മറ്‌ക്കോസ് 5
5
കെ്ട്ടജാദി തട്ടിര്‌ക്കവാന ഏസു തെ്ള്‌സ്‌റാ്
1ഏസുമ് തന്ന് സൊല്ലുപഡി ണഡാക്കവാര്‌മ് ഗെലീലെ കഡാല്‌ക്ക് അയ്യേ്ട്ടി ഇര്‌ക്ക ഗരെസേനെ എങ്ക ണാഡ്‌ക്ക് എജ്ജിനാര്. 2ഏസു തോണിലിര്‌ന്ത് ഏ്ട്ടിക്ക് ഇ്റാങ്കിനാദ്‌മ്, കെ്ട്ടജാദി തട്ടിര്‌ക്ക ഒരുത്താ് സുഡാലേലിര്‌ന്ത് ഏസുക്ക് ണേരെ ബന്താ്. 3അയാള് ഇര്‌ന്തിര്‌ന്താദ് സുഡാലെക്ക്‌റാഗാത്തെ. സങ്കിളിലി ഗൂഡി ആര്‌ക്ക്‌മ് അയാള്‌ണ കെ്ട്ടി ബെക്ക്യ മുഡ്യാലെ. 4എത്തിന്യൊ ജമ്പ് ആള്‌ഗ ഇയാള്‌ദ് കയ്യിഗണ കയ്യികുട്ടേക്ക്‌മ് കാല്‌ഗണ സങ്കിളിക്ക്‌മ് കെ്ട്ടി ബെത്താര്. ആന അയാള് കയ്യികുട്ടേന ബലിത്ത് പറ്‌ത്തെക്കിനാ്. കാലില്യ സങ്കിളിന ഒരേത്ത് പറ്‌ത്തെക്കിനാ്. അയാള്‌ണ ആര്‌ണാലേമ് അഡാക്ക്യ മുഡ്യാലെ. 5അയാള് ഇ്റ്‌ട്ട്‌പഗാല് സുഡാലെക്ക്‌റാഗാമ് മലേക്ക്‌റാഗാമ് അഗാറി ആലാത്ത് ണഡാന്താ്. തനാണതാനെ കല്ലിലി തപ്പി സദേത്ത്‌കൊണ്ട്‌മ് ഇര്‌ന്താ്.
6അയാള് ഏസുണ എമ്മാട്ടൊ ഇര്‌ന്ത് കണ്ട് ഓഡി ബന്ത് ഏസു കാല്‌ക്ക് ബ്‌ന്ത് കുമ്മുഡിനാ്. 7അയാള് ബെല്ല്യാദ്‌ക്ക് അഗാറികൊണ്ട് ഇച്ചെ സൊന്നാ്: <<ഏസുവെ, എല്ലാദ്‌ണാമ് ബ്‌ഡ മ്‌ഗ്‌ന്ത സാമിമഗാനെ, എനാക്ക്‌മ് ണിനാക്ക്‌മ് എന്ത കാര്യ? സാമി, സാമി ണീ എനാണ ദണ്ടിക്കാഗെ ബേ്ഡ?>> 8അയ്യി കെ്ട്ടജാദിന, <<ഇവാന ബ്‌ട്ട് ബെ്ള്യെ കഡ>> എന്ത് ഏസു സൊല്ലിര്‌ന്താദ്‌ണാലെത്തെ അദ് ഇച്ചെ സൊന്നാദ്.
9അയാള്‌ണ ഏസു കേ്ട്ടാ്: <<ണിന്ന്‌ദ് പേര് എച്ചെ?>>
അയാള് സൊന്നാ്: <<എന്ന്‌ദ് പേര് ലെഗ്യോന്; എമ്മ എത്തിന്യൊ ജാദിഗ ഇര്‌ക്കേര്.>> 10<<എമാണ ഈ ഊരിലിര്‌ന്ത് മുഡിക്കി ബ്‌ഡ ബേ്ഡ>> എന്ത് അയ്യി ജാദി കുമ്മുഡികൊണ്ട് സൊല്ലിറ്റ്.
11അയ്യി ഗള്യേലി അദിലിര്‌ക്ക മലെ പത്തേലി ബെല്ല്യൊരു കൂട്ട പന്റി മേന്തിര്‌ന്ത്‌ദ്. 12<<എമാണ സൊല്ലിബ്‌ഡ്‌റദാനാക്കി അയ്യി കാട്ട്‌റ പന്റിഗാക്കെ പുക്ക്യ ബേ്ണ്ടി എമാണ അയ്യി കൂട്ടാക്കെ ബ്‌ട്ട മദി>> എന്ത് അയ്യി ജാദിഗ സൊല്ലിറ്റ്. 13അയ്യി ജാദിഗണ ഏസു പോയ സൊന്നാ്. അയാളിലി ഇര്‌ന്ത് അയ്യി ജാദിഗ അദിലി മേന്തിര്‌ന്ത പന്റിഗാക്കെ പോയി പുക്കിറ്റ്. അക്കുളെ പന്റിഗ ജഗാല് മേലെ ണേരെ കഡാല്‌ക്കെ ബ്‌ന്ത് മുങ്കി സത്ത്‌ദ്. ഒപ്പത്തപ്പ അദിലി റണ്ടായിര പന്റിഗ ഇര്‌ന്ത്‌ദ്.
14ഇദ്‌ണ കണ്ട് പന്റി മേസ്‌റവാര് ഓഡി പോയി അര്‌ഗെ സുറ്റു ഇര്‌ക്ക പട്ടണഗാക്ക്‌മ് ഊര്‌ഗാക്ക്‌മ് സൊന്നാര്. സേദി കേ്ട്ടവാരെല്ല ണഡാന്താദ് എന്തായെന്റ് തെര്യ ഏസു പട്ട്‌ക്ക് ഓഡി എജ്ജിനാര്. 15അവാര് ഏസു പട്ട്‌ക്ക് ബന്ത് ണോഡുഗാട്ടി കെ്ട്ടജാദി തട്ടിര്‌ന്തവാ് സീലെന കെ്ട്ടിമ് ബുദ്ദി തെ്ളിന്ത്‌മ് ണലമായി കുക്കാന്ത് ഇര്‌ക്കാദ്‌ണ കണ്ട് അവാര്‌ഗെല്ല അഞ്ച്യെക്കിനാര്. 16കെ്ട്ടജാദി തട്ടിര്‌ന്തവാന്‌ക്ക്‌മ് പന്റിഗാക്ക്‌മ് ണഡാന്താദ്‌ണ കണ്ട ആള്‌ഗ ബന്ത ആള്‌ഗാക്ക് സൊല്ലികൊഡുത്താര്. 17അയ്യി ണാഡ്‌ക്കാറാര് എമ്മ്‌ദ് എല്ലെന ബ്‌ട്ട് സെറ്റെ പോഡോമെ എന്ത് ഏസുണ ബേ്ണ്ടിനാര്.
18ഏസു തോണിക്കെ ഏ്റ്‌ഗാട്ടി <<ണാന്‌മ് ണിന്ന്‌ദ് ഒപ്പ ബരെ>> എന്ത് ണോയി തെ്ളിന്തവാ് സൊന്നാ്. 19ഏസു അവാന: <<ണീ ബേ്ഡ; ണീ പോയി ആണ്ടവാ് ണിന്നോഡെ ബേ്റ്‌വെന്ത് ണിനാണ ണല്ലാദാക്കിനാദ്‌ണ ണിന്ന്‌ദ് കുഡുമക്കാറാര്‌ക്കേമ് എ്ണേവുക്കാറാര്‌ക്കേമ് സൊല്ലു>> എന്ത് സൊന്നാ്. 20അച്ചെ അയാള് തിലിമ്പി പോയി ദെക്കെപൊലി#5:20ദെക്കെപൊലി എഗുദ റാജ്യാത്തിലി പത്ത് പട്ടണഗ ഇര്‌ക്ക ഒരു ണാഡ്‌ത്തെ ദെക്കെപൊലി. ണാഡ് മുച്ചുഡ തനാണ ഏസു ണല്ലാദാക്കിനാദ്‌ണ സൊല്ല്യ പ്‌ഡിത്താ്. ഇദ്‌ണ കേ്ട്ടവാരെല്ല അദിസ്യപട്ടെക്കിനാര്.
ഏസു സത്ത ഒരു പ്‌ള്ളെന ഉജുറേ്ത്ത്‌റാ്
21ഏസു പിന്നേമ് തോണിക്കെ ഏ്റി ഇയ്യേ്ട്ടി എജ്ജിനാ്. അദ്‌ക്കെ എത്തിന്യൊ ആള്‌ഗ ബന്ത് അയാള്‌ക്ക് സുറ്റുമുറ്റ് തുമ്പികൊഡുത്താര്. 22ഏസു കഡാല് ഏ്ട്ടിദ് അര്‌ഗെ ഇര്‌ക്കാട്ടി എഗുദാര് പരേസ്‌റ കൂരേദ് അദിഗാരിഗാളിലി പട്ട ആയിറോസ് എങ്ക ഒരുത്താ് അദ്‌ക്കെ എജ്ജിനാ്. അയാള് ഏസുണ കണ്ടാദ്‌മ് ഏസു കാല്‌ക്ക് ബ്‌ന്ത് കുമ്മുഡിര്‌ന്ത്: 23<<എന്ന് പ്‌ള്ളെ ഉജുറു പോയ അക്കപക്ക ആയിര്‌ക്ക. ണീ സെറ്റെ ബന്ത് അവാള്‌ക്കെ കയ്യി ബെത്ത മദി അവാള്‌ദ് ണോയി ബിച്ചെന്നു. അച്ചെ അവ ഉജുറു പെ്ളേക്കുവ>> എന്ത് സൊന്നാ്. 24ഏസു അപ്പ്‌താനെ ആയിറോസോഡെ പോനാ്.
അയാള് പിന്ന്‌ക്ക് എത്തിന്യൊ ആള്‌ഗ തള്ള്‌തിരക്കായി പോനാര്. 25അയ്യി കൂട്ടാത്തിലി പന്നന്റ് ബര്‌സ കാല പൊലെ ബെ്ട്ട്‌റ ണോയിക്കാറ്‌സി ഇര്‌ന്ത. 26അവാള്‌ക്ക് ഇര്‌ക്ക സൊത്തുമുദാല്‌ഗണെല്ല ബയ്യിദ്യാ് ണോഡി സിലാവളിത്ത്‌മ് ണോയി ഉള്ളാസ് ആരദല്ലാദെ കൊറേരാദില്ലെ. 27-28അവ ഏസുണ പറ്റി കേ്ട്ടിര്‌ന്ത. <<അയാള്‌ദ് ഉഡുപ്പുണ എന്താല് ണാന് അണ്ണിന എന്ന് ണോയി തെ്ള്യു>> എന്ത് അവ ണെനേത്ത്, ആള് തിരാക്ക് മേലെ ഏസുദ് പിന്ന് സാരി പോയി അയാള്‌ദ് ജൊഗേദ് താനെന അണ്ണിന. 29അപ്പ്‌താനെ പൊലെ ബെ്ട്ട്‌റാദ് ണിന്റ്‌ദ്. ഈ ണോയി മാറിനാദ് തന്ന് സരിഗലാത്തിലി അവാള്‌ക്ക് തെരിന്ത്‌ദ്.
30ഏസുക്ക് തന്നോഡെ ഇര്‌ന്ത് സക്‌ദി പോറ്റു എന്ത് തെരിന്ത്‌ദ്. അയാള് അപ്പ്‌താനെ ആള് കൂട്ടാത്തിലി തിലിമ്പി ണിന്റ്: <<ആര് എന്ന്‌ദ് ഉഡുപ്പുണ അണ്ണിനാദ്?>> എന്ത് കേ്ട്ടാ്.
31അക്കുളെ ഏസുദ് സൊല്ലുപഡി ണഡാക്കവാര്: <<ഈ കണ്ട ജന ണിനാണ ണെഗ്‌സ്‌ഗാട്ടി ണീ എനാണ അണ്ണിനാദ് ആര് എന്ത് കേ്ക്കേനെ?>> എന്ത് സൊന്നാര്.
32ആന തനാണ ആര് അണ്ണിനാദ് എന്ത് കാണ്യ ബേ്ണ്ടി ഏസു സുറ്റുമ് ണോഡിനാ്. 33തന്ന് ണോയി മാറിനാദ്‌ണ തെരിന്ത അവ കോവേക്ക് സദ്‌റബെ്ട്ടി കൊണ്ട് ഏസു കാല്‌ക്ക് സഡാങ്ക ബ്‌ന്ത് ണഡാന്ത സത്ത്യണ ഏസുക്കെ തുറാന്ത് സൊന്ന. 34അക്കുളെ ഏസു: <<മഗാളെ, ണിന്ന് ണമ്പിക്കെ ണിന്ന് ണോയിന തെ്ള്‌സിറ്റ്. ണീ ണലമായി പെ്ളേക്കുവെ. ണിമ്മദ്യോഡെ പോ>> എന്ത് സൊന്നാ്.
35ഏസു ഇച്ചെ പേസികൊണ്ടിര്‌ക്കാട്ടി എഗുദാര് പരേസ്‌റ കൂരേദ് അദിഗാരി ആയിറോസ്‌ദ് കൂരേലിര്‌ന്ത് സേദിക്കാറാര് ബന്ത്: <<ണിന്ന് മഗ സത്തെക്കിന. ഇനി എന്ത്‌ക്ക് ഗുരുവുണ തൊന്തറെ പഡ്‌സ്‌റാദ്>> എന്ത് സൊന്നാര്.
36ഏസു ഈ ണായണ ഗെവനിക്കാദെ അയാള്‌ക്കെ: <<ണീ അഞ്ചാദെ, ണമ്പിന മദി>> എന്ത് സൊന്നാ്.
37ഏസു തന്ന്‌ദ് ഒപ്പ പത്ത്‌റോസ്, ആക്കോവു അവാ് തമ്പി ഓഗന്നാ് ഇവാര്‌ണ അല്ലാദെ ബേ്റെ ആര്‌ണാമ് കൂട്ടി പോഗാലെ. 38അവാര് അയ്യി കൂരേക്കെ എജ്ജിനാദ്‌മ് ആള്‌ഗ അഗ്‌റാദ്‌ണാമ് അഗാറി ബ്‌ന്ത് ഗിജ്‌റ് ബെ്ട്ട്‌റാദ്‌ണാമ് ഏസു കണ്ടാ്. 39അയാള് കൂരെക്കുള്ളുക്ക് കഡാന്ത് <<ണിമ്മ എന്ത്‌ക്ക് ഇച്ചെ അഗ്‌റാദ്? ണിമ്മ എന്ത്‌ക്ക് ഇച്ചെ അഗാറി ബ്‌ന്ത് ഗിജ്‌റ് ബെ്ട്ട്‌റാദ്? പ്‌ള്ളെ സാഗാലെ, ഉറാങ്ക്‌റ>> എന്ത് സൊന്നാ്. 40ഇദ്‌ണ കേ്ട്ടവാരെല്ല അവാന ണാണഗെ്ഡ്‌സികൊണ്ട് ണീ്ത്താര്.
ഏസു അദിലിര്‌ന്തവാര്‌ണ ബെ്ള്യെ സൊല്ലിബ്‌ട്ട്, അയ്യി പ്‌ള്ളേദ് അവ്വെ അപ്പലണാമ് തന്ന്‌ദൊപ്പ ഇര്‌ന്ത സൊല്ലുപഡി ണഡാക്ക മൂണ് ആള്‌ണാമ് കൂട്ടി പ്‌ള്ളെന ക്‌ഡാത്തിര്‌ന്ത പട്ട്‌ക്കെ പോനാ്. 41ഏസു അദ്‌ക്കെ പോയി പ്‌ള്ളേദ് കയ്യിന പ്‌ഡിത്താ്. അദ് കളിന്ത് <<അമ്മെ, എ്ന്ത് ണില്ല് എന്ത് ണാന് ണിനാക്കെ സൊല്ലുറെ>> എന്ത അര്‌ത്താത്തിലി <<തലീദ കൂമ്>> എന്ത് സൊന്നാ്. 42അപ്പ്‌താനെ പ്‌ള്ളെ എ്ന്ത് ണഡാന്ത. അയ്യി പ്‌ള്ളേക്ക് പന്നന്റ് ബയ്യിസ് ആയിര്‌ന്ത്‌ദ്. അവാര് ഇദ്‌ണ കണ്ട് അദിസ്യപട്ടാര്. 43ഏസു അയ്യി പ്‌ള്ളേദ് അവ്വെ അപ്പലാക്കെ: <<ഇദിലി ണഡാന്താദ്‌ണ കണ്ടിപ്പായി ബെ്ള്യെ ബ്‌ഡ്‌റാക്കില്ലെ. അവാള്‌ക്ക് തിന്ന്യ എന്താറ്റ് കൊഡിരി>> എന്ത് സൊന്നാ്.
Currently Selected:
മറ്‌ക്കോസ് 5: സാമിദ് സേദി
Highlight
Share
Copy
Want to have your highlights saved across all your devices? Sign up or sign in
New Life Literature
