Matius 20
20
Poumpamoan mongona'i boko urakng inyo bokorojo di kobutn anggur
(20:1-16)
1 Yesus molajuan pomandiran-Nyo, “Koraja'an Sorugo samo sama'an kisah ni'in. Ado siku' urakng inyo umputn sobidakng kobutn anggur. Sunsukng pukau, io botula' bogoyap boboropo urakng pakai' bokorojo di kobutnnyo nantai. 2Sio sotuju mombayar sia' sopingka'i duit pira' pakai' soari bokorojo, sama'an biaso. Lalu, io monyiuh sia' botula' bokorojo di kobutnnyo nantai. 3Sokitar japm sombilatn sunsukng, io botula' agi' ko pasar. Sio moniant ado boko urakng bukai inyo nganggur. 4Lalu katonyo ko sia', ‘Kaitn botula' jam bokorojo di kobutn anggurku. Aku paca'an mombayar kaitn agatn upah inyo cucu'.’ Jadi, sia' pan botula' bokorojo di kobutnnyo. 5Sokitar japm duo bolas siakng, umputn kobutn nantai botula' ko pasar ongko moningkau agi' urakng ongko bokorojo di kobutnnyo. Sokitar japm tigo babahari io molabuhan hal inyo samo. 6Sokitar japm lima' babahari, io botula' agi', botomu agatn boko urakng nganggur. Katonyo ko sia', ‘Ma'apo kaitn monganggur di si'itn boari-ari?’ 7Kato sia' ko io, ‘Obai nyiant ado urakng inyo moonji'i pokoroja'an ko koi.’ Katonyo ko sia', ‘Kaitn botula' bokorojo ja'am di kobutn anggurku.’
8Watu huntu malapm, io bopandir ko kopala' pokorojonyo, ‘Tingkaubo somuo boko urakng inyo bokorojo ko aku sari nintai. Bayarcam upah sia' siku'-monyiku', mula'i doi' sia' inyo dudi datakng sampai agatn sia' inyo doholu datakng.’ 9Jadi, bodatakanam sia' inyo hoyu' mula'i bokorojo sokitar japm lima' babahari. Sia' dionji'i siku'-monyiku' sopingka'i duit pira'. 10Lopas sia' inyo doholu datakng moniant nantai, sia' bopikir obai sia' paca'an dionji'i lobih banya' obai sia' bokorojo doi' sunsukng. Apo sia' pan dionji'i siku'-monyiku' sopingka'i duit pira' jam. 11Jadi, lopas sia' monorima', sia' botuta' ko urakng umputn kobutn nantai. Kato sia', ‘Sia' inyo dudi datakng nantai sampat bokorojo so japm mo. 12Koi udah bokorojo koras soarian bopodi'. Apo Duatn mombayar upah sia' samo agatn koi!’
13Apo umputn kobutn nantai monimbasi salah siku' doi' sia'. Katonyo, ‘Kawal, aku co molabuhan inyo kurakng adil ko kulo! Kito duo udah sotuju obai kulo paca'an dionji'i upah sopingka'i duit pira' pakai' so ari bokorojo. 14Jadi, ni'in pulakng cam agatn upah kulo nantai. Aku honda' moonji'i upah ko urakng inyo dudi datakng ni'in samo sama'an aku moonji'i upah ko kulo jam. 15Pasti aku bebas momakai somuo umputnku monurut kohonda' hatiku. Kata'an kulo tungi obai aku boi' hati ko urakng bukai ai?’ ”
16 Yesus monyimpulan, “Nantai inyo Ku kohonda'i agatn pomandiran ni'in: ado urakng inyo dianggap kinyo pontikng ni'in, apo nononyo Allah paca'an bulah sia' pontikng. Ado jam urakng inyo dianggap pontikng watu ni'in, apo nononyo Allah paca'an bulah sia' kinyo pontikng.”
Udah kopontigo kalinyo, Yesus momadahan mongona'i ajab sonsaro inyo paca'an dialapi-Nyo
(20:17-19)
(Mrk. 10:32-34; Luk. 18:31-34)
17Timpu Yesus monuju ko kota Yerusalem, di tongah jalatn Sio moningkau koduo bolas murid-Nyo oca' bokumpul di tompat sonsiku'annyo agatn Sio. Kato-Nyo, 18“Kito tongahan monuju ko kota Yerusalem. Di su'utn, Ana' Monsio paca'an disorahan ko boko imam kopala' huatan boko guru agama Yahudi. Sia' paca'an bulah koputusan obai Sio paca'an dihukupm mati. 19Lalu sia' paca'an monyorahan Sio ko boko urakng inyo bukainyo urakng Yahudi oca' Sio dipoulu'an, disipat, dipantu' lalu dibunuh di kayu salib. Apo watu ari kotigo, Allah paca'an bulah Sio bobali' hidup agi'.”
Kohonda' indai Yakobus agatn Yohanes
(20:20-28)
(Mrk. 10:35-45)
20Lopas nantai, indai sia' Yakobus agatn Yohanes datakng ko Yesus bosamo agatn sia'. Rasul Yakobus huatan Yohanes ia'an boko poana'an Zebedeus. Indai sia' tundu' monyungkapan di hadapan Yesus pakai' mominto la'apo kohonda'nyo. 21Kato Yesus, “Kohonda' indai la'apo?” Timbas Indai sia', “Aku honda' oca' duatn moonji'i kodudu'an tinggi ko poana'anku duo ni'in dalapm koraja'an Duatn, kohonda'ku siku' dudu' disopia' kanan Duatn inyo siku' disopia' kiba' Duatn.”
22Timbas Yesus ko sia'. Kato-Nyo, “Kaitn co tohu la'apo inyo kaitn minto. Sobontar agi', Aku paca'an ajab sonsaro. Kata'an kaitn sanggup ajab sonsaro samo sama'an Aku ai?”#20:22: Dalapm ayat ni'in, teks asli, baso Yunani, momakai kiasan ‘minum doi' cangkir’. Kiasan nantai rotinyo ‘ajab sonsaro’
Kato sia' ko Sio, “Au, koi duo sanggupmo.”
23Kato Yesus ko sia', “Memang bondar. Kaitn duo paca'an ajab sonsaro samo sama'an Aku. Apo Aku co bohak monontuan sopo inyo paca'an dudu' momorintah di sopia' kanan-Ku damo di sopia' kiba'-Ku. Kodudu'an nantai disodiaan pakai' boko urakng inyo udah ditontuan ulih Allah Bopai-Ku.”
24Sia' sopuluh murid inyo bukai mondinga' kohonda' Yakobus huatan Yohanes nantai. Jadi, sia' monjadi godi ko sia' duo somadikan nantai. 25Apo Yesus moningkau somuo sia'. Kato-Nyo, “Ado boko pomimpitn banso di dunia ni'in inyo co mongonal Allah. Kaitn tohu obai sokohonda' hati sia' mo agatn rayat. Boko urakng inyo bokuaso momoso rayat oca' tundu' agatn kuaso sia'. 26Apo, kaitn culih ubo nian! Sobali'nyo, urakng inyo honda' monjadi kotakng pontikng di antaro kaitn, io gola' monjadi samo sama'an polayatn kaitn inyo bukai. 27Urakng inyo honda' monjadi pomimpitn di antaro kaitn, io gola' monjadi samo sama'an hulutn kaitn. 28Kaitn gola' tuyut toladatn Ana' Monsio. Sio datakng ko dunia ni'in bukainyo pakai' dilayati boko urakng, apo pakai' molayati boko urakng bukai. Sio paca'an monyorahan diri sampai mati. Agatn caro nantai, Sio monobus dosa urakng banya'.”
Yesus monyamani duo urakng buto
(20:29-34)
(Mrk. 10:46-52; Luk. 18:35-43)
29Timpu sia' moninggalan kota Yerikho, banya' urakng tuyut Yesus. 30Ado duo urakng buto inyo dudu' di pinggir jalatn. Sia' mondinga' obai Yesus tongahan lalu. Jadi, sia' moningkau, “Tuhatn, Rajo doi' koturutan Daud!#20:30: Rajo doi' koturutan Daud ia'an sobut'an bukai pakai' Kristus, nantaiam ‘Rajo Inyo Dijanjian Allah’. Kasihi koicam!”
31Boko urakng banya' nantai monogur duo urakng buto nantai oca' sia' langunt. Apo sia' mondongkakng-mondorah moningkau Sio agi', “Tuhatn, Rajo doi' koturutan Daud! Kasihi koicam!”
32Yesus botongga' lalu moningkau sia'. Kato-Nyo, “Kaitn honda' la'apo tangga'i Aku?”
33Timbas sia', “Tuhatn, koi honda' moniant.”
34Yesus mooso salu' agatn sia' lalu moncama' mato sia'. Watu nantai jam sia' ulih moniant. Lalu sia' tuyut Yesus am.
Currently Selected:
Matius 20: TBDS
Highlight
Share
Copy
Want to have your highlights saved across all your devices? Sign up or sign in
