Lukas 2

Kolahiran Yesus

(2:1-7)

(Mat. 1:18-25)

1Timpu nantai Kaisar inyo bodamoan Agustus, rajo inyo kotakan bokuaso di Roma mongoluaran porintah, monyiuh mondaptaran boko urakng di soluruh korajaan-nyo. 2Ni'inam sensus potamo kalinyo diadoan, timpu Kirenius monjadi gubernur di doerah Siria. 3Ongko botula'am somuonyo mondaptaran diri masikng-masikng di tompat asal angki-bayatnnyo.

4Sama'an nian jam, Yusuf botula' doi' kota Nazaret di doerah Galilea, ko doerah Yudea ko kota Daud damonyo Betlehem,#2:4: Jouhnyo kiro-kiro 100 pal obai Yusuf doi' koturutan Daud. 5Ongko Yusuf pan mondaptaran diri agatn Maria tunangannyo inyo tongahan buntikan.

6-7Timpu sia' datakng di kota Betlehem, boko rumah pakai' sia' bomalapm udah bisi am. Jadi sia' gola' bomalapm di kandakan hayapm-inguan. Di santai Maria boana'an siku' bobia' lolaki, ana' kojula'annyo. Bobia' nantai dipututnyo agatn lompitn, ongko diulit'annyo ko dalapm tompat poumpatan inguan.

Molekat monyampaian borito kolahiran Yesus, Rajo Inyo Dijanjian Allah ko boko gombala

(2:8-20)

8Timpu malapm nian jam, ado boko pongombolo domba tongahan monjago'i boko hayapm-inguannyo di padakng rumput di doerah dampikng agatn kota Betlehem. 9Sopongirap molekat Tuhatn moniant'an dirinyo ko sia', ongko cohayo torakng doi' Allah monoraki di sokitar sia'. Sia' kotakan gola'. 10Ongko molekat nantai bopandir, “Jangan gola'! Aku datakng mombaba' borito boi'. Borito ni'in monyonangan somuo urakng. 11Obai ari ni'in di kota Daud udah lahir siku' urakng Ponyolamant, pakai' monulukng kaitn. Io nantai Rajo Inyo Dijanjian Allah.#2:11: Kato ‘Mesias’ dalapm Porjanjian Manah (BASO. Ibrani) samo roti agatn ‘Kristus’ dalapm Porjanjian Boharu (BASO. Yunani). Rotinyo ‘inyo diurapi’. Masudnyo, Rajo Inyo Dijanjian Allah. Tiat Mazmur 2:2, 45:2-9, 132:17-18. Imam ongko Nabi pan diurapi. Yesus nantai Imam (Ibrani 4:14-16), Nabi (Kisah 3:22) huatan Rajo. 12Ni'innam caronyo kaitn paca'an tohu borito ni'in bondar-bondar udah tojadi: Kaitn paca'an botomu siku' bobia' inyo diputut agatn lompitn diulit'an di tompat poumpatan inguan.”

13Sopongirap kotiat'anam kotakng banya' boko molekat.#2:13: BASO. Yunani momakai sotilah samaꞌan ‘pasukan tontara sorugo.’ Pomandiran ni'in cucu' agatn kodatakan Rajo Inyo Dijanjian Allah, apo co nyiant unsur militer dalapm konteks ni'in. Boko molekat nantai somuonyo momuji Allah huatan bopandir,

14“Pujian pakai' Allah di sorugo, tompat Inyo Maho Tinggi.

Sonang-asau di bumi pakai' monsio inyo monyonangan hati Allah.”

15Lopas nian, boko molekat nantai bobali' ko sorugo, moninggalan boko pongombolo domba. Ongko boko pongombolo domba bopandir ko siku'-monyiku', “Mara kito ko Betlehem, moniant kojadian inyo udah tojadi di suntai, inyo hoyu' di padahan Tuhatn ko kito.”

16Sia' hagar botula' ko Betlehem, monomu'i Maria ongko Yusuf, ongko bobia' kocit nantai inyo tongahan diulit'an di tompat poumpatan inguan. 17Kali udah moniant bobia' nantai, sia' mongisahan pomandiran molekat nantai, pomandiran mongonaꞌi bobia' nantai. 18Boko urakng somuonyo hiratn mondingaꞌ kisah boko pongombolo domba nantai. 19Apo Maria hala monyimpatn boko poristiwa inyo udah tojadi nantai, ongko morenungan somuo nantai di dalapm hati.

20Ongko boko pongombolo domba bobali' ko padakng rumput kapikng momuji huatan mongatoan koboi'an Allah, obai somuo inyo udah sia' dinga' ongko sia' tiat, topat samaꞌan inyo dipadahan molekat nantai.

Yesus disunant ongko disorahan ko Allah

(2:21-24)

21Timpu boumur dolapatn ari, bobia' nantai pan disunant ongko didamo'i Yesus. Damo inyo udah dipadahan molekat sobolupm indai-Nyo buntikan.

22-24Pas watu ari adat ponyucian husus pakai' urakng jadi boana' datakng ko arinyo, Maria agatn Yusuf botula' ko Rumah Allah di kota Yerusalem oca' sia' ulih moonji'i posombahan ko Allah sosuai agatn inyo totulis dalapm Hukupm Torat. Posombahan nantai sopasakng burukng tokukur, suba' jam duo iku' ana' burukng daro inyo hoyu' trobakng labuh. Sia' pan mombaba' Yesus ko kota Yerusalem pakai' monyorahan Sio ko Allah obai ado porintah agi' dalapm Hukupm Allah, dinga' ni'inan bunyinyo, “Aman siku' botina' molahiran ana' kojula'annyo lolaki, jadi indai agatn bopainyo gola' monyorahannyo ko Allah oca' io hidup husus pakai' Allah.”

Simeon botomu Yesus, Rajo Inyo Dijanjian Allah

(2:25-35)

25Timpu nantai di kota Yerusalem ado urakng damonyo Simeon. Sio ni'in urakng onsi', inyo hala mohormati huatan monaati Allah. Sio monanti Rajo Inyo Dijanjian Allah nononyo datakng moonji'i kodamaian ko banso Israel. Roh Allah monyoroto'i Simeon. 26Roh Allah udah momadahan ko Simeon komainyo obai io kinyo tajahan mati sobolupm moniant Rajo Inyo Dijanjian Allah.

27Jadi pas Yusuf ongko Maria mombaba' Yesus ko Rumah Allah pakai' molabuhan inyo udah diporintahan dalapm Hukupm Torat, pas timpu nantai Roh Allah bulah Simeon botula' ko Rumah Allah jam. 28Pas Simeon moniant Bobia' nantai, io monjola' ongko mongipa'-Nyo, huatan momuji Allah,

29“Tuhatn, aku ni'in hulutn Duatn.

Ni'inan aku siap mati agatn sonang-asau

obai Duatn udah monopat'i janji Duatn ko aku.

30Obai agatn mato-kopala'ku siku'

aku udah moniant'am Ponyolamant inyo datakng tangga'i Duatn.

31Ponyolamant ni'in

udah Duatn siap'an pakai' somuo banso.

32Ponyolamant ni'in ubo torakng inyo monjolasan kohonda' Tuhatn ko boko urakng inyo bukainyo banso Yahudi.

Sio pan bulah umant Duatn Israel dihormati”.

33Indai-Bopai bobia' nantai pan hiratn mondingaꞌ lapo inyo dipandiran Simeon mongona'i Ana' sia' nantai. 34-35Ongko Simeon momborokati Maria agatn Yusuf.

Huatan io bopandir ko Maria, “Sobondarnyo, Bobia' ni'in udah dipilih Allah, oca' isi hati boko urakng banyaꞌ inyo tobumbutn tajahan kotohuan. Sio monjadi tando pakai' monunju'an kohonda' Allah, sampai banyaꞌ boko urakng Israel monjadi lobih dampikng ko Allah. Apo banyaꞌ jam inyo tajahan molawatn-Nyo. Banyaꞌ urakng Israel paca'an monjouhan diri doi' Allah obai monula' Bobia' ni'in. Ajab sonsaro sampai komatian inyo paca'an dialapi-Nyo tajahan bulah kolai pan bulikng, Maria. Samo ubo podakng inyo monuhu' hati kolai.”

Hana bosukur obai kodatakan Yesus

(2:36-38)

36-37Di tongahlamanan Rumah Allah nantai pan ado siku' urakng nabi botina' inyo udah kotakng tuho. Damonyo Hana. Io ana' Fenuel doi' suku Asyer. Io kalo kawitn somanahan tujuh tohutn, apo lopas nian lakinyo mati ongko monjadi balu. Io boumur dolapatn puluh ompat tohutn. Io hala di Rumah Allah. Siakng-malapm sombayakng agatn hala bopuaso ongko bodoa. 38Timpu Yusuf, Maria ongko bobia' nantai ado di santai, datakam Hana ko sia', ongko mula'i moucap sukur ko Allah. Io bopandir mongonaꞌi Ana' nantai, Rajo Inyo Dijanjian Allah. Io bopandir ko somuo urakng di siatn inyo monanti watu somuo banso Israel dilopasan.

Yesus dibaba' pulakng ko kota Nazaret ongko dibosaran di santai

(2:39-40)

39Lopas Yusuf ongko Maria jadi molabuhan boko acara diporintahan dalapm Hukupm Torat pulakam sia' ko kota Nazaret, di doerah Galilea. 40Bobia' nantai dibosaran di santai. Sio monjadi kotakng kuat. Sio monjadi kotakng pintar-corodi' bondar. Allah kotakng mongasihi Sio.

Yesus mongajar di tongahlamanan rumah Allah watu Io boumur duo bolas tohutn

(2:41-52)

41Sotiap tohutn urakng tuho Yesus botula' ko kota Yerusalem pakai' morayaan Ari Rayo Paskah.#2:41: Urakng Yahudi moingant joman komai watu sia' dibebasan doi' pacal di tanah Mesir. Allah mohukupm urakng Mesir. Sotiap ana' kojula'an urakng Mesir mati, sampai ko boko hayapm-inguan jam. Apo urakng Israel disolamant'an. 42Pas Yesus boumur duo bolas tohutn, botula'am sia' oca' tuyut morayaan Ari Rayo Paskah sama'an biasonyo. 43Lopas poraya'an nantai jadiam, urakng tuho Yesus pan pulakam. Apo, Yesus kotinggalan di Yerusalem mo co kotohuan indai-bopaiNyo. 44Sia' bojalatn torus obai bopikir Yesus ado di antaro rombokan inyo bojalatn sosamo agatn sia'. Udah tumbas ari sia' bojalatn, hoyu' monggoyapi Yesus di antaro boko koluarga ongko pokawalan sia'. 45Apo sia' kinyo monomuan Yesus, obai nantai Yusuf ongko Maria bobali' agi' ko Yerusalem monggoyapi Yesus. 46Koponsuahannyo, lopas tigo ari monggoyapi, sia' monomuan Yesus di tongahlamanan Rumah Allah. Yesus tongahan dudu' agatn boko guru agama Yahudi mondingaꞌan pongajaran sia', huatan botakutn ko sia'. 47Ado jam boko urakng bukai di santai bondinga'an pomandiran Yesus dalapm boko soal-jawab agatn boko guru agama nantai. Hiratn sia' somuo, mondingaꞌ boko jawaban Yesus, obai pongorotian-Nyo kotakng dalapm. 48Urakng tuho-Nyo pan tonganga' kali moniant Yesus. Indai-Nyo bopandir ko Io.

“Na, jangan ubo nian agatn indai-bopai kolai. Koi duo murakan udah kuatir monggoyapi kolai!”

49Timbas Yesus ko sia', “Kaitn duo jangan kuatir monggoyapi Aku, obai sobondarnyo kaitn udah tohu Aku gola' ado di dalapm Rumah Bopai-Ku ni'in!” 50Apo sia' kinyo mongoroti agatn pomandiran-Nyo nantai.

51Lopas nian Yesus pulakng sosamo agatn sia' ko kota Nazaret. Yesus totap taat agatn sia'. Indai-Nyo monyimpatn boko poristiwa inyo tojadi nantai, dalapm hatinyo. 52Yesus mongkitn manah mongkitn bosaram huatan kotakng pintar-corodi'. Allah ongko monsio mongkitn sonang agatn Yesus.

Currently Selected:

Lukas 2: TBDS

Highlight

Copy