Tuuma 10

Pita la Koneliyose

1Buraa kayima n boi Kasariya puan, ti ka yu'urɛ yi'iri Koneliyose, bihera pɛntiireba kɔbega ti ba yi'ira ba Itali tansugere. 2A dela nɛra suŋɔ paaɛ paaɛ, dɛna Yinɛ zɔta eŋa la a yire za'a, gee bɔ'ɔra nɛreba yabi yabi gee pu'uha Yinɛ saŋa wuu. 3Ti daarɛ deyima wuntɛɛŋa gogo kaareŋa atã bɔba, ti a nyɛ ti lilegere ti de yu'ɛ, bo' en, ti a nyɛ ti Yinɛ Suŋera ayima kini na gee yɛta en yeti, “Koneliyose.” 4Ti a bihɛ Suŋera la ti dabeem kɛ̃ en paaɛ paaɛ, gee soke en yeti? “La dela beni Daana?” Ti la lerege en yeti, “Fum pu'uhegɔ, la fum bu'a la za'a zom paaɛ Yinɛ nɛŋan mɛ dɛna tuulum tiihegɔ. 5Bala zuo la, tum nɛreba Yopa ti ba ta ɛ nɛra ayima yu'urɛ n yi'iri Simɔn ti ba yi'ira Pita la zi'an. 6A kɛ̃'ɛ̃ri la Simɔn se'em n de gbanzaba la yire n boi ateko nuuren la.” 7Suŋera la n tɔgɛ bo' en ba'ahɛ gee kiŋɛ la, a yi' la a yire la yamehi siyi, la pɛntiira suŋɔ se'em kpe'eŋo en zuni la sɛba en biheri en daare woo la, 8yele ba sɛla woo, gee tum ba Yopa.

9Ti yiimbeere wuu wuntɛɛŋa zuo tiŋasuka, ti ban boi sore zuo pɔra tiŋa la puan la, bala ma'a ti Pita me zom gɔhegɔ zuo ti a pu'uhɛ. 10Sankaŋa puan la, ti a kom duna ti a bɔta sɛla ti a di, ti ban boi bini dugera la, ti a zɛɛ guum zaahum. 11A nyɛ mɛ ti saazuo yu'ɛ ti sɛla ana wuu ganɛ n karegɛ, yirege ti sɛla gurɛ a nɔya anaahi la ze'ele saazuo sigehera en fiifiihe tiŋa wa zuo na. 12Ti duhi nama anaahi anaahi, bunvuula, la saazuo niihe en boi ku puan. 13Ti a wum ti kua yɛta en yeti, “Pita, ihege la fum ku ba obe.” 14Gee Pita yeti, “La kan ta'am iŋɛ bala n Daana, se'ere n sɔi la, mam ka tabelɛ di galeŋɔ bii kihere sɛla.” 15Ti kua le la yele en yi'i yeti, “Sɛla ti Yinɛ pee, da yi' la kihere bunɔ.” 16Lilegere dina wa iŋɛ la bala sugum nuuren butã, ti n yeti a bihɛ la, ti ganɛ la zom la saazuo.

17Pita n ze' yɛli ti'iha lilegere vuurɛ en de se'em la, a yeti bihɛ la ti buraahi la ti Koneliyose tum la n bala paara na, zɛ'a Simɔn yire zanɔren, gee sɔkera de yele. 18Nyaa yi'ira baha na ti ba soke nyaa Simɔn se'em ti ba yi'ira Pita la kɛ̃'ɛ̃ri la yire la puan. 19Pita n kelum bɔna bini ti'iha lilegere la yele la, ti Fa'a Sia la yele en yeti, “Bihɛ, buraahi sitã n eere fum. 20Nananawa, ihege sige tu'uhɛ ba, la fum doohe la ba kiŋɛ, da bɔ'ɔra, se'ere n sɔi la, mam tum ba.” 21Ŋwana ti Pita sige ta paaɛ buraahi la yele ba yeti, “Bihɛ ya, Mam n bala ti ya ɛɛra la, beni zuo ti ya kina na?” 22Ti ba lerege yeti, “Koneliyose n de pɛntiireba kɔbega nɛŋadaana, dɛna nɛre tuuntɔɔ, dɛna Yinɛ zɔta la, ti Yuuduma la za'a yi'ira en yu'sunɛ la, ti Fa'a Suŋera pa'alɛ en ti a tum yi' fum ti fum wa'am a yire na ti a wum fum tari se'ere ti fum yele.” 23Ŋwana ti Pita nyaa tari ba kɛ̃, ta bo' ba ga'aregɔ zi'an.

Ti yiimbeere ti a ihege doohe la ba, ti Yopa suurɔ basɛba, lagum kɔlegɛ en. 24Yiimbeere ti ba wa'am na paaɛ Kasariya puan. Koneliyose n pun gura ba la zuo, a yi' a mabiihi la sɛba n ba' dɛna a zɔduma lagehɛ na. 25Pita n wa'am na paaɛ la, ti Koneliyose tu'uhɛ en, dɔbelɛ a nɛŋan na'ahɛ en. 26Gee Pita yele en mɛ yeti, “Ihege, mam me yeen dɛna la asaala.” 27Ti Pita n tɔgɛ la en la, a kɛ̃ deen ta nyɛ ti nɛreba zo'e zo'e n lagehɛ, 28ti a yele ba yeti, “Ya mɛhi mi' ti la dela kihere bo' Yuda nɛra, ti a lagum bii a wa'am na kaaɛ sɛba n dagi Yuda buuri la, gee Yinɛ n lilege pa'alɛ mam yeti, n da yi' asaala ti kihere bii galeŋɔ lɔkɔ. 29Bala zuo ban tum yi' mam la, n ka de n zagehɛ. Gee nyaa bahɛ ti n soke se'ere zuo ti ya tum yi' mam la?”

30Ti Koneliyose lerege yeti. “Dabeha anaahi n ŋwana zina, ti mam wa pu'uha n yire, wuu sankana wa, gogo kaareŋa atã bɔba, mam yeti n bihɛ ti buraa n yɛ lɔgerɔ ti tu nyagera bala zɛ'a mam la. 31Yele mam yeti, ‘Koneliyose, fum pu'uhegɔ la fum bu'a la paaɛ Yinɛ nɛŋan mɛ dɛna tuulum tiihegɔ. 32Bala, tum nɛreba Yopa, ti ba ta soke Simɔn se'em ti ba yi'ira Pita la yele. A kɛ̃'ɛ̃ri la Simɔn la n de gbanzaba yire n lɛm la ateko la puan. 33Ŋwana zuo ti n kɔ'ɔm tum ba fum zi'an na, ti fum me iŋɛ sum zo'e zo'e wa'am na wa. Bala zuo la, tu za'a ze' la Yinɛ nɛŋan ka'lam ti tu kelehe sɛla woo ti Daana bo' fum nuurɛ ti fum yele tu.”

Sɛba n dagi Yuda buuri wum Yelesuma la

34 # Tii 10.17 Ti Pita pɔhɛ ya'ɛ a nuurɛ tɔgera bɔ'ɔra ba yeti, “Mam nananawa yelemɛŋerɛ bɔkɛ ya ti Yinɛ ka gaheri nɛreba, 35gee tiŋa woo puan, se'em n zoti en, gee tuna sɛla n de ma'a ti Yinɛ bɔta. 36Ya mi' yelehum sebo ti a yuum tum bo' Izirale buuri la, muula suma'ahum yelehum Yezu Kiresta puan. Eŋa n de sɛla woo Daana la. 37Ya mi ti Yelehum buna wa to'e Yuda za'a mɛ, pɔhɛ Galilii, Yɔn en yuum muulɛ ko'om sua yelehum ba'ahɛ la. 38Yinɛ n bi'ihɛ Yezu en yehe Nazareti na la, la Fa'a Sia, la paŋa se'em, la en yuum eere tuna sum se'em, gee tibera sɛba woo ti Sagena la mugeha ba, se'ere n sɔi Yinɛ en boi la en zuo. 39Tumam dela aze' nyɛ duma bo' en tum yele sɛ'a woo Yudiya la Yerusalɛm tihi puan, ti ba ku en doohe la ban yule en tia zuo la; 40gee ti Yinɛ vo'e en dabeha atã daarɛ, gee bo' en fole ti a niiɛ a mɛŋa. 41A yuum ka niiɛ a mɛŋa bo' la nɛra woo, gee tumam sɛba ti Yinɛ pun looe ti tu dɛna aze' nyɛ duma bo' en la ma'a, tumam sɛba n di gee nyu la en, en ihege a kum la puan la. 42Ti a bo' tu nuurɛ ti tu tɔgɛ bo' nɛreba, gee muulɛ ti eŋa n de se'em ti Yinɛ looe en ti a dɛna vɔpa la ki'induma gakera. 43Nɔtɔgeheba la woo yuum yele la eŋa yele ti, se'em woo n nam en, a be'em wan saalum Yezu yu'urɛ la zuo.”

Fa'a Sia la sige sɛba n dagi Yuuduma la zuo

44Pita n boi bini tɔgera ŋwana la, ti Fa'a Sia la sige sɛba woo n boi bini wum yelehum la zuo na. 45Ti sakereba la en ŋma en doohe Pita na la zɛ'a yɛli, la Fa'a Sia bo'olum la n lagum sige sɛba n dagi Yuda buuri la zuo. 46Se'ere n sɔi la, ba wum nɛreba la n tɔgeri yetɔgum buuri buuri, gee na'aha Yinɛ se'em la. Ŋwana ti Pita yeti, 47“Se'em boi wan ta'am gu' nɛreba wa ti ba da sɔ ko'om, sɛba n to'e Fa'a Sia la bo'olum wa wuu tumam wa?” 48Ŋwana ti Pita nyaa bo' sore ti ba sɔ nɛreba la ko'om Yezu Kiresta yu'urɛ puan. Ti nɛreba yele Pita ti a kɛ̃ la ba yuue fii wa.

Currently Selected:

Tuuma 10: GBTP

Highlight

Copy