Matius 19

Ajaran Yesus mongona'i urakng saya'

(19:1-12)

(Mrk. 10:1-12)

1Lopas Yesus udah momandiran somuo nantai, Sio moninggalan propinsi Galilea ongko botula' ko doerah Yudea di soborakng sungai Yordan. 2Banya' urakng inyo tuyut Sio. Sio monyamani boko urakng inyo boponyakit di antaro sia' di santai.

3Lalu, ado boboropo pomimpitn agama Yahudi doi' kolompok Farisi, sia' datakng ko Yesus honda' bogoyap caro pakai' monyalahan Sio. Kato sia', “Ulih cado siku' urakng lolaki monyaya' bininyo agatn alasan la'apo pan?”

4Timbas Yesus, “Pasti kaitn udah mombaco di Buku Suci. Doi' mulonyo, Allah bulah sopasakng monsio, ia'an lolaki ongko botina'.#19:4: Doi' buku Kojadian 1:27, 5:2. 5Lalu Sio bopandir, ‘Obai Aku bulah sia' socaro bopasakan, ongko siku' urakng lolaki paca'an songkayo agatn indai-bopainyo ongko kopal-kumpul agatn bininyo. Ia'an koduonyo monjadi sama'an sobukakng-sotubuh.’#19:5: Doi' buku Kojadian 2:24. 6Jadi, sia' kinyo dianggap duo urakng agi', apo sia' sobukakng-sotubuh. Obai sia' udah dijadian Allah sobukakng-sotubuh, ongko sia' co ulih disaya' monsio.”

7Apo boko urakng Farisi nantai monimbas. Kato sia', “Aman ubo nian, ma'apo timpu joman komai Musa moonji'i porintah ni'in: Sotiap laki monyaya' bininyo gola' moonji'i surat tando saya' ko io.”#19:7: Doi' buku Ulangan 24:1-4. Tiat catatan di Lukas 16:18.

8Timbas Yesus ko sia', “Musa moijitan siku' urakng laki monyaya' bininyo obai sia' koras kopala' samo sama'an kaitn. Apo nantai bukainyo kohonda' Allah doi' mulonyo. 9Jadi dinga'anbo ni'in: Siku' urakng lolaki inyo monyaya' bininyo aman bukai obai bininyo bomporajoan, ongko lolaki nantai kawitn agatn botina' bukai, rotinyo io nantai bomporajoan jam.”

10Lopas nantai, boko murid Yesus bopandir ko Sio, “Aman laki-bini co ulih saya', rotinyo lobih boi' aman co kawitn.”

11Apo Yesus bopandir ko sia', “Kinyo somuo urakng ulih mongoroti pomandiran nantai. Bayo boko urakng inyo udah dionji'i pongorotian doi' Allah.#19:11: Ado duo komungkitan pakai' roti ayat ni'in (huatan kalimat toahir di ayat 12). 1) Yesus bomasud ajaran mongona'i ‘jangan bosaya'’. Banya' urakng Farisi co honda' monorima' ajaran nantai obai sia' kinyo dionji'i pongorotian doi' Allah. DAMO 2) Yesus bomasud pomandiran boko murid-Nyo mongona'i ‘lobih boi' jangan kawitn’. Bayo boko urakng inyo dionji'i Allah komampuan inyo ulih hidup cado kawitn. 12Obai, ado urakng inyo dilahiran kinyo ulih kawitn. Ado jam urakng inyo kinyo ulih kawitn obai dipulah sama'an nantai ulih urakng bukai. Ado jam urakng inyo obai kohonda' siku' pakai' co kawitn oca' ulih molayati husus pakai' Koraja'an Sorugo. Boko urakng inyo ulih mongoroti pomandiran nantai, kuba'annyo sia' mongoroti.”

Yesus momborokati boko bobia' kocit

(19:13-15)

(Mrk. 10:13-16; Luk. 18:15-17)

13Ado boko urakng mombaba' boko bobia' kocit datakng ko Yesus oca' Sio moncama' sia', ongko mondoa'an sia'. Apo, boko murid-Nyo monggodi'i boko urakng inyo mombaba' boko bobia' kocit nantai.#19:13: Timpu joman Yesus, boko bobia' kocit dianggap pontikng, sampai boko murid-Nyo mungkitn bopikir ado boko hal inyo lobih pontikng pakai' dilabuhan Yesus daripado diganggu' boko bobia' kocit nantai. 14Apo Yesus bopandir, “Biaran ja'am boko bobia' kocit nantai datakng ko Aku! Jangan morarakng sia'. Obai boko urakng inyo monjadi samo sama'an boko bobia' kocit ni'in ia'an anggota koluarga Koraja'an Sorugo”#19:14: Boko bobia' kocit bogantukng ko urakng tuhonyo. Samo jam, anggota koluarga Koraja'an Allah gola' hidup bogantukng ko Allah 15Yesus molota'an jari-Nyo ko kopala' sia' ongko mondoa'an sia'. Lopas nantai, Sio botula' doi' santai.

Urakng dampu huatan kohidupan inyo somanah-manahnyo di Sorugo

(19:16-30)

(Mrk. 10:17-31; Luk. 18:18-30)

16Ado siku' urakng inyo datakng ko Yesus. Katonyo, “Guru, porbuatan boi' la'apo inyo gola' aku labuhan oca' bodapat hidup somanah-manahnyo?”

17Kato Yesus, “Pikiran holu'ai masud kolai sobolupm kolai botakutn ko Aku mongona'i la'apo inyo boi'. Obai, bayo Allah inyo boi'.#19:17: Yesus bomasud aman urakng nantai botakutn ko Sio mongona'i la'apo inyo boi', boroti urakng nantai moaku'i obai Yesus nantai Allah! Apo, mungkitn urakng nantai kinyo honda' moaku'i nantai. Aman kolai honda' bodapat hidup somanah-manahnyo, ongko kolai gola' monaati boko porintah Allah.”

18Urakng nantai bopandir, “Boko porintah Allah inyo mono?”

Timbas Yesus, “Jangan mombunuh, jangan bomporajoan, jangan mongolit, jangan bulah tuduhan palsu, 19hormaticam indai-bopai kolai, kasihicam sosamo kolai samo sama'an kolai mongasihi diri kolai siku'.”#19:19: Onam porintah ni'in mowakili somuo porintah inyo Allah onju' ko Musa komai. Tiat Koluaran 20:1-17 huatan Ulangan 5:6-22. Apo onam porintah ni'in ado hubukan agatn mongasihi urakng bukai (daripado boko porintah inyo ado hubukan agatn mongasihi Allah). Jadi, mungkitn Yesus monyobut onam porintah ni'in obai urakng inyo botakutn nantai kinyo somombondarannyo mongasihi urakng bukai

20Kato urakng muda' nantai ko Sio, “Aku udah monaati somuo porintah nantai. La'apo agi' inyo gola' aku labuhan?”

21Kato Yesus ko io, “Aman kolai honda' monaati Allah agatn boi', pulakngcam, jual somuo umputn kolai. Lalu pombagi-bagian duitnyo ko boko urakng jaro. Agatn ubo nian, kolai paca'an bodapat kodampuan di sorugo. Lopas kolai molabuhan somuonyo nantai, datakngcam agi' ko si'itn, lalu tuyut Aku cam” 22Mondinga' pomandiran Yesus nantai, io monjadi kotakng salu' ongko moninggalan Yesus, obai io kotakng dampu.

23Yesus bopandir ko boko murid-Nyo, “Dinga'anbo ni'in: Uyuh bondar urakng dampu monjadi anggota koluarga koraja'an Sorugo.#19:23: Mungkitn uyuh pakai' urakng dampu bogantukng ko Allah obai opat bogantukng ko kodampuannyo. 24Sokali agi' dinga'anbo. Mansi mudah aman siku' unta moncubo mansu' molalu'i lubakng jayupm, daripado urakng dampu moncubo monjadi anggota koluarga koraja'an Allah.”

25Timpu boko murid-Nyo mondinga' nantai, sia' kotakng hiratn. Kato sia', “Uah, aman ubo nian, sopo inyo ulih disolamant'an?”#19:25: Urakng Yahudi bopikir somuo urakng dampu diborokati Allah. Jadi, aman urakng dampu kinyo disolamant'an, pasti urakng bukai (inyo kinyo diborokati agatn kodampuan) co ulih disolamant'an jam.

26Yesus borotian sia' ongko bopandir, “Co mungkitn monsio ulih molabuhan nantai. Apo, Allah ulih molabuhan la'apo pan.”

27Lalu Petrus botakutn ko Yesus, “Koi udah moninggalan somuo umputn koi oca' tuyut Duatn. Jadi la'apo inyo paca'an monjadi pongulihan koi?”

28Kato Yesus ko sia', “Dinga'anbo ni'in: Timpu Allah bulah somuo hal monjadi boharu, Ana' Monsio paca'an dudu' di pucu' krosi-Nyo inyo tohormat pakai' momorintah di dunia boharu ni'in. Kaitn boko murid-Ku pan paca'an dudu' di pucu' duo bolas krosi ponguaso. Kaitn paca'an mohakipi koduo bolas suku banso Israel. 29Ado urakng udah moninggalan rumahnyo, somadikan lolaki ongko botina', bopainyo, indainyo, poana'annyo, ongko lakaunyo. Somuo urakng inyo udah moninggalan somuo nantai obai pocayo ko Aku, sia' paca'an mondapat'an agi' doi' Allah soratus kali lipat. Sia' pan paca'an mondapat'an hidup somanah-manahnyo. 30Ado urakng inyo dianggap pontikng ni'in, apo nononyo Allah paca'an bulah sia' co pontikng. Ado jam urakng inyo dianggap co pontikng ni'in, apo nononyo Allah paca'an bulah sia' pontikng.”#19:30: Teks asli baso Yunani momakai “urakng inyo potamo paca'an monjadi inyo toahir, ongko inyo toahir paca'an monjadi inyo potamo.”

Currently Selected:

Matius 19: TBDS

Highlight

Copy