MARKUS 4

Ap aingge ndulir laga dogolir ekige mende oba lirogo yoragage wene

(Mat. 13:1-9; Luk. 8:4-8)

1 # Luk. 5:1-3 Ar Yesus tuguluk omanggi inom ar i Danau Galilea aik paga, wene emeriragage. Wene emeriraga welaganem, ye akuni nde akuni akpir dogalek, Ar uwagam wonggali wagugwarik ma, ir akuni nogo i yenggelek aik paga welagwi dagik, ar Yesus enogo i enggelek agum paga, to perahu akla koktari unggirige o. 2Onggega lagagerek, ye wene nde wene pakalogar oba lirogo yoragage o. Ma, wen yoraga dogolir yegerogo yoragage.

3“Kinaruk dogoni o! Ap aingge ndulir taga mende nen, aingge ndulik nen yiluk arar lagage o. 4Ma aingge ndulir laganem, amberak tuan paga wurar lagage. Tuan paga wurar lagage mende eti, tewe wagu lagugwarik, ner lagugwa o. 5Ambetak yigom ambik mo, agar bugudak ar ma wurar lagage o. Ma yomanogo eti, enggakbu ibar dagarigerek ogwe, 6omanggen pik pak yatukdek ma, pia nen tar lagagerek, mbuk agage o. 7Nen ambetak irikngga adok werek akla wurabir lagage o. Irikngga adok werek akla wurabir lagage mende enogo eti, enggakbu arar wulkigerek ogwe, adok werek enogo enggakbu obarne dagaga ar dogolir, mbalogo wukbirige mo, enggen yikikdek ar welagage o. 8Nen ambetak agar mudi paga wurabir lagage o. Ma agar mudi paga wurabir lagage yomanogo, enggakbu ken-ken agan dagaga lagagerek, enggen arar yirir laga dogolir, edo ambetak nen tiga puluh yika, edo ambetak nen enam puluh yika, edo ambetak nen seratus paga yungguk medak yirir dagarige o,” yiluk yoragage. 9Yoraga lagagerek, wene irep paga yoraga dogolir, “Kir kinaruk werek kalok, dirogon ar kinaruk kolalku dogoni o,” yiluk yoragage.

Ar Yesus wene oba lirogo nenaluk yirige

(Mat. 13:10-17; Luk. 8:9-10)

10O omanggi paga, ar Yesus adigar dogogi nanggige, ir akuni Ar nen wene emeriragage inaruk kolkugwa mende yomanogo, ir Ar aworomi inom uwagam wagugwarik, wene oba lirogo yoneragan enogo, wene enggen ebe mbililogo yoneran o yiluk, nggino yorugwa. 11Etegerogo yogu nanggugwa, Ar Yesus nen yoraga dogolir, “Ar Allah kir kinakba nen, wene kirago mende wene, Ar Allah apma baurak wene eti yokerar taga o. Ogwe ir akuni tekman nggwe mende inake emer iraurak eti, wene oba lirogo mban arar o. 12#Yes. 6:9-10Nenaluk,

‘Ir nen inil birogo mondogar welagwi ogwe,

yabongga nena etarigin eti ir inunggukdek o,

ir nen inaruk kolalkwi mondok ar ogwe, ir inakla eberukbuk ar o,

etegerogo etarir taga etoma, ir inil kugik, nen ir inakla eberkik ekdiluk, nen ir Ar Allah oba warumu,

ir inomaduk dek erogo balok, maga baganem yiluk arar o.’”

Aingge ndulir lagage wene enggen mbililogo yoragige wene.

(Mat. 13:18-23; Luk. 8:11-15)

13Yoraga lagagerek, nin tuguluk yoraga dogolir, “Kir wene oba lirogo yokiragi enogo kir kinakla andagikdek kalok, wene oba lirik ambetak yoma nenggerogo kir kinilu arurak? 14Aingge ndulir lagage enogo ebe eti, akuni Allah Wene yorar nugwi mende eti arar o. 15Aingge tuan taga wukige eti, ir akuni Allah apma baurak wene nenggerogo yiluk, obok inaruk kolitagwi mende eti. Etegerogo inaruk kolal diluk mo, ar Iblis watuk nen aingge ir iniliti mo yago enogo waganir taga o. 16Aingge nggir anggedokla wukige enogo eti, akuni wene enogo inaruk koldiluk, iniliti adeknggen taga lok-lok wene enogo waganir tagwi. 17Etegerogo ogwe, wene enogo ir iniliti mo omanggen yakikdek ma, pago dogoluk dek. Wene enogo paga, ir inoba anggin panggin dida dada ekwi, akuni nen ir inoba inair kuninakwi, etegerogo paga ir enogo Allah wene eti togok diluk iniyok paga wundugun o. 18Aingge irikngga adok werek mumun akla wurakige enogo eti, ir akuni Pano Wene enogo inaruk kolalir tagwi mende ndak-ndak. 19Etegerogo ogwe, ir iniluk dogorak paga iniliti pirik ekwi, ininggi werek iniluk mondok pano dogorak paga eberir lagwi. Iniliti mo ye mende nde mende agar taga mende paga wadok-wadok andagwi. Etegerogo eberir lagwi paga, Pano Wene Allah ane waganggugwa enogo iniliti mo lambik lambok ekbiluk welagwi paga, enggen yirukdek. 20Nen aingge agar mudi mo wurakige enogo eti, ir akuni Pano Wene enogo inaruk kolal diluk nen, Wene enogo waganggwi paga, ir enogo enggen pakalok ar yikwi o. Enggen ambetak tiga puluh paga yika, ambetak enggen enam puluh paga yika, nen enggen ambetak seratus paga yungguk medak yirir dagaga erir taga mende o,” yiluk yoragage.

Pelita yibalek walu paga tebelogo bugwi oba lirogo yirige wene

(Luk. 8:16-18)

21 # Mat. 5:15; Luk. 11:33 Yoraga lagagerek, ir enogo ambi inom yoraga dogolir, “Akuni nen pelita yibal diluk kalok, walu apma kirak bugwi, nen ndikla onggol bugwi erir tagwi kogop a? Pelita enogo yibalogo kalok telekma yadek togon ar birtaga kogop a? 22Ye mende nde mende kirago welaga enogo telek ma ertaga, nen ye wene nde wene iniliti mo tebelek welagwi enogo buga laga, erigin o. 23Kinaruk werek kalok, dirogon ar kolalku dogoni o,” yiluk yoragige.

24 # Mat. 7:2; Luk. 6:38 Yoraga lagagerek, “Kir kinaruk kolalkwi yi ernogo, kiniliti dikbugu dogoni o! Kir nen akuni inake walkalok wogorar tagwi enogo ndak-ndak, Ar Allah nen kir kinake eti ndak-ndak ar walkalok workeragin o. Nen ebe pakalok negen ar erigin o. 25#Mat. 13:12, 25:29; Luk. 19:26Kir kinamende welaga kalok eti, ambi inom oba dulogo wokeraga nen, kinamende dek kalok eti, kinamende bugudak welaga enogo arar ndilogo wagangga, etegerogo eka kugun o,” yiluk yoragige.

Aingge yago anggup pudali taga oba lirogo yoragage wene

26Yoraga lagagerek, “Allah apma baurak enogo eti, ap ambi aingge nggililogo yarir lagage enogo ndak-ndak arar o. 27Ap enogo o kukbaga etaga kalok nogo yega, o dinggaga etaga kalok, ye ekik-nde ekik eka, etegerogo erir laga kigik, enggakbu pudalka lagatek, edo nggok ar etari taga mende o. Edo enogo nenggerogo nggok etari taga mende, ar onggokdek ar o. 28Aingge enogo agar taga nggililik ma, aburak ar enggakbu dagi taga mende o. Enggakbu wulka dogolir, alokbak mbere mendagago nen, edo dagaga dogolir enggen yiri taga mende. 29Nen, enggen yugu ernogo, arar kode atuk, enggen mbalurak arar panggo yi waga kalok, ar ap mbirok paga mbalir lektaga mende enogo nen, arar mbalir taga mende o.”

Sawi enggen paga oba lirogo yoragage wene

(Mat. 13:31-32,34; Luk. 13:18-19)

30Yoraga lagagerek, “Ar Allah Apma baurak enogo eti, nena paga oba lirogo yokerak o?” 31Yoraga lagagerek men yirige, “O sawi#4:31: Sawi: Sawi yi enggen bugudak bagadak ogwe, enggen ai ndul begetek ma, anggup dagik yiluk kalok, akuni inanggok ndak inanggup yubuk togon 3 meter ndak-ndak. Nen obate eti ap inambeda talek, ma ye tewe nde te, inai paldiluk dogi taga mende. Enggengga dagago nunggwi, enggen eti dago paga induk pano eraru paga ekwi, nen naungge wodalek dogowak nen yiluk ekwi, nen amok amburu waganogo, u kunik inoba dek aruwak nen yiluk, sawi nunggwi, eku lagugwa enggen agarma yumbulir tagwi enogo ndak-ndak arar o. O agar taga yoma, aingge bugudak mondok mende eti, ar sawi enggen eti arar o. 32Ogwe, ar sawi enggen eti, ai ndul begetek ma, anggup ken agan dagaga dogolir, edo nggok arar etatuk, alokbak wigalketek ma, ye tewe nde te, o enogo paga nggunak ma etoma arar, inai pali unggwi tagwi kwak, Ar Allah apma baurak wene eti, etegerogon arar o,” yiluk yoragage.

33Ir akuni enogo ye wene nde wene oba lirogo yoraga enogo, ir dikbiluk waganggwi paga, oba lirogo mban yoraga lagage o. 34Ar Yesus wene emerirak nen yiluk kalok eti, oba lirogo mban emeriraga lagage. Etegerogo ogwe, ir Ar mutok lagwi mende inom, inadigar dogolir kalok, ye wene nde wene ebe telekma arar bugalogo yoraga lagage o.

Yesus nen wiya kade abodok dek ekige wene

(Mat. 8:23-27; Luk. 8:22-25)

35Yoraga lagagerek, o ogimo enogo paga, Ar Yesus nen aworomi yomanogo yoraga dogolir, “Nir danau aik alibagan nggwe unda luwok nen, warni o” yiluk yoragage. 36Etegerogo yoraga lagagerek, Ar Yesus to perahu akla dagarige. Nen Ar Yesus aworomi enogo ir akuni pakalok yomanogo arar dambe dalok, ir to perahu Yesus dagarige enogo paga arar dagarugwa o. Perahu wedek mende ambetak etomala labek welagugwa mban ar o. Nen arar dagagu lagugwarik, ar Yesus aworomi inom to enogo paga unda luwok nen yiluk obogar lagugwa. 37Danau enogo unda lagunem, wiya nggok obarne werek arar wagage. Wiya nggok obatne werek mende enogo waga dogolir, i danau enogo mogolik-kialek eka, perahu enogo pulik denggalek eka, nen perahu enogo akla i unggirige. I arar onggega dogolir, to perahu ande kerok yik nen yiluk ekige. 38Nen to perahu enogo akoma nggwe Ar Yesus alep mbalogo nogo yeganem. Ar Yesus awurumi mende yomanogo nen, ar Yesus iluk karugwa. Ir nen yogu dogolir, “Ninombae Guru wae, nir i nen muk ndonggal ninabik nen yiluk eka kigik, kar nenaluk ninaba andagikdek, nogo mban yir tagan o?” 39Yogu nanggugwa iluk aga lagagerek, Ar Yesus nen wiya enogo wenemuk yoga dogolir, “Kane kabodok dek arin!” Yiluk yogi nanggige, wiya enogo abodok dek atuk, i nggok danau mogolik-kialek ekige enogo, mondok ane lakbu yirige o. 40Abodok dek agi nanggige, Ar Yesus aworomi yomanogo yoraga dogolir, “Kir An noba ebebar andagikdek, nenaluk kir kinobade kertagwi o?” 41Yoragi nanggige, ir enogo inobade agu lagugwarik, ar ambi nen, ar ambi yogik eku dogolir, “We! Ap yi, wiya inom, i inom ane kolalka, ap yi ta kogop nda?” yiluk bi wakugwa.

Currently Selected:

MARKUS 4: WLW

Highlight

Copy