മറ്‌ക്കോസ് 4
4
ബെദെക്കാറാ് കദെ
1പിന്നെ ഒരു ണാള് ഏസു ഗെലീലെ കഡാലോരാക്കെ പോയി ആള്‌ഗാക്ക് ബുദ്ദിണായ പഡിസ്യ പ്‌ഡിത്താ്. അക്കുളെ മൊത്തന ആള്‌ഗ അയാള്‌ണ ഗുമ്പ്‌കൂഡി കൊണ്ടിര്‌ന്താര്. അദ്‌ണാലെ ഏസു കഡാല്‌ദ് ഏ്ട്ടി അര്‌ഗെ ഇര്‌ന്ത ഒരു തോണിക്കെ ഏ്റി കുക്കാന്താ്. ആള്‌ഗൊട്ടുക്ക് ഏ്ട്ടിലിമ് ഇര്‌ന്താര്. 2ഏസു തോണിലിര്‌ന്ത് അവാര്‌ക്കെ കദെ ദിന്‌സിലി ണല്ല ണല്ല ബുദ്ദിണായഗണ സൊല്ലി പഡിസിനാ്. അവാര്‌ക്കെ പഡിസി കൊണ്ടിര്‌ക്കാട്ടി ഇച്ചെ സൊന്നാ്: 3<<ഈങ്ക് ണോഡി, ഒരുത്താ് ബെദേക്ക്യ പോനാ്. 4അവാ് ബെദേക്കാട്ടി ലേസ ബെദെ ബയ്യിക്ക് ബ്‌ന്ത്‌ദ്. അദ്‌ണ പക്കിഗ ബന്ത് കൊത്തി തിന്തെക്കിറ്റ്. 5അദിലി ലേസ ബെദെ അറെക്കുദ്ദാക്കിര്‌ക്ക മണ്ണ്‌ക്കെ ബ്‌ന്ത്‌ദ്. അറേലി അത്തറ മണ്ണില്ലാത്താദ്‌ണാലെ ബെദെ പൊത്തന കൊഡിത്ത്‌ദ്. 6ആന പയിര്‌ക്ക് ബേരോഡ്യ മുഡ്യാത്താദ്‌ണാലെ ബെക്കെ തട്ട്‌ഗാട്ടി അദ്‌ഗ ബാഡി കരിന്തെക്കിറ്റ്. 7ലേസ ബെദെ മുള്ളു സെ്ഡി പട്ട്‌ക്കെ ബ്‌ന്ത്‌ദ്. ആന മുള്ളു സെ്ഡി ബളാന്ത് അദ്‌ണ സപാളിസ്യെക്കിറ്റ്. അദ്‌ണാലെ അദിലി അന്ന കെ്ഡേക്കാലെ. 8ലേസ ബെദെ ണല്ല മണ്ണ്‌ക്കെ ബ്‌ന്ത്‌ദ്. അദ് കൊഡിത്ത് ബളാന്ത് അയ്യി ബെദേത്ത ബെദേന ബ്‌ഡ മുപ്പദ് അറുവാദ് ണൂറ് സലാഗെ അന്ന കെ്ഡേത്ത്‌ദ്.>>
9<<ണാന് സൊല്ലുറാദ്‌ണ കേ്ക്ക്യ മനേസ്സിര്‌ക്കവാ് കേ്ക്കുഡൊ>> എന്ത്‌മ് ഏസു സൊന്നാ്.
ഏസു കദേദ് പൊറുള്‌ണ സൊല്ലുറാ്
10അദ്‌ക്ക് പ്‌റ ഏസു ഒരുത്താ് ഇര്‌ക്കാട്ടി തന്ന് സൊല്ലുപഡി ണഡാക്ക പന്നന്റ് ആള്‌ഗാമ് തന്ന്‌ദ് ഒപ്പ ഇര്‌ന്ത ലേസ ആള്‌ഗാമ് ബന്ത് കദേദ് പൊറുള്‌ണ പറ്റി അവാന കേ്ട്ടാര്. 11അക്കുളെ ഏസു അവാര്‌ക്കെ സൊന്നാ്: <<സാമി ആള്‌റാദ്‌ണ പറ്റി മറേന്തിര്‌ക്ക പൊറുള് ണിമാക്ക്‌ത്തെ ബെ്ളിപട്ട് കെ്ഡേത്തിര്‌ക്ക്‌ദ്. ആന സാമി ആള്‌റാദ്‌ക്ക് ബെ്ള്യെ ഇര്‌ക്ക ആള്‌ഗാക്കെല്ല ഇദ് കദെ പാസെത്തെ സൊല്ലികൊഡുക്കുവെ. 12എന്ത്‌ക്കെന്റ,
<അവാര് പിന്നേമ് പിന്നേമ് സാമി സൊല്ലുസുലാക്കണ പഡിക്കുവാര്; ആന അവാര് എത്തറ പഡിത്താല്‌മ് അദ്‌ദ് പൊറുള് പ്‌ഡികെ്ഡേക്കമാട്ട;
അവാര് ണാന് സൊല്ലുറാദ്‌ണ കേ്ക്കുവാര്; ആന അദ്‌ദ് പൊറുള് ണെപ്പ്‌കെ്ഡേക്കമാട്ട;
അദ്‌ണാലെ അവാര് തമ്മ സെയ്‌ര പാവാത്തിലിര്‌ന്ത് തില്‌മ്പാമ് മാട്ടാര്. സാമി അവാര്‌ദ് പാവണ പൊറുക്കാമ് മാട്ടാ്.>#എസയ്യാ് 6:9 >>
13പിന്നേമ് ഏസു അവാര്‌ക്കെ സൊന്നാ്: <<ഈ കദേദ് പൊറുള്‌ണ ഗൂഡി ണിമാക്ക് ണെപ്പ്‌കെ്ഡേക്കാലേഗ? പിന്നെച്ചെ ബേ്റെ കദേദ് പൊറുള് ണെപ്പ്‌കെ്ഡേക്കു? 14ബെദെക്കാറാ് ബിത്ത് ബെദേക്ക പാസെത്തെ ഒരുത്താ് സാമി സൊല്ലുസുലാക്കണ ആള്‌ഗാക്കെ സൊല്ലുറാദ്. 15ബയ്യിക്കെ ബ്‌ന്ത ബെദേന പാസെത്തെ ലേസ ആള്‌ഗ കേ്ക്ക സാമി സൊല്ലുസുലാക്ക. ഇവാര് കേ്ട്ട സാമി സൊല്ലുസുലാക്കണ അപ്പ്‌താനെ സെയിത്ത്യാ് ബന്ത് എ്ഡ്‌ത്തെക്ക്‌റാ്. 16അറെ പട്ട്‌ക്കെ ബ്‌ന്ത ബെദേന പാസെത്തെ ബേ്റെ ആള്‌ഗ കേ്ക്ക സാമി സൊല്ലുസുലാക്ക. ഈ ആള്‌ഗ സാമി സൊല്ലുസുലാക്കണ പിര്യപിര്യാത്ത് തങ്കാരിക്കാര്. 17സാമി സൊല്ലുസുലാക്ക സെരിക്ക്‌മ് അവാര്‌ദ് മനേസ്സ്‌ക്ക് പദിന്ത് ഇ്റാങ്കാലെ. ആന സാമി സൊല്ലുസുലാക്കണ ണമ്പിനാദ്‌ണാലെ എന്താറ്റ് കജട്ടഗൊ കൊഡിമെഗൊ ബന്താക്കി അപ്പ്‌താനെ അദ്‌ണ തള്ള്യെക്കുവാര്. 18മുള്ളു സെ്ഡി പട്ട്‌ക്കെ ബ്‌ന്ത ബെദേന പാസെത്തെ ലേസ ആള്‌ഗ കേ്ക്ക സാമി സൊല്ലുസുലാക്ക. 19ഈ ഉലഗാത്തിലി ബര കജട്ടമാന പെ്ളേപ്പ്‌മ്, പണ ആസേമ്, അദിദ്‌ഗളോഡെ ഇര്‌ക്ക കെ്ട്ട ആസേമ് അവാര് കേ്ട്ട സാമി സൊല്ലുസുലാക്കണ ണെരിക്കി ഇല്ലാദാക്ക്‌ദ്. ഇച്ച്‌ളവാര് ഒന്റുക്ക്‌മ് ഉവഗാരപഡ മാട്ടാര്. 20ണല്ല മണ്ണ്‌ക്കെ ബ്‌ന്ത ബെദേന പാസെത്തെ ലേസ ആള്‌ഗ കേ്ക്ക സാമി സൊല്ലുസുലാക്ക; അവാര് സാമി സൊല്ലുസുലാക്കണ കേ്ട്ട് തങ്കാരിക്കാര്. ഇച്ചെ തങ്കാരിത്തവാര് തമാക്ക്‌മ് ബേ്റെ ആള്‌ഗാക്ക്‌മ് ഉവഗാരപഡുവാര്. ലേസ ആള്‌ഗ ലേസ ഉവഗാരപഡുവാര്; ബേ്റെ ലേസ ആള്‌ഗ അദ്‌ക്ക് ബ്‌ഡ ഉവഗാരപഡുവാര്; പിന്നെ ബേ്റെ ലേസ ആള്‌ഗ ഇവാര്‌ക്ക്‌മ് ബ്‌ഡ എത്തറാഗൊ ഉവഗാരപഡുവാര്.>>
ബ്‌ളാക്ക് പട്ടഡെക്കുദ്ദാക്ക്
21അവാര്‌ക്ക് ഏസു പിന്നേമ് ഇച്ചെ സൊന്നാ്: <<ണിമ്മ ആരാറ്റ് ഒരു ബ്‌ളാക്ക്‌ണ കത്തിസി തെക്ക്‌ണ കമ്‌സ്യൊ ഇല്ലെ പട്ടഡെക്കഡ്യോ ബെക്കുവേര? ബ്‌ളാക്ക്‌ണ ആരാനാല്‌മ് മദ്‌ള്‌ക്കുദാക്ക്‌ത്തെ ബെക്കില. 22ഒളിസി ബെത്തിര്‌ക്ക എന്താനാല്‌മ് ഒരു ണാള് ബെ്ള്യെ കഡാക്കു. മുച്ചി ബെത്തിര്‌ക്ക എന്താനാല്‌മ് എദ്‌ക്കാവു. 23ണാന് സൊന്നാദ്‌ണ കേ്ക്ക്യ മനേസ്സിര്‌ക്കവാ് കേ്ക്കുഡൊ.>>
24അവാര്‌ക്ക് ഏസു പിന്നേമ് സൊന്നാ്: <<ണിമ്മ കേ്ക്കാദ് എന്തായെന്റ് സൊക്കാന ഓസണെ എ്ഡ്‌ത്ത് ണോഡിരി. അഡ്‌ത്തവാര്‌ക്ക് ണിമ്മ എത്തിനി അളാന്ത് കൊഡുക്കേരൊ അത്തിനി താനെ സാമി ണിമാക്ക് തിലിപ്പിമ് തരുവാ്. ണിമ്മ കൊഡുക്കാദ്‌ണ ബ്‌ഡ സാമി ണിമാക്ക് ദാസ്‌ത്തി തരുവാ്. 25ഇര്‌ക്കവാന്‌ക്ക് എക്കസക്ക കൊഡുക്കുവാ്. ലേസ ഇര്‌ക്കവാന്‌ക്ക് ഇര്‌ക്ക ലേസണ ഗൂഡി എ്ഡ്‌ത്തെക്കുവാ്.>>
തെര്യാദെ കൊഡിക്ക ബെദെ
26അവാര്‌ക്കെ ഏസു പിന്നേമ് ഒരു കദെ ഗൂഡി സൊന്നാ്: <<സാമി ആള്‌റാദ് എങ്കാദ് ഇദ്‌ക്ക് സമ. ഒരു കാഡ്‌ക്കാറാ് തന്ന് കാഡ്‌ക്കെ ബിത്ത് ബെദേത്താ്. 27അയാള് അന്തിക്ക് ഉറാങ്ക്‌റാ്. ബെ്ഡ്യാലെ എ്ന്ത്‌റാ്. അയാള്‌ക്ക് എച്ചെന്ത് തെര്യാദെ താനെ ബെദെ കൊഡിത്ത് ബര്‌ദ്. 28മണ്ണ് തന്യെ ബെ്ള്ളാമെ തര്‌ദ്. മുദ പയിര്‌മ് പ്‌റ കദ്‌റ് ബ്‌ട്ട് കഡേസിലി കദ്‌റിലി തുമ്പ അന്ന ബെദേമ് ആദ്. 29ബെ്ള്ളാമെ ബെ്ളേന്ത് അറ്‌ക്ക്യ ആഗാട്ട്യെല്ല ആള്‌ഗണ കാഡ്‌ക്കാറാ് അറ്‌ക്ക്യ ബ്‌ഡ്‌റാ്.>>
കഡ്‌ഗ് ബെദെ കദെ
30അവാര്‌ക്കെ ഏസു പിന്നേമ് സൊന്നാ്: <<സാമി ആള്‌റാദ്‌ണ ഏദ്‌ക്ക് എ്ണേത്ത് ണാന് ണിമാക്കെ സൊല്ലി തരുവെ? ഈ പൊറുള് തെര്യ ഏദ് കദേക്കെ എജേത്ത് ണാന് സൊല്ലി തരുവെ? 31സാമി ആള്‌റാദ് എങ്കാദ് ഒരു കഡ്‌ഗ് ബെദേക്ക് സമ. അദ്‌ണ ബെദേക്കാട്ടി ബൂമിലി ബെദേത്ത ബെദെഗണ ബ്‌ഡ സിന്ന ബെദേത്തെ അദ്. 32ഇദ് കൊഡിത്ത് ബളാന്ത് എല്ല സെ്ഡിഗണ ബ്‌ഡ ബെല്ല്യാദാദ്. അദ് ബെല്ല്യ താറ്‌തലേപ്പ്‌ഗ ബ്‌ട്ട് അയ്യി കുളുസിലി പക്കിഗ ഗൂഡ് എ്ഡ്‌ത്ത് ഇര്‌ക്ക്യ ആദ്.>>
33ഇദേപാസെ സാമി സൊല്ലുസുലാക്കണ എത്തിന്യൊ കദെഗ ദിന്‌സിലി അവാര്‌ക്ക് തെരിര പാസെ ഏസു സൊല്ലികൊഡുത്താ്. 34അവാര്‌ക്ക് കദെ ദിന്‌സിലി അല്ലാദെ ബേ്റെ ദിന്‌സിലി ഒന്റുമ് സൊല്ലികൊഡുക്കാലെ. ആള്‌ഗ ബിച്ചന പോന പ്‌റ തന്ന് സൊല്ലുപഡി ണഡാക്കവാര്‌ക്ക് ഒരൊരു കദേദ് പൊറുള്‌ഗണ ണലമായി സൊല്ലികൊഡുത്തിര്‌ന്താ്.
ഏസു കാറ്റ്‌ണ അഡാക്ക്‌റാ്
35അയ്യി ണാള് അന്ത്യോഡെ തന്ന് സൊല്ലുപഡി ണഡാക്കവാര്‌ക്കെ ഏസു: <<ണമ്മ അയ്യേ്ട്ടി പോഗായി>> എന്ത് സൊന്നാ്. 36അവാര് ആള്‌ഗണ തള്ളി ഏസു കുക്കാന്തിര്‌ന്ത തോണിക്കെ താനെ ഏ്റി അയാള്‌ണ കൂട്ടി പോനാര്. അവാര്‌ദ് ഒപ്പ ബേ്റെ തോണിഗാമ് ഇര്‌ന്തിര്‌ന്ത്‌ദ്. 37അക്കുളെ ബെല്ല്യൊരു കാറ്റഡിത്ത് തെരെ പൊങ്കി തോണിക്കെ തണ്ണി തുമ്പി തോണി മുങ്ക്യെക്ക്യ ആറ്റ്. 38തോണിക്ക് പിന്ന് സാരി ഏസു തലെങ്കണി ബെത്ത് ഉറാങ്കിര്‌ന്താ്. അക്കുളെ ഏസുദ് സൊല്ലുപഡി ണഡാക്കവാര് അവാന ഏ്ത്തി, <<ഗുരേ, എമ്മ ഇപ്പ് മുങ്കി സത്തെക്ക്യ ആയിര്‌ക്കേര് എന്ത് ണിനാക്ക് തെര്യാഗ?>> എന്ത് സൊന്നാര്.
39അക്കുളെ ഏസു എ്ന്ത് ണിന്റ് കാറ്റ്‌ണാമ് തെരെനാമ് <<അഡാങ്ക്>> എന്ത് മെ്റ്‌ട്ടിനാ്. അപ്പ്‌താനെ കാറ്റ് ണിന്റ്‌ദ്, കഡാല് കോവ അഡാങ്കി സപ്പെന്താറ്റ്.
40<<ണിമ്മ എന്ത്‌ക്ക് കോവെപട്ടാദ്? ഇപ്പ്‌മ് ണിമാക്ക് ണമ്പിക്കെ ഇല്ലേഗ?>> എന്ത് തന്ന് സൊല്ലുപഡി ണഡാക്കവാര്‌ക്കെ ഏസു സൊന്നാ്.
41അവാര്‌ക്ക് കോവെ പ്‌ഡിത്ത് അഞ്ച്യെക്കിനാര്. <<അവ്വൊ, ഇയാള് ആര്? കാറ്റ് കഡാല് ഗൂഡി ഇയാള് പേസ് കേ്ക്ക്‌ദ്>> എന്ത് തമാക്ക് തമാക്ക് സൊന്നാര്.
Currently Selected:
മറ്‌ക്കോസ് 4: സാമിദ് സേദി
Highlight
Share
Copy
Want to have your highlights saved across all your devices? Sign up or sign in
New Life Literature
