MARKUS 12

Ir ap anggur ai yago yabumo eritagwi mende oba lirogo yoragage wene

(Mat. 21:33-46; Luk. 20:9-19)

1 # Yes. 5:1-2 Yoraga lagagerek, wene oba lirogo yoraga dogolir, “Ap ambi nenanggur ai yakbiluk, leger palka, amburu peralogo wurabumo akdip walu ndak-ndak elo kenaka, tuam dogumo nggayo nggir paga mbedarka, etegerogo ekbega lagagerek, ar eyabu anggur leger waganek enogo, akuni inebe mende negen inobasewa erogo balok, ar ebe o adikmo nggwe ar lagage o. 2Arar laga lagagerek, o etoma dogolir, anggur enggen yugu enogo kode agartekma enggen mbalirtagwi o arar panggo yi wagagemo, ar ayedoman mende ambi, anggur enggen mbalogo wogoruak nen yiluk, ir akuni eyabu erek aruam mende yomanogo inoba arar lakbirige o. 3Ogwe, ir yabu ekwi mende enogo nen, ar yedoman mende enogo arar pakbiluk, ndugi ndamuk pamuk warogo, ar ebe inggimo dek wedegar iyok paga lakbirugwa o. 4Ndugwi warogo lakbirugwama, ar ambortaga, ar ayedoman ambi inoba lakbi wagage ar o. Lakbi wagagemo, ir yomanogo nen, ar yabu mende inakepala enogo ndugi wakwi, nen wenemuk yotuk mugogo arar lakbirugwa o. 5Tuguluk ar ap eyabu ondewerek enogo, ap eyabu mende ambi lakbirige ar o. Ogwe ar enogo, mondok min arar wakugwa o. Tuguluk amberak lakba wagik mban ekige mende, ambetak wedek ndugi inakwi, nen ambetak mondok min inakwi, etegerogon mban arar eku lagugwa o. 6Obogar inakugwama, ap ambiar etagage o. Ar ap enogo eti, ar akbur iliti kunik mende eti arar o. Ma an nakbur yi lakbumo, alon palku dogolir, ebe keyagi warogo waganugunma yiluk, andega lagagerek, arar lakbirige o. 7Ogwe, ir ap ar eyabu mende yemenogo nen, inane dambulogo wene mbalku dogolir, ‘Ar ap yi ombae arar kambumo, yabungga eyabu erek yoma, ar akbur yi arar kodaginma, ar ebe mondok min arar wakbiluk, nir onde aruok nen o,’ yiluk yirugwa. 8Etegerogo yugu lagugwarik, ar ebe pagago, mondok min arar waku lagugwarik, anggur yabumo yomanogo nen wolok, abel tekman nggwe wuldirugwa o,”

9Tuguluk Ar Yesus nen kinok yoraga dogolir, “Ar anggur yabu ondewerek enogo nen, nenggerogon erinabigin kinakla andagop? Ar ebe waga dogoluk, eyabu aruam welagwi mende yomanogo obogar min wakbalok, inakdikmo ap adik mende arar eyabu aruam doguwak nen yiluk mendagin o. 10Kir nen Alkitab akla etoma, obok endaga talkugup mende arar o,

‘Ar tukang nen, nggir o palka dogolir togokbirige mende etnogo,

obok nggir unggune mondok mende arar ertaga o.

11Ar Tuhan nen ekige mende yi,

pani pano mondok arar o!’”

12Yoragi nanggige, ir ap Yahudi mende inewai yomanogo nen, nir ninalok, yonerar taga o, yiluk yenggak kugu lagugwarik, Paktawok nen yiluk ekugwa mende, akuni pakalok ma, inobade nen dambe kalok lagugwa.

Ar Kaisar ake onggo bugu dogorak yirige wene

(Mat. 22:15-22; Luk. 20:20-26)

13Ir ap Farisi mende amberak inom, ir ap Herodes awurumi mende amberak inom, wene yiduk kau ake paga, Ar Yesus yi wene ndik wene kinok yoruak nen yiluk yorarugwa. 14Yorarugwama, Ar Yesus oba wagu lagugwarik yegerogo yorugwa, “Ninombae Guru wae, nir ninilu eti, Kar wene kenggal mondok yirtagadek, Wene yi ta nen yege yiluk inalon palukbuk ar o. Ninombae Kar nen Ar Allah akla andar taga mende eti, akuni telekma ar emerirar tagan, nenaluk Kar nen akuni inelokte mbenarir tagodek ar o. Etegerogon ma, yogo Ninombae Kar nen kakla andar tagan mende yoneran o, ‘Agama wene mbalek paga, Kaisar ake pajak onggo burak ndak a, ndak dek a? Pajak onggo mondok-mondok burak a, dek a?’ ”

15Ir wene inenggal mende yidilogo Oba maduk erogo buok nen yiluk, ekwi yenggak darige o. Etegerogo yenggak daga lagagerek, ir yoraga dogolir, “Kir kinenggalar An noba wene yiduk nenaluk kwaruok nen yiluk erirtagwi? Uang perak ambi nil kak nen woknirni nda.”

16Yoragagemo, ir nen uang perak#12:16 Uang perak eti; Uang pae enggen, yogondak koin etnogo ndak-ndak. omanggi ar wogorugwa. Wogorugwama Ar Yesus nen ir kinok Yoraga dogolir, “Uang perak yi paga ta eloktenggen aguringge inom nen ta endaga inom diru werek?”

Yoragi nanggige, ir nen onggo yugu dogolir, “Kaisar,” yiluk yirugwa.

17Tuguluk, Ar Yesus nen yoraga dogolir, “Etegerogon ma, ar Kaisar amende kalok eti, ar Kaisar ar wogorurak o, nen Ar Allah amende kalok eti, Ar Allah ar wogorurak o.”

Etegerogo yoragi nanggige ir ap yomanogo nen, we, yiluk bi warkugwa o.

Akuni kambiluk iniluk arugun a dek a yiluk kinok yirugwa wene

(Mat. 22:23-33; Luk. 20:27-40)

18 # Mat. 22:23; Luk. 20:27; Kis. 23:8 Ir ap ambetak Saduki mende Yesus oba wagugwa. (Ir ap Saduki mende yi nen inakla andagu dogolir, akuni kambugun mende eti iniyok taga yabongga iniluk arugun dek o, yiluk yugu lagugwa.) 19#Ul. 25:5-6Ir ap Saduki mende nen, Ar Yesus yogu dogolir, “Ninombae Guru wae, Ar Musa nen wene nir ninake yi diru mbalka dogolir, ‘Ap ambi akbur endarkikdek kigik kambigin kalok, ar agwe togwe bigin ernogo, ar ap kambigin mende enogo ogar nen waganurak o, nen ar kwe enogo wokbiluk elege endarinabigin enogo eti, ar ap kambigin mende enogo akburi erogo bagin o,’ yiluk yirige o. 20Etiar ma, ar ap ambi aworomi inom inebe dambulik tujuh paga welagugwa o. Inewe alep mende enogo kwe waganggigerek ogwe, akbur endakikdek kigik ar ebe wartagage o. 21Etegerogo kanggigemo ar awor ambor paga mende enogo ar ewe agwe togwe enogo waganggige o. Ogwe etegerogo ewe agwe toge enogo wagangga lagage, ar oge akbur endarkikdek kigik ar wartagage o. Ir inaworomi inebe tiga yanogo ogwe etegerogo ar erir wagugwa. 22Nen etegerogon ar kambir wagwi dagik, inebe tujuh enogo arar takbo yirugwa o. Etegerogo ebiluk ar kwe enogo ebe ogwe kanggige. 23Etegerogon ma, akuni warek mende iniluk erogo mendagin eti paga, ar kwe eti ap ta kwak agwe etarigin? Nenaluk, ir ap inebe tujuh paga yi nen, kwe eti obogar waganek welagugwa eti paga o!” yiluk yorugwa.

24Yorugwama, Ar Yesus nen wene onggo yoraga dogolir, “Kir dibi biluk kinagi o. Nenaluk wene Ar Allah obarne inom nen Alkitab paga yirige inom, kinakla dikbigikdek ar kinagi o. 25Nenaluk, yabongga akuni warek mende iniluk erogo mendagin eti paga, ir ap nen kumi wogonakwi, ir kumi nen ap wogonakwi, etegerogon eku dogogun dek o. Ir inebe malaikat ndak-ndak arar mbogor paga dogogun o. 26#Kel. 3:6Akuni warek mende iniluk aru wene mende ar Musa nen, indu akda o edoma wulok damok eka dogolir yirige mende diru mbalkige eti endaga talukdek a? Ayat-ayat diru mbalek etoma paga Ar Allah nen ar Musa yorige mende eti, ‘An eti Abraham mende Allah arar, nen ar Isak mende Allah arar, nen Ar Yakub mende Allah arar.’ 27Ar Allah eti akuni warek mende inombae Allah dek o. Ar Allah eti akuni iniluk mende inombae arar o. Kir dibi biluk yirtagwi kigi o!” yiluk yoragige.

Wene edo unggune mondok mende yirige wene

(Mat. 22:34-40; Luk. 10:25-28)

28 # Luk. 10:25-28 Yoraga werekma, ap guru agama mende ambi inuwagam wagage. Waga lagagerek, ir ap Saduki mende, Ar Yesus inom wene yugwi enogo aruk kolek dogolir, nen il mbenarinakige mende, Ar Yesus enogo, ir ap Saduki mende enogo wene onggo ebebar pano dombok yoraga karige. Etegerogo il kega lagagerek, wene kinok Ar Yesus yoga dogolir, “Ar Allah Wene denggalek mende paga etoma, wene nggok lektek negen nggi kwak kegen?” yiluk kinok yorige.

29 # Ul. 6:4-5 Ar Yesus nen wene enogo onggo yoga dogolir, “Wene mbalek ibibir mondok yugu eti mende yi o: ‘Ap kir kinalebunu Israel mende yi kinaruk kolini o! Nir mende Tuhan Allah eti, Ar Tuhan eti omanggi omangga ar o. 30Kiliti paga inom, kagurengge paga inom, kaklanggar paga inom, nen kobarne paga inom, Ar Tuhan Allah akba eka dogon o.’ 31#Im. 19:18Wene mbalek amborna eti yi o, ‘Kar kebe kiliti kunik etar tagan ndak-ndak, kogari kinom mende kiliti kunik etegerogon ar erinaka dogon o.’ Wene mbere yi mbalek ndak-ndak, nggok lektek negen amberak mondok dek arar o.”

32 # Ul. 4:35 Etegerogo yoragi nanggige, guru agama enogo nen Ar Yesus yoga dogolir: “Nombae guru wae, wene yegen endoma ebebar mondok o. Nir mende Tuhan Allah eti, Allah wedek mende ambi mondok dek arar o. 33#Hos. 6:6 Ma, nir ninamende Ar Allah ake biluk nen, waganogo kali kunirtagwi inom, nen Ar Allah ake ambetak birtagwi etoma inom, obok pano ar ogwe, wene ebe unggune mondok eku dogorak eti, ir akuni iliti ebe paga mondok inom, nen inaklanggar paga inom, nen inobarne paga inom, Ar Allah iniliti kunik eku dogorak o. Nen ar enggawerek iliti kunik etertaga ndak-ndak, ar ogari inom werek mende eti, etegerogon ar iliti kunik erinaka dogorak o.”

34Ar ap guru agama enogo nen wene onggo mondok pano ar yega ar Yesus il karige o. Etegerogo kega lagagerek, Ar Yesus nen ap guru agama enogo yoga dogolir, “Kar obok Allah akburi negen etarik yiluk ertagan keyagi o.”

Etegerogon yirigemo, ir akuni amberak nen inobade degar Ar Yesus kinok wokalokdek arar o.

Raja Akuni ndilinakwa wene

(Mat. 22:41-46; Luk. 20:41-44)

35Allah Ai Palek ma wene emeriraga dogolir, Ar Yesus nen wene kinok yegerogo yirige, “Ir guru-guru agama nen, Ar Raja Akuni Ndilinakwa eti ar Daud umbu o yiluk nenggerogon yitagwi? 36#Mzm. 110:1Ar Daud nen ogwe Roh Kudus nen yoga kigik, yegerogo yirige o:

‘Ar Tuhan nen, an Nombae Tuhan yoga dogolir:

An ninggi ebenggan nggwe arar korektarin o, nen ir kinom wim mbalek mende etoma, An nen kapma debelogo bagin o,’ yiluk yirige o.

37Etegeronma, ar Daud nen, ap Raja akuni ndilinakwa mende eti, Ar ‘Tuhan’ arar o, yiluk yirige kalok, ar Daud umbu nenggerogon yurak kogop?”

Ir guru-guru agama nen nugurogo binagagunem, tuam pik pak waku dogorak yirige wene

(Mat. 23:1-36; Luk. 20:45-47)

Ir akuni pakalok Ar Tuhan Ai Palekma welagugwa yemenogo, Ar Yesus nen wene emeriraga inakla adeknggen ambik karugwa.

38“Ir guru-guru agama enogo nen, kir nugur kinakwi kau, kir nen ir inatuam pik pak waku dogoni o. Ir nen iniyom jubah lokndik mende yikbiluk, pasar nggwe akuni nen nir mban keyagi wakbinanuwak o, andalok erir lagwi o. 39Ir nen wadok eti, tamban erirtagama nggwe an mban neyawak andalok, panoma nggwe ker erir nugwi, amikmir dakunem mban kwarir nugwi o. 40Ir ap eti nen, kumi togwe inenggalar nuker balok, inai palek ndilogo waganggwi. Nen ir inomaduk tebelogo buok nen yiluk, tamban idu wadu paga ekwi o. Ir nen anggin waganugun kwak eti, mondok nggogar o!”

Kwe togwe inggi dek mende nen Allah ake ekige wene

(Luk. 21:1-4)

41Yoraga lagagerek, ar Allah ake uang birtagama etanogo koretari lagage, korek taga lagagerek, akuni obogar uang birtagama yomanogo bi lagwi il darige. Ir akuni inamendek werek yomanogo, uang aktibar bi lagwi il darige; 42tuguluk inakla yemenogo, kwe toge ambi inggi dek mende ambi waga lagagerek, uang tembaga#12:42: Uang tembaga eti: Uang pawe ndak-ndak ma, ir ap Romawi mende nen ekugwa mende ma, Ar Yesus werek kigik eta paga eku lagugwa. mende mberendak bega il karige. 43Bega Ar Il kega lagagerek, Ar Yesus nen Aworomi wai yoraga lagagerek, yoraga dogolir, “Yi kinil birdani o: ir akuni amberak nen inake bega eti bugudak ar ogwe, ar kwe toge inggi dek mende yi bege perak, mondok nggok arar begemo o. 44Ir akuni inamendek pakalok werek eti, inamendek aktip werek kigik ar begarik ogwe, kwe togwe yi kwak perak, nena-nena ar oba werek mende etoma, ar nen etau mende korane kigik, obogar bege o.”

Currently Selected:

MARKUS 12: WLW

Highlight

Copy