Kisah Boko Rasul 8

1aSaulus inyo ado di santai, io ia'an salah siku' pomimpitn agama Yahudi jam. Io pan sotuju aman boko urakng mombunuh Stefanus.

Di Yerusalem, boko urakng inyo pocayo didorako'i

(8:1b-3)

1b-3Lopas jadi Stefanus mati, ado boboropo urakng inyo pocayo ko Allah momasar io. Sia' bulikng agatn kotakan salu'. Apo pado ari nantai jam di kota Yerusalem, boko urakng inyo pocayo Yesus mula'i didorako'i. Sia' didorako'i agatn kotakan borat. Saulus tongahan bousaha pakai' mombonasoan jomaat. Io botula' doi' rumah ko rumah, monyeret boko urakng inyo pocayo Yesus ko ponjara, boi' lolaki damo botina'. Jadi banya' bondar urakng pocayo rari doi' Yerusalem. Sia' tosebar ko boko tompat di doerah Yudea huatan Samaria. Bayo koduo bolas rasul totap tinggal di Yerusalem.

Kabar Boi' mongona'i Yesus diboritoan di Samaria

(8:4-25)

4Boko urakng pocayo inyo rari doi' kota Yerusalem nantai tosebar. Sia' momboritoan Kabar Boi' ko mono ja' sia' botula'. 5Di antaro sia' ado Filipus. Io botula' ko sobuah kota di doerah Samaria ongko momboritoan ko boko urakng di santai. Io momboritoan obai Yesus nantai Rajo Inyo Dijanjian Allah.#8:5: Komungkitan bosar Filipus, sama'an Stefanus, ia'an salah siku' urakng doi' tujuh urakng inyo dipilih pakai' monulukng boko rasul (Kisah 6:5). Damo mungkitn Filipus ni'in ia'an Rasul Filipus (Yohanes 1:43). Urakng Samaria nantai koturutan urakng Yahudi inyo kawitn agatn urakng inyo bukai Yahudi. Urakng Samaria huatan urakng Yahudi bomusuhan, apo di si'itn banya' doi' sia' mula'i pocayo agatn Yesus. 6-7Filipus monyamani banya' urakng lumpuh huatan banya' urakng timpakng. Io pan monundukng boko roh jahat doi' banya' urakng. Boko roh jahat nantai koluar kapikng mondorah agatn saro kotakan borakng. Pondudu' kota nantai mondinga'an somombondarannyo ajaran Filipus, obai sia' moniant banya' mujisat inyo io labuhan. 8Boko urakng di kota nantai kotakan rindakng obai somuo nantai.

9Di kota nantai ado siku' urakng boponohu. Damonyo Simon. Io udah manah bulah boko urakng di doerah Samaria tohiratn-hiratn agatn ponohunyo. Io pan moaku'i dirinyo sobagai urakng inyo hebat. 10Jadi sobolupm Filipus datakng, somuo urakng Samaria pocayo agatn io, boi' urakng biaso damo urakng pontikng. Sia' bopandir, “Urakng ni'in ado kuaso bosar obai ado kuaso doi' Allah.” 11Jadi sia' pocayo agatn io, obai udah kotakan manah io bulah sia' tohiratn-hiratn agatn ponohunyo.

12Apo Filipus momboritoan Kabar Boi' mongona'i Koraja'an Allah. Io momboritoan mongona'i kuaso Yesus sobagai Rajo Inyo Dijanjian Allah. Watu Filipus momboritoan somuo nantai, banya' urakng pocayo agatn borito nantai, boi' lolaki damo botina'. Ongko, Filipus mombaptis sia'. 13Simon nantai pan pocayo ongko dibaptis. Lopas nantai, io hala tuyut Filipus. Io hala hiratn moniant Filipus molabuhan banya' macapm mujisat.

14 Pontongahan nantai, boko rasul ija' ado di Yerusalem. Sia' mondinga' obai banya' urakng Samaria nantai udah pocayo borito doi' Allah mongona'i Yesus. Jadi sia' moutus Petrus ongko Yohanes ko su'utn. 15Timpu sia' duo datakng, sia' bodoa oca' somuo urakng Samaria inyo pocayo monorima' Roh Allah. 16Urakng pocayo nantai memang udah dibaptis obai pocayo agatn Yesus, Tuhatn inyo bokuaso di pucu' somuonyo. Apo Roh Allah bolupm ado pado sia'. 17Jadi Petrus ongko Yohanes molota'an jarinyo ko pucu' sia'. Watu nantai, hoyu' sia' monorima' Roh Allah.

18Simon nantai moniant obai Roh Allah dionji'i ko boko urakng nantai molalu'i boko rasul inyo molota'an jarinyo ko pucu' sia'. Jadi, io honda' moonji'i duit ko sia' duo, 19katonyo, “Onji'i jam kuaso nantai ko aku. Jadi, timpu aku molota'an jariku ko urakng, urakng nantai paca'an monorima' Roh Allah.”#8:19: Pado joman nantai, tukakng sihir ulih mongoit boko ponohu doi' tukakng sihir inyo bukai. Mungkitn Simon bopikir molota'an jari nantai suatu acara ritual adat inyo ulih ditiru pakai' moonji'i Roh Allah ko urakng bukai. Apo udah jolas, boko rasul Yesus bukainyo tukakng sihir, apo ado kuaso doi' Allah. ‘Molota'an jari’ nantai tando obai kuaso Allah bokorojo molalu'i siaꞌ.

20Apo Petrus bopandir ko Simon, “Kironyo Allah mombonasoan kolai bosamo duit kolai nantai! Obai kolai monyangko kolai ulih mongoit Roh Allah nantai agatn duit. 21Kolai co nyiant hak pakai' tuyut dalapm polayatan ni'in, obai hati kolai kinyo bondar dihadapan Allah. 22Jadi gola' kolai tongga'an cam bopikir jahat sama'an nantai. Bodoacam ko Tuhatn oca' kohonda' hati kolai inyo jahat nantai ulih diamputi-Nyo. 23Obainyo aku moniant kolai sangant tungian. Kolai tojoyat dalapm dosa.”

24Timbas Simon, “Tulukng kaitn duo bodoacam ko Tuhatn. Bodoa oca' somuo inyo udah kaitn katoan nantai kinyo tojadi ko aku.”

25Lopas nantai, koduo rasul nantai monyampaian borito doi' Tuhatn. Sia' momboritoan mongona'i pongalapan sia' siku' bosamo Yesus. Ongko, sia' bobali' ko Yerusalem. Dalapm pojalatan pulakng, sia' momboritoan Kabar Boi' mongona'i Yesus di banya' laman bukai di doerah Samaria nantai.

Filipus monjolasan Kabar Boi' ko siku' urakng doi' koraja'an Etiopia#8:25: Etiopia ni'in bobeda doi' Etiopia watu ni'in. Etiopia ni'in moliputi bagian Solatatn Mesir huatan bagian Utara Sudan. Nogori ni'in mohampar doi' kota Aswan sampai ko kota Khortum watu ni'in. Etiopia pan dikonal sobagai Nubia damo Kusy (damo Ibraninyo).

(8:26-40)

26Pado suatu ari, Tuhatn monyiuh molekat monomu'i Filipus. Molekat nantai bopandir, “Bososiapcam! Botula' ko arah solatatn,#8:26: Dalapm baso Yunani, ‘ko sobolah solatatn’ ulih jam boroti ‘kiro-kiro tongah ari’. ko jalatn inyo turutn doi' Yerusalem ko Gaza.” (Jalatn nantai molalu'i doerah inyo langunt.) 27Jadi Filipus bososiap ongko botula'. Di jalatn nantai, io moniant siku' urakng Etiopia.#8:27: Urakng inyo udah dikobiri doi' kocit opat dipocayoan agatn jabatan tinggi obai habakngnyo kinyo pontikng kuatir io paca'an momporajoan agatn bini damo ana' daronyo. Apo, koadaan jasmani urakng ni'in kinyo ditokatan dalapm perikop ni'in. Inyo ditokatan ia'an io urakng pontikng. Urakng Etiopia nantai ia'an siku' urakng pojabat tinggi. Io kopala' bendahara inyo bokorojo pakai' ratu Etiopia.#8:27: Dalapm baso Etiopia ‘Kandake’ boroti ‘Ratu’ bukai damo ratu ni'in. Tontai pojabat nantai botula' sombayakng ko Yerusalem, 28apo timpu nantai tongahan dalapm pojalatan pulakng. Io pulakng noi' koreta inyo didudus boko kuda. Dalapm pojalatan, pojabat nantai mombaco doi' buku Nabi Yesaya.

29Pas Filipus moniant urakng Etiopia nantai, Roh Allah bopandir ko io, “Hampiki koreta nian.” 30Ongko Filipus bonggidi'an mohampiki koreta nantai ongko mondinga' pojabat nantai tongahan mombaco doi' buku Nabi Yesaya. Jadi Filipus botakutn, “Apobai Habakng mongoroti masud baca'an nantai?”

31Kato pojabat nantai, “Co mungkitn aku ulih mongoroti aman co nyiant urakng inyo monjolasannyo ko aku.” Jadi pojabat nantai mominto Filipus noi' ko koretanyo ongko dudu' bosamo agatn io.

32Bagian Buku Suci inyo dibaco pojabat nantai dinga' ni'innan:

“Sio dibaba' pakai' dibunuh samo ubo siku' domba dibaba' pakai' disombolih.

Apo Sio nantai co mongatoan la'apo pan samo ubo siku' domba kinyo bosaro timpu urakng mongguntikng bulunyo.

33Sio dihanyam. Sio dipoulahan agatn kinyo adil.

Co nyiant urakng inyo ulih mongisahan mongona'i koturutan-Nyo, obai Sio dibunuh.”#8:32-33: Doi' Yesaya 53:7-8. Nabi Yesaya monulis ni'in mongona'i Polayatn Tuhatn, golar bukai pakai' Rajo Inyo Dijanjian Allah. Apo pojabat nantai bolupmnyo tohu.

34Pojabat nantai bopandir ko Filipus, “Tulukng padahan ko aku: Nabi nantai monulis mongona'i sopo? Apobai mongona'i dirinyo damo mongona'i urakng bukai?” 35Jadi, Filipus monjolasan pomandiran nabi nantai sobondarnyo mongona'i Yesus. Ongko, Filipus momboritoan soluruh Kabar Boi' ko io.

36Dalapm pojalatan, sia' molalu'i tompat inyo ado ara'i. Pojabat nantai bopandir, “Tiat, di si'itn ado ara'i. Tulukng duatn mombaptis aku.”

[ 37Filipus bopandir, “Aman Habakng somombondarnyo pocayo ko Yesus, Habakng ulih dibaptis.”

Kato pojabat nantai, “Aku pocayo Yesus nantai Rajo Inyo Dijanjian Allah. Yesus nantai Ana' Allah.”]

38Ongko pojabat nantai monyiuh hulutnnyo pakai' monongga'an koretanyo. Filipus ongko pojabat nantai turutn ko ara'i, ongko Filipus mombaptis io. 39Lopas jadi sia' monjouh doi' ara'i nantai, sopongirap Roh Allah mombaba'i Filipus doi' tompat nantai. Pojabat nantai kinyo moniant Filipus agi'. Ongko pojabat nantai molajuan pojalatannyo pulakng agatn hati inyo rindakng. 40Apo Roh Allah mombaba' Filipus doi' tompat nantai ko kota inyo bodamo Asdod. Tangga'i santai io bojalatn ko kota Kaisarea. Io momboritoan Kabar Boi' di somuo kota di sopanjakng pojalatannyo.

Currently Selected:

Kisah Boko Rasul 8: TBDS

Highlight

Copy