Kisah Boko Rasul 7
7
Stefanus bopandir obai pomimpitn banso Yahudi inyo monula' Yesus samo ubo angki-bayatn sia' inyo monula' Allah
(7:1-53)
1Ongko Imam Agukng botakutn ko Stefanus, “Apobai pomandiran sia' ni'in bondar?”
2Stefanus monimbasi, “Pombopaian boko poadikng-poanci'an dinga'anku bo! Bopai kito komai, Abrahapm bodiapm di doerah Mesopotamia, apo watu sio ija' di doerah Mesopotamia nantai, Allah inyo Maho Bosar udah moniant'an diri-Nyo ko sio. 3Allah bopandir ‘Tinggalan ja'am nogori kolai ni'in. Tinggalan ja'am koluarga bosar kolai, ongko botula' cam ko nogori inyo paca'an Aku tiat'an ko kolai.’ 4Jadi, Abrahapm moninggalan doerah Mesopotamia, tanah urakng Kasdim nantai ongko pindah ko kota Haran.#7:4: Jaraknyo lobih doi' 1000 pal Lopas bopainyo mati, Allah monyiuh Abrahapm pindah doi' su'utn ko nogori Israel ni'in, tompat kodiapan kito watu ni'in.#7:2-4: Allah mombimbikng Abrahapm doi' kota Ur-Kasdim di doerah Mesopotamia, ko kota Haran, ongko ko tanah Kanaan (tanah Israel). Kojadian 11:31-12:5, 15:7.
5Watu nantai Allah kinyo moonji'i sodikit pan tanah ni'in ko Abrahapm pakai' monjadi umputnnyo. Apo Allah bojanji ko io obai tanah ni'in paca'an monjadi umputn io huatan koturutannyo. Padohal watu nantai Abrahapm bolupm ado ana'. 6Allah bopandir ko io, ‘Sobolupm tanah ni'in monjadi umputn koturutan kolai, koturutan kolai paca'an diapm ubo urakng asikng di nogori banso bukai holu'ai. Banso nantai paca'an momoso somuo koturutan kolai bokorojo monjadi hulutn pakai' sia'. Somanah ompat ratus tohutn, banso nantai paca'an boulahan sia' agatn kotakan kojapm.’ 7Apo lopas nantai, Aku paca'an mohukupm banso inyo kojapm nantai. Ongko koturutan kolai paca'an koluar doi' nogori nantai huatan paca'an monyombah Aku di tompat ni'in.#7:7: Doi' Kejadian 15:13-14; 17:7-8.
8Ongko Allah bojanji agatn Abrahapm. Obai Allah hala sotia ko Abrahapm ongko koturutannyo. Jadi, sia' pan gola' sotia ko Sio. Allah monyiuh sotiap boko lolaki disunant. Sunant nantai monjadi tando sia' mohormati porjanjian nantai.#7:8: Tiat Kejadian 17:3-14. Lopas nantai Abrahapm ado ana' am. Damonyo Ishak. Jadi, lopas Ishak boumur dolapatn ari,#7:8: Pado ari inyo ko dolapatn boroti sominggu lopas jadi bobia' nantai lahir. (Umpamonyo aman bobia' nantai lahir pado ari Senin, bobia' nantai disunant pado ari Senin, Minggu muka'nyo.) Abrahapm monyunant io. Ubo nian jam watu Ishak ado ana', inyo bodamo Yakub, ana' nantai pan disunant. Yakub pan molabuhan hal inyo samo ko koduo bolas ana'nyo. Lopasnyo somuo sia' nantai monjadi koduo bolas Bopai loluhur banso kito Israel.
9Ana' Yakub inyo kosobolas bodamo Yusuf. Somuo poanci'annyo tungi agatn io. Jadi, sia' nantai monjual io ko podagakng. Podagakng nantai mombaba' io ko nogori Mesir. Yusuf monjadi hulutn di su'utn apo Allah hala molinduki io. 10Allah monyolamant'an io doi' sotiap jorih-uyuh inyo io alapi. Allah bulah Yusuf kotakan pintar-corodi', sampai pan Rajo Mesir sonang agatn io. Ongko rajo nantai moangkat Yusuf monjadi urakng bokuaso di soluruh Mesir, tomansu' mourus somuo urusan istana rajo nantai.
11Lopas nantai datakam lapar-barau di soluruh Mesir. Doerah Kanaan kona' jam, sampai pan somuo urakng kotakan ajab sonsaro. Angki-bayatn kito di nogori Kanaan kinyo dapat pomakatn. 12Jadi, watu Yakub mondinga' obai di Mesir ado gandupm, Yakub monyiuh poana'annyo ia'an angki-bayatn kito ko su'utn. Nianam potamo kalinyo sia' botula' ko Mesir. Timpu sia' datakng di su'utn, sia' co konal am agatn Yusuf. Sia' pan pulakng agatn mombaba' gandupm nantai. 13Apo pomakatn sia' nantai habis, ongko sia' botula' agi' pakai' koduo kalinyo. Pado watu nantaiam, Yusuf botorus torakng agatn sia'. Yusuf mongonalan dirinyo ko boko somadikannyo. Ongko, Rajo Mesir mongotohu'i mongona'i koluarga Yusuf. 14Yusuf monyiuh boko somadikannyo pulakng agi'. Yusuf honda' sia' momocaki bopainyo agatn somuo koluarganyo, oca' sia' somuo ulih pindah ko Mesir. Timpu nantai, jumlah sia' somuo tujuh puluh lima' urakng. 15Jadi, Yakub agatn somuo angki-bayatn kito botula' ko Mesir. Sia' somuo tinggal di nogori nantai sampai mati pan di su'utnmo. 16Apo boko tulakng sia' dibaba' agi' ko kota Sikhem di tanah Kanaan. Boko tulakng nantai dibaba' oca' ulih dipasar di pasaran inyo udah diboli Abrahapm. Obai sokomai Abrahapm momboli nantai doi' boko urakng di su'utn, ia'an poana'an Hemor.#7:16: Urakng inyo mondinga' kisah Stefanus udah tohu io monyimpulan kisah Yusuf doi' Kojadian 38–50. Sobondarnyo Yakubam inyo momboli tanah doi' poana'an Hemor di kota Sikhem (Kojadian 33:19). Abrahapm momboli gua pasaran dampikng kota Hebron doi' Efron urakng Het (Kojadian 23:15–18). Boko tulakng Yakub ongko boko tulakng Yusuf inyo dibaba' pulakng. Yakub dipasaran di gua inyo diboli Abrahapm (Kojadian 50:13), huatan Yusuf dipasaran di Sikhem (Yosua 24:32).
17Jadi, angki-bayatn kito monjadi hulutn di Mesir. Apo watu ari inyo jouh sobolupmnyo, Allah udah bojanji agatn Abrahapm. Allah bojanji Sio paca'an mombaba' sia' koluar doi' tanah Mesir nantai. Jadi manah-komanahan, mongkitn dampikam watunyo nantai, jumlah urakng doi' banso kito di Mesir mongkitn botambah banya'. 18Pado watu nantai, siku' urakng rajo boharu momorintah di Mesir.#7:18: Kiro-kiro ompat ratus tohutn lopas Yusuf mati. Rajo nantai kinyo konal agatn Yusuf. Rajo nantai kinyo tohu agatn Yusuf huatan koboi'annyo doholu komai. 19Rajo nantai boulahan angki-bayatn kito agatn kojapm huatan monyisa sia'. Io kinyo honda' banso kito botambah banya'. Io momoso sia' mombuakng somuo bobia' lolaki oca'nyo mati.
20Watu nianam Musa lahir. Io kotakan gagah.#7:20: Baso Yunani pakai ‘Io kotakan boi' pakai' Allah.’ Ado tigo komungkitan: 1) Allah mooso bobia' nantai gagah, 2) Allah sonang agatn bobia' nantai DAMO, 3) Ni'in kiasan inyo boroti bobia' nantai gagah (obai Allah kinyo moniant bangkakng huatan bobia' bolupm ado porbuatan inyo monyonangan Allah). Somanah tigo bulatn urakng tuhonyo mongombolo io, kapikng moombakan io di rumah. 21Timpu sia' udah co ulih moombakan io agi', toposo sia' mombuakan io. Apo ana' botina' Rajo Mesir monomuan io ongko dikobolo sama'an ana'nyo siku'.#7:21: Tiat Koluaran 2:1-10. 22Jadi Musa dididik dalapm bomacapm ilmu pongotohuan urakng Mesir. Io monjadi urakng inyo hebat. Io bopongaruh, boi' di dalapm pomandirannyo apotolagi' kolaku'annyo.
23Lopas Musa boumur ompat puluh tohutn, io momutusan pakai' monjongu' boko somadikannyo, banso Israel. 24Watu nantai, io moniant siku' doi' sia' tongahan dipantu' ulih siku' urakng Mesir. Jadi, Musa honda' mombela urakng Israel nantai. Ongko Musa pan mombunuh urakng Mesir nantai. 25Musa monyangko boko somadikannyo urakng Israel dapat mongoroti Allah udah moutus io huatan momakai io pakai' monyolamant'an sia' doi' hulutn-pacal. Apo co sia' mongoroti nantai.
26Kohobu'annyo, Musa botomu agatn duo urakng Israel bukai. Sia' tongahan boporap. Musa moncubo morara'i sia'. Katonyo, ‘Uai kaitn, jangan kaitn boporap! Kaitn ni'in somadikan.’ 27Apo urakng inyo momantu kawalnyo nantai, monula'an Musa. Katonyo, ‘Duatn co bohak moatur ongko moadili koi! 28Jangan sampai duatn mombunuh aku jam, sama'an duatn mombunuh urakng Mesir nantai somaman.’
29Pado watu Musa mondinga' pandir urakng nantai, io monjadi gola' obai boko urakng udah tohu io mombunuh siku' urakng Mesir. Jadi, io morarian diri doi' Mesir ongko tinggal ubo urakng asikng di nogori urakng Midian. Di su'utn io bobini ongko mondapat duo ana' lolaki.
30Ompat puluh tohutn lopas nantai, pado suatu ari Musa ado di padakng pasir dampikng Gunung Sinai. Watu nantai, ado molekat monunju'an bukakngnyo ko io. Molekat nantai monyorupo'i api inyo bonyalo di rado momant. 31Musa kotakan hiratn obai api nantai kinyo moloburan rado momant. Musa mohampiki api nantai pakai' moniant lobih jolas. Watu nantai, io mondinga' saro Tuhatn Allah inyo bopandir, 32‘Aku ninam Allah inyo disombah angki-bayatn kolai, ia'an Abrahapm, Ishak, ongko Yakub.’
Watu Musa mondinga' pomandiran nantai, io monjadi kotakan gola' sampai bogogora'. Io co borani moniant ko arah api nantai agi'. 33Ongko Tuhatn Allah bopandir agi', ‘Buka' sandal kolai, obai tompat di mono kolai bodiritn nantai tanah inyo suci obai Aku ado di si'itn. 34Umant-Ku kotakan ajab sonsaro di Mesir. Aku bondar-bondar udah moniant nantai. Aku jam udah mondinga' koluhan sia'. Obai nantaiam, Aku udah turutn pakai' mombebasan sia' doi' hulutn-pacal. Jadi bosiap cam, obai watu ni'in Aku moutus kolai bobali' ko nogori Mesir pakai' molabuhan nantai.’
35Jadi Tuhatn Allah moutus Musa, inyo komai ditula' ulih urakng Israel. Watu nantai sia' bokato, ‘Kolai co bohak moatur ongko moadili koi?’ Apo malah io nanam inyo udah diutus Allah molalu'i molekat inyo monampa'an bukakng ko io di tongah rado momant nantai. Allah moutus io pakai' monjadi pomimpitn huatan ponyolamant.#7:35: Urakng Israel monula' Musa inyo diutus Allah pakai' monjadi pomimpitn sia' huatan monyolamant'an sia' doi' hulutn-pacal di Mesir. Ubo nantai jam koturutan sia' pado joman Yesus. Boko urakng Yahudi monula' Yesus inyo diutus Allah pakai' monjadi pomimpitn sia' huatan mombebasan sia' doi' hulutn-pacal dosa, ia'an hukupan obai dosa sia'.
36Musa ni'innam inyo momimpitn urakng Israel koluar doi' Mesir. Io molabuhan banya' mujisat di nogori Mesir agatn di Lout Mirah. Io jam molabuhan banya' mujisat timpu sia' ado di padakng pasir somanah ompat puluh tohutn. 37Musa ni'in jam inyo udah bopandir ko banso Israel, ‘Tuhatn Allah kito paca'an moutus siku' urakng doi' banso kito. Io paca'an monjadi Nabi samo ubo aku inyo monyampaian pomandiran Allah ko kaitn.’#7:37: Doi' Ulangan 18:15. Tiat catatan di Kisah 3:22. 38Somanah angki-bayatn kito urakng Israel ado di padakng pasir, Musa ado bosamo sia'. Io monjadi porontaro pakai' sia' obai io monorima' pomandiran Allah doi' molekat di Gunung Sinai, ongko io monyampaian pomandiran Allah nantai ko sia'. Sampai ari ni'in pan pomandiran Allah nantai totap bolaku. Pomandiran Allah nantai monjolasan caro hidup inyo monyonangan Allah.
39Apo angki-bayatn kito co honda' taat agatn Musa. Sobali'nyo sia' monula' io. Hati sia' honda' bobali' ko Mesir.#7:39: Ado duo komungkitan. 1) Urakng Israel honda' bobali' ko Mesir obai ado makatan, minuman DAMO, 2) Urakng Israel honda' bobali' monyombah boko duato Mesir daripado Tuhatn Allah 40Jadi timpu Musa ija' di Gunung Sinai, sia' bopandir ko Harun, ‘Musa udah mombaba' kito koluar doi' nogori Mesir. Apo ni'in kito co tohu la'apo inyo tojadi agatn io. Jadi, pulahcam boko lompatukng pakai' kito. Boko lompatukng nantai monjadi boko duato inyo paca'an momimpitn kito.’ 41Timpu nantai am sia' bulah lompatukng inyo bukakngnyo sama'an ana' sapi. Sia' mombaba' posombahan ko lompatukng nantai. Agatn sonang hati sia' moadoan pogai bosar. Pogai nantai pakai' morayaan lompatukng, pulahan sia' siku'. 42Obai nantai am, Allah monula' sia', mombiaran sia' monyombah matoari, bulatn, boko bintakng. Nantai tojadi sama'an ubo inyo totulis di dalapm buku boko nabi. Allah bopandir, ‘Oi urakng Israel! Kaitn udah hidup di padakng pasir somanah ompat puluh tohutn. Somanah nantai, kaitn co bondar mombaba' kurbatn sombolihan ongko posombahan ko aku. 43Kaitn bulah boko lompatukng pakai' monyombah boko duato bukai. Ado lompatukng duato Molokh di dalapm kemah. Kaitn momindah kemah nantai doi' sobuti' tompat ko tompat bukai. Kaitn jam mombaba' barakng agatn rupo bintakng pakai' monyombah duato Refan. Obai nantai am, Aku udah momutusan pakai' mohukupm kaitn. Kaitn tajahan monjadi tawatan poparakan. Kaitn paca'an dibaba' ulih boko musuh sampai ko kota Babel ongko lobih jouh agi'.’#7:42-43: Doi' Amos 5:25-27.
44Somanah angki-bayatn kito ado di padakng gurutn, sia' mombaba' Kemah Tompat Sombayakng Allah pakai' tando obai Allah bosamo sia'. Kemah nantai dipulah sosuai agatn pomadahi Allah, sama'an contoh inyo Allah tiat'an ko Musa.#7:44: Stefanus monyimpulan sojarah urakng Israel inyo dikisahan di buku Koluaran. 45Lopas nantai, Yosua momimpitn angki-bayatn kito. Allah monulukng sia' mongalahan boko banso bukai sampai sia' suba' morobut tanah ni'in. Sia' mombaba' Kemah Tompat Sombayakng Allah sampai ko si'itn jam. Kemah nantai ado bosamo agatn sia' sampai joman Rajo Daud. 46Daud kotakan monyonangan hati Allah. Jadi io muhun ko Allah oca' io ulih bulah sobuah rumah pakai' Allah, ia'an Allah inyo disombah ulih angki-bayatn kito Yakub. 47Bukainyo Daud apo Salomo ana'nyo inyo bulah Rumah Allah nantai.
48Apo Allah Inyo Maho Tinggi kinyo bodiapm di dalapm rumah inyo dipulah ulih tunju'-jari monsio. Sama'an pandir Allah inyo disampaian ulih siku' urakng nabi,
49‘Langit ia'an tompat Aku dudu' pakai' momorintah. Bumi ia'an tompat Aku molota'an kaki.
Jadi co mungkitn kaitn ulih bulah rumah inyo cucu' pakai' Aku damo tompat pakai' Aku torahat.
50Ingantcam, Aku ninam inyo udah monjadian somuonyo ni'in!’ ”#7:50: Kisah 7:49-50 dikutip doi' Yesaya 66:1-2. Boko pomimpitn Yahudi tolalu monokatan sombayakng di Rumah Allah di kota Yerusalem. Jadi, Stefanus bomasud Allah lobih bosar daripado la'apo aja' inyo ulih dipulah monsio. Allah ado di mono-mono. Sio ulih disombah di mono-mono.
51Ongko Stefanus bopandir, “Kaitn ni'in koras kopala'! Hati kaitn co honda' pocayo ko Allah! Kolindakan kaitn co honda' mondinga' pomandiran Sio! Kaitn hala molawatn Roh Allah sama'an ubo angki-bayatn kaitn! 52Angki-bayatn kaitn monyisa somuo nabi Allah. Joman komai, sia' mombunuh boko nabi inyo mongabaran mongona'i kodatakan Rajo Inyo Dijanjian Allah, ia'an Hulutn Allah inyo hala hidup bondar di hadapan Allah. Sokarakng Rajo nantai udah datakng apo kaitn monyorahan Sio ko musuh-Nyo oca' Sio dibunuh! 53Joman komai Allah moutus boko molekat-Nyo pakai' monyampaian boko porintah-Nyo ko angki-bayatn kaitn. Ni'inan, boko porintah nantai udah ado dalapm Buku Suci, apo kaitn co monaati nantai!”
Stefanus dibunuh
(7:54–8:1a)
54Watu boko pomimpitn Yahudi mondinga' somuo nantai, sia' bokorit gigi kotakan godi. 55Apo watu nantai Roh Allah ado pado Stefanus. Io monongadah ko langit, moniant cohayo doi' Allah. Io moniant Yesus tongahan bodiritn di tompat inyo palikng tohormat, ia'an di sopia' kanan Allah. 56Stefanus bopandir, “Tiat! Aku moniant langit tobuka'. Yesus Inyo Diutus Allah Pakai' Monjadi Monsio tongahan bodiritn di tompat inyo palikng tohormat di su'utn.”
57Watu sia' mondinga' pomandiran Stefanus nantai, sia' monutup kolindakan kapikng mondorah, ongko sosamo monyorakng Stefanus. 58Sia' mondudus io koluar kota, ongko mula'i monikapi io agatn batu pakai' mombunuh io. Boko urakng inyo bosasi molawatn Stefanus nantai molopasan jubah sia'. Sia' moninggalan boko jubah nantai di kaki siku' urakng pomuda' oca' io monjago'inyo. Pomuda' nantai bodamo Saulus.#7:58: Boko sasi nantai, mungkitn boko urakng inyo disobut pado Kisah 6:13, inyo potamo monikapan batu (tiat Imamat 24:14 huatan Ulangan 17:7). Sia' molopasan jubah oca' lobih mudah monikapm batu. Saulus ni'in inyo dikonal agatn damo Paulus inyo monjadi salah siku' urakng rasul Yesus.
59Timpu boko urakng monikapi Stefanus agatn batu, io bodoa, “Tuhatn Yesus, torima'cam rohku.” 60Ongko kapikng molota'an kopututnyo ko tanah, io mondorah agatn saro kotakan borakng. Katonyo, “Tuhatn, amputicam dosa inyo sia' pulah ni'in!”
Lopas bopandir sama'an nantai, Stefanus matiam.
Currently Selected:
Kisah Boko Rasul 7: TBDS
Highlight
Share
Copy
Want to have your highlights saved across all your devices? Sign up or sign in
