Markus 14
14
Boko pomimpitn urakng Yahudi bohajat pakai' mombunuh Yesus
(14:1-2)
(Mat. 26:1-5; Luk. 22:1-2; Yoh. 11:45-53)
1Boko imam kopala' ongko boko guru agama Yahudi honda' mombunuh Yesus. Sia' bogoyap caro pakai' monangkap Sio agatn caro kinyo dikotohu'i urakng. Apo, duo ari agi' ari Rayo Paskah huatan ari rayo Roti kinyo Boragi dampikng am. 2Kato sia', “Jangan kito sampai monangkap Yesus tongahan boko urakng morayaan ari rayo ni'in, obai nononyo paca'an ado korusuhan di antaro rayat.”#14:2: Mungkitn boko pomimpitn agama Yahudi nantai gola' aman boko urakng inyo momihak Yesus molawatn sia'. Apo mugkitn jam sia' gola' agatn pomorintah Romawi paca'an mohukupm sia' aman tolibat dalapm korusuhan nantai
Botina' inyo monuyungan minya' harupm ko pucu' kopala' Yesus pakai' morogo'i Sio
(14:3-9)
(Mat. 26:6-13; Yoh. 12:1-8)
3Di laman Betania, Yesus ado di rumah Simon inyo komainyo boponyakit kulit inyo bogola'i. Timpu Sio tongahan dudu' makatn, ado botina' datakng ko Sio. Botina' nantai mombaba' botul pualam inyo boisi minya' harupm inyo kotakan mahal rogonyo. Io momatahan lihi' botul nantai, lopasnyo monuyung minya' nantai ko kopala' Yesus pakai' morogo'i Sio. 4Apo ado boko urakng inyo godi obai hal nantai. Kato sia' ko siku'-monyiku', “Mapo minya' harupm diporugi'i sama'an nian? 5Minya' harupm nian ulih dijual ongko rogonyo kotakan mahal huatan duitnyo hoyu' dionju' ko boko urakng jaro!” Lalu sia' monggodi'i botina' nantai.
6Apo Yesus bopandir, “Biaran io ja'am. Jangan kaitn monyusahannyo! Io molabuhan inyo boi' ko aku. 7Aman kaitn honda', kaitn hala ado mo kosompatan pakai' monulukng boko urakng jaro obai sia' hala bosamo agatn kaitn. Apo Aku kinyo paca'an hala bosamo agatn kaitn. 8Botina' ni'in udah molabuhan la'apo inyo ulih io labuhan. Agatn caro monuyungan minya' harupm nantai ko Aku, sobondarnyo io udah monyiap'an bukakng-tubuh-Ku pakai' dipasar. 9Dinga'an bo! Di soluruh dunia, di mono aja' Kabar Boi' diboritoan, la'apo inyo di pulah botina' ni'in paca'an dikisahan jam sampai kinyo kalo tongkolupatn mongona'i io.”
Rasul Yudas bohajat pakai' monyorahan Yesus ko boko urakng inyo molawatn-Nyo
(14:10-11)
(Mat. 26:14-16; Luk. 22:3-6)
10Lopas nantai, Yudas Iskariot, ia'an salah siku' doi' koduo bolas rasul Yesus, io botula' ko boko imam kopala' tujuannyo pakai' monyorahan Yesus ko sia'. 11Timpu sia' mondinga' nantai, sia' kotakan rindakng bondar lalu bojanji paca'an moonji'i duit ko io. Jadi, io mula'i bogoyap kosompatan inyo boi' pakai' monyorahan Yesus ko sia'.
Yesus morayaan ari rayo Paskah bosamo agatn boko murid-Nyo
(14:12-21)
(Mat. 26:17-25; Luk. 22:7-14, 21-23; Yoh. 13:21-30)
12Udah tuntukng watunyo pakai' momula'i poraya'an ari rayo Roti Kinyo Boragi. Watu ari potamo dalapm poraya'an nantai, urakng monyombolih domba pakai' makatn poraya'an Paskah. Jadi, boko murid Yesus bopandir ko Sio, “Di mono am inyo Duatn kohonda'i koi monyiap'an pakai' Duatn oca' makatn morayaan Paskah?”
13Jadi, Yesus monyiuh duo urakng murid-Nyo. Kato-Nyo, “Botula' cam ko kota Yerusalem. Di su'utn, kaitn paca'an botomu urakng inyo mombaba' topaian boisi ara'i. Bodapan io ko rumah inyo dimansu'inyo. 14Padahan ko puku' rumah nantai: ‘Koi disiuh Guru oca' botakutn, di mono ruakan inyo ulih dipakai Sio pakai' makatn Paskah bosamo agatn boko murid-Nyo?’ 15Lalu, puku' rumah nantai paca'an monunju'an ko kaitn sobuah ruakan inyo bosar di lantai pucu'. Somuo inyo kaitn pontikan pakai' morayaan Paskah ado di su'utn. Siap'an cam somuonyo di su'utn pakai' kito.” 16Jadi, koduo murid nantai botula'. Somuo hal tojadi pas sama'an inyo udah dipadahan Yesus ko sia'. Lalu, sia' monyiap'annyo pakai' morayaan Paskah.
17Pas malapm ari, Yesus datakng bosamo agatn koduo bolas murid-Nyo ko tompat nantai. 18Tongahan sia' dudu' makatn di santai, Yesus bopandir, “Dinga'an bo! Siku' doi' antaro kaitn inyo makatn bosamo agatn Aku paca'an monyorahan Ku ko boko urakng inyo molawatn Aku.”
19Hal nantai mombulah hati sia' kotakng salu'. Sia' siku'-monyiku' bopandir ko Sio, “Pasti bukainyo aku, pan Tuhatn?”
20Timbas Sio, “Urakng nantai ia'an salah siku' doi' kaitn duo bolas ninam. Io ia'an urakng inyo moncolupan rotinyo ko dalapm mangku' samo agatn Aku. 21Udah totulis dalapm buku Suci obai Ana' Monsio paca'an disorahan ko boko urakng inyo molawatn-Nyo. Sosuai agatn tulisan nantai, hal nantai paca'an tojadi ko Io. Apo Allah paca'an mohukupm urakng inyo molabuhan nantai. Lobih boi' pakai' urakng nantai aman io kinyo kalo dilahiran samo sokali!”
Acara makatn pakai' monggonang Yesus
(14:22-25)
(Mat. 26:26-29; Luk. 22:14-20; 1Kor. 11:23-25)
22Watu Yesus ongko boko murid-Nyo tongahan makatn, Yesus monguti' roti lalu moucap'an doa sukur. Sio momingkai'-mingkai' roti nantai ongko moonju' ko boko murid-Nyo. Kato Sio, “Kuti', pua'icam, ninam bukakng-tubuh-Ku.”
23Lopas nantai, Yesus monguti' socangkir anggur. Sio moucap doa sukur agi' lalu moonju' cangkir nantai ko sia'. Sia' somuo minum doi' cangkir nantai. 24Kato-Nyo ko sia', “Ninam darah-Ku inyo paca'an ditumpahan pakai' banya' urakng watu Aku mati. Darah-Ku monsahan Pojanjian Boharu inyo Allah pulah agatn monsio.#14:24: Joman komai, urakng Israel disunant sobagai tando sia' umant Allah. Sia' pan momposombahan bonatakng oca' dosa diamputi. Nantai am Pojanjian Allah inyo manah. Apo watu ni'in ado Pojanjian Allah inyo boharu. Sopo pan inyo pocayo ko Yesus, hidup sosuai kohonda'-Nyo, urakng nantai diamputi lalu monjadi umat-Nyo. 25Apo porotian cam ni'in: Aku kinyo paca'an minum anggur agi' sampai Aku minum anggur inyo boharu dalapm Koraja'an Allah.”
Yesus momandiran obai rasul Petrus paca'an monyangkal-Nyo
(14:26-31)
(Mat. 26:30-35; Luk. 22:31-34; Yoh. 13:36-38)
26Lalu, Yesus ongko boko murid-Nyo monyanyian nyanyian pujian ko Allah. Lopas nantai, sia' botula' ko bukit Jaitun. 27Di santai, Yesus bopandir ko sia', “Malapm ni'in, kaitn somuo paca'an moninggalan Aku. Obai gola' tojadi sosuai agatn pomandiran Allah ni'in inyo totulis dalapm Buku Suci: ‘Aku paca'an mombunuh gombala nantai, lalu kabatn dombanyo paca'an botomboburan.’#14:27: Doi' buku Zakharia 13:7. Yesus disamoan agatn ‘gombala’ ongko boko murid-Nyo disamoan agatn ‘kabatn domba’. Memang Allah kinyo ‘mombunuh’ Yesus, apo komatian Yesus tomansu' dalapm hajat Allah inyo sompurna, tiat Kisah 2:23. 28Apo lopas Allah mombulah Aku bobali' hidup, Aku paca'an botula' mondoholu'i kaitn ko propinsi Galilea.”
29Kato Petrus ko Yesus, “Mungkitn somuo sia' paca'an moninggalan Duatn, apo aku cado!”
30Apo Yesus bopandir ko io, “Dinga'an nam! Timpu malapm ni'in jam kulo paca'an monyangkal Aku sampai tigo kali sobolupm manu' bokuku' duo kali.”
31Apo Petrus lobih togas bopandir, “Biar pan aku sampai mati bosamo Duatn, aku kinyo paca'an monyangkal Duatn.” Somuo murid inyo bukai bopandir sama'an nantai jam.
Yesus bodoa di kobutn Getsemani
(14:32-42)
(Mat. 26:36-46; Luk. 22:39-46)
32Lopas Yesus ongko boko murid-Nyo datakam ko tompat inyo bodamo Getsemani. Di santai, Sio bopandir ko sia', “Kaitn dudu' di sinam, nantian Aku ko su'utn pakai' bodoa.”
33Sio mombaba' Petrus, Yakobus ongko Yohanes. Sia' botula' samoan Sio. Watu nantai, Yesus mula'i mooso kotakan salu' huatan golisah. 34Kato Sio ko sia', “Hati-Ku kotakan salu', osonyo sama'an honda' mati. Kaitn tanti di si'itn huatan bojojago.”
35Lopasnyo, Yesus bojalatn sodikit lobih jouh. Sio tundu' monyungkapan lalu bodoa. Dalapm doa-Nyo, Sio minto aman ulih Sio jangan moalapi watu ajab sonsaro inyo paca'an tojadi. 36Kato-Nyo, “Oi Bopai-Ku, lopasan bo Aku doi' ajab sonsaro inyo paca'an Ku alapi ni'in. Apo jangan monuruti kohonda'-Ku, apo ongkah monuruti kohonda' Duatn ja'am bopai inyo tojadi.”
37Lopas nantai, Sio bobali' ko boko murid-Nyo nantai. Sio moniant sia' tongahan tidu'. Kato-Nyo ko Petrus, “Simon, mapo kulo tidu'? Tonyato sojapm pan kulo culih bojojago?” 38Kulo gola' bojojago ongko bodoa oca' kulo co jatu' ko dalapm poncoba'an. Memang hati monsio honda' molabuhan inyo boi', apo udah baba'annyo am monsio lomah.
39Yesus botula' agi' lalu bodoa agatn momadahan pandir inyo samo sama'an tontai. 40Lopas Sio bobali', Sio moniant sia' tongahan tidu' agi' am obai sia' kotakan ngantu'. Jadi, sia' co tohu la'apo inyo gola' sia' pandiran ko Yesus.
41Lopas nian, Yesus botula' kotigo kalinyo. Watu Sio bobali', Sio bopandir ko sia', “Kaitn pagutn tidu' ongko torahat bai?! Jadiam! Watunyo udah tuntukam pakai' Ana' Monsio disorahan ko boko urakng inyo bodosa. 42Huascam! Hincapm! Udah datakam io inyo monyorahan Aku ko boko urakng inyo molawatn Ku.”
Yesus ditangkap
(14:43-52)
(Mat. 26:47-56; Luk. 22:47-53; Yoh. 18:1-11)
43Somontaro Yesus ija' bopandir, Yudas datakng. Io ia'an siku' doi' koduo bolas rasul. Bosamo-samo agatn io, sorombokan urakng datakng jam mombaba' podakng ongko pompangkukng. Sia' di siuh boko imam kopala', boko guru agama Yahudi huatan boko pomimpitn banso Yahudi. 44(Nah, sobolupmnyo, Yudas nantai udah bohajat pakai' monyorahan Yesus ko rombokan inyo molawatn Yesus nantai. Io moonji'i tando ni'in ko sia'. Katonyo, “Urakng inyo ku ciupm, nanam urakngnyo. Tangkap cam Io! Baba'cam Io ko boko pomimpitn agama. Somanah nantai, jago'i cam Io bobondar.”)
45Jadi, watu Yudas ongko rombokan datakng di santai, Yudas lansukng mohampiki Yesus. Katonyo, “Salapm, Guru!” Lalu, Yudas monciupm Sio. 46Lansukng rombokan nantai maju, monangkap Yesus.
47Siku' urakng inyo monambahi Yesus moncabut podakng, lansukng monyorakng siku' hulutn Imam Agukng. Io momopat kolindakan hulutn nantai sampai putus.
48Yesus bopandir ko rombokan nantai, “Ponjahat bai Aku ni'in, sampai kaitn datakng gola' agatn podakng huatan pompangkukng pakai' monangkap Ku? 49Padohal, sotiap ari Aku di tongah-tongah kaitn mongajar di tongahlamanan Rumah Allah. Apo watu nantai kaitn co monangkap Ku. Apo, somuonyo ni'in tojadi oca' pomandiran mongona'i Aku inyo ditulis dalapm Buku Suci monjadi nyata.”
50Lalu somuo murid Yesus morarian diri moninggalan Sio.
51Watu nantai, ado bujakng inyo tuyut Yesus. Io ongkah momakai koitn pakai' momutut bukakngnyo. Rombokan nantai honda' monangkap io jam. 52Apo pas sia' monjujuti io, io molopasan koitn nantai huatan rari bokolanjakng.
Yesus di hadapan Mahkamah agama Yahudi
(14:53-65)
(Mat. 26:57-68; Luk. 22:54-55, 63-71; Yoh. 18:12-14, 19-24)
53Boko urakng inyo monangkap Yesus mombaba'-Nyo ko Imam Agukng. Timpu nantai, somuo imam kopala', boko pomimpitn banso Yahudi ongko boko guru agama Yahudi bokumpul di santai. 54Petrus bontuyutan Yesus doi' jouh sampai ko tongahlamanan rumah Imam Agukng nantai. Di santai, Petrus dudu' dampikng api kapikng botindu agatn boko ponjago.
55Boko imam kopala' ongko somuo Mahkamah agama Yahudi bousaha bogoyap buti oca' Yesus dapat dihukupm mati. Jadi, sia' bogoyap boko urakng inyo paca'an monjadi sasi pakai' molawatn Yesus. Apo, sia' kinyo bohasil mondapat'an buti la'apo pan. 56Banya' urakng maju pakai' bosasi palsu molawatn Yesus, apo pandir siku' urakng kinyo samo agatn pandir urakng bukainyo. 57Lalu, boboropo urakng maju pakai' monjadi sasi palsu molawatn Yesus. 58Kato sia', “Urakng ni'in kalo bopandir Io paca'an morobahan Rumah Allah inyo di pulah agatn jari monsio. Lalu, dalapm watu tigo ari, Io paca'an moninjakan inyo bukainyo, inyo kinyo di pulah agatn jari monsio.” 59Apo pandir boko urakng nantai pan kinyo samo agatn inyo bukainyo.
60Lalu Imam Agukng nantai bodiritn di tongah sidakng nantai. Katonyo ko Yesus, “Apo bai Kolai kinyo monimbas tuduhan nantai inyo ditujuan ko Kolai?” 61Apo Yesus kinyo bobunyi. Sio kinyo monimbas samo sokali.
Imam Agukng nantai botakutn agi', “Apo bai Kolai Rajo Inyo Dijanjian Allah inyo kito sobut ‘Mesias’? Apo bai Kolai Ana' doi' Allah inyo Topuji?”
62Timbas Yesus, “Aku nam io nantai. Kaitn paca'an moniant ana' Monsio dudu' di tompat inyo tohormat di sopia' kanan Allah Inyo kotakan bokuaso. Nononyo, kaitn pan paca'an moniant Io datakng di pucu' boko awatn di langit.”
63Mondinga' nantai, Imam Agukng mombirat-birat pakai'annyo. Katonyo ko boko pomimpitn inyo bukainyo di santai, “Pompadohan bogoyap sasi pakai' momandiran kosalahan-Nyo! 64Io udah mohanyam Allah! Kaitn pan udah mondinga' pandir-Nyo siku' monyamoan diri-Nyo agatn Allah! Jadi, la'apo koputusan kaitn?”
Sia' somuo mombulah koputusan inyo samo, ia'an nantai Sio gola' dihukupm mati.#14:64: Boko pomimpitn urakng Yahudi kinyo pocayo Yesus ia'an Rajo Inyo Dijanjian Allah. Jadi, sia' bopikir Yesus mohanyam Allah watu Sio momandiran Sio bokuaso (dudu' di sopia' kanan Allah ongko datakng di pucu' boko awatn), tiat Dan. 7:13-14. Monurut agama Yahudi, urakng inyo mombulah kosalahan nantai gola' di hukupm mati (Imamat 24:16). Apo, obai urakng Israel dijajah pomorintahan Romawi, ongkah pomimpitn Romawi ulih mombulah koputusan pakai' mohukupm mati urakng. Jadi, Yesus dibaba' ko Gubernur Pilatus.
65Lalu boboropo urakng moigahi Yesus. Sia' monutup mato-Nyo huatan bodularan Sio. Sia' mohanyam Sio agatn bopandir, “Aman Duatn bondar-bondar nabi, butianbo, sopo inyo bodularan Duatn?” Boko ponjago nantai pan jumpat monompilikng Yesus.
Rasul Petrus monyangkal Yesus
(14:66-72)
(Mat. 26:69-75; Luk. 22:56-62; Yoh. 18:15-18, 25-27)
66Timpu nantai, Petrus ija' ada'an di tongahlamanan rumah nantai. Siku' botina' mohampiki io. Botina' nantai ia'an urakng inyo monjadi hulutn di rumah Imam Agukng nantai. 67Watu io moniant Petrus tongahan botindu, io borotian mato-muho Petrus. Katonyo, “Pasti kolai ni'in pan urakng inyo hala bosamo-samo agatn Yesus, urakng doi' laman Nazaret nantai.”
68Apo Petrus monyangkal. Katonyo, “Aku cuku tohu la'apo inyo kolai pandiran! Aku co mongoroti la'apo inyo kolai pandiran!” Lalu, Petrus botula' ko pohadapan, pintu gerbakng tongahlamanan nantai. [Watu nantai, manu' bokuku'.]
69Botina' hulutn nantai moniant Petrus agi'. Jadi, io bopandir jam ko boko urakng di santai, “Urakng ni'in ia'an murid Urakng inyo ditangkap tontai.” 70Apo sokali agi' Petrus monyangkal Yesus.
Kinyo manah lopas nantai, boko urakng di santai bopandir agi' ko Petrus, “Pasti kolai ni'in salah siku' urakng doi' sia' boko murid Urakng nantai obai kolai pan doi' doerah Galilea jam!”
71Apo Petrus monyangkal agi' sampai bosumpah. Katonyo, “Aku maho bondar-bondar cuku mongonal Urakng inyo kaitn pandiran nian!”
72Watu nantai jam, manu' bokuku' pas koduo kalinyo. Petrus toingant pomandiran Yesus ko io, “Sobolupm manu' bokuku' duo kali, kolai paca'an monyangkal-Ku tigo kali.” Jadi, Petrus monangis obai kotakng monyosal.
Currently Selected:
Markus 14: TBDS
Highlight
Share
Copy
Want to have your highlights saved across all your devices? Sign up or sign in
