Yɔn 8

1Gee ti Yezu zom Olive zoore la zuo ha. 2Ti yiimbeere bulika, ti a le wa'am Pu'uhegɔ yire la puan na. Ti nɛreba la za'a wa'am a zi'an na, ti a zi'ire pɔhɛ ba pa'alegɔ. 3Ti gɔnmi'ineba la, la Farasii duma la tari pɔka ti ba nyɔkɛ ka kabohi puan na, bahɛ ka ti ka zɛ'a ba woo nɛŋan, 4ti ba nyaa yele Yezu yeti, “Pa'ala, pɔka wa kɔ'ɔm bɔna bini mɛ tuna kabohi tuuma ti tu nyɔkɛ ka. 5#Malm 20.10; Tii 22.22-24 Pa'alegɔ la puan, Moose bo' tu nuurɛ ti tu lobe pɔge kaŋa taaba la kuga. Gee fum yeti bu?” 6Ba yele ŋwana ti ba makɛ Yezu mɛ, la ba ta'am dikɛ yele pagelɛ a zuo. Ti Yezu suure tiŋa tara a nu'dibila buura tiŋa. 7Ti ban sini gee zɛ'a sɔkera en la, ti a dooe zi'ire, yele ba yeti, “Bahɛ ya ti se'em n boi ya puan ka tabelɛ tum be'em, diŋɛ yia lobe pɔka wa.” 8Gee le suure le bɔ'ɔra tiŋa. 9Ban wum lebehego kuna wa la, ba foohe mɛ ayima ayima, pɔhɛ kiinduma la, ta gee Yezu ma'a, ti pɔka la zɛ'a a nɛŋan. 10Ti Yezu le dooe zi'ire, yele pɔka la yeti, “Pɔka wa, ba bɛɛ? Ba se'em ka gakɛ hɔ?” 11Ti pɔka wa yeti, “Naa, aayi, ba se'em se'em.” Ti Yezu yele en yeti, “Mam me kan gakɛ hɔ ti fum tuue ya. Kina, gee yehe nananawa yɛ'a ha, da le tum be'em.”]#8.11 Diimen diimen gulehegɔ la basɛba ka tari 7:53-8:1-11 wa.

Yezu n de timpaberɛ wa zuo niihum

12 # Mat 5.14; Yɔn 9.5 Ti Yezu le tɔgɛ bo' ba yeti, “Mam n de niihum bo' timpaberɛ wa. Se'em woo n dole mam kan malum kina lika puan, gee a wan tara vom niihum la.” 13#Yɔn 5.31 Ti Farasii duma la yele en yeti, “Fum nyaa tɔgeri la fum mɛŋa yele. Fum yetɔgum la woo ka le tara vuurɛ.” 14Ti Yezu lerege ba yeti, “Mam han pun nyaa tɔgera la n mɛŋa yele, mam yelehum la kelum dɛna la yelemɛŋerɛ, se'ere n sɔi la, mam mi' mam n ze'ele zi'an na, la mam n ye' zi'an. Gee yamam ka mi' mam n ze'ele zi'an na, bii mam n ye' zi'an. 15Yamam gakeri la nɛresaalenɛ, gee mam ka gakeri se'em. 16Gee la bala za'a, mam han pun gakera, mam gakerɛ la ani suŋa mɛ, se'ere n sɔi la, dagi mam ma'a n gakeri, gee mam la n Sɔ se'em n tum mam na la. 17#Tii 19.15 Ya ze'elego la puan, la gulehɛ yeti, “Aze'nyɛ yelemɛŋerɛ duma ba yi' han tɔgɛ, la ba'ahɛ ya. 18Mam tɔgɛ la n mɛŋa yele, ti Sɔ se'em n tum mam na la, me tɔgɛ n yele.” 19Ti ba soke en yeti, “Fum Sɔ wa bɛɛ?” Ti Yezu lerege ba yeti, “Ya pun ka mina mam, benti mam Sɔ la. Ya han mini mam, ya wan mini mam Sɔ la me.” 20A tɔgɛ tɔgebuna wa la se'em ma'a ti a bɔna pu'uhegɔ yire la puan, lɔgerɔ biŋere bɔ'ɔ la puan pa'ala nɛreba la. Ti se'em ka nyɔkɛ en, se'ere n sɔi la, a saŋa la ka paaɛ.

Yezu tɔgɛ a kum yele

21Ti Yezu le yele ba yeti, “Mam ye' mɛ, gee ya wan leen ɛɛra mam, gee ya wan ki ya be'em la puan. Mam n ye' zi'an la, ya kan ta'am wa'am bini na.” 22Ti Yuuduma la yɛta ba mɛhi yeti, “A yeti a ku la a mɛŋa bii? De vuurɛ n bala ti a yɛta yeti, ‘Mam n ye' zi'an la, ya kan ta'am wa'am bini na la bii’?” 23Ti Yezu yele ba yeti, “Yamam yehe la timpaberɛ wa zuo na, gee mam yehe la saazuo wa ha. Yamam dela timpaberɛ wa zuo dinɛ, gee mam dagi timpaberɛ wa zuo dinɛ. 24Mam yele ya ti ya wan ki ya be'em la puan. Ya sirum wan ki ya be'em la puan han dagena ya nam mɛ bo' mam ti mam dela mam n de se'em la.” 25Ti ba soke en yeti, “Fum dela ani?” Ti Yezu lebehe ba yeti, “Beni ti n pun le tɔgera bɔ'ɔra ya wa? 26Gee mam tari ya yɛla zo'e zo'e wan yele ni ya, gee gakɛ ya. Gee Se'em daana n tum mam na la dela yelemɛŋerɛ, ti mam muula bɔ'ɔra timpaberɛ wa la mam wum sɛla a zi'an la.” 27Ti ba ka bɔkɛ ti Yezu tɔgeri la a Sɔ la yele bɔ'ɔra ba'. 28Ŋwana ti Yezu yele ba yeti, “Ya han ta zɛkɛ Asaala Dayua wa saazuo ba'ahɛ, ya wan baŋɛ ti mam n bala, gee me baŋɛ ti mam ka iti sɛla n ma'a, gee mam tɔgeri yele ana wa dɔla la Sɔ la n pa'ali mam se'em. 29Se'em daana n tum mam na la, boi mɛ la mam. A ka bahɛ mam n ma'a, se'ere n sɔi la, mam tuni pɛɛra la a puurɛ paaɛ paaɛ saŋa woo.” 30En yeti yele ana wa woo la, ti nɛreba zo'e zo'e nam bo' en.

Sɛba n de Yezu dɔleba

31Ti Yezu yele Yuuduma sɛba n nam bo' en la yeti, “Ya han gurɛ la mam yelehum wa, ya sirum dela mam zahereba. 32Ya wan mina yelemɛŋerɛ la, ti yelemɛŋerɛ la bahɛ ti ya bɔna fai.” 33#Mat 3.9; Luk 3.8 Ti ba lebehe yele en yeti, “Tumam dela Aberaham yaahi, tu ka tabelɛ dɛna se'em da'aba. De vuurɛ dela deni ti fum yeti, ‘Tu wan bɔna fai’?”

34Ti Yezu lerege ba yeti, “Yelemɛŋerɛ yelemɛŋerɛ ti n yɛta ya wa. Se'em woo n tum be'em dela be'em da'aberɛ. 35Da'aberɛ ka boi wuuha yire la puan. Gee dayua la, kɔ'ɔm bɔna yire la puan mɛ wuuha. 36Bala zuo, dayua la han faaɛ fum bahɛ, fum yeti fum sirum bɔna la fai. 37Mam mi' ti ya dela Aberaham yaahi, gee la bala za'a, ya eere la fole ti ya ku mam, se'ere n sɔi la ya suya ka boti mam yelehum la.” 38Mam yeti ya la sɛla ti mam bɔna Sɔ la zi'an gee nyɛ, gee han dɛna yamam, yamam iti la sɛla ti ya wum ya sɔ la zi'an.

Yezu la Aberaham

39Ti ba lerege Yezu yeti, “Aberaham n de tumam sɔ” Ti Yezu yele ba yeti, “Ya han deni Aberaham kɔma, ya wan iti ni Aberaham itegɔ, 40gee nananawa, ya zigera mɛ ti ya ku mam, mam se'em n yele ya yelemɛŋerɛ se'ere ti n wum Yinɛ zi'an. Dagi bala ti Aberaham iŋɛ. 41Yamam kɔ'ɔm sirum ita la tuunsɛ'a ti ya sɔ la ita la.” Ti ba yele en yeti, “Tumam dagi kɔm-yooro, Tumam sɔ dela ayima, Yinɛ wa.” 42Ti Yezu yele ba yeti, “Yinɛ han sirum dɛna yamam Sɔ, ya wan nɔŋɛ ni mam, se'ere n sɔi la, mam ze'ele la a zi'an na bɔna ka'lam wa. Dagi mam mɛŋa n wa'am na, eŋa n tum mam na. 43Wani ti ya ka bɔkera mam yeti se'em wa? La dela, ya ka maahum ti ya nam mam yelehum wa zuo. 44Ya kɔ'ɔm ze'ele la ya sɔ Sagena la zi'an na, gee me looe ti ya tum ya sɔ tuunfi'iha sumboolum la. A dela nɛre kuura pi'ileŋo puan na, ka bɔta yelemɛŋerɛ, se'ere n sɔi la, yelemɛŋerɛ ka boi a puan. A han parum, a tɔgeri dɔla la a naanɛ n bala, se'ere n sɔi la, a dela pumparema, gee dɛna pumpɔreŋɔ woo sɔ. 45Gee mam n tɔgeri yelemɛŋerɛ la zuo, ya ka sakɛ bo' mam. 46Ya ani n wan ta'am pa'alɛ mam n tum be'em sebo? Mam han yɛta ya yelemɛŋerɛ, wani ti ya ka nam mam? 47Se'em woo en ze'ele Yinɛ zi'an na, wuni Yinɛ yelehum mɛ. Se'ere zuo ti yamam ka wuna yelehum la dela, ya ka ze'ele Yinɛ zi'an na.” 48Ti Yuuduma la lebehe en yeti, “Tu ka tari la buurɔ la tu yele fum yeti, fum dela Samariya, ti kulekpa'bɛ'a yaga fum zuo la?” 49Ti Yezu lerege ba yeti, kulekpa'bɛ'a ka yage mam zuo. Gee mam na'ahɛ n Sɔ la mɛ, gee ti yamam ka na'ahɛ mam. 50Gee la bala za'a, mam ka eere n mɛŋa pɛka. A yima n boi nara pɛka la. Eŋa n de gakera la. 51Yelemɛŋerɛ yelemɛŋerɛ ti n yɛta ya wa, “Ti se'em woo n gurɛ mam yelehum wa kankaŋi, kan malum ki.” 52Ti Yuuduma la yele en yeti“, “Tu nyaa baŋɛ ya ti kulekpa'bɛ'a n sirum yage fum zuo. Aberaham ki mɛ, bala mɛa ti nɔtɔgeheba la woo ki, gee la bala za'a, fum yeti mɛ ti, ‘Se'em woo n gurɛ mam yelehum wa kankaŋi kan malum ki?’ 53Fum gani tumam sɔ Aberaham n ki la mɛ? Nɔtɔgeheba la me ki mɛ. Fum tugum yeti fum dela ani?” 54Ti Yezu lerege ba yeti, “Mam han na'ahera n mɛŋa, n mɛŋa na'ahegɔ kuŋɔ dela yoo. La dela mam Sɔ la n na'aheri mam, Eŋa n bala ti ya yeti, ‘Yinɛ ma'a n de tumam Yinɛ la,’ 55la yamam n pun ka mina en la. Gee mam mi' en. Mam han yeti mam ka mi' en, n pareni mɛ wuu yamam wa la. Gee mam sirum mi' en mɛ, gee gurɛ a a yelehum la kankaŋi. 56Ya yaaba Aberaham yuum nyɛɛni mɛ ti a nyɛ mam kinɛ dabeherɛ la. En yuum nyɛ mam kinɛ la, a puurɛ yuum pee mɛ.” 57Ti Yuuduma la yele en yeti, “Fum nan ka paaɛ yuuma pihinuu, gee yuum bɔna la bɛ nyɛ Aberaham?” 58Ti Yezu yele ba yeti, “Yelemɛŋerɛ yelemɛŋerɛ ti n yɛta ya wa. Aberaham n wa bɔna la, ti mam pun bɔna mɛ.” 59Ŋwana ti nɛreba la pi'ihe kuga ti ba lobe en, ti a lile nɛreba la puan yehe pu'uhegɔ yire la puan.

Currently Selected:

Yɔn 8: GBTP

Highlight

Copy