Luki 10

Zahereba pihiyopɔi la tuunɛ

1Yele ana en tole la, tu ti Daana la looe a zahereba basɛba pihiyopɔi,#10.1 Diimen diimen gulehegɔ tuseto tari la pihiyopɔi la tuyi'. tum ba bayi' bayi', ti ba diŋɛ a nɛŋa, ta kɛ̃ tihi se'ehi woo puan ti eŋa mɛŋa maahum ti a doohe si puan la. 2#Mat 9.37-38A yele ba yeti, Hmm! “Dia buŋa la zo'e mɛ, gee ti tuntuneba la pɔ'ɛ. Bala, suhɛ ya Daana la en sɔi va'am la, ti a tum tuntuneba a dia buŋa la puan na. 3#Mat 10.16 Kini ya. Bihɛ ya, ya ani mɛ wuu pebibehi la, ti n tuna ya sahi puan la. 4#Mat 10.7-14; Mak 6.8-11; Luk 9.3-5 Da tari ya ligeri tapɔtɔ, bii sore kinɛ tapɔtɔ, bii tagera. Da teke ya sore zuo pu'uhɛ nɛra ya kinɛ wa puan. 5Yire se'ere woo ti ya yeti ya kɛ̃ de puan, yia ni yele ya yeti, “Suma'ahum bɔna yire wa puan.” 6Ti suma'ahum daana han bɔna bini, ya suma'ahum la, wan sige a daana, gee se'em han ka bɔna bini dɛna suma'ahum daana, ya suma'ahum wan lebe ya zi'an na. 7#1 Kor 9.14; 1 Tim 5.18 Yee ya yire dinɛ puan la ya dita gee nyuura sɛla woo ti ba bo' ya, se'ere en sɔi la, tuntuna dela ba yɔ en. Da lomehe ya yiya kaara. 8Sansɛka woo ti ya kɛ̃ tinsɛka woo puan ti ka nɛreba to'e ya, diti ya sɛla woo ti ba bɔ'ɔra ya. 9Tiberi ya bã'duma sɛba woo en boi tiŋa la puan, gee yɛta ba yeti, ‘Yinɛ sɔ'ɔlum la paaɛ ya na.’ 10#Tuum 13.51 Gee sansɛka woo ti ya kɛ̃ tinsɛka puan ti ka nɛreba ka to'e ya, yehe ya ta ze'ele ka sɔya zuto la ya yeti, 11‘Ya tiŋa wa puuhego en puke tu nama la n bala ti tu kpa'aha baha wa, ti la dɛna yele gã'a gura ya. Gee la bala za'a, mini ya suŋa ti Yinɛ sɔ'ɔlum la lɛm ya mɛ na.’ 12N yeti ya mɛ wa, ti dabeherɛ la daarɛ, la wan ana ma'ma' bo' Sodom nyana tihi sina taaba.

Yele boi tinse'ehi n ka sakɛ teere wa zuo

(Matu 11.20-24)

13 # Aza 23.1-18; Eze 26.1—28.26; Yow 3.4-8; Amo 1.9-10; Zɛk 9.2-4 “Yele boi yamam Korazinduma wa zuo. Yele boi yamam Bɛtesaadaduma wa zuo. Se'ere en sɔi la, mam paŋa n tum daalehum sebo ya puan wa han tum ni la Taai la Sidɔn tihi, ŋwana ma'a ba pun tee ni la wunse'eren ha, yɛ susageŋɔ futo, gã'a tiŋa bilena. 14Gakerɛ daarɛ la, la wan ana ma'ma' bo' Taai la Sidɔn tihi nyana yamam. 15#Aza 14.13-15 Yamam Kapɛnum tihi wa me,

ya ti'ihɛ ti ba wan zɛkɛ yamam wan yagelɛ la saazuo bii?

Aayi, ba wan sigehe ya tiŋa ki'intiŋa.

16 # Mat 10.40; Mak 9.37; Luk 9.48; Yɔn 13.20 “Se'em woo en kelehe ya, kelehe la mam. Se'em woo me en zagehɛ ya, zagehɛ la mam. Ti se'em woo me en zagehɛ mam, zagehɛ la se'em en tum mam na la.”

Zahereba Pihiyopɔi la lebena

17Ti Yezu zahereba pihiyopɔi la lebena la nyɛɛma, yɛta yeti, “Daana, fum yu'urɛ la zuo, kulekpa'bɛ'ɛhi nam tumam mɛ!” 18Ti a yele ba yeti, “Mam nyɛ Sagena la en ze'ele saazuo ha luta na wuu bugum pãrehi la. 19#Yoo 91.13 Bihɛ ya, n bo' ya paŋa ti ya niira bunsɛlenduma, nahi, la Sagena la pahi za'a zuto, ti sɛla sɛla kan iŋɛ ya. 20Gee la bala za'a da nyɛɛni ya la kulekpa'bɛ'ɛhi la n nam ya la, gee tugum tari ya pupeelum ti ya yu'ura gulehɛ gã'a saazuo ha.”

Yezu Nyɛɛma

(Matu 11.25-27; 13.16-17)

21Sankaŋa mɛa puan, ti Yezu nyɛɛna Fa'a Sia la puan yeti, “N pu'uhɛ ya n Sɔ, saazuo la tiŋa Daana, la fum en sugɛ yele ana wa yɛm la mi'ilum duma, gee tugum lilege a bo' kɔmbilɛɛhi wa. La dela sira n Sɔ, fum zu'uhegɔ la fum sumboolum n de se'em n bala. 22#Yɔn 3.35; 10.15 Mam Sɔ dikɛ sɛla woo iŋɛ la mam nu'uhen. Se'em ka mi' Dayua la en de se'em han dagena Sɔ la ma'a, bii se'em mina Sɔ la en de se'em, han dagena Dayua la ma'a, la sɛba ti Dayua la mɛŋa looe ba ti a niiɛ Sɔ la pa'alɛ ba la.”

23Ti Yezu ŋmɛregɛ tɔ a zahereba la, gee yele ba bããlam yeti, “Sum boi mɛ la nini se'ehi en nyɛ sɛla ti yamam nyɛ wa. 24N yele ya ti, nɔtɔgeheba, la na'duma zo'e zo'e boti ni ti ba nyɛ yamam n nyɛ sɛla wa mɛ, gee ba ka nyɛ. Ba wum ni yamam n wum sɛla wa, gee ba ka wum.”

Samariya nɛresuŋɔ makerɛ

25 # Mat 22.35-40; Mak 12.28-34 Bilam bilam, ti yetɔge tɔgera ayima vaaɛ ihege ti a makɛ Yezu bihɛ, nyaa yeti, “Pa'ala, beni ti n wan iŋɛ la n ta'am nyɛ vom kamba'ahɛ wa?” 26Ti Yezu yele en yeti, “Beni en gulehɛ bɔna ze'elego la puan? Fum kãalɛ la beni bini?” 27#Tii 6.5; Malm 19.18 Ti a lebehe yeti, “Fum nɔŋɛ Daana Yinɛ, la fum suure za'a, fum Sia za'a, la fum paŋa za'a, la fum puti'irɛ za'a, gee nɔŋɛ fum suuɔ wuu fum mɛŋa la.” 28#Malm 18.5 Ti Yezu yele en yeti, “Fum kɔ'ɔm lebehe la ma'a. Kɔ'ɔm ita bala gee fum wan vɔna.”

29Gee buraa wa en boti ka nyɛ buurɔ la, ti ka soke yeti, “Ti ani n nyaa de n mabia?” 30Ti Yezu lerege en yeti, “Buraa kayima en ze'ele Yerusalɛm sigera Yeriko, ti fãareba ta gu' ka sore, sɛgehɛ ka gee ŋmɛ' ka, gee kiŋɛ gee bahɛ ka ti ka gee kum. 31Ti la iŋɛ, ti malema daana ayima dɔla sore dinɛ mɛa sigera, en nyɛ buraa la, a lɔkɛ doohe la zi'an kayima ha tole. 32Bala mɛa ti Levi wa'am na paaɛ zi'an la, nyɛ buraa la, gee me lɔkɛ doohe zi'an kayima ha tole. 33#2 Yel 28.15 Gee Samariya n ta yɛ'a tɔla, wa'am na pɔra buraa la, nyɛ buraa la, ti nimbu'ɔ nyɔkɛ en. 34Ti ka sige paaɛ en, ka'ɛ kaam la daam duuhe en, gee pɔgeleŋɔ la lu', gee ɔ̃begɛ en pagelɛ a mɛŋa buŋa zuo, tari en paaɛ saama ga'aregɔ yire, bihɛ en. 35Ti yiimbeere ti a dikɛ ligeri wuu dabeha ayi yɔɔrɛ bo' se'em en biheri saama ga'aregɔ yire la, gee yele en yeti, ‘Bihera buraa wa suŋa bɔ'ɔra mam, ti n han ta tulege na ti sanɛ se'ere woo bɔna, n wan yɔ.’ 36Ba ani batã wa puan, ti fum ti'ihɛ ti a dela buraa wa n lu fãareba nu'uhen wa mabia?” 37Ti yetɔge tɔgera la lerege yeti, “Se'em n zɔ a nimbu'ɔ la.” Ti Yezu yele en yeti, “Me kiŋɛ ta iŋɛ bala mɛa.”

Yezu kiŋɛ ta bihɛ Maata la Mɛɛri

38 # Yɔn 11.1; 12.2-3 Ban boi sore zuo yɛ'a la, ba ta paaɛ la timbila kayima puan, ti pɔka bɔna bini ti ka yu'urɛ yi'ira Maata, yi' Yezu kule a yire. 39Maata wa me tari la a suuɔ yu'urɛ en yi'iri Mɛɛri, kɔ'ɔm zi'a Daana la nɛŋan kɛleha sɛla ti a tɔgera la. 40Gee ti Maata yee kiileŋɔ la tuuma. Bala ti a wa'am na soke Yezu yeti, “N Daana, Fum ka nyɛti n suuɔ wa bahɛ mam ti mam kɔ'ɔm kiilena la tuuma wa n ma'a? Yele en ti a ihege na suŋɛ mam.” 41Gee Daana la yele en yeti, “Maata, Maata, la daani fum mɛ, ti fum puti'irɛ ka gã'a tiŋa la tuuma kekeko la zuo, 42gee yele deyina ma'a n pakɛ. Mɛɛri looe la yele suŋa ti nɛra kan ta'am to'e ka a zi'an.”

Currently Selected:

Luki 10: GBTP

Highlight

Copy