Tuuma 28

Pɔɔl boi Malita tiŋa

1Gee tumam n paaɛ doone suŋa ba'ahɛ la, ti tu nyaa baŋɛ ti timbila la en boi ko'om tiŋasuka la yu'urɛ en yi'iri Malita. 2Ti tiŋa la nɛreba pa'alɛ tɔ ba itesuŋɔ en ka tari makerɛ. Lan wa dɛna sanire saŋa ti saa pɔhɛ niia ti la ma'ara la, ba tuurɛ la bugum gee yi' tu za'a ti tu zi'ire kaaɛ bɔ ɔɔha. 3Ti Pɔɔl me lagehɛ dɔpu'uha na biŋe lɔɔha ita bugum la puan, ti kampia ɛkɛ yehe na, bugum la wɔlegɔ la zuo, vile Pɔɔl nu'o kankaŋi yula. 4Tiŋa la nɛreba en nyɛ ti bunsɛla wa yule a nu'o la, ti ba waahena bɔ'ɔra taaba yeti, “Burakana wa ba'ahum dɛna la nɛrekuura; bala en sɔi ti ka pun piiɛ ko'om puan kum la, buurɔ ka bo' ka sore ti ka vɔna.” 5Gee ti Pɔɔl me mɛhegɛ kampia la bahɛ bugum la puan gee ti be'em ka paaɛ en. 6Ti nɛreba la guri mɛ ti a iŋa fuuhum, bii a lu ki bilam bilam. Gee ban gu'uhi yuue, ta nyɛ ti sɛla sɛla ka ita Pɔɔl la, ti ba tee ba puti'ira le yeti a dela bagerɛ.

7Nananawa zɛ'kana ti nɛreba kɛ̃'ɛ̃ra la, mɛa puan, samana zo'e zo'e en boi bini dɛna tiŋa la n boi ko'om tiŋasuka la naba yu'urɛ en yi'ira Pabiliyuse dinɛ, se'em n to'e tumam, bihɛ tumam suŋa dabeha atã. 8Ti la iŋɛ, ti Pabiliyuse wa sɔ lu bã'a gã'a la ɔɔrɔ la nyɛ'a. Ti Pɔɔl kiŋɛ ta bihɛ en, gee tibɛ en doohe la a dikɛ la a nu'uhi pagelɛ a zuo. 9Dina en iŋɛ tole la, ti tiŋa la puan nɛresɛba woo en gee tara bã'ahi yima yima la, me wa'am na, ti Pɔɔl tibɛ ba. 10Ti nɛreba wa na'ahɛ tumam paaɛ paaɛ la ba bo'olum. Pooren ti tumam ta yeti tu kiŋɛ la, ti ba tari tumam en boti sɛla woo la na iŋɛ uureŋɔ seko ti tu yeti tu zom la puan.

Pɔɔl paaɛ Arome

11Ŋmarehi sitã en tole, ti tumam ihege la uureŋɔ la. Ku wa yee la tiŋa la en boi ko'om tiŋasuka la puan. Ku wa bɔna bini la ɔɔrɔ saŋa la puan, dɛna Alɛgezandiriya uureŋɔ, ti liiba paga la ti ba na'aha la bɔna ku puan. 12Tu pɔhɛ la Sirakuse, ze'ele bilam dabeha atã; 13Gɔlum na paaɛ Aregium, dikɛ daarɛ deyima bilam, ti kusebego ze'ele tiŋanuurɛ bɔba vuke na, ti yi'i daarɛ la ti tu wa'am na paaɛ Puteyoli. 14Bilam ti tu nyɛ suurɔ tuseto, ti ba me yi' tu ti tu wa'am na kɛ̃ la ba dabeha ayopɔi. Tumam n doohe se'em wa'am na paaɛ Arome na n bala. 15Ti suurɔ la n boi Arome n wum ti tu kini na la, yehe la zaaɛ zaarɛ Apiyosi Da'a bɔba ha la, la Saama Vo'ohego Zi'ihi Sitã la puan ha tu'uhɛ tu na. Pɔɔl en ta nyɛ ba la, a bo' la Yinɛ fara gee ti a iŋa kpeŋe.

16Tumam n wa'am na na kɛ̃ Arome puan la, ba bahɛ Pɔɔl mɛ ti a bɔna a ma'a, la pɛntiira sɛka en guri en la.

Pɔɔl la Yuuduma kiinduma Arome

17Dabeha atã daarɛ, ti Pɔɔl yi' kiinduma la en biheri Yuda buuri wa la. Ban lagehɛ na ba'ahɛ la, ti a yele ba yeti, “N suurɔ, la mam en pun ka iŋɛ se'ere tuue tu nɛreba Yuuduma wa, bii tu yaabeduma kiha wa la, gee la bala za'a, ba nyɔkɛ mam mɛ Yerusalɛm, dikɛ mam ta'ahɛ Arome duma ha. 18Ban ta viihɛ mam bihɛ la, Arome duma wa daa boti ba bahɛ mam mɛ, se'ere n sɔi la, vuurɛ daa ka boi kua la ti ba daa bɔta ti ba ku' mam la puan. 19#Tuum 25.11 Gee Yuuduma la en ka sakɛ la zuo, la daa pɛregɛ mam mɛ, ti n suhɛ timbihega kpɛ'ɛma la ti a bahɛ ti n paaɛ timbihega nɛŋadaana Kaiza nɛŋan, la mam pun ka tari zɛregerɛ se'ere la n mɛŋa tiŋa duma la. 20Yele dina wa zuo, ti mam suhɛ sore ti n nyɛ ya, la n tɔgɛ la ya, lan de Izirale beere puti'irɛ wa zuo ti ba ba' mam la bãhi wa.” 21Ti ba lebehe en yeti, “Tumam ka to'e gɔŋɔ Yudiya, doohe fum puan. Tu suuɔ la kuyina me n kini na saŋa woo la me ka tabelɛ yele fum yele be'o ti tu wum. 22Gee tumam wan bɔta ti tu wum la fum mɛŋa zi'an, fum ti'ihɛ se'em doohe sadɔkuna wa ti tu mina ti zi'an woo ba zɛregera ku me wa.”

Pɔɔl muulɛ Faarɛ yelehum la Arome

23Ban daa ta ze'ele dabeherɛ ti ma le tu'uhɛ la ena la, ba wa'am la a ga'aregɔ zi'an na, ba nɛrekuuŋɔ. Ze'ele bulika tara tara la zaanuurɛ, ti a tu' yele la n ani se'em bo' ba, yɛta ba Yinɛ sɔ'ɔlum la n ani se'em, zigera ti a tee ba puti'ira la Yezu, ze'ele Moose ze'elego la, la nɔtɔgeheba la puan. 24Ti basɛba sakɛ doohe la Pɔɔl n yele se'em la, gee basɛba me zagehɛ ti bamam kan nam. 25Bala, ba ka sakɛ bo' taaba, bala zuo la, ban yiregerɛ la, Pɔɔl tɔgɛ yele deyima ma'a yeti: “Fa'a Sia la yuum tari la buurɔ la a yele ya yaabeduma doohe nɔtɔgeha Azaaya puan yeti,

26 # Aza 6.9-10 ‘Kiŋɛ nɛrebana wa zi'an ta yele ba yeti,

Ya sirum wan kelehe, gee ya kan malum bɔkɛ,

ya me sirum wan bihɛ, gee ya kan malum nyɛ.

27Se'ere n sɔi la, nɛrebana wa suya ba' bukɛ mɛ,

ti ba tuba li' ka wuna,

ti ba mum ba nini,

ti ba da biha la ba nini la,

gee me da kɛleha la ba tuba,

gee me da bɔkera la ba suya la ba ta'am ŋmɛregɛ na

ti n tibɛ ba'.’

28Bala, ye mini ya zina dabeherɛ wa yeti, Yinɛ faarɛ yelehum buna wa muulɛ bo' Sɛba en dagi Yuda buuri la mɛ, ti ba me wan kelehe bu.” [29En tɔgɛ yele ana wa ba'ahɛ la, ti Yuuduma la yiregera gee nyɔna taaba la ninmu'urɛ.]#28.29 Diimen diimen gulehegɔ la tuseto tari ka'lam.

30Pɔɔl kɛ̃'ɛ̃ri la bilam yuuma ayi', bihera a mɛŋa, gee tɔ'ɔha sɛba woo en kini a zi'an na la, 31gee muula Yinɛ sɔ'ɔlum la yele, gee pa'ala Yezu Kiresta yele la sukpe'ene, ti sɛla ka gu'ura en.

Currently Selected:

Tuuma 28: GBTP

Highlight

Copy