Tuuma 9

Sɔɔl teere

(Tuuma 22.6-16; 26.12-18)

1Ŋwana woo en daa iti la, Sɔɔl me daa kelum mu'ɛ la nini tara nyɔ̃pɔ̃hega la kua yɛla dɔla Daana la zabera la, nyaa pun kiŋɛ malema nɛŋadaana la zi'an, 2ta yele en ti a bo' en gɔnɔ ti a tari kiŋɛ Damasekuse zamehegɔ yiya la puan ta bihɛ a han nyɛ ti se'em boi bini dɔla Sore la, dɛna buraahi bii pɔgehi, a nyɔgɛ ba bobe ba lebe Yerusalɛm na. 3Nananawa, en ye' ta pɔra Damasekuse la, a yeti a bihɛ ti bugum en bala ze'ele saazuo nyakɛ kaaɛ en mum. 4Ti a lu tiŋa, gee wum ti kua yi'ira en yeti, “Sɔɔl, Sɔɔl, ŋwani ti fum dɔla mɛleha mam?” 5Ti Sɔɔl lebehe soke yeti, “Fum dela ani n Daana?” Ti leregere wa'am na yeti, “Mam dela Yezu, se'em ti fum dɔla mɛleha la. 6Gee ihege kɛ̃ tiŋa la puan, gee nɛra wan yele fum sɛla en de fum iŋɛ.” 7Ti burase'ehi n dole en kina la, maam zɛ'a se'ere en sɔi la, ba wum la kua gee ka nyɛ se'em. 8Ti Sɔɔl ihege tiŋa la, ti a nini piga, gee a ka nyɛti sɛla. Bala ti ba gi' a nu'o vɛ'ɛra en ta kɛ̃' Damasekuse. 9Dabeha atã ti Sɔɔl fɔ ka nyɛta, gee me ka di bii nyu sɛla.

10Ŋwana woo la, ti Yezu dɔla ayima n boi Damasekuse la puan ti a yu'urɛ yi'ira Ananiya. Ti a nyɛ lilegere, ti Daana la tɔgɛ bo' lilegere la puan yeti, “Ananiya,” ti a lerege yeti, “Bihɛ Mam n ŋwana n Daana.” 11Ti Daana la yele en yeti, “Ihege kiŋɛ sadɔɔ seko ti ba yi'ira kɔ tuuntɔɔ la, la fum ɛ Yudasi yire, kɛ̃ de puan soke buraa n yehe Tasuse na ti ka yu'urɛ yi'ira Sɔɔl. Bihɛ, Nananawa, buraa wa boi la pu'uhegɔ puan, 12ti la lilege bo' en ti a nyɛ ti buraa yu'urɛ en yi'iri Ananiya kɛ̃ a zi'an na, dikɛ a nu'uhi pagelɛ a zuo ti a lebe nyɛta.” 13Gee Ananiya lerege en yeti, Daana, “Mam wum nɛreba zo'e zo'e , be'em zo'e zo'e sebo taaba ti buraa kana tum fum nɛresunduma en boi Yerusalɛm, 14gee nyaa to'e kpe'eŋo ka'lam, malema kiinduma la zi'an ti a pagɛ sɛba woo n yi'iri fum yu'urɛ la.” 15Gee Daana la yele en yeti, “Kiŋɛ, gee a dela lɔkɔ ti mam looe ti a tara mam yu'urɛ wa bo' sɛba n dagi Yuda buuri la, ba naduma, la Izirale buuri la. 16Mam mɛŋa wan pa'alɛ en, en de a namehɛ namehɛ kãra sɛ'a mam yu'urɛ wa muulegɔ zuo.” 17Ŋwana ti Ananiya kiŋɛ, ta paaɛ kɛ̃ yire la puan. Dikɛ a nu'uhi pagelɛ a zuo, gee yele en yeti, “N suuɔ Sɔɔl, Daana Yezu se'em n niiɛ a mɛa pa'alɛ hɔ fum boni sore zuo yɛ'a ka'lam na la, n tum mam ti n wa'am na ti fum nini la le nyɛta, gee ti Fa'a Sia la me pirɛ hɔ.” 18Bilam bilam ti sɛla ana wuu zim pɔgerɔ la ze'ele a nini la puan lu na, ti a nini la le nyɛta. Ti Sɔɔl nyaa ihege ti a bo' en ko'om sua. 19Ti en di dia la, ti a paŋa le lebe na.

Dabeha zo'e zo'e ti a bɔna la Yezu zamehereba la Damasekuse.

Sɔɔl muulɛ Damasekuse puan

20Bilam bilam ti Sɔɔl pɔhɛ muula Yezu yele zamehegɔ yire la puan yeti, “Yezu sirum dela Yinɛ Dayua.” 21Ti la iŋɛ sɛba woo en kelehe la pakerɛ, ti ba sɔkera yeti, “Dagi buraa kana n bala n pɔgelum nɛreba Yerusalɛm ha ti ba yi'iri yu'dina wa zuo la? A ka wa'am ka'lam na bala zuo na? Ti a nyɔgɛ ba mɛ bobe ta bo' malema kiinduma la?” 22Ti Sɔɔl malum pa'ahera la paŋa, tɔgɛ nyaŋɛ Yuuduma la en ki'ire Damasekuse la, doohe la eŋa en nyaŋɛ pa'alɛ ba sira sira ti Yezu sirum dela Kiresta la.

Sɔɔl piiɛ Yuuduma nu'uhen

23 # 2 Kor 11.32-33 Lan iŋɛ dabeha fii la, ti Yuuduma la ɛɛra sose'ere ti wan doohe ku en, 24gee Sɔɔl baŋɛ ba maaheŋɔ la za'a mɛ, ba guri tiŋa la nayahi la za'a mɛ pigera bulika la yu'uŋɔ za'a ti ba wan nyɛ Sɔɔl ku, 25gee zahereba la basɛba tari en la yu'uŋɔ bahɛ ti a sige pi'ɔ puan dikɛ doohe nangoone zuo sigehera pi'ɔ la fifihe ti ku ta ze'ele tiŋa.

Sɔɔl boi Yerusalɛm

26Sɔɔl n wa'am na paaɛ Yerusalɛm la, maahum a mɛŋa ti a lagum Yezu zahereba la, gee ba za'a me zoti en me, se'ere n sɔi la, ba ka nam ti a dela Yezu zahera. 27Gee ti Banabase to'e en, tari en wa'am tuntuneba la zi'an na, nyaa pa'alɛ ba sore la zuo ti a nyɛ Daana la se'em, ti a tɔgɛ bo' en se'em, la en ze'ele Damasekuse muulɛ la buraanɛ Yezu yu'urɛ la puan se'em. 28Bala ti Sɔɔl bɔna la ba, ti ba lagum kina gee lɛbera na Yerusalɛm puan, tɔgera la buraanɛ Daana yu'urɛ la puan. 29Ti Sɔɔl tɔgera gee ŋmɛ'ɛra nɔkpɛ'ɛma la Hiburuduma sɛba en tɔgeri Giriki la, ti ba maahum ti ba ku en. 30Ti sakereba la n ta baŋɛ la, ba tari en kiŋɛ la Kasariya, ta bahɛ ti a tole Tasuse. 31Gee ŋwana ma'a saŋa la, ti Lageŋɔ la n boi Yudiya, Galilii, la Samariya tihi puan la za'a nyaa tari la suma'ahum, gee ze'ele suŋa. Ti ba kina la Daana la zoolum Fa'a Sia la sumbugehum puan, ti ba zɔ'ɔra ba kãlɛ puan.

Aniyase nyɛ tibegɔ

32Pita n daa dole kaara la, a ta kiŋɛ la nɛresunduma sɛba n boi Lida la. 33Bilam ti a nyɛ buraa ti ka yu'urɛ n yi'iri Aniyase, n bɛ̃' gã'a ka suŋɔ zuo yuuma anii, dɛna kɔɔreŋɔ. 34Ti Pita yele en yeti, “Aniyase, Yezu Kiresta tibɛ hɔ mɛ. Ihege la fum kilum fum suŋɔ la.” Ti bilam bilam, ti a ihege. 35Ti nɛresɛba woo n kɛ̃'ɛ̃ri Lida la Saron tihi puan n nyɛ buraa wa la, ba ŋmɛregɛ la ba suya bo' Daana la.

Pita boi Lida la Yopa

36Yopa puan, Yezu zahera ayima n boi bini ti a yu'urɛ yi'ira Tabita ti de vuurɛ dɛna la Dɔkasi. A pirɛ itesuŋɔ la bu'a. 37Sankaŋa puan la, ti a lu bã'a, ki. Ban sɔ en ba'ahɛ la, ba tari en ta biŋe la bɔ'ɔ n tugelum saazuo ha puan. 38Lida tiŋa wa n ka zaaɛ la Yopa la, ti zahereba sɛba n boi la n wum ti Pita wa'am bini na la, ti ba tum buraahi siyi a zi'an na suhera en yeti, “Wa'am tu zi'an kalum na, da gu'um.” 39Bala ti Pita sirum ihege doohe la buraahi la ti ba wa'am na paaɛ. Ti ba tari en zom bɔ'ɔ la n tugelum bɔna saazuo la. Ti pokɔpa la woo zɛ'a la en kɛla, gee pa'ala lɔge kãra la lɔge bibehi seto ti Dɔkasi pɛ en daa nan boi la ba la. 40Ti Pita bahɛ ti ba za'a yehe, gee ti a kpa' duma pu'uhɛ, gee ŋmɛregɛ tɔ kum la gee yeti, “Tabita, ihege.” Ti kum la pikɛ bu nini, ti en nyɛ Pita la, ti a ihege zi'ire. 41Ti Pita tiɛ a nu'o gurɛ en, suŋɛ en ti a ihege ze'ele. Ti a nyaa yi' nɛresunduma la la pokɔpa la, dikɛ en voto pa'alɛ ba. 42Ti yele dina wa to'e Yopa za'a, ti nɛreba zo'e zo'e nam Daana la. 43Ti Pita kɛ̃ Yopa puan dabeha kekeko la buraa kayima yu'urɛ n yi'iri Simɔn n de gbanzaba.

Currently Selected:

Tuuma 9: GBTP

Highlight

Copy