മറ്‌ക്കോസ് 6
6
സൊന്ത ഊര്‌ക്കാറാര് ഏസുണ തള്ള്യെക്ക്‌റാര്
1അദിലിര്‌ന്ത് ഏസു തന്ന് സൊന്ത ഊര്‌ക്കെ പോനാ്. തന്ന് പിന്ന്‌ക്ക് തന്ന് സൊല്ലുപഡി ണഡാക്കവാര്‌മ് പോനാര്. 2ഏസു ഒയിവു ണാള് എഗുദാര് പരേസ്‌റ കൂരേക്കെ പോയി ണല്ല ണല്ല ബുദ്ദിണായഗണ സൊല്ലികൊഡുത്താ്. അദ്‌ണ കേ്ട്ട് എത്തിന്യൊ ആള്‌ഗ അദിസ്യപട്ടാര്.
<<ഇയാള്‌ക്ക് ഇദെല്ല ഏദിലിര്‌ന്ത് കെ്ഡേത്ത്‌ദ്? ഇയാള്‌ക്ക് എത്തറ ബുദ്ദി? എച്ചെ ഇയാള് അദിസ്യ സെയ്‌രാ്? 3ഇവാ് ണമ്മ്‌ദ് മറിയ മഗാ് ആസാരിത്താനെ? അയാള്‌ദ് തമ്പില ആക്കോവു, ജോസെ, ജൂദാ്, സീമോന് ഇവാര്‌ത്തെഗൊ? ഇവാന്‌ദ് തങ്കെലാമ് ണമ്മ്‌ദൊപ്പ ഇര്‌ക്കാര്?>> എന്ത് സൊല്ലി അവാര് അവാന ഒരു ബെലേമ് ബെക്കാലെ.
4അവാര്‌ക്കെ ഏസു ഇച്ചെ സൊന്നാ്: <<ഒരു സാമിദാസ്‌ണ ഒച്ചാരില്യ ഊര്‌ക്കാറാര്‌ഗെല്ല മദിക്കാര്; ആന സൊന്ത ഊര്‌ക്കാറാര്‌മ് കുഡുമകൂട്ടഗാമ് സൊന്ത കൂരെക്കാറാര്‌മ് അയാള്‌ണ മദിക്കാദില്ലെ.>> 5അദ്‌ക്ക് പ്‌റ ഏസു ഏദൊ ഒന്റൊ റണ്ടൊ ണോയിക്കാറാര്‌ണ കയ്യി ബെത്ത് തെ്ള്‌സിനാ്. അദിലി ബേ്റെ ഒരു അദിസ്യാമ് ഏസുക്ക് സെയ്യ മുഡ്യാലെ. 6തനാണ അവാര് ണമ്പാത്താദ്‌ണാലെ ഏസു അദിസ്യപട്ടെക്കിനാ്.
പന്നന്റ് ആള്‌ണ ഊര്‌ക്ക്‌റാഗ സൊല്ലിബ്‌ഡ്‌റാ്
പിന്നെ ഏസു സുറ്റുമുറ്റിര്‌ക്ക ഊര്‌ക്ക്‌റാഗ പോയി ബുദ്ദി സൊല്ലികൊഡുത്താ്. 7പ്‌റ ഏസു തന്ന് പന്നന്റ് ആള്‌ഗണ ബര്‌സി ഒരൊരു ഊര്‌ഗാക്ക് റണാണ്ട് ആള് ബെത്ത് സൊല്ലിബ്‌ട്ടാ്; ആള്‌ഗാക്ക് തട്ടിര്‌ക്ക ജാദിഗണ തുറാത്ത്യ അവാര്‌ക്ക് അദിഗാരാമ് കൊഡുത്താ്.
8<<ണിമ്മ പോഗാട്ടി കുത്തി ണഡാക്ക്യ തഡി അല്ലാദെ കെ്ട്ടഞ്ചോറൊ ദറ്‌മ്മ പയ്യൊ പണഗാളൊ ഒന്റുമ് മഡിക്കെ്ട്ടി എ്ഡ്‌ത്ത് പോഗ ബേ്ഡ. 9സെര്‌പ്പ് ഇക്കില. ഇക്കിര്‌ക്ക ഉഡുപ്പുഗ മാട്ട് മദി. 10ണിമ്മ ഏദാറ്റ് ഒരു കൂരേക്കെ എജ്ജിന അയ്യി ഊരിലിര്‌ന്ത് ബരമാട്ട് അദിലിതാനെ തങ്കുഡൊ. 11ഏദാറ്റ് ഊരിലി ണിമാണ സേത്താദേമ് ണിമ്മ സൊല്ലുറാദ്‌ണ ഏറ്റ്‌കൊള്ളാദേമ് ഇര്‌ന്ത അദ്‌ണ ബ്‌ട്ട് പോയി. ഇച്ചെ അവാര് സെയ്‌രാദ്‌ണാലെ അവാര്‌ക്ക് കെ്ഡേക്ക ദണ്ടണേക്ക് ണിമ്മ കുറ്റക്കാറാര് അല്ല എന്ത് അവാര്‌ക്ക് തെര്യ ണിമ്മ് കാലില്യ ദൂളിന തട്ടി എക്കിരി>> എന്ത് ഏസു സൊന്നാ്.
12അച്ചെ ഏസുദ് സൊല്ലുപഡി ണഡാക്കവാര് ഊര്‌ക്ക്‌റാഗ പോയി: <<ണിമ്മ സെയ്‌ര പാവഗണ തള്ള്യെക്കി സാമി സാരി തിലിമ്പിരി>> എന്ത് സൊന്നാര്. 13അവാര് ആള്‌ഗാക്ക് തട്ടിര്‌ക്ക എത്തിന്യൊ കെ്ട്ടജാദിഗണ ഒയിപ്പിസിനാര്. എത്തിന്യൊ ണോയിക്കാറാര്‌ണ എ്ണ്ണെ#6:13എ്ണ്ണെ ഒലിവ് മര പഗാദ് ബെദേലിര്‌ന്ത് ആട്ടി എ്ഡ്‌ക്ക എ്ണ്ണെത്തെ ഇദ്. പൂസി ണല്ലാദാക്കിനാര്.
ഓഗന്നാന കൊല്ലുറാര്
14അച്ചെ ഏസു പേര്‌കേ്ട്ടവാനായി തീന്താ്; എരോദാ് റാജാവുമ് ഏസുണ പറ്റി ഉള്ള സേദി കേ്ട്ടാ്. ലേസ ആള്‌ഗ സൊല്ലുറാര് <<തണ്ണിക്ക് മുളുഗ്‌സ്‌റ ഓഗന്നാ്ത്തെ സത്തവാര് പട്ടിലിര്‌ന്ത് ഉജുറെ്ന്ത് ബന്തിര്‌ക്ക ഈ ഏസു; അദ്‌ണാലെത്തെ ഇച്ചെല്ല സെയ്യുള്ള സക്‌ദി അയാളോഡെ ഇര്‌ക്കാദ്>> എന്ത്.
15ലേസ ആള്‌ഗ സൊല്ലുറാര് <<ഏല്യാവു>> എന്ത്, ബേ്റെ ലേസ ആള്‌ഗ സൊല്ലുറാര് <<മുന്തുക്കേത്ത കാലാത്തില്യ സാമിദാസ്‌ഗണ പാസെ ഉള്ള ഒരു സാമിദാസ്>> എന്ത്.
16ആന ഇദ്‌ണെല്ല കേ്ട്ട എരോദാ് റാജാവു: <<ഇദ് ണാന് തലെ ബെ്ട്ടി കൊന്റ ഓഗന്നാ്ത്തെ ഉജുറെ്ന്ത് ബന്തിര്‌ക്കാദ്>> എന്ത് സൊന്നാ്.
17-18ഈ എരോദാ് റാജാവു തന്ന് അണ്ണാ് പീലിപ്പോസ്‌ദ് പെ്ണ്ട് എരോദിന തനാക്ക് പെ്ണ്ടാക്കി എ്ഡ്‌ത്തിര്‌ന്താ്. <<ണിന്ന് അണ്ണാ് പെ്ണ്ട്‌ണ ണീ സൊന്ത പെ്ണ്ടാക്കി ബെത്തിര്‌ക്കാദ് സെര്യല്ല>> എന്ത് ഓഗന്നാ് എരോദാ് റാജാവുക്ക് സൊല്ലിര്‌ന്താ്. അദ്‌ണാലെ അവാണ പിര്യപഡ്‌സ്യ എരോദാ് റാജാവു പഡെഗണ ബ്‌ട്ട് ഓഗന്നാന പ്‌ഡിത്ത് ജെയില്‌ക്ക് ഇക്കിസിനാ്. 19എരോദി ഓഗന്നാനോഡെ ഏദ് ബെത്തിര്‌ന്താദ്‌ണാലെ അയാള്‌ണ കൊല്ലുഡൊ എന്ത് ണെനേത്ത. ആന അദ് ഒന്റുമ് ണഡാക്കാലെ. 20ഓഗന്നാ് ണല്ലവാന്‌മ് ണേരോഡെ ണഡാക്കവാന്‌മ് എന്ത് എരോദാന്‌ക്ക് തെരിരാദ്‌ണാലെ അയാള്‌ണ കൊല്ല്യ എരോദാ് റാജാവുക്ക് കോവെ പ്‌ഡിത്ത്‌ദ്. അദ്‌ക്ക് അയാള്‌ണ ഒന്റുമ് സെയ്യാദെ ണലമായി ബെത്തിര്‌ന്താ്. ഓഗന്നാന്‌ദ് ണായണ കേ്ട്ട് എരോദാ് റാജാവുദ് മനേസ്സ്‌ക്ക് അങ്കലാപ്പ് പ്‌ഡിത്ത്‌ദ്. ആനാല്‌മ് അയാള്‌ദ് ബുദ്ദിണായ പിര്യപിര്യാത്ത് കേ്ട്ടിര്‌ന്താ്.
21അച്ചെ ഇര്‌ക്കാട്ടി അവ ആസെപട്ട പാസെ ഒരു ണാള് ബന്ത്‌ദ്. അദ് റാജാവുദ് പ്‌റാന്ത ണാള് ആയിര്‌ന്ത്‌ദ്. അയ്യി ണാള് എരോദാ് റാജാവു ബെല്ല്യ ഉദ്ദേഗക്കാറാര്‌ക്ക്‌മ് പഡെതലെവലാക്ക്‌മ് ഗെലീലെ ഊരില്യ അദിഗാരിഗാക്ക്‌മ് ബിര്‌ന്ത് കൊഡുത്താ്. 22അയ്യി ഗള്യേലി എരോദിദ് മഗളച്ചി റാജ മദ്ദേസാക്ക് പോയി അവാര് മുന്തുക്ക് ആട്ട് ആഡിന. എരോദാ് റാജാവുക്ക്‌മ് ബിര്‌ന്ത്‌ക്കാറാര്‌ക്ക്‌മ് അയ്യി ആട്ട് പ്‌ഡിത്ത് പോറ്റു.
അക്കുളെ റാജാവു അവാള്‌ക്കെ: <<ണീ എന്തണ ആസെപട്ട് കേ്ട്ടാല്‌മ് ണാന് ണിനാക്ക് തരുവെ>> എന്ത് സൊന്നാ്. 23<<ണീ എന്തണ കേ്ട്ടാല്‌മ്, എന്ന്‌ദ് പഗ്‌ദി സീമെന കേ്ട്ടാല്‌മ് ണാന് ണിനാക്ക് തരുവെ>> എന്ത് സത്ത്യ അഡിത്ത് അവാക്ക് ബാക്ക് കൊഡുത്താ്.
24അവ ബെ്ള്യെ അവ്വാസി പട്ട്‌ക്ക് ഓഡി പോയി <<ണാന് എന്തണ കേ്ക്ക്യ>> എന്ത് അവ്വാസിന കേ്ട്ട.
<<തണ്ണിക്ക് മുളുഗ്‌സ്‌റ ഓഗന്നാന്‌ദ് തലേന തര്യ സൊല്ലു>> എന്ത് അവ്വാസി സൊന്ന.
25അക്കുളെ അവ കദമുദ ഓഡി പോയി <<എനാക്ക് ഇപ്പ് താനെ തണ്ണിക്ക് മുളുഗ്‌സ്‌റ ഓഗന്നാന്‌ദ് തലേന ഒരു ബട്ടാക്കെ തരുഡൊ>> എന്ത് റാജാവുക്കെ സൊന്ന.
26ഇദ്‌ണ കേ്ട്ട് എരോദാ് റാജാവുക്ക് എച്ചെഗൊ ആറ്റ്. ആന ബിര്‌ന്ത്‌ക്ക് ബന്തവാര്‌ദ് മുന്തുക്ക് ബെത്ത് സത്ത്യ അഡിത്ത് ബാക്ക് കൊഡുത്താദ്‌ണാലെ അയ്യി ബാക്ക്‌ണ ണഡാത്തി കൊഡുക്കാദെ ഇര്‌ക്ക്യ മുഡ്യമാട്ട. 27അപ്പ്‌താനെ റാജാവു ഒരു പഡെയാളിന ഒളേത്ത് ഓഗന്നാന്‌ദ് തലേന ബെ്ട്ടി ബര്യ ജെയില്‌ക്കെ അന്‌പ്പിനാ്. പഡെയാളി പോയി അദിലിതാനെ ഓഗന്നാന്‌ദ് തലേന ബെ്ട്ടി, 28ഒരു ബട്ടാക്കെ എ്ഡ്‌ത്ത് ബന്ത് പ്‌ള്ളെ കയ്യിക്ക് കൊഡുത്താ്. അവ എ്ഡ്‌ത്ത് പോയി അവ്വാസിക്ക് കൊഡുത്ത. 29ഓഗന്നാന്‌ദ് സൊല്ലുപഡി ണഡാക്കവാര് ഈ സേദിന കേ്ട്ട് അയാള്‌ദ് സാവുണ എ്ഡ്‌ത്ത് പോയി പൊദേത്താര്.
അഞ്ചായിര ആണ്‌മക്കഗാക്ക് ഏസു പജ്യാറ്‌സ്‌റാ്
30ഊര്‌ക്ക്‌റാഗ ഏസു അന്‌പ്പി ബ്‌ട്ട അപ്പൊസലല തിലിമ്പി ബന്താര്. അവാര് തമ്മ സെയ്‌ദാദ്‌ണാമ് പഡിസിനാദ്‌ണാമ് ഏസുക്കെ സൊന്നാര്. 31എത്തിന്യൊ ആള്‌ഗ ഏസു പട്ട്‌ക്ക് ബന്ത് പോയികൊണ്ട് ഇര്‌ന്താദ്‌ണാലെ ഏസുക്ക്‌മ് തന്ന് സൊല്ലുപഡി ണഡാക്കവാര്‌ക്ക്‌മ് തിന്ന്യ ഗൂഡി ഒയിവെ കെ്ഡേക്കാദെ ആറ്റ്. <<ഇദിലി ഒയിവു കെ്ഡേക്കാത്താദ്‌ണാലെ ബായി ഒച്ചാരി പോയി എ്ളേക്കില>> എന്ത് ഏസു തന്ന് സൊല്ലുപഡി ണഡാക്കവാര്‌ക്കെ സൊന്നാ്.
32അച്ചെ ഒരു ഒട്ടിപ്പാസുള്ള എ്ഡേക്ക് അവാര് തമ്മ താനെ തോണിക്കെ ഏ്റി പോനാര്. 33എന്താല്‌മ് അവാര് പോനാദ്‌ണ പല ആള്‌ഗാമ് കണ്ടാര്. അയ്യി പോനാദ് ഏസുമ് കൂട്ടാര്‌മ്‌ത്തെ എന്ത് അവാര്‌ക്ക് തെരിന്ത്‌ദ്. അദ്‌ണാലെ എല്ല ഊരിലിര്‌ന്ത്‌മ് ആള്‌ഗ ഏസു പോര പട്ട്‌ക്ക് ഓഡി പോനാര്. ഏസുമ് ഏസുദ് സൊല്ലുപഡി ണഡാക്കവാര്‌മ് എജ്ജാത്ത മുദ അവാര് ആങ്കെ പോയി എജ്ജിര്‌ന്താര്. 34ഏസു അദ്‌ക്കെ എജ്ജിനാദ്‌മ് എത്തിന്യൊ ആള്‌ഗ തനാണ കാത്തിര്‌ക്കാദ്‌ണ അയാള് കണ്ടാ്. അവാര്‌ണ മാട്ട്യാ് ഇല്ലാത്ത കൊറ്യാഡ്‌ഗണ പാസെ ഇര്‌ക്കാദ്‌ണ കണ്ട് ഏസുക്ക് ബേ്റ്‌വെന്ത്‌ദ്. അദ്‌ക്ക് അവാര്‌ഗാക്ക് പല കാര്യഗണാമ് സൊല്ലികൊഡുത്താ്.
35അച്ചെ മജാക്കെ ആറ്റ്. അക്കുളെ തന്ന് സൊല്ലുപഡി ണഡാക്കവാര് ഏസുക്കെ പോയി ഇച്ചെ സൊന്നാര്: <<ഇദ് ഒരു ആള് ഇല്ലാത്ത എ്ഡെ. ണേരാമ് പോയി ജാമാമ് ആറ്റ്. 36അദ്‌ണാലെ ഈ ആള്‌ഗണ അര്‌ഗെ ഇര്‌ക്ക ഊര്‌ക്ക്‌റാഗാഗൊ കാഡ് സാളെക്ക്‌റാഗാഗൊ പോയി എന്താറ്റ് ബാങ്കി തിന്ന്യ സൊല്ലിബ്‌ഡുഡോമെ.>>
37അക്കുളെ ഏസു: <<ണിമ്മ താനെ അവാര്‌ക്ക് തിന്ന്യ കൊഡിരി>> എന്ത് തന്ന് സൊല്ലുപഡി ണഡാക്കവാര്‌ക്കെ സൊന്നാ്.
അക്കുളെ ഏസുദ് സൊല്ലുപഡി ണഡാക്കവാര് കേ്ട്ടാര്: <<എമ്മ പോയി ഇരുന്നൂറ് ദിനാറ്‌ക്ക്#6:37 ഇരുന്നൂറ് ദിനാറ്‌ക്ക് ഒരു ബേലെക്കാറാന്‌ദ് ഒരു ണാള്‌ദ് കൂലിത്തെ ഒരു ദിനാറ്. അഡെ ബാങ്കി ഈ കണ്ട ജനാക്ക് കൊഡുക്കുഡൊ എന്ത്‌ത്തേഗ ണീ സൊല്ലുറാദ്?>> എന്ത് ഏസുണ കേ്ട്ടാര്.
38<<ണിമ്മ് കയ്യിലി എത്തിനി അഡെ ഇര്‌ക്ക്‌ദ്?>> എന്ത് ഏസു തന്ന് സൊല്ലുപഡി ണഡാക്കവാര്‌ണ കേ്ട്ടാ്.
അക്കുളെ അവാര് പോയി ണോഡി: <<അഞ്ച് അഡേമ് റണ്ട് മീന്‌മ് ഇര്‌ക്ക്‌ദ്>> എന്ത് സൊന്നാര്.
39അക്കുളെ ഏസു തന്ന് സൊല്ലുപഡി ണഡാക്കവാര്‌ക്കെ: <<എല്ലാര്‌ണാമ് സരസരമായി പുല്ലുക്കുദ്ദാക്ക് കുക്കാക്ക്യ സൊല്ലിരി>> എന്ത് സൊന്നാ്. 40അവാര് ണൂറ് ണൂറുമ് അമ്പദ് അമ്പദ്‌മ് ആള്‌ഗ ബെത്ത് പന്തിലി സരസരമായി കുക്കാന്താര്. 41ഏസു അഞ്ച് അഡേനാമ് റണ്ട് മീന്‌ണാമ് എ്ഡ്‌ത്ത് മേല് ണോഡി സാമിക്ക് ണണ്ണി സൊല്ലി അഡേന മുറുത്താ്. പ്‌റ ആള്‌ഗാക്ക് പങ്കി കൊഡുക്ക്യ തന്ന് സൊല്ലുപഡി ണഡാക്കവാര്‌ക്കെ കൊഡുത്താ്. അയ്യി റണ്ട് മീന്‌ണാമ് അയാള് എല്ലാര്‌ക്ക്‌മ് പങ്കി കൊഡുത്താ്. 42എല്ല ആള്‌ഗാമ് ബേ്റ് തുമ്പ തിന്താര്. 43തിന്ത് മിച്ച ബന്ത അഡേനാമ് മീന്‌ണാമ് ഏസുദ് സൊല്ലുപഡി ണഡാക്കവാര് പന്നന്റ് ബട്ടി തുമ്പിസി എ്ഡ്‌ത്താര്. 44തിന്തവാരിലി ആണ്‌മക്കഗ അഞ്ചായിര താനെ ഇര്‌ന്തിര്‌ന്താര്.
തണ്ണിക്ക് കുദ്ദാക്ക് ഏസു ണഡാക്കാ്
45അപ്പ്‌താനെ ഏസു ആള്‌ഗണ സൊല്ലിബ്‌ട്ടാ്. അയ്യി കൂട്ടാത്തിലി താനെ തന്ന് സൊല്ലുപഡി ണഡാക്കവാര്‌ണാമ്: <<ണിമ്മ തോണിക്കെ ഏ്റി അയ്യേ്ട്ടി ഇര്‌ക്ക ബേദ്‌സെയ്‌ദേക്ക് പോയിരിരി>> എന്ത് ണത്തിനാ്. 46അവാര് പോന പ്‌റ ഏസു പരേസ്യ മലേക്കെ പോനാ്.
47മജാക്കെ ആയിമ് തോണി അയ്യേ്ട്ടി എത്താദെ ണഡ് കഡാലിലിതാനെ ഇര്‌ന്ത്‌ദ്. ഏസു ഒരുത്താ് താനെ ഏ്ട്ടിലിമ് ഇര്‌ന്താ്. 48അവാര്‌ക്ക് ണേരെ കാറ്റ് ബീസ്‌റാദ്‌ണാലെ തോണിന അയ്യേ്ട്ടി എജ്ജിസ്യ മുഡ്യാലെ. അച്ചെ തന്ന് സൊല്ലുപഡി ണഡാക്കവാര് ഒഗേന്ത് സാരാദ്‌ണ ഏസു ദൂരാത്തിലിര്‌ന്ത് താനെ കണ്ടാ്. കോയിജാമാത്തിലി ഏസു കഡാല്‌ക്കുദ്ദാക്ക് ണഡാന്ത് തന്ന് സൊല്ലുപഡി ണഡാക്കവാര്‌ദ് പട്ട്‌ക്ക് പോനാ്. അവാര്‌ണ കഡാന്ത് പോയ ഏസു ണെനേത്താ്. 49ഏസു കഡാല്‌ക്കുദ്ദാക്ക് ണഡാന്ത് ബരാദ്‌ണ ഏസുദ് സൊല്ലുപഡി ണഡാക്കവാര് കണ്ടാര്. അവാര് അദ് പിജാദ്‌ത്തെ എന്ത് ണെനേത്ത് കോവേക്ക് അഞ്ചി അഗാറിനാര്. 50എല്ലാര്‌മ് അയാള്‌ണ കണ്ട് കോവെപട്ടാര്.
അക്കുളെ ഏസു: <<കോവെപഡാദി; ദയ്യിരമായി ഇരിരി, ഇദ് ണാന്‌ത്തെ>> എന്ത് സൊന്നാ്. 51അക്കുളെ ഏസു അവാര് ഇര്‌ന്ത തോണിക്കെ ഏ്റിനാ്. അപ്പ്‌താനെ കാറ്റ് അഡാങ്കിറ്റ്. അവാര് സെരിക്ക്‌മ് അദിസ്യപട്ട് മരത്തട്ടി എക്കിനാര്. 52അഞ്ച് അഡേന പെര്‌ഗ്‌സിനാദ്‌ണ കണ്ണാറ കണ്ട് ഗൂഡി ഏസുദ് സൊല്ലുപഡി ണഡാക്കവാര്‌ക്ക് അദ്‌ദ് അര്‌ത്ത എന്തായെന്റ് തെര്യാലെ. എന്ത്‌ക്കെന്റ അവാര്‌ദ് ണെഞ്ച് കല്ല് ണെഞ്ചായിര്‌ന്ത്‌ദ്.
മൊത്തന ആള്‌ഗണ ഏസു തെ്ള്‌സ്‌റാ്
53ഏസുമ് ഏസുദ് സൊല്ലുപഡി ണഡാക്കവാര്‌മ് കഡാല് കഡാന്ത് ഗന്നേസരെ എങ്ക ണാഡ്‌ക്കെ എജ്ജിനാര്. അവാര് തോണിന അദ്‌ക്കെ താനെ കെ്ട്ടി ബെത്ത് പോനാര്. 54അക്കുളെ അദിലിര്‌ക്ക ആള്‌ഗ ഏസുണ കണ്ടാദ്‌മ് അവാ് ആര് എന്ത് ണെപ്പ്‌കെ്ഡേസിനാര്. 55ഏസു അദ്‌ക്കെ ബന്ത സേദി അവാര് അര്‌ഗെ ഇര്‌ക്ക ഊര്‌ക്ക്‌റാഗ ഓഡി പോയി സൊന്നാര്. ഈ സേദി കേ്ട്ട ആള്‌ഗ തമ്മ് ണോയിക്കാറാര്‌ണ കെ്ട്ടി എ്ഡ്‌ത്ത് ബന്താര്. 56ഏസു അയ്യി ണാഡില്യ ഏദ് ഊര്‌ക്ക്‌റാഗ പോനാല്‌മ്, ഏദ് പട്ടണാക്ക്‌റാഗ പോനാല്‌മ്, ഏസു ഏദ്‌ക്കെല്ല പോരാനൊ അദ്‌ക്കെല്ല ആള്‌ഗ ണോയിക്കാറാര്‌ണ എ്ഡ്‌ത്ത് ബന്ത് അദിലിര്‌ക്ക സന്തേക്ക്‌റാഗ ക്‌ഡാത്തിനാര്. ഇവാര് <<ണിന്ന് സീലെ താനെന എന്താല് അണ്ണ്യ ണോയിക്കാറാര്‌ണ ബ്‌ഡുഡോമെ>> എന്ത് ഏസുണ ബേ്ണ്ടിനാര്. അച്ചെ അണ്ണിനവാര് ഒട്ടുക്ക് ണോയി തെ്ളിന്താര്.
Currently Selected:
മറ്‌ക്കോസ് 6: സാമിദ് സേദി
Highlight
Share
Copy
Want to have your highlights saved across all your devices? Sign up or sign in
New Life Literature
