Luki 11

Yezu pa'alɛ a zahereba pu'uhegɔ

(Matu 6.9-13; 7.7-11)

1Yezu ta bɔna la zi'an kayima pu'uha, ti en ba'ahɛ la, ti a zahereba la ayima yele en yeti, “Daana, pa'alɛ tɔ ti tu pu'uha wuu Yɔn en pa'alɛ a zahereba la se'em la.” 2Ti Yezu yele ba yeti, “Ya han ni pu'uha, ni yele ya yeti,

“Sɔ, fum yu'urɛ wa sɔna na'ahegɔ.

Fum sɔ'ɔlum wa'am na.

3Bɔ'ɔra tɔ daarɛ woo tu nuurɛ dia.

4Bahera tu be'em bo' tu

beni zuo, tumam mɛhi baheri bɔ'ɔra se'em woo en tari tu sama mɛ.

Da bahɛ ti tu kɛ̃ pã'ahebe'ero puan.”

Ŋmibera Pu'uhegɔ puan

5Ti Yezu yele ba yeti, “Ya se'em han tara a zɔ, kiŋɛ a zi'an yu'unsunsua ta yele en yeti, ‘N zɔ, peŋe mam boroboro batã na, 6gee n zɔ n nan kɔ'ɔm paaɛ n zi'an na, ti mam me ka tara sɛla wan dikɛ ze'ele a nɛŋan.’ 7Ti fum zɔ la gã'a ha gee yeti, ‘Da daana mam, gee mam pun diŋɛ yu' n kuleŋa mɛ, ti kɔma me gã'a la ma suŋɔ zuo giha. Mam kan ta'am ihege bo' fum sɛla.’ 8N yeti ya mɛ wa, ti la en kan ihege bo' en sɛla ban pun dɛna zɔtɔ la, gee buraa la en sini gee zɛ'a ŋmɛ'ɛra la zuo, a wan ba'ahum ihege bo' en sɛla woo ti a bɔta la.

9“Bala, mam yeti ya yeti, soke ya, gee ba wan bo' ya. Ɛ ya gee ya wan nyɛ. Ŋmɛ' ya gee kuleŋa la wan yu'ɛ bo' fum. 10Beni zuo, Se'em woo en soke wan to'e, ti se'em woo en ɛ wan nyɛ, ti se'em woo en ŋmɛ, kuleŋa la wan yu'ɛ. 11Se'em boi yamam wa puan ti a bia han suhɛ en ziho, a nyɔkɛ bunsɛla bo' en gee dagi ziho? 12Bii a bia suhɛ en gele ti a nyɔkɛ naŋa bo' en? 13Yamam en tugum dɛna be'em duma, han mina yan bo'ori ya kɔma bo'olum suma se'em, Ŋwani ti ya Sɔ en boi saazuo ha kan bo' sɛba en suhɛ en Fa'a Sia la gaŋɛ bala.”

Yezu dagi Beelezebule

(Matu 12.22-30; Maki 3.20-27)

14Yezu wa bɔna bini sa'ara la gɔɔnɛ kulekpa'bɛ'a nɛra zi'an, ti kulekpa'bɛ'a la en yehe la, ti nɛra la en de gɔɔŋɔ la tɔgɛ, ti la iŋɛ nɛrekuuŋɔ la pakerɛ paaɛ paaɛ. 15#Mat 9.34; 10.25 Gee nɛreba la basɛba yeti, “A sa'ahɛ kulekpa'bɛ'ɛhi wa mɛ la Beelezebule en de kulekpa'bɛ'ɛhi nɛŋa daana la paŋa puan.” 16#Mat 12.39; 16.1; Mak 8.11 Ti sɛba me en boti ba magehɛ en bihɛ la me kɔ'ɔm ɛɛra ti a tum saazuo daalehum. 17Gee Yezu en mi' ban ti'ihɛ se'em la, ti a yele ba yeti, “Tinsɛka woo en welege zabera la ka mɛŋa, wan yiregɛ. Yire me en welege zabera la de mɛŋa, wan lebege daboo. 18Sagena la me han welege zabera la a mɛŋa, a sɔ'ɔlum la wan iŋɛ la ŋwani ta'am ze'ele? Se'ere en sɔi la, yamam yeti mam tari la Beelezebule paŋa sa'aha kulekpa'bɛ'ɛhi. 19Mam han tara Beelezebule paŋa sa'aha kulekpa'bɛ'ɛhi, gee yamam nɛreba la me tari la ani yu'urɛ sa'aha kulekpa'bɛ'ɛhi la? Bala zuo, bamam en wa dɛna ya mɛŋa gakereba 20Gee la han dɛna la Yinɛ nu'dibila ti mam tara la sa'aha kulekpa'bɛ'ɛhi la, la pa'alɛ ti Yinɛ sɔ'ɔlum la paaɛ ya na. 21Paŋa daana han bobe a zaba lɔgerɔ gura a zi'an suŋa suŋa, a lɔgerɔ la boi la fai. 22Gee se'em me en kpe'em gana en han kɔ' zaberɛ la en, nyaŋɛ en, a wan to'e a zaba lɔgerɔ la ti a dikɛ a mɛŋa delum la, a wan tɔrɛ sɛla woo ti a fã la. 23#Mak 9.40 Se'em woo en ka boi la mam, zaberɛ mɛ la mam, se'em en ka lagum ka'aha la mam, yiregerɛ bahera mɛ.

Kulekpa'bɛ'a lɛbega na

(Matu 12.43-45)

24“Kulekpa'bɛ'a han yehe nɛra puan, ka ni ɛɛra la kpaahenɛ puan tuuna ɛɛra vo'ohego zi'an, gee en kan nyɛ la, ka wan yeti, ‘N wan lebe n yikɛka la ti n ze'ele de puan na la puan.’ 25Kulekpa'bɛ'a wa han lebena nyɛ ti yire la maalɛ mɛ gã'a filam. 26A wan lebe ta ɛ kulekpa'bɛ'ɛhi siyopɔi n fi'ɛ gana eŋa, tara ba na ti ba kɛ̃ nɛra la puan, bɔna bini ti nɛra la nyaa sagum gana en daa nan ani se'em la.”

Yelemɛŋerɛ sum

27Yezu en boi bini tɔgera ŋwana la, ti pɔka ze'ele nɛrekuuŋɔ la puan tɔgɛ voole bahɛ na yele Yezu yeti, “Sum bɔna la puse'ere en daa tari hɔ la, la bi'ihum sebo en uge fum la.” 28Gee Yezu yele en yeti, “Sum tugum bɔna mɛ la sɛba en wum Yinɛ yelehum wa gee gurɛ bu suŋa suŋa.”

Yona dela daalehum

(Matu 12.38-42)

29 # Mat 16.4; Mak 8.12 Nɛrekuuŋɔ la en malum pa'ahera la, ti Yezu pɔhɛ yɛta yeti, “Sankana buuri wa dela be'em buuri saŋa. Ba eere la ba nyɛ daalehum, gee daalehum ka boi ti n wan iŋɛ bo' ba, han dagena daalehum sɛka en yuum iŋɛ Yona la ma'a. 30#Yona 3.4 Wuu Yona en yuum de daalehum bo' Ninevɛ tiŋa duma se'em la, bala mɛa ti mam Asaala Dayua wa wan dɛna bo' sankana buuri wa. 31#1 Nad 10.1-10; 2 Yel 9.1-12 Tiŋanuurɛ bɔba pɔgenaba la wan ta ihege ze'ele gakerɛ daarɛ, tɔgɛ lubɛ sankana buuri wa, se'ere en sɔi la, Pɔgenaba wa yuum ze'ele la zi'an en ka yɔi' wa'am na ti a zi'ire naba Solomɔn nɛŋan kelehe a yɛm tugum la. Gee bihɛ ya, se'em en gani Solomɔn en bala bɔna ka'lam wa. 32#Yona 3.5 Ninevɛ tiŋa nɛreba wan ta ihege ze'ele gakerɛ daarɛ la tɔgɛ lubɛ saŋa kana buuri wa, se'ere en sɔi la, Yona en yuum tɔgɛ bo' ba la, ba yuum tee mɛ. Gee bihɛ ya, se'em en gani Yona en bala bɔna ka'lam wa.

Iŋa wa niihum

(Matu 5.15; 6.22-23)

33 # Mat 5.15; Mak 4.21; Luk 8.16 “Nɛra ka laŋeri butolela yire puan, dikɛ sɛla vugele ka, gee a wan tugum dikɛ ka ze'ele la ka ze'elego zi'an, ti se'em woo en ki'ire yire la puan na nyɛta. 34Fum niho en de fum iŋa wa niihum, bala, niho la han dɛna bu mɛŋa, fum iŋa la tari niihum mɛ, gee niho la han ka barɛ, fum iŋa la za'a boi la lika puan. 35Bala, bihɛ fum mɛŋa, ti niihum sebo en boi fum puan la dagena lika. 36Gee niihum han to'e fum iŋa la za'a ti lika ka bɔna, bu wan niiɛ piim wuu butolela en niiri se'em la.”

Yezu fakɛ Farasiiduma, la yetɔge tɔgereba

(Matu 23.1-36; Maki 12.38-40)

37Yezu en tɔgera la, ti Farasii ayima wa'am na yi' en ti a wa'am na yire na di la en. Ti Yezu kiŋɛ ta paaɛ zi'ire a zi'irego zi'an dia la saŋa. 38Ti la iŋɛ Farasiiduma la pakerɛ, la Yezu en paaɛ na ka pee malema peere la yia gee zi'ire dia la puan la. 39Ti Daana la yele en yeti, “Yamam Farasiiduma peere la laa, bii wanɛ la poore, gee ti ya puan ha pirɛ la nyika la putoo. 40Geto wa, dagi se'em en maalɛ yiŋa la n maalɛ puan la? 41Bala, dikɛ ya sɛla en boi ya puan la tihɛ, gee ya wan nyɛ ti ya sɛla woo ana filam bo' ya.

42 # Malm 27.30 “Gee yele boi yamam Farasiiduma wa zuo, se'ere en sɔi la, ya yɔɔri ya pia pia bo'olum la nima nima, ta ta' nangina la yɔgevuurɔ, la zɛvuurɔ woo ti ya yɔ' ti ya dugɛ, gee tugum zagehɛ yelemɛŋerɛ, la Yinɛ nɔŋerɛ. Yele ana n tugum dɛna ya ita, nyaa ita yan iti yele sɛ'a wa pa'aha. 43Yele boi yamam Farasiiduma wa zuo, se'ere n sɔi la, ya nɔŋɛ la ya ni to'ohe nɛhi duma kugehi, Zamehegɔ yiya la puan, gee nɔŋɛ nɛreba dɔbeta pu'uha ya da'ahi puan. 44Yele boi ya zuo, ya ani mɛ wuu yɔɔrɔ en gã' ka tara daalehum la, ti nɛreba kina ba zuto gee ka mina.”

45Ti yetɔge tɔgera la ayima soke en yeti, “Pa'ala, fum han tɔgera ŋwana, fum tu ta' tumam me mɛ n bala.” 46Ti a yele ba yeti, “Yele boi yamam yetɔge tɔgereba wa zuo! Se'ere en sɔi la, ya ni ziile la nɛreba zeero en tibegɛ gaŋɛ, gee kan dikɛ ya nu'dibila tebege zeero la suŋɛ ba. 47Yele boi ya zuo, se'ere en sɔi la, yamam en mɛti la nɔtɔgeheba la ti ya yaabeduma yuum ku la yɔɔrɔ. 48Bala, yamam en de aze' nyɛ duma, la sɛba n yuum pa' ya yaabeduma poore ti ba tum ba tuuma la. Bama n ku nɔtɔgeheba la, ti yamam me mɛ ba yɔɔrɔ. 49Bala ti Yinɛ mi'ilum la puan yeti, ‘N wan tum n nɔtɔgeheba, la n tuntuneba na, gee ba wan ku basɛba, gee mɛlehɛ basɛba.’ 50Bala ti buuri saŋa kana wa, wan tara taalɛ nɔtɔgeheba la za'a ziim n ka'ɛ, gee ti tiŋa wa baŋɛ naam la. 51#Pi'il 4.8; 2 Yel 24.20, 21 Ze'ele Abɛl ziim ka'arɛ, ta paaɛ nɔtɔgeha Zekariya ziim ka'arɛ la, se'em ti ba wa ku' en biŋe kaabegɔ daka la, la tuulum saraa la tiŋasuka la. Ɛ̃ɛ, bu taala wan dɔla la yamam zina beere nɛreba wa. 52Yele boi yamam yetɔge tɔgereba wa zuo. Se'ere en sɔi la, yamam en dikɛ mi'ilum kparehega la, ya kan kɛ̃ ya mɛŋa, gee me gu'ura sɛba en boti kɛ̃'ɛ̃ri la.”

53Yezu en tɔgɛ ba'ahɛ gee yehe na la, ti gɔnmi'ineba la, la Farasiiduma la, iŋɛ suure la en, nyaa sɔgeha en yɛla zo'e zo'e doohe en tɔgɛ se'em la puan, 54#Luk 20.20 kɔ'ɔm pigera la ba wum ti ba bɛ̃rɛ nyɔkɛ en yele sɛla tuue ti ba nyɔkɛ en.

Currently Selected:

Luki 11: GBTP

Highlight

Copy