MARKUS 3

O Sabat paga Yesus nen ap inggi penak nggwe warek pano ekige wene

(Mat. 12:9-14; Luk. 6:6-11)

1Ar Yesus iyok paga ambi inom ar o tamban erir tagama lagage. O tamban erir tagama etomala, ap ambi inggi penak nggwe warek mende ambi welagage 2Etomala akuni ambetak ar Yesus maduk eka ninil kalok nen, Ar oba maduk yidilogo buok nen yiluk, inil waganggwi welagugwa. Ir akuni yomanogo ap Yahudi tamban eritagwi o Sabat yi paga, Ar Yesus nen, akuni ambetak pano erinabigin a, dek a? Yiluk, inil welagugwa. 3Ar Yesus nen ap inggi penak nggwe warek mende enogo yoga dogolir, “Akuni inilka paga yoma menari eme o,” yiluk yorige. 4Menari lagagemo, Ar Yesus nen akuni yomanogo kinok yoraga dogolir, “Agama wene eku dogu denggalek werek eti, o hari Sabat yi paga, nir nen nena kwak erurak? Pano mende kwak erurak a, maduk mende kwak erurak a? Akuni inagap endarurak a, akuni inarurak a?” yiluk yorarige mende, ir inane dek mban ar puk agugwa.

5Yesus wenemuk akla andaga dogolir, il akuni yomanogo dagak-dagak yamben inakige. Etegerogo wenemuk akla andarigerik ogwe, tuguluk ir iniliti mondok akber werek il daga lagagerek inaba akla andarige. Etegerogo il daga lagagerek, Yesus nen ap inggi penak nggwe warek mende enogo yoga dogolir, “Kinggi nggik togo lagabi eme o.” Ar ap enogo inggi nggik togo lagabi wagage mo, inggi enogo pano agage. 6Tuguluk, ir ap Farisi mende yomanogo o tamban erir tagama nen dambe kalok wulkugwarik, nenggerogo Ar Yesus ebe waruwok, yiluk, ir ap Herodes aworomi inom wene mbalkugwa.

Akuni Pakalok i Galilea enggelek aik paga kuwak ekugwa wene

7Ar Yesus aworomi inom, o yomanogo dambe kalok, i danau Galilea enogo aik paga lagugwa. Ir akuni o Galilea nen pakalok Ar Yesus mutek lagugwa. Akuni pakalok ambetak o Yudea nen inom, 8o Yerusalem nen inom, o Idumea nen inom, o Timur Yordan nen inom, nen o Tirus nen inom, Sidon nen inom wagugwa. Nenaluk wagugwa eti, Ar Yesus nen akuni pano erinabi taga yomanogo inaruk kolku lagugwarik, ir akuni o ye ai nde ai etoma nen, Ar Yesus oba wagugwa. 9#Mrk. 4:1; Luk. 5:1-3Ir akuni wagugwa yomanogo pakalok ma, ar Yesus akuni pakalok ina nggedokla nggeda laru enaga yiluk, ar Yesus nen aworomi to perahu ambi pik puk erogo bini o, yiluk, yoragige. 10Ar Yesus nen akuni pakalok pano ekbarige, etegerogo pano eginaki nanggige, akuni u warek mende pakalok ar Yesus oba korok-korok watuk, ininggi pakta warurak paga pedal-pedal mondok oba wagugwa. 11Nen ir akuni monggar maduk mende inakla unggegetek mende eti, ninggi nanggi Yesus inil kugu dogolir kalok eti, ar Yesus apma tebe yiluk, inane nggok paga yugu dogolir, “Kar eti Allah Akbur o,” yiluk yirugwa. 12Ogwe ar Yesus nen yoraga dogolir, an nabok mondok yurak maga o, yiluk yorarige.

Yesus nen aworomi 12 paga inayonggo birige wene

(Mat. 10:1-4; Luk. 6:12-16)

13Etegerogo eka lagagerek, Yesus kur omanggi paga dagi lagage, Ar nen akla andalok ap ambetak wai yoragage. Ir ap wai yoragage yomanogo mutek wagugwa. 14Mutok wagugwa ma, ir akuni ambetak inakla nen inebe 12 paga mirinakige. Wai yoraga lagagerek yoraga dogolir, “An nen kir wai yokiragi ernogo, kir An ninom lagu dogu yiluk, An nen pulogo lakbinagu mo kir nen Pano Wene Allah Ane enogo ya paga nda paga wigalogo yorar laurak yiluk o. 15Kir nen ye kugwi nde kugwi maduk mende wulinaku dogu yiluk Allah obarne kodagun o.” 16Ir ap inebe 12 enogo inendaga yio: Simon (ar endaga omanggi eti Petrus) inom, 17Yakobus ogar Yohanes imbirak, ir yi ap Zebedeus akburi (ir imbirak inendaga Yesus nen wogoragage eti Boanerges, inendaga yi enggen ebe eti “mbogor ane akburi”), 18Andreas inom, Filipus inom, Bartolomeus inom, Matius inom, Tomas inom, Yakobus ap Alfeus akbur inom, Tadeus inom, Simon ap Zelot mende inom, 19Nen ar Yudas Iskariot yabonggane enggalar Yesus eti maduk o, yiluk, ar nen Yesus ebe warurak paga onggo kunigin enogo inom miginaka lagagerek wai yoragage.

Ar Yesus kugi Beelzebul obatne paga, akuni u nggigilogo wulinabi taga yiluk, yorige wene

(Mat. 12:22-32; Luk. 11:14-23, 12:10)

20Pulogo menogo balok, ar Yesus uma lagage. Uma lagagerek puk mo, yabongga akuni pakalok ar uwagam kuwak eri wagugwa. Akuni pakalok wagugwarik ma, Yesus aworomi inom erom naurak o telek dek agage. 21Ir akuni ambetak nen yugu dogolir, “Ae Yesus obok iliti mbalke o!” yirugwa. Etegerogo yugwi ir Ar Yesus agwiya ombae aworomi inom inaruk kolku lagugwarik, wagani lagugwa. 22#Mat. 9:34, 10:25, 12:24; Luk. 11:15Ir ap guru-guru agama o Yerusalem nen wagugwa mende yomanogo nen yugu dogolir, “Ar Yesus iliti mo, kugi endaga Beelzebul unggege o. Etegerogo ma, ir kugi etoma inobarne wogogwi paga, Ar nen kugi mugogo wulinabi taga o,” yiluk yirugwa. 23Etegerogo yugwi kalok, Ar Yesus nen, akuni pakalok yomanogo wai yoraga lagagerek, wene oba lirogo mbililogo ir yoragage. Ar Yesus nen yoraga dogolir, “Nenggerogo ar irimbo nen, irimbo ar mugogo wulaburak. 24Ir ap o negara ambila ir-ir agok diluk iniliti dambulkikdek kalok, o negara eti pano abodok dek dogitaga dek o. 25Ir keluarga ambila nen, iniliti agorik agorek dambulik dogu ndak dek kalok, ir keluarga eti pano dogogun dek, nadok kalok ekbiluk, maduk agangger o. 26Etegerogo ma, ar Iblis apma dogogwi mende ir-ir agok diluk nadok-kalok welagwi kalok, ir ar Iblis apma welagwi mende enogo pano dogogun dek o, nadok kadok ekbiluk maduk arigin o.

27Ap obarne werek ambi uma agarik agarek kugul ndilogo wagani ungguok yiluk kalok eti, ar ap obarne werek enogo ndak alebagik kede marogo burak o. Etegerogo obok kede marogo biluk kalok, ar ap eti uma unggi lalok, amindik amende ndilogo kugul waganurak o.

28Kinilu arni o! Ir akuni maduk ekwi nen, inane paga ir ambetak maduk-maduk yoragwi kalok eti, ar ap eti omaduk dek erogo biluk maga bigin o. 29#Mat. 12:32; Luk. 12:10Etegerogo ogwe, ir akuni Roh Allah nen wene pano yoraga kigik ogwe! Yiduk maduk erogo bugwi kalok, ar ap eti omaduk dek erogo biluk maga bigin mondok dek o.” 30Ir akuni ambetak nen yugu dogolir, Ar Yesus iliti mo irimbo unggege o yiluk, yugu nanggugwa wene etegerogo yoragage.

Yesus ogari ir inagwiya inom oba wagugwa wene

(Mat. 12:46-50; Luk. 8:19-21)

31Etegerogo ekbiluk nen, ar Yesus agwiya o, aworomi inom wagugwa. Ir inebe tekman nggwe dogolir, Yesus inoba wundi waruak nen yiluk, akuni yonggo yoruak yiluk uma onggoldirugwa. 32O etanogo paga ar Yesus uwagam akuni pakalok dagak-dagak inom pukmo. Akuni Yesus yoruak nen yiluk, onggol darugwa enogo nen, Yesus yogu dogolir, “Ninombae, Kar kagwiya o, kaworomi o, kinom abuk aru yiluk, tekmangge karuam agiyarik o,” yiluk yorugwa. 33Etegerogo yorugu nanggugwa ar Yesus nen yoraga dogolir, “An nagwiya eti ta? Nen An naworomi eti tani?” 34Etegerogo yoraga lagagerek akuni Ar uwagam dagak-dagak korek yomanogo il bikdaga dogolir yegerogo yirige, “An nagwiya inom, naworomi inom, eti akuni An ninom agorik yoma o! yiluk, yoragige. 35Ir akuni Allah akla andaktaga ndak-ndak ekwi ernogo, ar eti An naworomi ap o, naworomi kumi o, nen An nagwiya inebe eti o,” yiluk yoragige.

Currently Selected:

MARKUS 3: WLW

Highlight

Copy