Yɔn 21

Yezu niiɛ a mɛŋa pa'alɛ a zahereba bayopɔi.

1Yele ana woo n tole la, ti Yezu le niiɛ a mɛŋa pa'alɛ a zahereba la, Tiberiyasi Ateko la nuuren. En niiɛ a mɛŋa se'em n ŋwana. 2Zahereba la lagehɛ la taaba bɔna zi'an kayina, Simɔn Pita, Tɔmasi ti ba yi'ira liiberɛ la, Nataniyɛl n yehe Kana tinkãtɛ n boi Galilii sɔ'ɔlum puan la, Zebedii dayɔɔhi, la Yezu zahereba bayi'. 3#Luk 5.5 Ti Simɔn Pita yele ba yeti, “Mam ye' la zim nyɔka.” Ti bana la me woo yele en yeti, “Tumam wan doohe hɔ.” Ti ba za'a yehe ta zom uureŋɔ, sige ko'om la puan. Gee yu'uŋɔ kuŋɔ la, ba ka nyɔkɛ sɛ'sɛla.

4Beere n ta yilegɛ la, ti Yezu wa'am na zɛ'a ko'om la nɔgbene ha, gee ba ka baŋɛ ti eŋa n bala. 5Ti Yezu yi' ba na soke yeti, “N kɔma wa, ya ka nyɔkɛ sɛla, bii ya nyɔkɛ ya?” Ti ba lerege en yeti. “Aayi.” 6#Luk 5.6 Ti a yele ba yeti, “Lobe ya yuka la bahɛ uureŋɔ la zuɔ bɔba, gee ya wan nyɛ ziim.” Ti ba sirum lobe ba yuka la bala, koŋe ba ve'e, se'ere n sɔi la, zim la ba zo'e mɛ yuka la puan. 7Ti zahera se'em ti Yezu ba' nɔŋɛ la yele Pita yeti, “Daana n bala.” Simɔn Pita n wum ti Daana n bala la, ti a dikɛ fuo yɛ, se'ere n sɔi la a ze' ni la beele. Nyaa ɛkɛ lu ko'om la puan. 8Gee ti a zahereba bana la yee uureŋɔ la puan dɔɔra na, vɛ'ɛra yuka la ti ka pirɛ la zim, bala ma'a ti ba ka zaaɛ la doone. La wan dɛna wuu mi' ihe kila pia.

9Ban wa'am na paaɛ doone la, ba nyɛ ti bugum saana n ga' la bugum, ti zim paga bu zuo, ti boroboro me gã'a. 10Ti Yezu yele ba yeti, tari ya zim se'e ti ya nan nyɔgɛ la i se'e na pa'ahɛ. 11Ti Simɔn Pita lebe uureŋɔ la puan ta lagum ve'e yuka la dooe na, ti ka pirɛ la zim kãra ma'a n de zim kɔbega, la pihinuu la i ta'. Gee zim la n pun zo'e bala la, yuka la ka ahegɛ. 12Ti Yezu yele ba yeti, “Wa'am ya na sãɛ nuurɛ.” A zahereba la ayima me ka soke en yeti, “Fum dela ani?” Se'ere n sɔi la, ba za'a baŋɛ ya ti a dela Daana la. 13Ti Yezu nyaa dikɛ boroboro la bo' ba, gee dikɛ zim la me bo' ba bala mɛa. 14Butã n ŋwana ti Yezu niiɛ a mɛŋa pa'alɛ a zahereba la, en ihige kum puan na la.

Yezu la Pita

15Ban sãɛ ba nuurɛ la ba'ahɛ la, ti Yezu yele Simɔn Pita yeti, “Simɔn,Yɔn dayua wa, fum nɔŋɛ mam gana n zahereba bana wa?” Ti Pita lerege yeti, “Ɛ̃ɛ, n Daana, fum mi' ti mam nɔŋɛ hɔ.” Ti Yezu lebehe en yeti, “Yi bihera n pebibehi wa.” 16Buyi' puan ti Yezu le yele Pita yeti, “Simɔn, Yɔn dayua wa, fum nɔŋɛ mam?” Ti Pita yele en yeti, “Ɛ̃ɛ, n Daana, fum mi' ti mam nɔŋɛ hɔ.” Ti Yezu yele en yeti, “Tara n piihi wa suŋa.” 17Ti Yezu le yele en butã puan yeti, “Simɔn,Yɔn dayua wa, fum nɔŋɛ mam?” Ti Pita suure sagum, se'ere zuo, Yezu n yele en butã puan yeti, “Fum nɔŋɛ mam?” Ti a yele Yezu yeti, “N Daana, fum mi' sɛla woo, fum mi' ti n nɔŋɛ hɔ.” Ti Yezu yele en yeti, “Bihera n piihi wa. 18Yelemɛŋerɛ ti n yɛta fum wa. Fum daa nan ihigere na la, fum mɛŋa n ni bobe fum sɛganɛ yɛ'ɛha fum boti zi'an. Gee fum han ta kuregɛ, fum wan tiɛ fum nu'uhi, ti nɛre se'em wan lu' fum sɛganɛ, tari fum kiŋɛ zi'an ti fum kan bɔta ti fum kiŋɛ.” 19(A yeti ŋwana na, a pa'ali la kum sebo taaba ti Pita wan ta ki ti Yinɛ yu'urɛ nyɛ pɛka.) En yele ŋwana ba'ahɛ la, a yele Pita yeti, “Dɔla mam.”

Yezu, la a zahera se'em ti a nɔŋɛ la.

20 # Yɔn 13.25 Ti Pita ŋmɛregɛ nyɛ zahera sɛka ti Yezu ba' nɔŋɛ la n dole ba. Eŋa n daa zi' lɛm Yezu, zaanuurɛ dia saŋa la, daa soke yeti, “Daana, ani n de' en yeti a koohe fum la?” 21Pita n nyɛ en la, a yele Yezu yeti, “Daana, gee ena me?” 22Ti Yezu yele en yeti, “La han dɛna mam suboolum ti a vɔna gura ti n ta lebe na, la nyɛ fum la bɛ? Dɔla mam.” 23Ti la to'e zi'an woo nɛreba puan ti, Yezu zahera se'em ti a ba' nɔŋɛ la kan ki. Gee ti Yezu me ka yele en ti a kan ki, gee a yeti, “La han dɛna mam sumboolum ti a vɔna gura ti n ta lebe na, la nyɛ fum la bɛ?”

24Yezu zahera ena n bala n tɔgeri yɛla wa, gee gulehɛ a wa. Tu mi' ti yele ana wa dela yelemɛŋerɛ. 25Gee yɛla a sɛ'a zo'e zo'e me boi ha, ti Yezu tum, ti ba han yele ni ti, ba gulehɛ a za'a yele, yele ta ba'ahɛ, mam mi ti timpaberɛ wa tari ka ni gɔnɔ seto ti ba wan gulehɛ ni la.

Currently Selected:

Yɔn 21: GBTP

Highlight

Copy