Markus 15

Yesus di hadapan Gubernur Pilatus

(15:1-15)

(Mat. 27:1-2, 11-26; Luk. 23:1-5, 13-25; Yoh. 18:28–19:16)

1Kotakan sunsukng-pukau, somuo Mahkamah agama Yahudi bokumpul, tomansu' boko imam kopala', boko pomimpitn banso Yahudi huatan boko guru agama Yahudi. Sia' mombulah koputusan oca' Yesus dihukupm mati. Jadi, sia' mongobat jari Yesus momakai rantai lalu mombaba'-Nyo ko gubernur Pilatus. Timpu sia' monyorahan Yesus ko Pilatus, 2Pilatus botakutn ko Yesus, “Apo bai Kolai rajo urakng Yahudi?”

Timbas Yesus, “Sama'an inyo kolai katoan nam.”

3Boko imam kopala' moajuan banya' tuduhan molawatn Sio. 4Pilatus botakutn agi' ko io, “Kolai mondinga' banya' tuduhan sia' molawatn Kolai. Mapo Kolai kinyo monimbas pakai' mombela diri Kolai?” 5Apo, Sio kinyo monimbasi samo sokali, sampai Pilatus hiratn.

6Nah, tiap watu ari rayo Paskah, gubernur Pilatus biasonyo molopasan siku' urakng doi' ponjara, sosuai agatn pilihan rayat. 7Timpu nantai ado urakng di ponjara inyo bodamoan Barabas. (Barabas ditamoan ko dalapm ponjara bosamo agatn boboropo urakng inyo mombulah pomborontakan molawatn pomorintah Romawi. Sia' pan mombunuh dalapm pomborontakan nantai.) 8Banya' urakng bokumpul lalu minto ko Pilatus oca' io molopasan siku' urakng doi' ponjara sama'an biasonyo. 9Pilatus botakutn ko sia', “Apo bai kaitn honda' aku molopasan Rajo urakng Yahudi nantai?” 10(Pilatus bopandir sama'an nantai obai io mongotohu'i alasan boko imam kopala' monyorahan Yesus ko io, ia'an obai sia' tungi agatn Yesus.)

11Apo boko imam kopala' mohadu urakng banya' nantai pakai' mominto oca' Barabas inyo dilopasan pakai' sia'. 12Jadi, Pilatus botakutn agi' ko urakng banya' nantai, “Aman sama'an nian, la'apo inyo kaitn kohonda'i oca' ku labuhan ko urakng inyo kaitn sobut Rajo urakng Yahudi nantai?”

13Sia' somuo mondorah, “Hukupm mati Io di kayu salib!”

14Kato Pilatus, “Apo kojahatan la'apo inyo udah dilabuhan-Nyo?”

Apo sia' mongkitn borakng, “Hukupm mati Io di kayu salib!”

15Obai Pilatus honda' monyonangan urakng banya' nantai, jadi io molopasan Barabas obai porminta'an sia'. Apo Yesus dicambuk. Lalu Pilatus monyorahan Yesus ko boko projuritnyo oca' dihukupm mati di kayu salib.

Boko projurit moulu'-ulu' Yesus

(15:16-20)

(Mat. 27:27-31; Yoh. 19:2-3)

16Lopasnyo boko projurit Pilatus nantai mombaba' Yesus ko istana gubernur.#15:16: Dalapm istana nantai, ado markas tompat monahan urakng inyo paca'an dihukupm. Sia' moningkau soluruh pasukan pakai' bokumpul di santai. 17Lalu sia' mula'i mohanyam Sio sobagai rajo. Sia' mongona'an jubah ungu ko Sio. Sia' pan moanyam somacapm mahkota doi' boko ranggau boduri, lalu diangga'an dikopala'-Nyo. 18Sia' pompadah mohormati Sio. Kato sia', “Pujicam Rajo Urakng Yahudi!” 19Lopasnyo, sia' moigahi-Nyo ongko momantu kopala'-Nyo agatn batakng buluh. Sia' pan tundu' monyungkapan di hadapan-Nyo, pompadah monyombah-Nyo. 20Lopas sia' boulu'-ulu'an Sio, sia' molopasan jubah ungu nantai lalu bali' mongona'an pakai'an-Nyo siku'. Lopasnyo sia' mombaba' Sio ko luar pakai' dihukupm mati di kayu salib.

Yesus dipaku di kayu salib

(15:21-32)

(Mat. 27:32-44; Luk. 23:26-43; Yoh. 19:17-27)

21Watu sia' tongahan bojalatn, sia' nantai botomu agatn urakng doi' kota Kirene. Damonyo Simon. (Io ia'an bopai Aleksander ongko Rufus.) Simon hoyu' datakng doi' luar kota. Boko projurit momoso io pakai' momikul kayu salib Yesus. 22Sia' mombaba' Yesus ko tompat inyo bodamoan Golgota. Damo nantai rotinyo ‘Tompat Tongkorak’. 23Di santai, sia' moonji'i Yesus minum anggur inyo bocampur agatn mur. Apo Sio kinyo honda' mominumnyo. 24Lopasnyo, sia' momaku Sio di kayu salib. Boko projurit monguti' pakai'an Yesus lalu moundinyo pakai' mombagi-bagian pakai'an-Nyo.#15:24: Poristiwa ni'in mombulah pomandiran doi' Mazmur 22:19 monjadi nyata.

25Sia' momaku Sio di kayu salib watu japm sombilatn sunsukng. 26Di bagian pucu' kayu salib, sia' momasakng tulisan inyo monjolasan alasan Sio dihukupm. Bunyi ni'in tulisan nantai, “Rajo Urakng Yahudi.”#15:26: Tulisan inyo dipasakng di pucu' Yesus morupoan hina'an ko Yesus (obai sia' kinyo pocayo Sio ia'an) DAMO hina'an ko urakng Yahudi (obai moremehan kuaso sia' dibandikan agatn kuaso pomorintah Romawi). 27Bosamo agatn Yesus, sia' pan monyaliban duo urakng ponyamun, inyo siku' di sopia' kanan-Nyo ongko inyo siku' agi' di sopia' kiba'-Nyo. [ 28Agatn sama'an nantai, pomandiran ni'in dalapm Buku Suci monjadi nyata: “Io dianggap siku' doi' boko urakng inyo jahat.”]

29Boko urakng inyo lalu di santai mohanyam Sio kapikng monggala'-monggili'an kopala'. Kato sia', “Ui Duatn inyo honda' morobahan Rumah Allah lalu moninjakannyo agi' dalapm watu tigo ari! 30Turutn cam doi' kayu salib nian! Solamant'an cam diri Duatn!”

31Ubo nian jam boko imam kopala' ongko boko guru agama Yahudi. Sia' mohanyam Yesus. Kato sia' ko siku'-monyiku', “Io monyolamant'an urakng bukai, apo culih-Nyo monyolamant'an diri siku'! 32Aman Sio bondar-bondar Rajo Urakng Israel, Rajo Inyo Dijanjian Allah, biaram Sio turutn doi' salib nian! Aman koi ulih moniant Sio mampu molabuhan nantai, koi paca'an pocayo ko Sio.”

Koduo urakng ponyamun inyo disaliban di sopia' Yesus, sia' pan mohanyam Sio jam.

Yesus mati

(15:33-41)

(Mat. 27:45-56; Luk. 23:44-49; Yoh. 19:28-30)

33Pas japm duo bolas tongah ari, soluruh doerah nantai monjadi kotakng potakng sampai japm tigo babahari. 34Pas japm tigo babahari, Yesus mondorah kotakng borakng, “Eloi, Eloi, lama sabakhtani?” Rotinyo, “Allah-Ku, Allah-Ku, mapo Duatn moninggalan Aku?”#15:34: Doi' buku Mazmur 22:2 35Boboropo urakng inyo mondinga' nantai kinyo mongoroti. Kato sia', “Tiat, Sio moningkau nabi Elia.” 36Siku' urakng doi' sia' hagar botula' monguti' lou' inyo ulih monyorap ara'i. Io bolit'an ko hujukng sokayu' buluh lalu dicolupannyo ko dalapm anggur mansapm. Io julukan ko nyao Yesus oca' diminum-Nyo. Urakng nantai bopandir, “Huncapm soboi'nyo kito tantian, ongko moniant aman Elia datakng pakai' monurutan Sio doi' salib.”

37Yesus mondorah agi' agatn saro borakng, huatan monyorahan kosih-Nyo. 38Watu nantai jam, tidikng di dalapm Rumah Allah birat monjadi duo, doi' pucu' ko babah.#15:38: Dalapm godukng Rumah Allah, ado ruakan husus kohadirat Allah. Ado tidikng inyo momisahan ruakan nantai doi' ruakan bukai. Sotohutn sokali ongkah Imam Agukng ulih tamo ruakan nantai. Jadi, watu tidikng nantai birat rotinyo kinyo ado batasan agi'. Kohadirat Allah kinyo ongkah di ruakan husus nantai. Rumah Allah kinyo monjadi pusat pakai' monyombah Sio agi'. Molalu'i Yesus, kito watu ni'in ulih monyombah Allah di mono pan. Tiat Ibrani 6:19-20, 9:1-15, 10:19-22 ongko Efesus 2:18, 3:12.

39Ado kopala' pasukan inyo bodiritn di pohadapan salib Yesus. Io moniant somuo inyo tojadi watu Yesus mati. Jadi, io bopandir, “Urakng ni'in maho bondar-bondar Ana' Allah!”

40Di santai ado jam boko botina' inyo moniant doi' jouh. Di antaro sia' ia'an Salome, Maria Magdalena, ongko Maria (indai doi' Yakobus inyo muda' ongko Yoses.) 41Sia' ia'an botina' inyo tuyut Yesus huatan molayati Sio timpu Sio di propinsi Galilea. Ado banya' botina' inyo bukainyo jam di santai inyo datakng ko Yerusalem bosamo Yesus.

Yesus dipasar di dalapm gua

(15:42-47)

(Mat. 27:57-61; Luk. 23:50-56; Yoh. 19:38-42)

42Ari nantai ia'an ari Jumat, ari urakng Yahudi monyodia'an posiapan sobolupm mula'i ari Sabat. Ari udah hampikng malapam, ari Sabat pan hampikam. 43Jadi, ado urakng inyo bodamoan Yusuf, bokotohuan ko gubernur Pilatus honda' moijitn aman io ulih momasar bangkai Yesus. (Yusuf ni'in asalnyo doi' kota Arimatea. Io anggota Mahkamah agama Yahudi huatan io dirogo'i urakng. Io pan ia'an urakng inyo monanti Koraja'an Allah datakng.) Io kinyo gola' monomu'i Pilatus. 44Pilatus hiratn mondinga' obai Yesus udah mati. Jadi, io moningkau kopala' pasukan ongko botakutn aman Yesus bondar udah mati am. 45Lopas mondinga' laporan doi' kopala' pasukan nantai, lalu Pilatus moijitan Yusuf oca' momocaki bangkai Yesus.

46Yusuf momboli koitn inyo bowarna putih huatan borosih lalu botula' monurutan bangkai Yesus doi' salib. Io momutut bangkai Yesus momakai koitn nantai lalu moulit'an-Nyo di dalapm gua pasaran inyo dipulah di dalapm bukit batu. Io mombarikan batu bosar di sambakng gua tompat pasaran nantai pakai' ponutupnyo. 47(Maria Magdalena ongko Maria indai Yoses moniant di mono Yesus diulit'an.)

Currently Selected:

Markus 15: TBDS

Highlight

Copy