Yɔn 12

Mɛɛri sɔ̃ Yezu la tuulum kaam

(Matu 26.6-13; Maki 14.3-9)

1La gee la dabeha ayoobe la azɔɛtole de'eŋo la paaɛ, ti Yezu wa'am Bɛtani na, Lazarus la ti a daa ihige en kum puan la yire. 2Ti ba dugɛ zaanuurɛ dia bo' en. Ti Maata tɔta dia la, ti Lazarus lagum zi'an kaaɛ ti ba dɛla taaba, bamam sɛba woo n boi bini ti ba di la Yezu la. 3#Luk 7.37-38 Ti Mɛɛri dikɛ tuulum kaam n tari yuuŋo suŋɔ, tari na ka'ɛ yeele Yezu nama, dikɛ a zonto viilum kaam la sɔ Yezu nama. Ti yire la za'a to'e la kaam la nyuuŋo suŋɔ la. 4Gee Yudasi Isikariyɔte en de Yezu zahera ayima la, (se'em n wan koohe en la), yeti, 5“Ŋwani ti fum ka dikɛ kaam wa koohe ligekɔba kɔbehi sitã ti ba dikɛ ligeri la suŋɛ naheduma?” 6(En yele ŋwana wa dagi la naheduma la yele n pakɛ en, gee a nu'uhi n wugɛ, gee ti eŋa me n zãli ba ligeri la, ti sɛla woo n ni wa'am na, a ni zu ãaɛ mɛ). 7Ti Yezu yele en yeti, “Bahɛ pɔka wa bããlam. Pɔka wa da' kaam wa biŋe mɛ gura mam laarɛ daarɛ. 8#Tii 15.11 Naheduma wan bɔna la ya mɛ daarɛ woo, gee mam kan bɔna la ya bala.”

Ba maahum ti ba ku Lazarus

9Yuuduma nɛrekuuŋɔ la n ta baŋɛ ti Yezu boi Bɛtani timpaberɛ puan la, ba zo'e zo'e wa'am me na, dagi la Yezu ma'a zuo, gee ba nyɛ Lazarus la ti Yezu vo'e en kum puan la. 10Ŋwana zuo ti malema kiinduma la ku nuurɛ mu'ɛ nini ti ba ku Lazarus pa'ahɛ, 11se'ere en sɔi la, eŋa vo'ore la zuo ti Yuuduma la zo'e zo'e zageha Yuuduma pu'uhegɔ la gee nam Yezu.

Yezu kɛ̃ Yerusalɛm

12Ti yiimbeere ti nɛrekuuŋɔ la en ka tã ita en wa'am azɔɛtole de'eŋo la na la, wum ti Yezu ye' Yerusalɛm na. 13#Yoo 118.25, 26 Ti nɛreba la aahum kunkɔɔreŋɔ yehe tu'uha en gee vɔɔla yeti,

“Hozaana!

Yinɛ sum boi la se'em n wa'am Daana la yu'urɛ puan na la.

Izirale naba la!”

14Ti Yezu nyɛ bompaalega, zom yaga ka zuo, wuu lan gulehɛ gɔŋɔ la puan yele se'em yeti,

15 # Zɛk 9.9 “Da zɔta dabeem Zaayɔn poyua wa,

Bihɛ, fum naba la n bala kina na la,

a yaga la bumpaalega zuo.”

16Yezu zahereba la ka bɔkɛ yele ana wa yia yia ha la, gee Yezu n da ta to'e a suŋa ba'ahɛ la, ti ba nyaa tiɛ ti yele ana wa woo gulehɛ bɔna gɔŋɔ la puan mɛ doohe Yezu puan, ti ba dikɛ a za'a iŋɛ en. 17Nɛrekuuŋɔ la n daa boi la Yezu ti a yi' Lazarus yɔɔ la puan la, gee vo'e en kum la puan la, daa kelum kɔ'ɔm tɔgera yele la mɛ. 18La me dela, nɛreba wum mɛ ti a tum la daalehum kana zuo, ti nɛrekuuŋɔ yehe bibigera tu'uha en. 19Ti Farasii duma la nyaa yɛta taaba yeti, “Ya nyɛti, tu kan ta'am iŋɛ se'ere. Bihɛ ya, timpaberɛ wa za'a n bala bibigere dɔla en wa.”

Giriki nɛreba basɛba n boti ba nyɛ Yezu.

20Nɛresɛba n wa'am na ti ba na'ahɛ azɔɛtole de'eŋo la saŋan la, basɛba dela Giriki duma. 21Ti ba wa'am na nyɛ Filipi n yehe Bɛtisaada tiŋa n boi Galilii sɔ'ɔlum puan la yele en yeti, “Naa, tu boti ni ti tu nyɛ la Yezu wa.” 22Bala ti Filipi kiŋɛ ta yele Anduru, ti Anduru la Filipi nyaa paaɛ Yezu zi'an yele en. 23Ti Yezu lerege ba yeti, “Saŋa la paaɛ ya ti asaala dayua la nyɛ pɛka. 24Yelemɛŋerɛ yelemɛŋerɛ ti n yɛta ya wa, ti beeleho han ka lu tintɔnɔ puan pu'ɛ, bu kelum dɛna la beeleho. Gee bu han lu timpaberɛ pu'ɛ yehe na, bu wan wam biili zo'e zo'e. 25#Mat 10.39; 16.25; Mak 8.35; Luk 9.24; 17.33 Se'em en nɔŋɛ a vom wan bɔregɛ bɔ bahɛ, ti se'em n ka gagɛ a vom zuo timpaberɛ wa zuo, a n tugum wan tara vomkanba'ahɛ paaɛ paaɛ. 26Se'em n wan dɛna mam yameŋa dela, a dɔla mam. Mam n boi zi'an la, n yameŋa la me wan bɔna la bilam. Se'em woo n de mam yameŋa tuna bɔ'ɔra mam la, Sɔ la wan zɛkɛ en.

Yezu tɔgɛ a kum yele

27“Nananawa, mam suure sagum mɛ. Gee n wan yeti bu? N yeti ‘N Sɔ, yehe mam namehegɔ saŋa wa puan bii’? Aayi n kan yele bala, namehegɔ wa zuo ti mam wa'am na paaɛ saŋa kana puan wa.

28N Sɔ, bo' fum yu'urɛ wa pɛka.” Ti kua ze'ele saazuo ha tɔgɛ bahɛ na yeti, “Mam bo' n yu'urɛ la pɛka gee wan le bo' de pɛka le yɛ'ɛha.” 29Ti nɛrekuuŋɔ la n ze' la en gee wum kua la, basɛba yeti, “Saa n damɛ, ti basɛba me yeti, suŋera n tɔgɛ bo' en na.” 30Ti Yezu lerege ba yeti, “Kua la wa'an la yamam zuo na gee dagi mam. 31Tiŋa la gakerɛ paaɛ ya, se'em n sɔi timpaberɛ wa bihera la dika saŋa paaɛ ya. 32Gee han dɛna mam, ba han ta zɛkɛ mam saazuo timpaberɛ wa zuo, n wan ve'e nɛreba zo'e zo'e wa'am n zi'an na.” 33Yezu yele ŋwana pa'ala la kum sebo taaba ti a wan ki. 34#Yoo 110.4; Aza 9.7; Eze 37.25; Dan 7.14 Ti nɛrekuuŋɔ la lebehe en yeti‘, “Tumam wum nɔze'elego gɔŋɔ la puan ti la yeti, Kiresta la wan bɔna la wuuha kan ki. Wani ti fum yɛta yeti, Ba wan ta zɛkɛ asaala dayua la saazuo? Ani n de asaala dayua wa?” 35Ti Yezu yele ba yeti, “Niihum la wan bɔna la ya la dabeha fii wa, bala biheri ya kina ti niihum la nan boi wa, ti lika la da ta wa'am na pi' ya. Ya han kina lika puan, ya ka mi' yan ye' zi'an. 36Niihum wa n nan boi la ya wa, nam ya bo' niihum la, la ya dɛna niihum la kɔma.”

Yezu n yele ba ŋwana ba'ahɛ la, a kiŋɛ mɛ ta sugɛ a mɛŋa ti ba da nyɛta en.”

Nɛreba n bu'uri Yezu yele

37La Yezu n tum daalehum kekeko nɛreba la ninin la, ba zo'e zo'e ka nam bo' en. 38#Aza 53.1 Gee ŋwana wa iŋɛ ti la doohe yelese'ere n tɔgɛ doohe nɔtɔgeha Azaaya puan se'em yeti,

“N Daana, ani n nam tu yelehum la,

gee ani ti Daana pa'alɛ a kinkpaŋa?”

39Ba kan ta'am nam, se'ere n sɔi la Azaaya daa purɛ pa'ahɛ yeti,

40 # Aza 6.10 “Yinɛ mɛŋa n pi' ba nini,

gee kãbɛ ba suya,

ti ba nini da nyɛta,

ti ba suya me da bɔkera yɛla, ti ba da tee ba puti'ira lebena

ti n tibɛ ba.”

41Azaaya n yele dina wa la dela a yuum nyɛ la na'ahegɔ seko n de Yezu dinɛ, bala ti a tɔgɛ a yele la. 42Gee la bala za'a, pun ta ta' la kpɛ'ɛnduma la zo'e zo'e, nam bo' en mɛ. Gee Farasii duma la zuo, ba ka ta'am muulɛ dɛ se'ere n sɔi la, ba zoti la dabeem ti ba wan sa'ɛ ba zamehegɔ yire la puan bahɛ. 43Se'ere n sɔi la, ba ba' nɔŋɛ la asaala pɛka, gana pɛka sɛka n ze'eti Yinɛ zi'an na.

Yezu pa'alegɔ la kilihego

44Ti Yezu kaahɛ bahɛ na yeti, “Se'em woo n nam bo' mam, ka nam bo' la mam ma'a gee a nam bo' la se'em n tum mam na la. 45Se'em woo me n nyɛ mam, a nyɛ se'em daana n tum mam na la mɛ. 46Mam wa'am timpaberɛ wa zuo me na woo niihum la, ti fum se'em woo n nam bo' mam kan yee lika puan. 47Mam ka gakeri se'em n wum mam yelehum wa gee ka tara bɔ. Se'ere en sɔi la, mam ka wa'am na ti n gakɛ timpaberɛ wa mɛ, gee n tugum faaɛ ka bahɛ. 48Se'em n zagehɛ mam gee ka to'e mam yelehum la, tari se'em n wan gakɛ en mɛ. Ba'ahegɔ daarɛ la, yelehum sebo ti mam tɔgɛ wa n wan dɛna gakera. 49Se'ere en sɔi la, mam ka tɔgɛ la mam mɛŋa n boti se'em, gee Sɔ la n tum mam na la n bo' mam nuurɛ, mam wan tɔgɛ sɛla, la mam wan yele sɛla. 50Mam me mi' suŋa ti eŋa n boti n yele se'ere dela vomkanba'ahɛ yele. Bala zuo, mam n tɔgeri sɛla la dela Sɔ la n kɔ'ɔm bɔta ti n tɔgɛ se'em n bala.”

Currently Selected:

Yɔn 12: GBTP

Highlight

Copy