mɛ la hɔ.” 29Gee Mɛɛri maam mɛ la a yetɔgum la, ti'ihɛ pu'uhegɔ wa vuurɛ en de sɛla. 30Ti Suŋera la yele en yeti, “Da zɔta dabeem Mɛɛri, Yinɛ en zu'uhɛ hɔ. 31#Mat 1.21 Fum yeti fum nyɔkɛ la puurɛ dɔgɛ budibela, sigɛ ka yu'urɛ Yezu. 32#2 Sam 7.12, 13, 16; Aza 9.7 Ka yeti ka ta dɛna la nɛre kãtɛ, ti ba yi'ira en Gani za'a Yinɛ wa Dayua. Daana la en de Yinɛ la, wan dikɛ ka sɔyaaba Deviti na'amkuka la bo' en. 33Eŋa en wan sɔna Yakɔbe sɔ'ɔlum la za'a bihera wuuha. Han dɛna ka sɔ'ɔlum la, bu ka tara tɛka.” 34Ti Mɛɛri soke suŋera la yeti, “Ŋwana yeti la iŋɛ la ŋwani iŋɛ, gee ti mam dɛna pɔgesa'kaherɛ wa?” 35Ti Suŋera la yele en yeti, “Fa'a Sia la wan sige fum zuo, ti Gani Za'a Daana paŋa pi' fum. Bala zuo, bia la ti fum yeti fum dɔgɛ la wan dɛna la Fa'a. Ba wan yi'ira ka la Yinɛ Dayua. 36Nananawa, fum suuɔ Elizabɛte la a kuregerɛ la za'a, tari la puurɛ, ti bia la dɛna budibela, a ŋmarehi siyoobe en ŋwana. Se'em ti ba daa yi'ira kundɔgerɛ la n bala. 37#Pi'il 18.14 Sɛla ka boi kpe'em bo' Yinɛ.” 38Ti Mɛɛri yeti, “Mam en ŋwana, mam dela Daana la yameŋa. Bahɛ ti la iŋɛ bo' mam doohe fum yelehum la.” Ti Suŋera la kiŋɛ.
Mɛɛri kiŋɛ bihɛ Elizabɛte
39Dabeha aŋa mɛa puan, ti Mɛɛri yehe kabelɛ kiŋɛ Yudiya tiŋa en boi zoore zuo la, 40ta kɛ̃ Zekariya yire, pu'uhɛ Elizabɛte. 41Ti Elizabɛte en wum Mɛɛri pu'uhegɔ la, bia la damɛ mɛ a puuren ha. Ti Elizabɛte pirɛ la Fa'a Sia la, 42kaahɛ supi yeti, “Sum boi fum zuo gana pɔgehi za'a, sum boi mɛ la walɛ se'ere en boi fum puuren wa. 43Gee beni ti la iŋɛ mam ŋwana, ti mam Daana ma wa'am mam zi'an na? 44Mam en kɔ'ɔm wum fum pu'uhegɔ la, bihɛ, bia la en boi mam puuren la dam mɛ la nyɛɛma. 45Sum bɔna la fum se'em en nam ti Daana la en yele se'em la wan sirum wa'am na tum la.”
Mɛɛri Yuunɛ
46 #
1 Sam 2.1-10
Ti Mɛɛri yeti,
“Mam suure wa pɛgɛ mam Daana la mɛ,
47ti mam sia me nyɛɛna Yinɛ en de mam Faara wa puan,
48 #
1 Sam 1.11
se'ere en sɔi la, a bihɛ mam mɛ la zu'uhɛ, a yameŋa wa en dagi sɛla wa.
Asira, pɔhɛ zina yɛ'a paara buuri saŋa woo, nɛra woo wan yi'ira mam la Sum.
49Se'ere en sɔi la, Gaŋɛ Za'a Daana la tum la yele kãra bo' mam.
A yu'urɛ dela la Fa'a.
50A nimbɔ'zɔrɛ boi bɔ'ɔra la sɛba en zoti en
buuri saŋa woo puan.
51A pa'alɛ la a paŋa la a nu'o.
A yiregɛ pa'ali mɛŋa duma suya ti'ihegɔ la za'a bahɛ mɛ.
52 #
Yob 5.11; 12.19 Eŋa en sigeheri paheduma, ba na'am zuo,
gee zɛkera tarenduma.
53Eŋa en piti sɛba ti kom tara ba, la lɔgesunɔ,
gee bahera ti buntateba kina nu'bɛɛla.
54A suŋɛ a yameŋa Izirale mɛ,
ti a tɛra a nimbɔ'zɔrɛ la,
55 #
Pi'il 17.7
doohe la a nɔbiŋere ti a biŋe la tu sɔyaabeduma,
Aberaham la a yaahi ti de ka tara ba'ahegɔ la.”
56Ti Mɛɛri yee kɛ̃ la en wuu ŋmarehi sitã, gee lebe kule.
Yɔn ko'sɔɔra la dɔgum
57Ti saŋa la ta paaɛ ti Elizabɛte dɔgɛ, ti a dɔgɛ budibela. 58Ti a mabiihi, la a mɛŋa nɛreba za'a wum ti Daana la zɔ a nimbu'ɔ, ti ba za'a lagum nyɛɛna la en.
59 #
Malm 12.3
Dabeha anii daarɛ en de ba ŋma bia la buraanɛ la, ti ba maahena ti ba dikɛ bia la sigɛ ka sɔ Zekariya. 60Ti ka ma yeti, “Aayi, bia la yu'urɛ dela Yɔn.” 61Ti nɛreba la yele en yeti, “Nɛra ka boi fum buuri wa puan tara yu'dina.” 62Gee nyaa pɔhɛ yibeha nu'uhi pa'ala bia la sɔ la ti ba baŋɛ yu'urɛ se'ere ti a bɔta ti ba dikɛ sigɛ bia la. 63Ti a yibehɛ pa'alɛ ba ti ba bo' en sɛla ti a gulehɛ iŋɛ bini, ti ba bo' en, ti a gulehɛ yeti, “Bia la yu'urɛ yi'iri la Yɔn.” Ti la iŋɛ nɛreba la za'a pakerɛ paaɛ paaɛ. 64En ba'ahɛ bala la, bilam bilam ti a ya'ɛ nuurɛ ti a zɛleŋa lorege, ti a tana tɔgera, nyaa pɛgera Yinɛ. 65Ti dabeem kɛ̃ sɛba woo en lɛm ba la, ti ba tɔgera yele ana woo zoore zuo tiŋa la en boi Yuda puan la za'a. 66Ti sɛba woo en wum yele ana wa la, ti'iha yeti, “Beni nɛra ti bikana wa nyaa yeti ka zo'e na dɛna?” Se'ere en sɔi la, la dela sira ti Daana la nu'o en page ka zuo.
Zekariya purega
67Ti bia wa sɔ Zekariya, pirɛ la Fa'a Sia la, nyaa purɛ purega wa yeti,
68“Sum dɛna Izirale Daana en de Yinɛ la dinɛ,
Se'ere en sɔi la, a zɔ a nɛreba la nimbu'ɔ mɛ, gee yɔ to'e ba.
69Yinɛ bo' tu la faara en sɔi a mɛŋa,
yehe a yameŋa Deviti yire puan na, 70wuu en tɔgɛ se'em doohe diimen diimen tuulum nɔtɔgeheba la nɔya puan se'em
71yeti, tu wan to'e tu mɛhi tu dinduma, la sɛba woo en yaaɛ tu la nu'uhen.
72A pa'alɛ tɔ a nimbɔ'zɔrɛ se'ere ti a yuum tara bo' tu yaabeduma la, a tiɛ a tuulum nɔbiŋere la mɛ,
73en yuum biŋe a nuurɛ se'ere la pɔtɛ bo' tu yaaba Aberaham
ti a wan bahɛ ti tumam sɛba 74ti a faaɛ tɔ tu dinduma nu'uhen bahɛ la,
wan tuna bɔ'ɔra en; ti dabeem ka tara tɔ, 75ti tu dɛna tuulum nɛreba, tara tuuntɔɔ vom bɔna a nɛŋan
tu vom dabeha woo puan la.
76 #
Mal 3.1
Gee fum bia wa, fum yu'urɛ wan yi'ira la Gaŋɛ Za'a Daana la Nɔtɔgeha.
Se'ere en sɔi la, fum en wan diŋɛ Daana la nɛŋa maalɛ a sɔya la biŋe en,
77Fum bo' a nɛreba la faarɛ mi'ilum,
doohe ba be'em la sugeri dia,
78tumam Yinɛ la nimbɔ'zɔrɛ la zuo.
Niihum wan ze'ele saazuo ha niiɛ bo' tumam na.
79 #
Aza 9.2
Bo wan niiɛ bo' sɛba en zi' lika puan, la sɛba en boi Kum nyɔ̃pɔ̃hega puan.
Bo wan niiɛ gu'ura tu nama suma'ahum sore la zuo.”
80Ti bia wa malum zɔ'ɔra Fa'a Sia la paŋa puan, bɔna muuen ha a ma'a, ta paaɛ daanse'ere ti a niiɛ a mɛŋa pa'alɛ Iziraleduma la.
Currently Selected:
Luki 1: GBTP
Highlight
Share
Copy
Want to have your highlights saved across all your devices? Sign up or sign in
Gurenɛ New Testament © The Bible Society of Ghana, 2020.
