Lukas 1

Lukas monulis surat pakaiꞌ moyakit'an kawalnyo

(1:1-4)

1-2Ko inyo tohormat, Teofilus: tangga'i; potamo Yesus ado di dunia, ado boko urakng inyo moniant agatn matonyo siku'. Sia' molayati Allah agatn caro monyampaian borito mongonaꞌi Yesus nantai. Sia' pan monyampaian borito nantai ko kito duo, samaꞌan nian jam ko boko urakng inyo mondinga' borito nantai. Banya' doi' sia' bousaha monulis niant apo boko kojadian nantai udah tojadi di tongah-tongah kito. 3Doi' potamo borito mongona'i Yesus nantai, aku udah monyolidiki kotakan toliti somuonyo. Jadi, aku bopikir boi' aman buku ni'in aku tulis agatn toatur ko kolai. 4Kohonda'ku oca' kolai yakitn somuo inyo diajaran ko kolai pasti bondar.

Molekat Gabriel bopandir agatn Imam Zakharia, bininyo paca'an boana'an Yohanes

(1:5-25)

5Timpu Herodes monjadi rajo inyo monguaso'i nogori Yudea, timpu nantai ado imam banso Yahudi bodamoan Zakharia. Io doi' kolompok imam Abia. Bininyo bodamoan Elizabet, koturutan imam jam. Io nantai koturutan Harun, imam potamo banso Yahudi. 6Siaꞌ duo laki-bini hidup monyonangan hati Allah. Sia' monuruti somuo porintah ongko poraturan Allah, agatn soponuh hati. 7Apo siaꞌ co boana' obai Elizabet manang. Ongko koduo siaꞌ udah tuhoam.

8Timpu nantai, kolompok imam Abia mondapat giliran pakai' molayati di Rumah Allah.#1:8: Rumah Allah = Disobut Rumah Tuhatn jam. Godukng inyo mewah di kota Yerusalem husus pakai' Allah. Rumah Allah bisi tongahlamanan dikoliliki tembok. Urakng Israel biasonyo ulih bodoa huatan moonju' posombahan di tongahlamanan, apo bayo imam inyo ulih mansu' ko dalapm Rumah-Nyo. Jadi, Zakharia monjalatan tugas sobagai imam pakai' molayati Allah. 9Sama'an biasonyo, boko imam boundi pakai' monontuan tugas siaꞌ siku'-monyiku'. Zakharia mondapat tugas husus pakai' mansu' ko dalapm Rumah Allah oca' moncucul sampu pangkukng dohupo. 10Timpu io moncucul sampu pangkukng dohupo nantai, ado banyaꞌ urakng di luar tongahan bodoa.

11Ongko Zakharia moniant molekat Tuhatn. Molekat nantai bodiritn di sopia' kanan meja dohupo poncuculan sampu pangkukng. 12Zakharia tokonyant huatan kotakng gola' moniant molekat nantai. 13Apo molekat nantai bopandir, “Jangan gola', Zakharia! Allah udah mondingaꞌ doa kolai. Bini kolai Elizabet tajahan boana', ana'nyo lolaki. Kolai gola' mondamo'inyo Yohanes pakai' damonyo. 14Kolai paca'an kotakng rindakng. Banyaꞌ urakng bukai jam paca'an jumpat rindakng obai kolahiran bobia' lolaki nantai. 15Siaꞌ rindakng obai bobia' nantai paca'an monjadi urakng pontikng di hadapan Tuhatn Allah. Io co ulih minum anggur damo mominum tua' samo sokali. Kuaso Roh Allah paca'an hala momonuhi io ija' tangga'i dalapm porut indainyo. 16Io paca'an bulah banya' urakng Israel bobali' pocayo ko Tuhatn Allah siaꞌ. 17Io paca'an ado sipat ongko kuaso samaꞌan Nabi Elia komai. Io paca'an datakng sobolupm kodatakan Tuhatn. Io paca'an mongomboi'i hubukan antaro urakng tuho agatn ana'nyo. Urakng inyo kinyo taat paca'an dipimpitnnyo ko jalatn inyo bondar, oca' monjadi taat agatn porintah Allah. Jadi ubo nian jam, io paca'an momposiapan hati boko urakng inyo siap hidup agatn caro inyo sosuai agatn kohonda' Tuhatn. Oca' siaꞌ udah siap pakai' monorima' Tuhatn.”

18Lopas nantai Zakharia bopandir ko molekat nantai, “Aku ni'in udah tuhoam. Biniku pan udah tuhoam jam! Niant apo aku suba' pocayo agatn pomandiran duatn bondar-bondar tajahan tojadi?”

19Timbas molekat nantai ko io, “Aku ninam molekat Gabriel inyo molayati Allah. Aku udah diutus pakai' bopandir ko kolai huatan monyampaian borito boi' nantai ko kolai. 20Pomandiranku tontai paca'an tojadi pado watunyo. Apo obai kolai co pocayo nantai, sobondarnyo kolai paca'an monjadi bisu sampai watunyo borito nantai tojadi. Kolai paca'an co ulih bopandir sampai watunyo bobia' nantai lahir.”

21Timpu nantai, urakng banyaꞌ tontai tongahan monantian Zakharia koluar. Siaꞌ hiratn obai io kotakng manah doi' biasonyo di dalapm Rumah Allah. 22Koponsuahannyo, Zakharia koluar, apo kinyo bopandir ko siaꞌ. Io ongkah momakai kode am pakai' bopandir obai io bisu. Ongko siaꞌ tohu io udah moniant suatu poniant'an di dalapm Rumah Allah.

23Giliran tugas Zakharia jadi am. Ongko, io pulakng doi' kota Yerusalem ko rumahnyo sikuꞌ. 24Kinyo manah lopas nantai, Elizabet bininyo buntikan. Elizabet bokurukng dalapm rumah somanahan lima' bulatn. 25Kato Elizabet, “Allah udah moniant'an koboi'an-Nyo agatn aku. Ni'in cuku malu am obai Allah udah moonji'i ana' ko aku.”

Molekat Gabriel bopandir ko Maria obai io tajahan boana'an Yesus

(1:26-38)

26Timpu Elizabet buntikan onam bulatn, Allah monyiuh molekat Gabriel ko kota Nazaret di doerah Galilea. 27Molekat Gabriel disiuh Allah monomu'i sikuꞌ botina' daro, damonyo Maria. Maria nantai botunangan agatn Yusuf, koturutan Rajo Daud.

28Ongko molekat nantai datakng ko rumah Maria, “Salapm, kolai diborokati Tuhatn. Tuhatn hala bosamo agatn kolai!”

29Mondingaꞌ pomandiran molekat nantai, Maria pan tokonyant ongko botakutn dalapm hati, “La'apo rotinyo pandir ni'in?” 30Molekat nantai bopandir ko Maria, “Jangan gola' Maria, obai Allah moonji'i tuah ko kolai. 31Kolai tajahan buntikan, ongko boana'. Ana' kolai lolaki ongko gola' kolai damo'i Yesus. 32Io paca'an monjadi urakng inyo bokuaso, ongko disobut Ana' Allah Inyo Maho Tinggi. Tuhatn Allah tajahan monjadian-Nyo rajo samaꞌan Rajo Daud, angki-bayatn-Nyo. 33Huatan Sio tajahan momorintah sobagai rajo Israel somanah-manahnyo. Korajaan-Nyo kinyo tohu botongga'.”#1:33: Ni'in janji Allah inyo dionju' ko Rajo Daud pado joman komai. Totulis di I Tawarikh 17:10b-15.

34Kato Maria ko molekat nantai, “Sama'an la'apo somuo nian sampai tojadi, sodakan aku ni'inan ija' daro?”

35Timbas Molekat nantai ko Maria: “Roh Allah tajahan datakng ko kolai. Kuaso Allah molinduki kolai. Obai nian, Ana' inyo kolai lahiran nantai disobut Kudus, Ana' Allah. 36Dinga' bo: pomili kolai Elizabet biar pan io udah tuho, apo watu ni'in tongahannyo buntikan onam bulatn. Komai boko urakng bopandir io manang apo ni'in io paca'an boana'. 37Pomandiranku ni'in pasti tojadi obai co nyiant inyo co mungkitn bagi Allah.”

38Kato Maria, “Aku ni'in siap molabuhan kohonda' Tuhatn; biaram somuo nian tojadi ubo inyo duatn pandiran.” Molekat nantai pan botula'am moninggalan Maria.

Maria botula' bujakng ko Elizabet

(1:39-45)

39Duo tigo ari lopas nantai, Maria hagar botula' ko laman Elizabet di doerah boko bukit Yudea. 40Maria mansu' ko rumah Zakharia huatan monyampaian salapm ko Elizabet. 41Timpu Elizabet mondingaꞌ salapm nantai, ana' inyo di dalapm porut Elizabet morunjakng. Roh Allah momonuhi Elizabet. 42Obai nianam, Elizabet monimbasi agatn ponuh somangant, “Diborokati kolai doi' somuo botina' bukai. Diborokati ana' inyo di dalapm porut kolai. 43Sobondarnyo, aku kinyo patut dipobujaki kolai obai ana' inyo di dalapm porut kolai niannan Tuhatnku! 44Aku udah mongotohu'inyo obai timpu mondingaꞌ salapm kolai, ana' dalapm porutku morunjakng koporindakan. 45Sonang-nyamanam hidup kolai, obai kolai pocayo agatn inyo dipandiran Tuhatn ko kolai somuonyo pasti tajahan tojadi.”

Maria momuji Allah agatn bonyanyi

(1:46-56)

46Ongko kato Maria,

“Jiwaku momuji Tuhatn.

47Ongko hatiku kotakan rindakng obai Allah, Ponyolamantku.

48Biar pan aku hulutn-Nyo inyo kotakan hina,

apo Sio moingant aku.

Doi' ni'in sampai turutn tomurutn,

somuo urakng paca'an bopandir obai aku ni'in diborokati Allah.

49Obai Allah Inyo Maho Kuaso molabuhan boko hal inyo bosar pakai' aku.

Sio Allah Inyo Suci.

50Sio kotakng poduli agatn boko urakng inyo mohormati Sio turutn-tomurutn.

51Sio moniant'an kuaso Sio agatn porbuatan inyo luar biaso.

Ia'an pan, boko urakng inyo buhau tajahan rari conontu-arah.

52Urakng inyo pontikng, Allah turutan doi' kodudu'annyo.

Apo urakng kinyo pontikng, Allah tinggian.

53Urakng inyo kolaparan, Sio kosihan agatn koboi'an.

Apo urakng dampu, Sio tundukng huatan co dionji'i la'apo pan.

54-55Allah bojanji agatn Abrahapm ongko koturutannyo. Janji nantai totap topakai somanah-manahnyo.

Allah kinyo tongkolupatn agatn janji Sio ko angki-bayatn kito. Sio totap monopat'i janji Sio ko kito.

Allah moingant pakai' monulukng koturutan Abrahapm inyo molayati Sio, huatan Allah tajahan molabuhan nantai somanah-manahnyo.”

56Maria bujakng ko siaꞌ Elizabet somanahan kurakng lobih tigo bulatn. Lopas nantai, io pulakng ko kota Nazaret.

Kolahiran Yohanes Pombaptis

(1:57-66)

57Pas udah tuntukng ko bulatn poana'annyo, Elizabet pan boana'an sikuꞌ bobia' lolaki. 58Boko totangga ongko boko koluarga bosar mondingaꞌ borito nantai, borito koboi'an Tuhatn inyo luar biaso ko Elizabet. Jadi, sia' kotakng rindakng sosamo agatn io.

59Bobia' nantai boumur dolapatn ari, datakam siaꞌ somuo pakai' tuyut acara bosunant. Boko dongan somadikan honda' mondamo'inyo Zakharia, samo agatn damo bopainyo, 60apo Elizabet, indai bobia' nantai bopandir, “Jangan! Io gola' di damo'i Yohanes.”

61Siaꞌ monimbasi, “Jangan moonji'i damo inyo bukai doi' boko damo inyo ado dikoluarga kito.” 62Ongko, siaꞌ moncubo momakai kode botakutn ko Zakharia, bopai bobia' nantai. Siaꞌ honda' tohu la'apo damo kohonda' io pakai' mondamo'i ana'nyo. 63Sio monunju'an pakai' dionji'i alat tulis oca' io monulis jawabannyo. Ditulisnyo, “Damo bobia' nantai Yohanes.” Somuo siaꞌ hiratn. 64Lansukng watu nian jam io kinyo bisu agi', ongko bopandir momuji Allah.

65Boko urakng inyo bodiapm di sokitarnyo kotakan hiratn. Borito mongona'i boko kojadian nantai monjadi pongkisahan soluruh doerah boko bukit Yudea. 66Boko urakng inyo mondingaꞌ borito nantai, morenungannyo di dalapm hati. Siaꞌ tohu kokuatan Tuhatn monyoroto'i io. Ongko siaꞌ bopikir, “Pasti bobia' ni'in paca'an monjadi urakng pontikng, molabuhan boko hal inyo luar biaso.”

Zakharia momuji Allah agatn bonyanyi

(1:67-80)

67Lopas nantai, Roh Allah momonuhi Zakharia, Bopai bobia' nantai. Obai nianam, Zakharia monyampaian posatn Allah mongonaꞌi la'apo inyo tajahan tojadi.

68“Topujicam Tuhatn, Allah banso Israel!

Allah datakng monulukng huatan mombebasan umant-Nyo.

69Allah moonju' ko banso Israel sikuꞌ Ponyolamant inyo bokuaso doi' koturutan Rajo Daud, hulutn-Nyo.

70Topat ubo inyo dijanjian Allah.

Janji inyo disampaian boko nabi pilihan Allah.

71Sio monyolamant'an kito doi' musuh.

Sio molopasan kito doi' kuaso boko urakng inyo bonci'an kito.

72Allah molabuhan nantai oca' monunju'an kasih sotia-Nyo ko angki-bayatn kito.

Allah monopat'i janji-Nyo kotakan suci nantai.

73-74Janji Sio inyo dionju' ko Abrahapm, Bopai loluhur kito.

Janji nian pakai' monyolamant'an kito doi' kuaso musuh

oca' kito totap monyombah Sio huatan samo sokali co mooso gola',

75monyombah Sio huatan hala monjouhan diri doi' dosa,

ongko molabuhan hal inyo boi' di hadapan Tuhatn,

soumur hidup kito.”

76Lopas nantai Zakharia bopandir ko ana'nyo,

“Ana'ku kolai tajahan disobut nabi inyo diutus Allah Inyo Maho Tinggi.

Kolai tajahan mondoholu'i Tuhatn pakai' monyiap'an hati urakng oca' siap monorima' Sio.

77Kolai tajahan molabuhan nantai oca' moonji'i pongorotian ko umant Sio,

siaꞌ tajahan disolamant'an obai boko dosa siaꞌ diamputi.

78-79Somuonyo nian tajahan tojadi obai Allah kito onsi' ongko kotakng kasih.

Urakng inyo bolupm mongonal Allah, samo sama'an urakng inyo tongahan di dalapm potakng,

inyo mooso gola' agatn pomati

Apo samo samaꞌan matoari hoyu' moncara' ongko monoraki potakng nantai,

Rajo Inyo Dijanjian Allah datakng doi' sorugo monjolasan caro hidup inyo monyonangan hati Allah.

Moarahan kito oca' hidup agatn damai.”

80Ana' Zakharia nantai mongkitn bosaram rohnyo pan mongkitn kuat. Io bodiapm di padakng pasir inyo langunt sampai io mula'i monyampaian borito ko banso Israel.

Currently Selected:

Lukas 1: TBDS

Highlight

Copy