Lukas 15

Yesus momakai boboropo poumpamoan pakai' monggambaran kasih Allah ko boko urakng inyo botongga' bulah dosa huatan hidup monyonangan Allah#15:1: Boko urakng Farisi ongko boko guru Poraturan Yahudi botuta' bomamai obai Yesus mongasihi boko urakng inyo sia' anggap ‘bodosa’. Apo Yesus mongajar sia', soharusnyo sia' rindakng aman boko urakng inyo sia' anggap bodosa nantai botongga' bulah dosa huatan monuruti Allah.

(15:1-32)

1Ado boko ponagih pajak huatan boko urakng bukai inyo dianggap kinyo boi' ulih masrakat. Biasonyo, sia' datakng mondingaꞌ Yesus mongajar. 2Di santai jam ado boko pomimpitn agama doi' kolompok Farisi ongko boko guru poraturan agama Yahudi. Sia' botuta', kato sia', “Ih, Urakng ni'in bokawal agatn boko urakng inyo kinyo boi'. Malahan io makatn samoan sia'!”

3Ongko, Yesus mongajar sia' agatn poumpamoan ni'in.

Poumpamoan Yesus mongonaꞌi domba inyo hilakng

(Mat. 18:12-14)

4“Soumpamonyo ado siku' urakng inyo bisi soratus iku' domba. Aman io kohilakan siku' domba obai domba nantai sosat, pasti io paca'an moninggalan sombilatn puluh sombilatn iku' domba inyo bukainyo di padakng rumput pakai' botula' monggoyapi inyo sosat nantai sampai io monomuannyo. 5Watu io monomuannyo, io kotakng rindakng, mounjakan domba nantai di pucu' bohunyo, mombaba'nyo pulakng.#15:5: Lopas jadi boroyau huatan tososat, domba nantai mungkitn hora' huatan co dapat bojalatn copat. Jadi, gombala nantai mohambi' domba di bohunyo agatn porutnyo dilihi'nyo huatan boko kakinyo dikolayuti di muka'. 6Io moningkau somuo kawal ongko totangganyo, lalu bopandir, ‘Huncapm kito rindakng-ramai. Dombaku inyo hilakng udah kotomuannam!’

7Nah, porotiancam ni'in: samo ubo nantai jam, Allah huatan boko molekat di sorugo kotakng rindakng aman siku' urakng tongga' bulah dosa lalu hidup monyonangan Allah, daripado sombilatn puluh sombilatn urakng inyo kinyo tohu tongga' bulah dosa.”#15:7: Ado duo tapsiran pakai' ‘urakng inyo co pontikng botongga' bulah dosa.’ 1) Ni'in monggambaran boko urakng inyo udah bisi hubukan inyo boi' agatn Allah. Tapsiran ni'in bodasaran konyata'an sombilatn puluh sombilatn domba tomansu' kabatn domba umputn gombala nantai. DAMO 2) Ni'in monggambaran boko urakng samaꞌan urakng Farisi ongko boko guru Poraturan Yahudi, boko urakng inyo bopikir sia' co nyiant dosa, jadi kinyo pontikng botongga' bulah dosa. Apo, sobondarnyo sia' jahat.

Poumpamoan Yesus mongonaꞌi duit inyo hilakng

8 Yesus molajuan mongajar agatn poumpamoan ni'in. “Soumpamonyo ado botina' inyo bisi sopuluh pingkai' duit pira'.#15:8: Dirham nantai duit pira' Yunani inyo (samaꞌan dinar, duit logapm Romawi) bonilai upah soari korojo [di lakau.] Aman io kohilakan sopingka'i, pasti io paca'an monokil pompolitoan lalu monyapu somuo rumahnyo pakai' monggoyapi duit nantai sampai io monomuannyo. 9Watu io monomuannyo, io kotakng rindakng, moningkau somuo kawal ongko totangganyo, ongko bopandir, ‘Huncapm kito rindakng-ramai. Duitku inyo hilakng udah kotomuan agi'!’

10Nah, porotiancam ni'in: samo sama'an nantai jam, Allah huatan boko molekat di sorugo kotakng rindakng aman siku' urakng botongga' bulah dosa lalu hidup monyonangan Allah.”

Poumpamoan Yesus mongonaꞌi ana' inyo momporoyauan doi' rumah bopainyo

11 Yesus molajuan mongajar agatn poumpamoan ni'in. “Siku' urakng Bopai bisi duo ana' lolaki. 12Inyo kobunsuan bopandir ko io, ‘Bopai, onju' ko aku cam ninam pombagianku doi' kodampuan kito.’#15:12: Kohonda' hati ana' kobunsuan sangant cado hormat. Biasonyo boko ana' mowarisi kodampuan bopainyo lopas bopainyo mati. Lalu bopainyo mombagi kodampuannyo nantai ko sia' duo ana'nyo.

13Boboropo ari lopas nantai ana' kobunsuan nantai monjual boko pombagiannyo nantai ongko botula' ko nogori inyo jouh. Di su'utn io momborosan duitnyo agatn hidup bopoya-poya. 14Pas duitnyo nyiantam, di nogori nantai tongahan musipm lapar-barau. Jadi, io udah culih momboli la'apo pan pakai' kopontikan hidupnyo. 15Lalu io hingkas bokorojo ko siku' urakng pondudu' di santai. Urakng nantai monyiuhnyo ko lakau mongombolo babinyo.#15:15: Urakng Yahudi moanggap urakng inyo bukai Yahudi huatan hususnyo boko babi ‘purih’ (Imamat 11:7-8, Ulangan 14:8), sampai mongombolo babi pakai' urakng inyo bukai Yahudi nantai pogota'an inyo kotakan hina huatan kotakan momaluan inyo ulih dibayakan pakai' dikorojoan siku' urakng muda' Yahudi; io jolas putus asa. 16Io kotakng kolaparan sampai honda' bopua' pomakatn boko babi nantai. Biar pan io kotakng kolaparan, conyiant siku' pan inyo moonji'inyo pomakatn.

17Koponsuahannyo io sadar kolaku'annyo kotakng salah nantai. Io bopandir, ‘Boko urakng inyo bokorojo ko bopaiku botuyu' pomakatnnyo, apo aku di si'itn honda' mati longkapam! 18Aku paca'an pulakng huatan botula' ko bopaiku, huatan bopandir ko sio: Bopai, aku udah bodosa tohadap Allah huatan tohadap Bopai. 19Kinyo cucu' agi' aku disobut ana' duatn Bopai. Anggapcam aku siku' urakng inyo bokorojo ko duatn Bopai.’

20Lalu botula'am io pulakng ko bopainyo. Watu io ija' jouh doi' rumah, bopainyo udah moniant io. Agatn kotakng salu' bopainyo bonggidi'an monomu'inyo, ongko mongolu'i huatan monciupmnyo.

21‘Bopai,’ kato ana' nantai, ‘Aku udah bodosa tohadap Allah huatan tohadap duatn Bopai. Kinyo cucu' agi' aku disobut ana' duatn Bopai.’

22Apo bopainyo moningkau boko hulutnnyo huatan bopandir, ‘Hohagarcam! Kuti' pakai'an inyo kotakng boi', huatan kona'an ko io. Kona'ancam cincipm ko jarinyo, huatan sopatu ko kakinyo. 23Lopas nian kuti' ana' sapi inyo gomu' huatan sombolihcam. Kito paca'an makatn huatan pogai. 24Obai ubonyo ana'ku ni'in udah mati, apo ni'in hidup agi'. Io udah hilakng, apo ni'in ditomuan agi'.’ Lalu labuh am sia' pogai.

25Timpu nantai, ana' inyo kojula'an tongahan di lakau. Pas io pulakng, sampai di hampikng rumah, io mondingaꞌ saro gondakng-gambalan ongko tarian. 26Io moningkau salah siku' urakng doi' boko hulutnnyo, ongko botakutn, ‘Ado la'apo di rumah ni'in?’

27Hulutn nantai monimbas, ‘Adikng Habakng udah pulakam! Bopai Habakng udah monyiuh monyombolih ana' sapi inyo gomu', obai io udah mondapat'an agi' ana'nyo dalapm koadaan solamant!’

28Ana' inyo kojula'an nantai tomaho godi bondar sampai io bolai' mansu' ko rumah. Ongko bopainyo koluar pakai' mongkongkanti'i oca' io mansu'. 29Apo io bopandir, ‘Botohutn-tohutn manahnyo aku bokorojo humpas-pulas pakai' duatn Bopai. Aku hala monaati porintah duatn Bopai. Apo duatn Bopai bolupm kalo moonji'i siku' kambikng pan pakai' aku rindakng-ramai agatn pokawalanku! 30Ana' duatn nantai udah mohabisan kodampuan duatn Bopai agatn botina' lahukng, apo kali io pulakng, Bopai monyombolih ana' sapi inyo gomu' pakai' io!’

31‘Ana'ku,’ timbas bopainyo, ‘Kolai hala ado di si'itn agatn aku. Somuo inyo umputnku nantai umputn kolai jam. 32Apo kito gola' bulah pogai huatan rindakng-ramai, obai adikng kolai nantai ubonyo udah mati, apo ni'in hidup agi' Io udah hilakng, apo ni'in udah kotomuannam.’ ” #15:32: Dalapm poumpamoan ni'in Bopai molambakan Allah, ana' kobunsuan molambakan boko urakng inyo dianggap kinyo boi' (ayat 10), ana' kojula'an molambakan urakng Farisi ongko boko guru Poraturan Agama Yahudi, huatan pogai molambakan Koraja'an Allah (samaꞌan di 13:29, 14:16-24). Boko urakng bodosa kotakng dikobonci' ulih urakng Farisi ongko boko guru Poraturan Agama Yahudi, apo Yesus kotakng mongasihi boko urakng bodosa nantai (ayat 10).

Currently Selected:

Lukas 15: TBDS

Highlight

Copy