Yɔn 11

Yezu vo'e Lazarus kum puan

1 # Luk 10.38-39 Buraa kayima n wa lu bã'a, ti ka yu'urɛ yi'ira Lazarus, yehe Bɛtani timpaberɛ, timbila sɛka n de Mɛɛri la a suuɔ Maata timpaberɛ la puan. 2#Yɔn 12.3 Mɛɛri kana n tabelɛ dikɛ tuulum kaam ka'ɛ yeele Yezu nama, dikɛ a zonto viilum kaam la Yezu nama la. Pɔge kana wa n bala ti ka taya dɛna Lazarus bɛ̃'ɛra wa. 3Ŋwana ti pɔgehi wa en de suurɔ wa tum sɔɔleŋa bo' Yezu yeti, “Daana, se'em ti fum nɔŋɛ la bɛ̃'ɛri mɛ.” 4Gee Yezu n wum sɔɔleŋa wa la, a yeti, “Ba'an wa kan ku kum, gee ka tugum wan bo' la Yinɛ pɛka, ti Yinɛ dayua wa doohe bini nyɛ pɛka.” 5Lan de se'em la dela, Yezu nɔŋɛ Maata la a suuɔ (Mɛɛri) la Lazarus mɛ, 6gee en wum sɔɔleŋa la ti Lazarus bɛ̃'ɛri mɛ la, a yee la eŋa n boi zi'an la dabeha ayi'.

7Pooren, ti Yezu yele a zahereba la yeti, “Bahɛ ya ti tu lebe ya Yudiya tiŋa le yɛ'ɛha.” 8Ti a zahereba la yele en yeti, “Rabi, daarɛ wa ti Yuuduma daa zigera ti ba lobe fum la kuga la, ti fum le yeti tu kiŋɛ bini?” 9Ti Yezu lerege ba yeti, “Dagi gogo kaareŋa pia la ayi' n ni dɛna wuntɛɛŋa? Sɛba n kini niihum saŋa la ka ŋmɛ'ɛri nama, se'ere n sɔi la, ba nyɛti timpaberɛ wa zuo niihum la. 10Gee sɛba duma n kini yu'uŋɔ la, ŋmɛ'ɛri la nama, se'ere n sɔi la, niihum la ka boi ba puan.” 11Ti en yele ŋwana ba'ahɛ la, a yele ba yeti, “Tu zɔ Lazarus gã' giha mɛ, gee mam ye' la bini ti n ta niiɛ en.” 12Ti a zahereba la yele en yeti, “Daana, a han giha, se'ere ka daani en.” 13Gee Yezu tɔgeri la Lazarus kum n bala, gee bamam ti'ihɛ ti a yeen tɔgera la gɔɔm yele. 14Ti Yezu nyaa anregɛ bo' ba yeti, “Lazarus ka boi. 15Gee yamam zuo, la ani mam suŋa la mam n ka boi bini ha wa. Ŋwana ti ya wan nam. Gee yeen bahɛ ya ti tu kiŋɛ a zi'an.” 16Ti Tɔmasi se'em ti ba yi'ira liiberɛ la yele a zahereba taaba la yeti, “Bahɛ ya ti tu doohe en kiŋɛ, ta lagum kɔ'ɔm ki la en.”

Yezu n de se'em n ihigere kum, gee dɛna vom

17Yezu n ta paaɛ Yudiya tiŋa la, a wum ti ba pi' Lazarus la dabeha anaahi zina. 18Bɛtani timpaberɛ wa ka zaaɛ la Yerusalɛm, la ani wuu miila ayi' la, 19ti Yuuduma timpaberɛ nɛreba zo'e zo'e wa'am na ti ba lagum pã'ahɛ Maata la Mɛɛri, ba taya kum la puan. 20Maata n wum ti Yezu kini na la, a yehe tu'uhɛ en mɛ sore, gee ti Mɛɛri yee yire. 21Ti Maata yele Yezu yeti, “Daana, fum daa han boni ka'lam, mam taya wa kan ki ni. 22Gee la nananawa wa me, mam mi' ti fum han soke Yinɛ sɛla woo, a wan bo' fum.” 23Ti Yezu yele en yeti, “Fum taya la wan vo'e a kum la puan.” 24Ti Maata lebehe Yezu yeti, “Mam mi' ti a wan ta vo'e la ihigere daarɛ la n de ba'ahegɔ daarɛ la.” 25Ti Yezu yele en yeti, “Mam n de ihigere la, la vom la. Se'em n nam mam, la han pun ki, gee ba wan vo'e, 26ti se'em woo n vɔi gee nam mam kan malum ki. Fum nam dina wa?” 27Ti a yele Yezu yeti, “Ɛ̃ɛ n Daana, mam nam ya ti fum de Kiresta la, Yinɛ dayua la, se'em n wan wa'an timpaberɛ wa zuo na la.”

Yezu kuunɔ

28Maata n tɔgɛ ŋwana ba'ahɛ la, a kɛ̃ mɛ ta waahum bo' Mɛɛri a suuɔ la ma'a bããlam yeti, “Pa'ala la boi ka'lam gee yi'ira hɔ.” 29Mɛɛri n wum bala la, a ihige kalam kiŋɛ la Yezu zi'an. 30Bala ma'a ti Yezu nan ka kɛ̃ timpaberɛ la puan na, gee a kelum bɔna la zi'an ti Maata tu'uhɛ en la. 31Ti Yuuduma la n wa'am na zi'an yire la puan pã'aha Mɛɛri la n nyɛ ti a ihige bala kalam yɛ'a la, ti ba me ihige dɔla a poore tɛ'ɛha ti a ye' la yɔɔ la puan ti a ta kele. 32Ti Mɛɛri wa'am na paaɛ zi'an ti Yezu bɔna la, nyɛ Yezu, kpa' duma Yezu nɛŋan, gee yele en yeti Naa, “Fum daa han boni ka'lam, mam taya wa kan ki ni!”

33Yezu n nyɛ ti Mɛɛri kɛla la, ti Yuuduma sɛba me n doohe Mɛɛri poore na la me kɛla la, ti la ve'e Yezu paaɛ paaɛ. 34Ti a soke yeti, “Ya biŋe en la bɛ?” Ti ba yele en yeti, “Daana, wa'am na bihɛ.” 35Ti Yezu kele. 36Ti Yuuduma la basɛba yɛta taaba yeti, “Bihɛ en nɔŋɛ Lazarus se'em?” 37Gee ti basɛba me yeti, “Eŋa se'em n daa pikɛ fua nini la, kan ta'am gu' ni ti buraa wa da ki ni?”

Yezu vo'e Lazarus kum puan

38Ti la le ve'e Yezu, ti a kiŋɛ paaɛ yɔɔ la zi'an, ti ku dela yoko, ti ba bilege taŋa lige ku nuurɛ la. 39Ti Yezu bo' nuurɛ yeti, “Bilege ya kugere la yɔɔ la nuuren.” Ti Maata n de Lazarus wa n ki wa taya ayima la, yele Yezu yeti, “Daana, la wan ba' fi'ira, se'ere en sɔi la, ban pi' en, dabeha a naahi n ŋwana zina.” 40Ti Yezu yele en yeti, “Mam ka yele fum ti fum han nam, fum wan nyɛ Yinɛ paŋa n ani se'em?” 41Ti nɛreba la bilege kugere la. Ti Yezu gorege tɔ saazuo gee yeti, “N sɔ, mam bo' fum fara, la fum n kelehe mam. 42Mam mi' ti saŋa woo, fum kelehe mam mɛ, gee n yeti ŋwana wa la nɛrekuuŋɔ wa n ze' ka'lam wa zuo, ti ba ta'am nam ti fum n tum mam na.” 43En tɔgɛ ŋwana ba'ahɛ la, a tahɛ mɛ la kukɛ'ɛŋa yeti, “Lazarus, yehe na.” 44Ti buraa wa n ki wa vaaɛ ihige yehe na, ti a nu'uhi la a nama bobe la tama, ti tanɛ bobe a zuo. Ti Yezu yele nɛreba la yeti, “Lorege ya en bahɛ ti a kiŋɛ.”

Ba zigeri ti ba ku Yezu

(Matu 26.1-5; Maki 14.1-2; Luki 22.1-2)

45Ti Yuuduma la n doohe la Mɛɛri yehe tu'uhɛ Yezu la, n nyɛ Yezu en iŋɛ sɛla woo la, ti ba zo'e zo'e nam Yezu. 46Gee ti ba puan basɛba me kiŋɛ Farasii duma la zi'an ta yele ba sɛla woo ti Yezu iŋɛ. 47Ti malema kiinduma la, la Farasii duma la yi' kiinduma lagehɛ ti ba sɔhɛ. Nyaa yele ba yeti, “Tu yeti tu iŋɛ la wani la buraa wa? Ka ba' tuna la daalehum zɔ'ɔra. 48Tu han bahɛ en ti a ita ŋwana yɛ'a ha, nɛra woo wan nam en, ti bala me wan bahɛ ti Aromduma wa'am na gbirege tu tuulum yire wa, la tu timpaberɛ wa bahɛ.” 49Gee ba puan, ayima yu'urɛ n yi'iri Kaifase, dɛna malema kiima yuum dinɛ puan la, n yele ba yeti, “Ya ka mi' sɛla la fii me. 50Ya ka mi' ti la ani suŋa ti nɛreyinɛ ki bo' nɛrekuuŋɔ, gana timpaberɛ la nɛreba za'a n ki.” 51A daa ka yele dina wa la a mɛŋa paŋa, gee en de malema kiima la yuum dinɛ puan la, ti a purɛ ti Yezu wan ki bo' timpaberɛ la, 52dagi bamam timpaberɛ la ma'a, gee ba lagehɛ sɛba woo n de Yinɛ kɔma, yiregɛ la wa'am bɔbeyinɛ na. 53Yehe daan dinɛ daarɛ, Yuuduma kiinduma wa daa ku la nuurɛ ti ba ku Yezu.

54Bala zuo la, Yezu ka le ɛɛra bala fai Yuuduma la puan, gee a bahɛ a timpaberɛ la mɛ, gee kiŋɛ timpaberɛ kayima ti ba yi'ira Efraim n boi goo bɔba ha la, ta bɔna bilam la a zahereba la.

55Ti Yuuduma azɔɛtole de'eŋo la pɔra, ti nɛreba zo'e zo'e yehe timbibehi puan yɛ'ɛha Yerusalɛm ti ba ta pee ba mɛhi gee gura azɔɛtole de'eŋo la. 56Ti nɛreba la ta ɛɛra Yezu, gee nyaa sɔkera taaba pu'uhegɔ yire la puan yeti, yamam ti'ihɛ la ŋwani? “A wan sakɛ wa'am de'eŋo wa puan na, bii a wan kan sakɛ?” 57Bala ma'a la, ti malema kiima duma la, la Farasii duma la pun bo' la nuurɛ yeti, Fum se'em woo n nyɛ Yezu zi'an, fum yele tu, ti tu nyɔkɛ en.

Currently Selected:

Yɔn 11: GBTP

Highlight

Copy