മറ്‌ക്കോസ് 3
3
സപ്പെ കയ്യിന തെ്ള്‌സ്‌റാ്
1പിന്നെ ഒരു ണാള് ഏസു എഗുദാര് പരേസ്‌റ കൂരേക്കെ എജ്ജിനാ്. അദിലി കയ്യി സപ്പെ ബ്‌ന്ത ഒരുത്താ് ഇര്‌ന്താ്. 2ഏസുണ കുറ്റക്കാറാ് ആക്ക്യ ഒരു കുറ്റ കെ്ഡേക്ക്യ ബേ്ണ്ടി ഏസു ഒയിവു ണാള് ഈ ണോയിക്കാറാന തെ്ള്‌സുവാനൊ എന്ത് ലേസ എഗുദല ണോഡികൊണ്ടിര്‌ന്താര്. 3ഏസു അയ്യി കയ്യി സപ്പെ ബ്‌ന്തിര്‌ക്കവാന്‌ക്കെ ഇച്ചെ സൊന്നാ്: <<ണീ എ്ന്ത് പോയി മുന്തുക്ക് ണില്ല്; എല്ലാര്‌മ് ണിനാണ കാണുഡൊ.>>
4ഏസു അവാര്‌ണ: <<ഒയിവു ണാള് ണല്ലാദ് സെയ്‌രാദൊ, ഇല്ലെ കെ്ട്ടാദ് സെയ്‌രാദൊ, ഒരു ഉജുറുണ കാപാറ്റ്‌റാദൊ, ഇല്ലെ അളിത്തെക്ക്‌റാദൊ ഏദ് ണായ?>> എന്ത് കേ്ട്ടാ്. അദ്‌ക്ക് ആള്‌ഗ ബദ്‌ള് ഒന്റുമ് സൊല്ലാലെ.
5അവാര്‌ദ് കല്ല് ണെഞ്ച്‌ണ കണ്ട് ഏസുക്ക് സങ്കഡാമ് മൊനേമ് ബന്ത്‌ദ്. അക്കുളെ ഏസു അവാര്‌ണ സുറ്റുമ് ണോഡിര്‌ന്ത് കയ്യി സപ്പെ ബ്‌ന്തവാന: <<കയ്യിന ണീ്ട്ട്>> എന്ത് സൊന്നാ്. അവാ് കയ്യിന ണീ്ട്ടിനാ്. അപ്പ്‌താനെ സപ്പെ ബ്‌ന്തിര്‌ന്ത കയ്യി ണലമായാറ്റ്. 6പരിസല അദിലിര്‌ന്ത് ബെ്ള്യെ പോയി എരോദലണ കണ്ട് ഏസുണ എച്ചെ കൊല്ലില എന്ത് ഓസണെ എ്ഡ്‌ത്താര്.
മൊത്തന ആള്‌ഗ ഏസു പിന്ന്‌ക്ക് പോരാര്
7ഏസു തന്ന് സൊല്ലുപഡി ണഡാക്കവാരോഡെ ഗെലീലെ കഡാലോരാക്കെ പോനാ്. അക്കുളെ ഗെലീലേലിര്‌ന്ത് അവാ് പിന്ന്‌ക്ക് ബെല്ല്യൊരു കൂട്ട ആള്‌ഗ പോനാര്. 8അച്ചെ എത്തിന്യൊ ആള്‌ഗ ഏസു പട്ട്‌ക്ക് എജ്ജിനാര്. എഗുദ, എര്‌സലേമ്, ഏദോമ്, പിന്നെ ഓറ്‌ദ്ദാ് ബാനിക്ക് അയ്യേ്ട്ടിര്‌ക്ക ആള്‌ഗാദ് ഒപ്പ സോര്‌ദ്‌മ്, സീദോന്‌ദ്‌മ് സുറ്റുമുറ്റിര്‌ക്ക ഊര്‌ക്കാറാര്‌മ് ഏസു പട്ട്‌ക്ക് ബന്താര്. ഏസു സെയ്‌ദ കാര്യഗണ പറ്റി കേ്ട്ട്‌ത്തെ അവാര് ബന്താദ്. 9-10ഏസു എത്തിന്യൊ ണോയിക്കാറാര്‌ണ ണല്ലാദ് ആക്കിനാ്. അദ്‌ണ കണ്ട് മൊത്തന ണോയിക്കാറാര് അവാന അണ്ണ്യ ണെഗ്‌സി ബന്താര്. തനാണ ആള്‌ഗ ണെഗ്‌സാദെ ഇര്‌ക്ക്യ ഏസു തന്ന് സൊല്ലുപഡി ണഡാക്കവാര്‌ക്കെ ഒരു തോണി എ്ഡ്‌ത്ത് ബര്യ സൊന്നാ്. 11കെ്ട്ടജാദി ണമ്പിര്‌ന്ത ആള്‌ഗ ഏസുണ കണ്ടാദ്‌മ് അയാള്‌ദ് കാല്‌ക്കെ ബ്‌ന്ത് കുമ്മുഡി: <<ണീ സാമിദ് മഗാ്>> എന്ത് ബെല്ല്യാദ്‌ക്ക് അഗാറി സൊന്നാര്. 12ഏസു കെ്ട്ടജാദിഗാക്കെ: <<കണ്ടിപ്പായിമ് ണാന് ആരെന്ത് ആള്‌ഗാക്ക് സൊല്ല ബേ്ഡ>> എന്ത് സൊന്നാ്.
ഏസു തന്ന് സൊല്ലുപഡി ണഡാക്ക്യ പന്നന്റ് ആള്‌ഗണ തെരിന്തെ്ഡ്‌ക്കാ്
13പിന്നെ ഏസു ഒരു ഗുഡ്ഡേക്കെ ഏ്റി തനാക്ക് പ്‌ഡിത്തവാര്‌ണ അര്‌ഗെ ഒളേത്താ്. അക്കുളെ അവാര് ഏസു പട്ട്‌ക്ക് ബന്താര്. 14അവാര്‌ദിലി പന്നന്റ് ആള്‌ഗണ തെരിന്തെ്ഡ്‌ത്ത് അപ്പൊസലല#3:14അപ്പൊസലല ഈ ബാക്ക്‌ദ് പൊറുള് <<സൊല്ലിബ്‌ട്ടവാ്>> എന്ത്‌ത്തെ. ഒരു അദിഗാരി തനാക്ക് ബദ്‌ള തന്ന് അദിഗാരത്തോഡെ ഒരുത്താന സൊല്ലിബ്‌ഡ്‌റാ്. ഏസു ഈ ബൂമിക്ക്‌റാഗ തന്ന് ബേലെ സെയ്യ തെരിന്തെ്ഡ്‌ത്ത് അദിഗാരത്തോഡെ സൊല്ലിബ്‌ട്ട ആള്‌ഗാത്തെ അപ്പൊസലല. എന്ത് പേര് ബെത്താ്. അവാര്‌ക്കെ ഏസു ഇച്ചെ സൊന്നാ്: <<ണാന് ണിമാണ തെരിന്തെ്ഡ്‌ത്തിര്‌ക്കാദ് എന്ന് ഒപ്പ ഇര്‌ക്ക്യാത്തെ; പിന്നെ ബേ്റെബേ്റെ ഊര്‌ക്ക്‌റാഗ പോയി ണല്ല സേദിന സൊല്ല്യാമ് ണിമാണ ബ്‌ഡുവെ. 15ആള്‌ഗാക്ക് തട്ടിര്‌ക്ക കെ്ട്ടജാദിഗണ ഒയിപ്പിസ്യ ണിമാക്ക് അദിഗാരാമ് ഇര്‌ക്ക്‌ദ്.>> 16പ്‌റ സീമോന്‌ക്ക് (ഏസു പത്ത്‌റോസ് എന്ത് പേര്‌മ് ബെത്താ്), 17സെവെദി മഗനാര് ആക്കോവുക്ക്‌മ് അയാള്‌ദ് തമ്പി ഓഗന്നാന്‌ക്ക്‌മ് <<ഇഡിജദ്ദ മക്ക>> എന്ത അര്‌ത്താത്തിലി <<ബൊവനേര്‌ഗ്ഗേസ്>> എന്ത് പേര് ബെത്താ്. 18അന്ത്‌റോസ്, പീലിപ്പോസ്, ബറ്‌ത്തലാമായി, മത്തായി, തോമാസ്, അല്‌പ്പായിദ് മഗാ് ആക്കോവു, തദ്ദായി, തന്ന് ജാദിഗാക്ക് എന്ത സെയ്യാമ് ഗട്ടിക്കാറാനാന സീമോന്, 19ഏസുണ കാട്ടി കൊഡുത്ത കര്യോത്ത്‌ക്കാറാ് ജൂദാ്. ഇവാര്‌ഗാത്തെ ഏസു തെരിന്തെ്ഡ്‌ത്ത പന്നന്റ് ആള്‌ഗ.
ഏസുമ് ബെല്‌സവൂലുമ്
20അദ്‌ക്ക് പ്‌റ ഏസു കൂരേക്കെ പോനാ്. അക്കുളെ ഏസുക്ക്‌മ് ഏസുദ് സൊല്ലുപഡി ണഡാക്കവാര്‌ക്ക്‌മ് തിന്ന്യ ഗൂഡി ഒയിവില്ലാത്ത പഡി പിന്നേമ് ആള്‌ഗ ബന്ത് തുമ്പികൊഡുത്താര്. 21ഏസുദ് കൂരെക്കാറാര്‌ക്ക് ഇദ് തെരിന്ത്‌ദ്. <<അവാന്‌ക്ക് പിരാന്ത് പ്‌ഡിത്തിര്‌ക്ക്‌ദ്>> എന്ത് സൊല്ലി അവാന പ്‌ഡിത്ത് ബര്യ പോനാര്.
22എര്‌സലേമിലിര്‌ന്ത് ബന്ത ബേദ ബാത്ത്യല ഇച്ചെ സൊന്നാര്: <<ഇവാന ണമ്പിര്‌ക്കാദ് കെ്ട്ടജാദിഗാദ് തലെവാ് ബെല്‌സവൂലുത്തെ. ഈ ജാദിത്തെ പിജാദ്‌ഗണ ഇ്റാക്ക്യ ഇവാന്‌ക്ക് സക്‌ദി കൊഡുക്കാദ്.>>
23അക്കുളെ ഏസു അവാര്‌ണ ഒളേത്ത് ഒറു കദെ ദിന്‌സിലി സൊല്ലികൊഡുത്താ്: <<സെയിത്ത്യാ് സെയിത്ത്യാന താനെ എച്ചെ ഒയിപ്പിസ്യ മുഡ്യു? 24ഒരേ ണാഡില്യവാര് താനെ ആങ്കീങ്ക് മല്ല് പ്‌ഡിത്ത് സിന്തസിദാറ ആനാക്കി അയ്യി ണാഡ് ണെലെക്ക്യാഗെ മുഡ്യമാട്ട. 25ആളാ്ന്‌പെ്ണ്ട് മല്ല് പ്‌ഡിക്ക കൂരെഗാമ് ഇച്ചെത്തെ കലേന്തെക്കു. 26സെയിത്ത്യാന്‌ക്ക് അഡിര്‌ക്ക കെ്ട്ടജാദിഗ റണ്ടായി പ്‌റ്‌ന്ത് തന്നോഡെ താനെ പോട്ടിപ്‌ഡിത്ത അയാള് ണാഡ് ണെലേത്തിര്‌ക്കമാട്ട. അദ്‌ക്ക് മുഡിവു ബന്തിര്‌ക്ക്‌ദ്. 27ണല്ല മുജുവുക്കാറാ്ന പോയി പ്‌ഡിത്ത് കെ്ട്ടാദെ പോന അയാള്‌ദ് കൂരേക്കെ പുക്കി മുദാല്‌മൂഡ്യെഗണ ത്‌റ്‌ഡി എ്ഡ്‌ക്ക്യ മുഡ്യമാട്ട. മുദ അവാന പ്‌ഡിത്ത് കെ്ട്ടി ബെക്കുഡൊ. അപ്പ്‌ത്തെ അദില്യ മുദാല്‌മൂഡ്യെഗണ ത്‌റ്‌ഡി എ്ഡ്‌ക്ക്യ മുഡ്യു. 28ണേര്‌മായിമ് ണാന് ണിമാക്കെ സൊല്ലുറെ: മന്‌സാര് സെയ്‌ര പാവഗാക്ക്‌മ് പൊറിമെ കെ്ഡേക്കു. സാമിന കുറ്റ സൊല്ലുറവാന്‌ക്ക്‌മ് പൊറിമെ കെ്ഡേക്കു. 29ആന സാമിണിഗാല്‌ണ കുറ്റ സൊല്ലുറവാന ഒരു ണാള്‌മ് പൊറുക്ക്യാഗെ മുഡ്യമാട്ട. അച്ച്‌ളവാന ഒരു ണാള്‌മ് പൊറുക്ക്യാഗെ ഇല്ലെ.>>
30<<തന്നോഡെ കെ്ട്ടജാദിര്‌ക്ക്‌ദ്>> എന്ത് അവാര് സൊന്നാദ്‌ക്ക്‌ത്തെ ഏസു ഇച്ചെ സൊന്നാദ്.
ഏസുദ് സൊന്തക്കാറാര് ആര്?
31അദ്‌ക്ക് പ്‌റ ഏസുദ് അവ്വേമ് തമ്പിലാമ് ബന്ത് ബെ്ള്യെ ണിന്റ് അദിലിര്‌ന്ത ഒരുത്താന ഏസുണ ഒളേത്ത് ബര്യ സൊല്ലിബ്‌ട്ടാര്. 32ഏസുദ് സുറ്റുമ് മൊത്തന ആള്‌ഗ കുക്കാന്തിര്‌ന്താര്. അവാര് ഏസുക്കെ സൊന്നാര്: <<ണിന്ന് അവ്വേമ് തമ്പിലാമ് ബന്ത് ബെ്ള്യെ ണിനാണ കാത്തിര്‌ക്കാര്.>>
33അക്കുളെ ഏസു: <<എന്ന് അവ്വെ ആര്? എന്ന് തമ്പില ആര്?>> എന്ത് അവാര്‌ണ കേ്ട്ടാ്.
34പിന്നെ തന്ന് സുറ്റുമുറ്റ് കുക്കാന്തിര്‌ന്തവാര്‌ണ ണോഡി ഇച്ചെ സൊന്നാ്: <<ഇദാ ഇവാര്‌ത്തെ എന്ന് അവ്വേമ് തമ്പിലാമ്. 35സാമി ആസെപഡി ണഡാക്കവാര്‌ത്തെ എന്ന് തമ്പിലാമ് തങ്കെലാമ് എന്ന് അവ്വേമ്.>>
Currently Selected:
മറ്‌ക്കോസ് 3: സാമിദ് സേദി
Highlight
Share
Copy
Want to have your highlights saved across all your devices? Sign up or sign in
New Life Literature
