Yɔn 9

Fua Pikɛ ya

1Yezu n kini la, a nyɛ la buraa n de fua ka biilimen na. 2Ti a zahereba la soke en yeti, “Rabi, ani n tum be'em? Buraa wa bii ka dɔgereba be'em zuo ti ba dɔgɛ ka ti ka dɛna fua wa?” 3Ti Yezu lerege ba yeti, “La dagi buraa wa, bii ka dɔgereba be'em zuo, gee ka de fua ti Yinɛ tuuma n niiɛ ka puan na. 4La dela tu tuna n Sɔ la n tum mam na la tuuma, ti wuntɛɛŋa nan boi wa, gee yu'uŋɔ kini na, ti nɛra kan ta'am tum. 5#Mat 5.14; Yɔn 8.12 Mam n nan boi timpaberɛ wa zuo wa, mam de timpaberɛ la niihum.” 6En yele ŋwana ba'ahɛ la, a tubehɛ la nɔtuurum iŋɛ tuntɔnɔ puan, nɔm tuntɔnɔ la la nɔtuurum la, dikɛ buuɛ buraa la nini la, 7gee yele en yeti, “Kiŋɛ Silom bɔka la puan ta wire.” (Silom vuurɛ dela, “Tuŋa”). Ti buraa wa kiŋɛ ta wire a nɛŋa la. Ti a nini la pikɛ ti a kina lɛbera na, 8ti a mabiihi, la nɛresɛba n ni nyɛta en ti a zi'an suhera la, pɔhɛ sɔkera taaba yeti, “Ena dagi buraa la n ni zi'an suha la?” 9Ti sɛba yeti, en bala, ti sɛba me yeti, “Aayi, a yeen wuna mɛ la en.” Ti buraa wa mɛŋa muula yeti, “Mam n bala, mam n bala.” 10Ti ba sɔkera en tabela yeti, “Ti la nyaa iŋɛ la wani tu fum nini la pikɛ?” 11Ti a lerege ba yeti, “Buraa la yu'urɛ n yi'ire Yezu la, n bum tuntɔnɔ yakɛ buuɛ mam nini la, gee yele mam yeti, ‘Kiŋɛ Silom bɔka la puan ta wire.’ Bala ti mam kiŋɛ ta wire nyaa nyɛta wa.” 12Ti ba soke en yeti, “Ka bɛɛ?” Ti a yeti, “Mam ka mi'.”

Farasii duma viihɛ tibegɔ la yele

13Ti nɛreba la tari buraa wa n daa de fua wa wa'am Farasii duma la zi'an na. 14La dela vo'ohego daarɛ ti Yezu nɔm tuntɔnɔ la buuɛ buraa la nini ti i pikɛ la. 15Bala ti Farasii duma wa me pɔhɛ sɔkera buraa la, lan iŋɛ se'em ti a nini la pikɛ. Ti a yele ba yeti, “A nɔm la tuntɔnɔ buuɛ mam nini, ti mam kiŋɛ ta wire nyaa nyɛta wa.” 16Ti Farasii duma la basɛba yeti, “Burasɛka n iŋɛ ŋwana wa ka ze'ele Yinɛ zi'an na, se'ere en sɔi la, a ka na'aheri vo'ohego dabeherɛ la.” Gee basɛba me yeti. “Ŋwani ti nɛra n de be'em daana wan ta'am tuna daalehum buna taaba?” Ti ba welehi taaba. 17Ti Farasii duma wa le soke fua wa yeti, “Fum ti'ihɛ ti buraa wa dela beni? Fum nini ti a pikɛ.” Ti buraa la yele ba yeti, “A dela nɔtɔgeha.” 18Gee Yuuduma kpɛ'ɛnduma la pun ka sakɛ ti buraa la tabelɛ fɔ mɛ gee nyaa nyɛta, han dagena ban yi' buraa wa dɔgereba na la, 19ti ba soke ba yeti, “Yamam dayua n ŋwana, ti ya yeti yamam dɔgɛ ka ti ka dɛna la fua ka biilimen na la? La nyaa iŋɛ la wani ti ka nyɛta wa?” 20Ti ka dɔgereba lerege yeti, “Tumam mi' ti tumam dayua n bala, tu me dɔgɛ en ti a dɛna la fua, 21gee tumam ka mi' lan iŋɛ se'em ti a nyaa nyɛta wa, bii tu mina se'em daana n pikɛ a nini la. Soke ya en gee a dagi bia, a mɛŋa wan tɔgɛ bo' a mɛŋa.” 22A dɔgereba la n yele ŋwana la dela, ba zoti la Yuuduma la dabeem, Se'ere n sɔi la, ba ku la nuurɛ yeti, fum se'em woo n sakɛ ti Yezu dela Kiresta la, ba wan dige fum daana ti fum kan le kɛ̃ zamehegɔ yire la puan. 23Bala zuo ti a dɔgereba la yele ba yeti, “A dagi bia, soke ya en la.”

24Ti ba le yi' buraa wa n tabelɛ dɛna fua wa buyi' puan na yele en yeti, “Pɛgɛ Yinɛ! Tumam mi' ti burasɛka n tibɛ fum wa dela be'em daana.” 25Ti a lerege ba yeti, “Mam ka mi' a de be'em daana, bii a dagi be'em daana. Yele yinɛ ti mam mina dela, mam daa fɔ mɛ, gee nyaa nyɛta.” 26Ti Yuuduma wa le soke en yeti, “A iŋɛ fum la wani? A iŋɛ la wani pikɛ fum nini la?” 27Ti a lerege ba yeti, “Mam pun yele ya bala mɛ, gee ya ka boti ya wum. Wani ti ya le ɛɛra ya wum le yɛ'ɛha? Ya nyaa boti ya lebege la a zahereba bii?” 28Ti ba taaɛ en la tuurɛ, yɛta en yeti, “Fum n de a bura kaŋa wa zahera, gee tumam dela Moose zahereba. 29Tumam mi' ti Yinɛ yuum tɔgɛ mɛ bo' Moose, gee han dɛna bura kana wa, tumam ka mi' kaŋa n yehe zi'an na.” 30Ti buraa la lebehe ba yeti, “Yele pakerɛ yaa! Ya ka mi' kaŋa n yehe zi'an na, gee la bala za'a, kaŋa me n pikɛ mam nini wa. 31Tumam mi' ti Yinɛ ka kelehe be'em duma pu'uhegɔ, gee a kelehe la se'em n na'ahɛ en, gee nana a suboolum. 32Tu ka tabelɛ wum dɛ, timpaberɛ wa n pɔhɛ na wa paaɛ zina, ti nɛra n pikɛ nɛra n de fua a biilimen na nini. 33Buraa wa han ka ze'ele ni Yinɛ zi'an na, ka kan ta'am ni looe yele.” 34Ti ba lerege en yeti, “Fum ti ba dɔgɛ hɔ kɔ'ɔm bahɛ be'em zo'e zo'e puan na wa en zigeri ti fum pa'alɛ tumam?” Gee nyaa sa'ɛ buraa la ti ka kiŋɛ.

Sia puan fɔɔlum

35Ti Yezu en ta wum ti ba sa'ɛ buraa la mɛ pu'uhegɔ yire la puan, ti a ta nyɛ ka, nyaa soke ka yeti, “Fum nam asaala dayua la?” 36Ti buraa la soke en yeti, “Naa, a dela ani? Pa'ali mam ti n nam bu n.” 37Ti Yezu yele en yeti‘, “Fum pun nyɛ en mɛ. Se'em n ze' tɔgera la fum wa n bala’.” 38Ti a yeti, “N daana, mam nam ya.” Gee na'ahɛ en. 39Ti Yezu yeti, “Mam wa'am timpaberɛ wa zuo na ti n gakɛ mɛ, ti sɛba n fɔ la nyɛta, ti sɛba n nyɛti la tee fɔ.” 40Ti Farasii duma basɛba zɛ'a lɛm en, wum en yele se'em la, yele en yeti , “Tumam ka fɔ, bii fum ti'ihɛ tu fɔ mɛ?” 41Ti Yezu lerege ba yeti, “Ya han fɔ ni mɛ, ya kan tari ni be'em, gee yamam n yeti, ‘Tumam nyɛti me wa la,’ ya be'em la yeere la ya puan.”

Currently Selected:

Yɔn 9: GBTP

Highlight

Copy