Tuuma 22

1“N suurɔ la n sɔduma wa, kelehe ya nananawa, mam me buurɔ n de se'em ti n yeti n dikɛ biŋe ya nɛŋan wa.”

2Ban wum ti a tɔgeri la Hiburu yetɔgum puan bɔ'ɔra ba la, ti ba malum iŋɛ bããlam pa'ahɛ. Ti a nyaa yeti:

3 # Tuum 5.34-39 “Mam dela Yuda buuri, ti ba dɔgɛ mam Tasuse tiŋa n boi Kilikiya sɔ'ɔlum puan la, gee mam zo'e la tinkana puan, ti mam zi'ire Gamaliyɛl nama tiŋa, ti a pa'alɛ mam gee, zamehi mam nima nima ti yaabeduma pa'alegɔ la, ti mam mu'ɛ la nini boi Yinɛ woo yamam za'a n ana se'em zina wa. 4#Tuum 8.3; 26.9-11 Mam pɔgelum Sore wa mɛ, pun ta paaɛ n kuura ba, doohe la mam yuum ni bobe sɛba n boi Sore wa puan ba buraahi la ba pɔgehi, tari ba ta pagɛ paka deto puan, 5malema nɛŋadaana la la pu'uhegɔ yire kiinduma la woo wan tɔgɛ mam yele pa'alɛ ya. Bama zi'an ti mam to'e gɔŋɔ ta bo' tu suurɔ n boi Damasekuse. N kiŋɛ bini ti n ta bobe la sakereba la n boi bini, gee tari ba lebe Yerusalɛm ti ba mɛlehɛ ba.

Pɔɔl tɔgɛ a teere yele

(Tuuma 9.1-19; 26.12-18)

6“Mam n boi sore zuo kina ta pɔra Damasekuse la, wuu wuntɛɛŋa zuo tiŋasuka, ti mam ta yeti n bihɛ la, ti bugum kãtɛ n ze'ele saazuo ha nyakɛ kaaɛ mam ze'ele. 7Ti mam lu tiŋa, gee wum ti kua yi'iri mam yeti, ‘Sɔɔl, Sɔɔl, beni zuo ti fum mɛleha mam?’ 8Ti mam lerege yeti, ‘Fum dela ani n Daana?’ Ti kua la yele mam yeti, ‘Mam dela Yezu n yehe Nazareti na la, Mam n bala ti fum dɔla mɛleha la.’ 9Lan iŋɛ ŋwana la, yelemɛŋerɛ sɛba n dole la mam la nyɛ bugum la, gee ka wum se'em n tɔgeri bɔ'ɔra mam la kua. 10Ti mam soke yeti, ‘Beni ti n nyaa wan iŋɛ n Daana?’ Ti Daana la yele mam yeti, ‘Ihege la fum kɛ̃ Damasekuse. Bilam ti ba wan ta yele fum, sɛla woo ti mam looe fum ti fum tum.’ 11Mam ka nyɛti, doohe la bugum la n ba' nyakɛ ku n nimbaahi la zuo, ti sɛba n dole mam la yari gurɛ n nu'o ve'e mam ta kɛ̃ Damasekuse puan.

12“Buraa kayima n de Ananiya kaabɛ ka mɛŋa bo' ze'elego la, ti Yuda buuri la woo n kɛ̃'ɛ̃ri Damasekuse puan la yi'ira ka yu'sunɛ la, 13Kaŋa n wa wa'am na, zɛ'a lɛm mam gee yeti, ‘N suuɔ Sɔɔl, lebe nyɛta.’ Sankaŋa ti mam lebehe nyɛta gorege saazuo nyɛ en. 14Ti a nyaa yele mam yeti, ‘Ti yaabeduma Yinɛ n looe fum ti fum baŋɛ a suboolum, fum nyɛ Tuntɔɔ Daana wa, gee wum a kua. 15Se'ere n sɔi la, fum yeti fum dɛna la a Aze' nyɛ daana bo' timpaberɛ wa za'a nɛreba la fum n nyɛ gee wum se'ere wa. 16Bala, nananawa, ŋwani ti fum gu'una? Ihege ze'ele, la fum sɔ ko'om, ti ba saalum fum be'em bahɛ, fum yi'iri a yu'urɛ la.’

Ba tum Pɔɔl sɛba n dagi Yuda buuri la zi'an

17“Mam lebe Yerusalɛm na ba'ahɛ la, ti daarɛ deyima ti n bɔna bini pu'uha, pu'uhegɔ yire la puan, ti guum zɛɛ mam, 18ti n nyɛ en ti a yɛta mam yeti, ‘Iŋɛ kalam la fum yehe Yerusalɛm wa tɔtɔ, se'ere n sɔi la, ba kan to'e fum yeti fum tɔgɛ mam yele se'em wa.’ 19Ti mam yeti, ‘N Daana, ba mɛhi mi' ti, mam doohe zamehegɔ yiya woo puan me, ŋmɛ'ɛra gee pagera sɛba woo n nam bo' fum la mɛ. 20#Tuum 7.58 Ti sansɛka ti ba ta ka'ara fum Aze' nyɛ daana Siteven ziim bahera la, mam mɛŋa n ze' bini pa' ba poore ti ba ku, gee to'ohe ba n lobere en kuura la futo zãla.’ 21Ti a yele mam yeti, ‘Kiŋɛ, gee n yeti n tum fum la zaaɛ zaarɛ, sɛba n dagi Yuuduma zi'an.’ ”

Pɔɔl la Arome tugum duma

22Ŋwana wa beene woo la, ti nɛreba la kelehe en mɛ, gee kɔ'ɔm malum tahera baha na yeti, “Ba'ahɛ ya nɛre-ina taaba yehe timpaberɛ wa zuo. Se'ere n sɔi la, a pun dagena ba bo' en sore ti a vɔna.” 23Ban taheri bala la, gee yɛɛha ba futo la fɔmbera tiŋa gee vaara tintɔnɔ lɔbera saazuo la, 24ti pɛntiireba kpɛ'ɛma la bo' sore ti ba tari en lebe pɛntiireba bɔŋa zi'an la puan, la ba viihɛ en gee ŋmɛ' en ti a baŋɛ se'ere zuo ti kaahi dɔɔrɔ tuna sigera a zuo wa. 25Gee ban lu' en ta' la gu'uhi la, Pɔɔl yele pɛntiireba nɛŋa daana se'em en biheri pɛntiireba kɔbega la yeti, “La de de sore ti fum ŋmɛ' Arome tiŋambia sɛka ti ba ka nyɛ ka tuure?” 26Pɛntiireba nɛŋadaana en biheri pɛntiireba kɔbega wa wa n wum ŋwana la, a kiŋɛ la pɛntiireba kpɛ'ɛma la zi'an ta soke ba yeti, “Fum boi beni ti fum iŋɛ la bem n bala? Buraa wa dela Arome wa tiŋambia.” 27Ti pɛntiireba kpɛ'ɛma la wa'am na soke Pɔɔl yeti, “Alaa, yele mam, fum dela Arome tiŋambia?” Ti Pɔɔl yeti, “Ɛ̃ɛ.” 28Ti pɛntiireba kpɛ'ɛma la yeti, “Mam yɔ la kɔɔba zo'e zo'e gee nyaŋɛ to'e n tiŋambiine gɔŋɔ wa.” Ti Pɔɔl yele en yeti, “Ba nuun dɔgɛ mam la Arome tiŋa wa.” 29Bilam bilam ti sɛba woo n ze' ni ti ba viihɛ en la fɔ lebe pooren gee bahɛ en, ti pɛntiireba kpɛ'ɛma la me zɔ dabeem, se'ere n sɔi la, a baŋɛ ti Pɔɔl dela Arome tiŋambia gee ti a sina gee ba' en.

Pɔɔl paaɛ Kiinduma nɛŋan

30Pɛntiireba kɛ'ɛma la n boti a baŋɛ sɛla ti Yuuduma tara zuuha Pɔɔl la zuo la, ti yiimbeere ti a yu'ɛ en yehe na, gee bo' malema kiinduma la ba kima la za'a nuurɛ ti ba lagehɛ. Ti a nyaa tari Pɔɔl sige ba ze'a na, bahɛ ti Pɔɔl zɛ'a ba nɛŋan.

Currently Selected:

Tuuma 22: GBTP

Highlight

Copy