Tuuma 21

Pɔɔl kiŋɛ Yerusalɛm

1Tumam n bahɛ nɛreba la gee zom tu uureŋɔ yɛ'a la, tu kɔ'ɔm kiŋɛ la tuuntɔɔ ta paaɛ Kose, ti yiimbeere ti tu paaɛ Arodisi, ze'ele bilam tole Patara. 2Ti tu nyɛ ti uureŋɔ boi bilam maahum ti ku kiŋɛ Fonisiya, ti tu zom, ti ku yɛ'a. 3Ti tu ta nyɛta Sapuruse, ti tu bahɛ tiŋa la tu gɔbega bɔba gee kiŋɛ ta paaɛ Siriya kiŋɛ ta sige Taai, se'ere n sɔi la uureŋɔ la zɛ la lɔgerɔ bɔta ti ba yehe lɔgerɔ la bilam. 4Ti tu nyaa ɛ zahereba n boi ze'a bilam, kɛ̃ bilam dabeha ayopɔi. Ti Sia la tɔgɛ bo' nɛreba bilam, ti ba yele Pɔɔl ti a da kiŋɛ Yerusalɛm. 5Tu kɛ̃'a dabeha la bilam n ba'ahɛ la, tu bahɛ bilam mɛ gee le to'e tu sore. Ti sakereba la za'a, ba pɔgeba la ba kɔma beele tu ta yehe tiŋa la puan. Bilam ti tu za'a kpa' duma mɔgerɛ la nuuren pu'uhɛ, 6gee keehe taaba, ti tumam kiŋɛ ta zom uureŋɔ ti bamam me lebe kula ba yiya.

7Tumam n yehe Taai tiŋa na daarɛ la, tu kelum kina la bala ta paaɛ Pitolemayese, pu'uhɛ suurɔ gee kɛ̃ la ba daanyinɛ. 8#Tuum 6.5; 8.5 Yiimbeere ti tu wa'am na paaɛ Kasariya, ta kɛ̃ Filipi n de ayehemuulɛ daana, se'em n de ba bayopɔi ayima la yire, kɛ̃ la en. 9Filipi wa tari la pɔgesa'kaha anaahi, en puti. 10#Tuum 11.28 Tumam n wa bɔna la ba dabeha zo'e zo'e la, ti nɔtɔgeha ayima yu'urɛ n yi'iri Agabuse ze'ele Yudiya wa'am na. 11Wa'am tumam zi'an na, paaɛ na dikɛ Pɔɔl sɛganɛ lu' a mɛŋa nama la a nu'uhi, gee yeti, Fa'a Sia la yeti, “Ŋwana ti Yuuduma la n boi Yerusalɛm la wan ta lu' burasɛka n sɔi sɛganɛ wa, dikɛ en bu sɛba n dagi Yuda buuri la.” 12Tumam n wum ŋwana la, tumam la sakereba la n boi bilam la tɔgɛ mɛ la en ninmu'urɛ ti a da kiŋɛ zom Yerusalɛm. 13Ti Pɔɔl lerege ba yeti, “Ya iti la bem n bala, ya kele mɛ Sagena mam suure? N yele ya ti, mam ka maahum ti ba bobe mam ma'a, gee n pun ki Yerusalɛm, Daana Yezu yu'urɛ wa zuo.” 14En ka maahum ti a tee a puti'irɛ la, tu yee la suram, han dagena tu yeti, “Daana la sumboolum tum.”

15Dabeha ana n ta tole la, ti tu maahum, to'e sore yɛ'a zɔna Yerusalɛm. 16Ti zahereba la basɛba n yehe Kasariya la, lagum doohe tu, tari tu na paaɛ Neeson n yehe Sapuruse tiŋa la yire, se'em en de yia yia zahera la ayima la. Se'em ti tu wan kɛ̃ en la en la, en bala.

Pɔɔl bihɛ Yemesi Yerusalɛm

17Tumam n paaɛ Yerusalɛm la, suurɔ la n boi bini la to'e tu mɛ suŋa. 18Yiimbeere ti Pɔɔl tari tu kiŋɛ ti a ta bihɛ Yemesi, a ta paaɛ la ti kiinduma la za'a boi mɛ. 19Ti en pu'uhɛ ba ba'ahɛ la, a pɔhɛ mɛ lɔɔha yele yele doohe sɛla ti Yinɛ tum bo' sɛba n dagi Yuda buuri la eŋa tuuma la puan. 20Ban wum yɛla la ba'ahɛ la, ba pɛgɛ la Yinɛ. Gee nyaa yele en yeti, “Fum nyɛ ya, tu suuɔ wa, bihɛ sakereba en de tuha tuha bilam se'em nyaa pa'ahɛ Yuuduma la puan, gee ti ba za'a me nini kɔ'ɔm mu'ɛ la ze'elego la. 21Ba pun yele ba mɛ, fum yele, ti fum pa'ali Yuuduma sɛba woo n boi la sɛba n dagi Yuda buuri la mɛ ti ba zagehɛ Moose, gee le yeti fum yeti ba ti ba da ŋmata ba kɔma, gee me da dɔla malema la. 22Beni n de tu iŋɛ? Ba wan ba'ahum wum ti fum wa'am na. 23#Kãl 6.13-21 Bala zuo la, doohe sɛla ti tu wan yele la. Tu tari la buraahi sinaahi n biŋe ba nuurɛ la pɔta. 24Bala, pa'ahɛ ba puan la fum lagum malum peere malema la la ba, gee yɔ ti ba siie ba zuto la. Bala nɛrawoo wan baŋɛ ti sɛla ka boi nɛreba n yele fum yele se'em la, gee ba wan nyɛ ti fum mɛŋa dole gee nana ze'elego la mɛ suŋa suŋa. 25#Tuum 15.29 Gee han dɛna sɛba n dagi Yuuduma gee lebege sakereba la, tumam tum gɔŋɔ bo' ba ha yeti, ba da dita sɛla ti n kaabɛ bo' bagerɛ, ba da dita ziim, la ba da dita sɛla ti ba kɛge ku, gee yehe ba mɛhi yaluntuuma puan.” 26Ti Pɔɔl tari buraahi wa, eŋa n pee a mɛŋa ba'ahɛ la yiimbeere, kɛ̃ pu'uhegɔ yire la puan la ba, ta malum peere malema dabeha la za'a nɛrekuuŋɔ la nɛŋan, ta paaɛ se'em ma'a ti ba wan kaabɛ kabegɛ bo' ba woo ayima ayima la.

Ba nyɔkɛ Pɔɔl Pu'uhegɔ yire la puan

27Dabeha ayopɔi la n pun ta wuna ti a ba'ahɛ me la, ti Yuda buuri sɛba n ze'ele Esiya na, gee nyɛ Pɔɔl pu'uhegɔ yire la puan la, gbirege nɛrekuuŋɔ la za'a bahɛ. Ti ba nyɔkɛ Pɔɔl, 28gee tahera yeti, “Tu Izirale taaba wa, suŋɛ ya mam. Burakana wa n bala pa'ala nɛrawoo zi'an woo ti ba da nana tumam nɛreba, tu ze'elego, la ze'kana wa. Sɛla n pun gana bala dela a tari la Giriki nɛreba wa'am na kɛ̃ pu'uhegɔ yire wa puan, galum tuulum zi'an wa.” 29#Tuum 20.4 Se'ere n sɔi ŋwana wa la dela, nɛreba la pun diŋɛ nyɛ la Tirofimuse n de Ɛfisu nɛra la ti Pɔɔl dɔla la en tiŋa puan ha la, ti ba kɔ'ɔm ti'ihɛ ti a tari en kɛ̃ pu'uhegɔ yire la puan me na. 30Ti tiŋa la za'a gbirege, ti nɛreba la zɔ lagehɛ taaba kalam. Gurɛ Pɔɔl vuue en yehe pu'uhegɔ yire la yiŋa, gee yu' kulehi la bilam bilam. 31Ban zigeri ti ba ku en la, ti sɔɔleŋa paaɛ pɛntiireba nɛŋa daana la yeti, Yerusalɛm za'a gbiregeri mɛ 32Ti bilam bilam ti a yehe pɛntiireba la ba nɛheduma en biheri pɛntiireba kɔbega kɔbega zɔ paaɛ zi'an la puan. Nɛrekuuŋɔ en nyɛ kpɛ'ɛma la la a pɛntiireba la, ti ba go'e Pɔɔl ŋmɛ'ɛrɛ. 33Ti pɛntiireba nɛŋa daana wa paaɛ nyɔkɛ Pɔɔl gee bo' nuurɛ ti ba lu' en la zɔtɔ tuyi' Gee nyaa viiha eŋa n de se'em la en eŋa sɛla. 34Ti nɛrekuuŋɔ la basɛba vɔɔla ti ŋwana, ti basɛba me vɔɔla ti ŋwana ha. Ti eŋa n kan baŋɛ sɛla n iŋɛ doohe la voole la zuo la, ti a bo' nuurɛ ti ba tari en wa'am pɛntiireba bɔŋa zi'an la na. 35Pɔɔl n ta zɔna kura la zuo la, nɛreba la malum gbirege gaŋɛ la bala, ti pɛntiireba la ɔ̃begɛ Pɔɔl buke. 36Ti nɛrekuuŋɔ la n dole la kɔ'ɔm tahera mɛ yeti, “Ba'ahɛ ya en ha Ba'ahɛ ya en.”

Pɔɔl tɔgɛ suŋɛ a mɛŋa

37Ban ta pɔra ti ba tari Pɔɔl kɛ̃ pɛntiireba bɔŋa zi'an la, ti Pɔɔl yele nɛŋadaana la yeti, “N wan ta'am tɔgɛ se'ere bo' fum?” Ti nɛŋadaana la soke en yeti, “Fum tã tɔgera Giriki mɛ? 38Fum ye dagi Igipiti tiŋa nɛra la n gbirege, tari zabe-zabereba tuha anaahi yehe kɛ̃ muuen ha la?” 39Ti Pɔɔl lerege en yeti, “Mam dela Yuda buuri, yehe Tasuse n boi Kilikiya sɔ'ɔlum puan la. Mam dela tiŋa n en tari yu'kãtɛ tiŋambia. N beleni fum mɛ bo' mam sore ti n tɔgɛ bo' nɛreba wa.” 40Ti nɛŋadaana wa bo' en sore, ti Pɔɔl zom yagelɛ kura la zuo, yele nɛreba la yeti, ba yeen go'e, ti ban iŋɛ bããlam la, a tɔgɛ bo' nɛreba la mɛ Hiburu yetɔgum puan yeti:

Currently Selected:

Tuuma 21: GBTP

Highlight

Copy