LUKAS 9

Ar Yesus nen Ar mutok lagwi mende inebe dua belas paga pulogo lakbarige wene

(Mat. 10:5-15; Mrk. 6:7-13)

1Ar Yesus nen, Ar mutok lagwi mende inebe dua belas paga wai yoralok, irimbo nggigilogo wulaku dogu mende inom, akuni u kunik mende dek eginaku dogu mende inom, ake paga Ar obatne inoba barige. 2Tuguluk Ar nen ir enogo akuni u kunik mende dek erinakik, nen Ar Allah Raja menatuk, apma baurak wene enogo mbililogo yorar lani o. 3#Luk. 10:4-11Tuguluk, Ar Yesus nen yoraga dogolir, “Tuan paga etoma lagu dogolir, ye mende nde mende, tegakduk inom, uang birtagama aogi inom, uang ebe inom, nonggwa mende inom, kiniyom yitau mende mbere inom, waganugup ar o. 4Akuni o ambimo nen, kir wokinakwi kalok, kinom etoma mondok dogoluk, kir o kota etila nen dambe kalok lugun kudi paga arar o. 5#Kis. 13:51Akuni o ambimo nen, kir wokinakwi dek kalok, kir o kota eti dambe kalok lagu dogolir, ir inilu dogowak nen yiluk, kir kiniyok agur wulukmok pulogo biluk lano o.”

6Yorarigemo, ir Ar Yesus mutok lagwi mende ernogo, o desa nggwe etoma nen, ya nda etoma obogar, wene Pano Wene enogo yoraurak paga inom, nen akuni u kunik mende palinaburak paga inom, arar lagugwa.

Ar ap Herodes iliti dibi yirige wene

(Mat. 14:1-12; Mrk. 6:14-29)

7 # Mat. 16:14; Mrk. 8:28; Luk. 9:19 Ar ap Herodes eti, o Galilea paga etoma ar apma werek paga ma, ye wene nde wene ekugwa mende inabok kolka lagagerek, iliti dibi yirige. Nenaluk ir akuni nen yugu dogolir, dek o, ar ap Yohanes Pembaptis enogo arar iluk aga o, yiluk yirugwa paga. 8Ir amberak nen yugu dogolir, dek o, Ar Elia ernogo, muk iluk agarik o, yiluk yirugwa mban ar o. Nen ir akuni amberak nen yugu dogolir, dek o, ap nabi-nabi alep kwak welagugwa mende yemenogo ambi muk iluk agarik o, yiluk yirugwa. 9Ar Herodes nen yega dogolir, “An nen ar Yohanes eti, akuni nen enggedobak mbaluak nen yiluk yirigi o. Ar abok, an naruk pakalok kolalkigirik ma, akuni eti ta kwak yiluk yitagwi o?” yiluk yega lagagerek, ar Herodes nen, Ar Yesus il kaurak paga nggebe dagu ekige.

Yesus nen akuni lima ribu paga erom wogorarige wene

(Mat. 14:13-21; Mrk. 6:30-44; Yoh. 6:1-14)

10Ar Yesus akburi rasul-rasul ernogo, iniyok paga Ar Yesus oba wagugwarik, ir ekugwa mende obogar mbililogo, ar Yesus yorugwa. Tuguluk, Ar Yesus nen ir obogar wogonarek, o kota Betsaida etoma inadik mondok ar lagugwa. 11Ogwe, ir akuni nen inabok kolalku lagugwarik, ir Ar Yesus mutok lagugwa. Lagugwama, Ar Yesus nen wogonaka lagagerek, wene yabungga, Ar Allah Raja arar menatuk wene nenggerogon mbalka dogogin eti mende yorarige. Nen ir akuni inom mende amberak, u kunik mo, pano eginakige ar o.

12O molinggi arar tebek togon aila unggurak eki nanggige, Ar Yesus aworomi wagugwarik yogu dogolir, “Abeak, yoma o waganekma arar ma, ir akuni yoma, inarom kwakbatagik, nogo yumo o telek kau kwakbatagik, o desa-desa korok negen yoma kwatar lowak nen, lani o yiluk, yoran o.”

13Yogu lagugwa, Ar Yesus nen onggo yoraga dogolir, “Erom kir nen arar wogorani o,” yiluk yorarige.

Yirigemo, ir Ar Yesus mutok lagwi mende nen yogu dogolir, “Erom nir nininggim ya agarik eti, roti lima, nen ikan mbere inom agarik o. Ma, mir ir akuni yoma obogar inake paga, onggo kuni lugun a?” 14(Ir akuni nggigilik welagugwa etanogo eti, inebe lima ribu paga arar o.)

Ar Yesus nen Ar Mutok lagwi mende yoraga dogolir, “Akuni yoma agar paga kuku dogolir, ambi kurik inebe lima puluh paga, etegerogo kurtarir lowak nen yorani o.”

15Nen ir Ar Yesus mutok lagwi mende enogo nen, Ar Yesus nen yirige ndak-ndak arar ekugwa. 16Arar ekugwa ma, Ar Yesus roti lima enogo inom, ikan mbere enogo inom, inggimo wagangga lagagerek, elokte mbogor paga liktaga lagagerek, Nombae Allah wa, yiluk keyagi wakige. Etegerogo eka lagagerek, roti enogo inggi paga ugur-ugur eka, nen ikan enogo inomar mbalka eka lagagerek, Ar aworomi ernogo, akuni tumburirawak nen yiluk, wogorarige. 17Nen ir akuni yemenogo obogar, inelabur togo arar narugwa. Tuguluk ir Ar Yesus mutok lagwi mende enogo nen, roti mbalela inelabur nen birugwa mende ernogo, wonggalogo nen keranjang 12 paga ande kerok togon arar yagakugwa.

Petrus nen Yesus Raja Ndilinakwa mende arar o yiluk bugalkige wene

(Mat. 16:13-19; Mrk. 8:27-29)

18O ambi paga, Ar Yesus adigar tamban eka werek ma, ir Ar mutok lagwi mende enogo oba wagugwa. Wagugwama nen, ar Yesus ir kinok yoraga dogolir, “Ir akuni yoma nen yugu dogolir, An yi ta yirtagwi kogop?”

19 # Mat. 14:1-2; Mrk. 6:14-15; Luk. 9:7-8 Ir nen onggo yogu dogolir, “Ir ambetak nen yugu dogolir, Kar eti Yohanes Pembaptis yirtagwi o, ir ambetak nen yugu dogolir, Elia yitagwi ar o, nen ir ambetak nen yugu dogolir, ap yi nabi o paga mende yemenogo, ambi obogar ar iluk atuk o,” yiluk yirugwa.

20 # Yoh. 6:68-69 “Ogwe kir ya kinadik nen, An yi ta andatagwi?” yiluk Ar Yesus yoragage.

Yiluk yirigemo ar Petrus nen, “Ninombae Kar eti, Raja Akuni Ndilinakwa mende, Ar Allah nen abok yirige etnaga, Kar arar o.”

Ar Yesus ebe yiduk maduk ekbiluk warogo burak mende yoragage wene

(Mat. 16:21-28; Mrk. 8:31–9:1)

21Tuguluk Ar Yesus nen Ir Ar mutok lagwi mende yoraga dogolir, “Yogo, wene yogo mende yi, akuni ambi ta kwak yorurak mondok maga o.” 22Ar Yesus nen ambi inom ar yoraga dogolir, “Ar Akuni Inakbur endago eti, ir ap nggokndak inom, nen ir ap imam-imam kepala inom, nen ir guru-guru agama inom, ir nen enok mbenok yogwi, nen oba anggon panggon ambik mende arar erogo biluk, nen Ar ebe warugun o. Ogwe warek dogoluk inggi hari tiga eri lugun eti kwak paga, iluk atuk menarigin o.”

23 # Mat. 10:38; Luk. 14:27 Tuguluk Ar Yesus akuni yanogo welagwi mende yoraga dogolir, “Ir akuni An mutnarek laurak kalok, ir inake ekodaurak mende eti, oba mi erogo bugwi, nen ar ao kari karo eti piyalogo kodalok, An mutnarek mondok laga dogorak o. 24#Mat. 10:39; Luk. 17:33; Yoh. 12:25Nenaluk, ir akuni ir iniluk idi erogo erugun mende eti, ir iniluk dogu mende eti bularigin o. Ogwe ir akuni An nake paga, An natni ar o, yiluk enak batagin mende eti, ar ebe ndilagin o. 25Ar akuni ambi, o agar paga yoma agarik mende obogar onde arigin ogwe, etoma paga oba ar oba maduk erogo bega, nen ar iluk dogorak mende eti bulaga erigin kalok, etoma nena ake onde arigin o? 26Nen ar akuni ambi nen, An nebe nabok inom, nen An wene yirigi mende inom, akuni yorau enggadi nen dambe kigin kalok, Ar Akuni Inakbur eti waga paga, Ar obatne paga inom, Ombae obatne paga inom, nen ir malaikat maduk eritagodek mende eti inobatne paga inom, ar akuni eti abok bugalurak mende, inenggadi nen dambe kugun o! 27Dikbugu dogoni o: Kir ya agoktip mende yi, Ar Allah apma balok wene mbaligin eti, kir ya ambi kanggikdek kigik ar kinil kugun o.”

Yesus wogok dirugwa wene

(Mat. 17:1-8; Mrk. 9:2-8)

28 # 2Ptr. 1:17-18 Ar Yesus nen wene etoma obogar emeriraga kigik tamban ambi eku lagugwarik, Emeriralok, ar Yesus nen, ar Petrus o, ar Yohanes o, nen Yakobus o, inom kurtaga tamban eruwok nen yiluk wogonarek dagarige. 29Yanogo Yesus auwan tamban ekanem, eloktenggen adigar agage, nen tu iyom baju akbinak pakalok mondok etagage. 30-31Ir Musa o, Elia o, imbirak ngga nen dek ar, inebe akbinak mbogor paga nen yibalkige mende akla kenam agugwa. Kenam atuk, Ir Yesus inom, Ar kamburak mende wene mbalkwi, nen dogoluk dek ar, o Yerusalem paga etoma Ar Yesus oba etarir laurak mende inom mbalkugwa. 32O eta paga, Petrus ogariyak inom noge nggaruk togo yirugwama ogwe, inagur bikbak inakla podalek dekma ar iniluk agugwa. Nen Ar Yesus akbinak eka akla, ir inebe mbere yanogo inom mendek darugwa. 33Ir ap inebe mbere yanogo, Ar Yesus dambe kalok luok nen yiluk eku nanggugwa, Petrus nen Ar Yesus yoga dogolir, “Ninombae Guru wae, nir ninom ya welago yi pano mondok arar o. Etiar ma, nir o Ambi Tuan Kar kake palkwi, ambi Musa ake palkwi, nen ambi Elia ake palkwi eruwok o.” (Petrus nen eterogon yirige eti, akla pikpak andalokdek yirigemo o.)

34Ar Petrus auwan wene yega kigik, agagona ambi arar tebelinabi wagagemo, ir arar inobade agugwa. 35#Yes. 42:1; Mat. 3:17, 12:18; Mrk. 1:11; Luk. 3:22Nen agagona wagage enogo akla nen, Ap ane yega dogolir, “An nakbur mirogo lakbi wagi ebe yi arar o. Ma, Ar ane ar kinaruk kolalku dogoni o!”

36Ane yega enogo arar dek aga kigik, Ar Yesus enogo adiknear inil lakarugwa. Nen Ar Yesus mutok lagwi mende enogo nen, wene etaga karugwa mende eti, ir akuni ambi mondok yoralok dek arar o.

Yesus nen irimbo elege akla werekma mugogo wulakige wene

(Mat. 17:14-18; Mrk. 9:14-27)

37Ar Yesus aworomi inebe mbere ambi yanogo inom, o kubenengge kur paga nen wura wagugwa. Wura wagugwama, ir akuni pakalok ar, Ar Yesus oba wagugwa. 38Ap ambi akuni pakalok inakla yemenogo nen naik yega dogolir, “Ai Guru Nombae o, an nakbur ambi amba yi arar ma, kil lakneyan nde! 39Ar irimbo oba onggega kalok, ar ane yu andalok dekma ar naik-waik yega, nen ebe litagik wutagik eka dogolir, andema nen woridagap mbal-mbal wulabi waritaga o. Nen ar irimbo enogo nen, elege yi likbigik wukbigik mondok ar warik nen yiluk eka, nen ar irimbo eti elege yi dambe kalok wundurak dak dek arar o. 40Nombae Kar kaworomi mukarek lagwi mende nen, ar irimbo yi mugogo wulabuak nen yiluk nggino arar yoragarik ogwe, ir nen erurak mondok ndak dek arar o.”

41Yesus nen onggo yoga dogolir, “Kir yi An nobade a! Akuni kir yi, wene tagalkwa, iniliti ebebar andakbuk mende kir arar o! An kir ninom welaga, nen tokinaka kigik, o menda kudi dogogin o. Elege eti ibar wolok watni o!”

42Elege enogo Yesus oba waga kigik, irimbo enogo nen, elege enogo yamburogo lakbiluk, ebe liktagik wutagik eka dogolir dede nggwe-nggwe arar ekige. Ogwe Ar Yesus nen irimbo enogo wundi lan yiluk yirigemo, elege enogo oba arar pano agage. Nen elege enogo iyok paga ombae wogorugwa. 43Allah obarne paga ekige enogo, akuni obogar nen wi au, yiluk bi wakugwa.

Ar Yesus nen An narugun yoragage wene

(Mat. 17:22-23; Mrk. 9:30-32)

Wene obogar etagage mende yemenogo akuni obogar bi warir lagwi kigik, Yesus nen aworomi yoraga dogolir, 44“An wene yigin yi, kir pik pak dikbugu dogolir, nen kinakla mi arugup o: Ar Akuni Inakbur eti, akuni inobatne werek mende arar wogoragin o.” 45Ogwe ir Yesus mutok lagwi mende ernogo, Ar wene nena yiluk yege eti inakla andalok dek mondok arar o. Wene eti ir dik bugunem, yiluk tebelogo barige. Ogwe, ir nen Ar kinok yoru inobade arar etagage.

An nggok kar nggok yirugwa wene

(Mat. 18:1-5; Mrk. 9:33-37)

46 # Luk. 22:24 Ar Yesus aworomi mutok lagwi mende yemenogo nen, ap nggok kwak ta, yiluk ir-ir aredo wakugwa. 47Nen Ar Yesus nen, Ir inakla eterogon andagwi obok ilu aga lagagerek, Ar Yesus elege bugudak mende ambi waganogo, Ar eragalu menek dogowak nen yiluk men dirige. 48#Mat. 10:40; Luk. 10:16; Yoh. 13:20Tuguluk Ar nen ir aworomi mutok lagwi mende yemenogo yoraga dogolir, “Ir akuni nen elege yi waganugun kalok, An arar woknabugun o. Nen ir akuni nen An woknabugun kalok, Ar An lakbani wagage eti arar waganugun o. Nenaluk, ar akuni ambi, kir yi obogar, ebe bugudak mondok eti, ap nggok mende kwak ebe eti arar o!”

Akuni kir kinane tagalugun dek mende eti, ir kir kinogari arar o yirige wene

(Mrk. 9:38-40)

49Yohanes nen yega dogolir, “Tuan wae, akuni ambi u kar kendaga mbalogo wulinaka ninil kogorik, nir nen etegerogon erurak maga o, yiluk wenemuk yogo o. Nenaluk ar akuni eti, nir ninogar mende nen dek o.”

50Yorigemo Ar Yesus nen onggo ar Yohanes o nen ir amberak Yesus mutok lagwi mende o, yoraga dogolir, “Ar eti maga yorugup o. Nenaluk, akuni kir kinane tagalugun dek mende eti, ir kir kinogari arar o arar o,” yiluk yorarige.

O Samaria Yesus waganurak nina'ir yirugwa wene

51Ar Yesus o surga dagurak paga, o arar panggo yigi nanggige, Ar nen An o Yerusalem arar ligin o, yiluk yirige. 52Yega lagagerek, Ar nen akuni ambi alep lowak nen yiluk lakbirige. Nen ar akuni lan yiluk yorige mende etno arar laga lagagerek, o uma Samaria paga etoma ambimo onggega lagagerek, Ar Yesus ake paga, ye mende nde mende etoma pikpuk erogo birige. 53Ogwe ir akuni uma etoma mende nen Ar Yesus waganu dambe karugwa. Nenaluk ir inilu, Ar Yesus o Yerusalem paga etoma lektaga, yiluk ir inilu ar ma o. 54#2Raj. 1:9-16Nen wene eta etagage mende, Ar Yesus mutok lagwi mende Yakobus o, nen Yohanes o, wene etagage mende etanogo inilu agu lagugwarik, tuguluk Ar Yesus yogu dogolir, “Tuhan wae, ir akuni yi kali mbidalinabuak nen yiluk, indu mbogor paga mende nggino yuwok o, yogo mende, Tuhan, Kar wadok a?” #9:54: Alkitab alep kwak etoma mbalek paga nen: Ar Nabi Elia eka lagage ndak-ndak.

55Ar Yesus il medalogo bikdaga latagagerek, ir wenemuk mberiragage. #9:55: Alkitab alep kwak etoma mbalek paga eti: Nen ir yoraga dogolir, “Roh nggi kwak obatne kir kinoba bege eti kir kinunggukdek o, Nenaluk Ar Akuni Inakbur wagage enogo eti akuni inalep dek erinabu paga waktudek o, ogwe ir ndilinaburak paga wagage o.” 56Tuguluk ir ernogo, uma wedek ma nggwe arar lagugwa.

Ar Yesus mutok lagu dogorak mende wene

(Mat. 8:19-22)

57Ar Yesus mutok lagwi mende inom tuwan ugu birugwa paga tuguluk lagunem, akuni ambi nen Yesus yoga dogolir, “Ai Nombae o, Kar o nggoma nggwe ligin eti, Nombae an Kar nimbirak mondok ar lugun o!”

58Ar Yesus nen onggo yoga dogolir, “Yangge nggwiya eti noge yitagama werek ar o, nen tewe inai palek werek ar ogwe, Ar Akuni Inakbur eti nogo yitamo akdip dek o,” yiluk yorige. 59Tuguluk Yesus nen akuni ambi yoga dogolir, “An murnarek eme o.”

Ogwe akuni enogo nen onggo yega dogolir, “Ai Ambo, an nombae ndak kubur erogo bilak nen, lan yornirin nde lak.”

60Yesus nen onggo yoga dogolir, “Ir akuni warek mende nen, ir warek mende eti ar kubur erogo buak o. Ogwe kar eti, Ar Allah nen yogondak arar apma binanir wari taga o, yiluk yorar lano o.”

61 # 1Raj. 19:20 Ar akuni ambi nen etegerogon ar yega dogolir, “Ai Ambo, an Nombae Kar arar mukarek ligin o. Ogwe akuni uma mende ndak, yogo, an lagi yiluk yora lak nen, we o telek ambi woknirin nde,” yiluk yorige.

62Ar Yesus nen akuni enogo yoga dogolir, “Ir akuni yabu erir lagwi mende, inil inamborna nggwe laktagwi kalok, Ar Allah akburi mende etarugun ndak dek arar o.”

Currently Selected:

LUKAS 9: WLW

Highlight

Copy