Luki 16

Ŋmɛlema daana makerɛ

1Ti Yezu yele a zahereba la yeti, Buntata ayima en tari a lɔgebehera kpɛ'ɛma, ti nɛreba ta yɛta en yeti, buraa wa kɔ'ɔm Sagena a lɔgerɔ la mɛ. 2Ti a yi' en na soke en yeti, ‘Beni en bala ti n wuna ti fum iti me wa? Wa'am na bo' mam fum bihɛ n lɔgerɔ la paaɛ se'em beene, gee fum kan le dɛna mam tuuma wa nɛŋa daana yɛ'ɛha.’ 3Ti lɔgebehera kpɛ'ɛma wa nyaa sɔkera a mɛŋa yeti, “N nyaa wan iŋɛ la ŋwani, n kpɛ'ɛma wa en ku a puti'irɛ ti a to'e kpe'eŋo wa n zi'an wa?” N ka kpe'em wan ta'am tu' N me zoti la vi ti n suhɛ 4N mi' mam wan iŋɛ se'em, ti n kpɛ'ɛma wa han pun sa'ɛ mam n kpe'eŋo wa puan, nɛreba wan kelum tɔ'ɔha mam ba yiya puan 5Ti buraa wa ihege yi' sɛba en tari a daana la sama la ayima, ayima lagehɛ na, soke yia daana la yeti, ‘Fum tari n daana sanɛ la ŋwani?’ 6Ti a yeti, ‘Kaam dugelehi kɔbega.’ Ti a yele en yeti, ‘To'e fum sanɛ gɔŋɔ en ŋwana, zi'ire ka'lam gulehɛ dugelehi pihinuu kalam iŋɛ bini.’ 7Gee le soke ayima me yeti, ‘Fum tari n daana sanɛ la ŋwani?’ Ti a yeti, ‘Ki pitɔ kɔbega.’ Ti a yele en yeti, ‘To'e fum sanɛ gɔŋɔ n ŋwana, zi'ire ka'lam gulehɛ pitɔ pihinii kalam iŋɛ bini.’ 8A daana la en ta baŋɛ la, a pɛgɛ ŋmɛlema lɔgebehera kpɛ'ɛma wa mɛ, la kaŋa en nyaŋɛ tarehɛ ka yele la se'em la yɛm. La dela bala mɛa, zina beere wa nɛreba tã zãla ba mɛhi saŋa wa yɛla la yɛm gana niihum puan nɛreba. 9#Tɔb 4.9-11 Bala, n yeti ya mɛ wa, ti ya dikɛ ya ŋmɛlema lɔgerɔ nyɔgɛ zɔtɔ, ti lɔgerɔ la han ta ba'ahɛ, ba wan bo' ya bɔŋa zi'an ti fum bɔna wuuha.

10“Se'em en de yelemɛŋerɛ daana yele pigehi puan, wan dɛna yelemɛŋerɛ daana yelekãra puan. Se'em daana en pini yele pika puan me wan pina yele kãtɛ puan. 11Fum han ka tara yelemɛŋerɛ ŋmɛlema lɔgerɔ puan, ani en wan sakɛ dikɛ yelemɛŋerɛ lɔgerɔ iŋɛ fum nu'uhen? 12Fum han ka tara yelemɛŋerɛ la ayima bunɔ, ani en wan dikɛ sɛla en de fum mɛŋa bunɔ bo' fum? 13#Mat 6.24 Yameŋa ka boi wan ta'am tuna bɔ'ɔra kpɛ'ɛnduma bayi'. Yameŋa la wan ba'ahum yaaɛ ayima, gee nɔŋɛ ayima, bii a kaabɛ a mɛŋa bo' ayima, gee bahɛ ayima. Fum kan ta'am tuna bɔ'ɔra Yinɛ, gee tuna bɔ'ɔra ligeri.”

Ze'elego, la Yinɛ sɔ'ɔlum

(Matu 11.12, 13; 5.31, 32; Maki 10.11, 12)

14Farasiiduma la en de lige bɔteba la en wum ŋwana za'a la, ba ɛregeri Yezu mɛ. 15Ti Yezu yele ba yeti, “Ya dela nɛreba en bo'ori ya mɛhi buurɔ nɛreba nɛŋan, gee Yinɛ mi' ya suya puan en ani se'em mɛ. Sɛla en de tuulum lɔkɔ nɛreba nɛŋan, fi'ɛ mɛ Yinɛ nɛŋan.

16 # Mat 11.12-13 “Ze'elego la, la nɔtɔgeheba la tugum la woo tum mɛ, tara tara ti Yɔn ta wa'am na. Yehe bilam, Yinɛ sɔ'ɔlum la yɛla kɔ'ɔm muula la bala, ti nɛra woo zigera ba pɛregɛ kɛ̃ bu puan. 17#Mat 5.18 La ka tɔi ti saazuo la tiŋa wa mɛlum, gee la kpe'em mɛ ti gulehegɔ pika pa'alegɔ wa puan saalum.

18 # Mat 5.32; 1 Kor 7.10-11 “Se'em woo en lebehe a pɔga gee tee di kayima, tum la kabohi, ti se'em woo me en di pɔgesɛka ti ka sira lebehe ka, me tum la kabohi.

Buntata, la Lazarus

19“Buraa kayima en wa bɔna dɛna buntata, bagera ka mɛŋa saŋa woo la banaahi la doogila, ti dia, la de'eŋo bɔna ka yire daare woo. 20Gee a nayaŋa nuuren, buraa kayima en de naha, ti ka yu'urɛ yi'ira Lazarus, ti nɔra to'e ka iŋa za'a, n gã' bini, 21ti ka suure ni bɔta ti ka pirɛ ka puurɛ la disɛka ze'ele buntata dia zi'an la zɔgɛ la; gee baahi kina lɛɛla ka nɔra la. 22Ti naha wa ta ki, ti Yinɛ suŋereba wa'am na tari en kiŋɛ Yinɛ yire, ta bɔna Aberaham zi'an. Ti buntata la me ta ki, ti ba pi' en. 23Ti a kiŋɛ bugum tiŋa puan, ta bɔna namehegɔ puan, gee gorege a zuo, nyɛ ti Aberaham boi zaaɛ zaarɛ ha, ti Lazarus gã'a a nyu'ɔ zuo bilena en. 24Ti a yi' la kɔkɛ'ɛŋa yeti, ‘N sɔ Aberaham, zɔ n nimbu'ɔ gee bahɛ ti Lazarus dikɛ a nu'dibila ti'ɛ ko'om puan na yɔɔlɛ n nuuren, gee n kunkɔya n kãberi. Se'ere en sɔi la, la wuni mam mɛ bugum peelum wa puan.’ 25Gee Aberaham yele en yeti, ‘N bia, tɛra ti fum yuum boi vom puan tiŋa zuo la, fum yuum nyɛ fum sum mɛ za'a, gee ti Lazarus me bɔna mɛlehegɔ puan. Gee nananawa, a boi la sum zi'an ka'lam, gee ti fum me bɔna mɛlehegɔ puan. 26Gee pun dagena bala ma'a, gee tumam la fum tiŋasuka, boko kãtɛ en beŋe, ti sɛba en wan bɔta ti ba ze'ele ka'lam yakɛ bilam na kan ta'am iŋɛ bala, ti se'em me kan ta'am ze'ele bilam yakɛ tumam zi'an na.’ 27Ti buntata wa yeti, ‘N sɔ, n ye beni fum mɛ ti fum tum Lazarus ti a kiŋɛ n sɔ yire, 28se'ere en sɔi la, mam tari la n suurɔ tunuu ha. A kiŋɛ ta tɔgɛ bo' ba la ninmu'urɛ, ti ba da ta wa'am namehegɔ kuna wa puan ze'kana wa puan na.’ 29Ti Aberaham lebehe en yeti ‘Moose, la nɔtɔgeheba la woo boi ha. Ba kɛleha ba.’ 30Ti buraa wa lebehe yeti, ‘Aayi n sɔ Aberaham, se'em n ki la han kiŋɛ ba zi'an, ba wan tee.’ 31Ti Aberaham lebehe en yeti, ‘Ba han kan kelehe Moose la nɔtɔgeheba la, bala mɛa ti se'em n ihege kum puan han pun lebe ta tɔgɛ bo' ba, ba pun kan tee ba puti'irɛ.’ ”

Currently Selected:

Luki 16: GBTP

Highlight

Copy