LUKAS 10

Ar Yesus mutok lagwi mende inebe tujuh puluh paga lakbarige wene

1Yoralok, Ar Tuhan nen akuni Ar mutok lagwi mende inebe tujuh puluh #10:1: Tujuh puluh: Alkitab alep kwak mbalkugwa paga erek eti, tujuh puluh dua yiluk erek. paga amberak pulogo baga lagagerek, inebe mbere dombo kigik, pulogo nen o kota nggwe, Ar lamo nggwe mban inalep lowak nen yiluk lakbarige. 2#Mat. 9:37-38Lakbaga dogolir wene men yirige, “Enggen mbalu mende nggok ar werek o.” Ogwe akuni ir enggen mbalu mende inebe we bugudak o. “Etiar ma, ar ap eyabu onde werek eti, akuni yabu eru mende amberak lakba waruwak nen yiluk, nggino yokni o. 3#Mat. 10:16Yogo lani arar o! An kir lakbinagagin yi, ir domba mende yangge tekman mende inakla talek lakbinagagin o. 4#Mat. 10:7-14; Mrk. 6:8-11; Luk. 9:3-5Etiar ma, kir nen dompet inom, uang kuwak erogo birtagama inom, sepatu inom, kininggimo wolok lagup o. Tuan obakte akuni kinane pak dagik, ya ku yigik lagup ar o. 5Nen kir akuni inuma unggugu dogolir kalok, yegerogon yorano, ‘Kir kinuma yoma kinoba pani pano kinadeknggen arar o,’ yiluk eti ndak yorano o. 6Nen ir etoma nen, inadeknggen pano paga wokinakwi kalok, kir kinadeknggen ir inoba bagun mende ernogo, ir inoba arar dogogin o. Nen kinadeknggen inoba bagun enogo togok bugwi kalok, kinadeknggen inoba bagun ernogo, iyok paga waganino o. 7#1Kor. 9:14; 1Tim. 5:18Nen arar lalok, kir o ambi mo arar dogono o. Kir ye mende nde mende, kinake bugwi kalok, kodano ar o. Nenaluk, ir akuni yabu ekwa mende kalok, yabu eru onggo kodaurak eti ndak arar o. O ar ambi uma nen, ar ambi uma unggigik, lagup ar o. 8Nen kir o kota ambimo kwak lalok ma, ir etoma pikpak arar wokinakwi, etoma kinedado kinake darogo bugwi ekwi kalok, dago etoma nano arar o. 9Ir akuni u kunik mende, o kota etoma, u dek ekbano ar o. Nen ir akuni etoma, ‘Ar Allah Raja ndak-ndak kinakla yoma menarurak eti, korok panggo yi waga o, yiluk yorano o.’ 10#Kis. 13:51Ogwe kir o kota ambila lugun mende, ir etoma nen wokinakwi dek arar kalok, tuan paga wundi lalok yegerogon yino o, 11‘Kir o kota yila mende kinawul momok niniyok paga denggelek yi, kir kinilu dogowak nen yiluk, nir nen pulogo kinoba bogo o. Ogwe kinilu togo dogono o, Ar Allah nen Raja ndak-ndak kir kinakla yoma menarurak nogo, arar panggo yege o!’ 12#Kej. 19:24-28; Mat. 10:15, 11:24Kinakla eberek togon dogono o, o Aga Yobok paga, ir akuni o Sodom mende enogo inomaduk dek erogo baurak mende eti, we anggin dek negen erigin ogwe, ir akuni o kota yi mende inomaduk eti, anggin nggok mende arar arigin o!”

O kota ambetak nen iniliti ebebar andagik dek wene

(Mat. 11:20-24)

13 # Yes. 23:1-18; Yeh. 26:1–28:26; Yl. 3:4-8; Am. 1:9-10; Za. 9:2-4 Kir o Korazim yi muk kinarigin arar o! Nen kir o Betsaida mende yi muk kinarigin ar o! Ye wene nde wene erukbuk mende kar koba etagage mende etoma, o kota Tirus etoma o, o kota Sidon etoma o, ir inoba etatep dogolepma, ir akuni o etoma mende pagane ar maduk mende nina'ir yiluk, inomaduk mbo biluk, tu kumbi mo yugu dogi tagwi mende yikwi, nen inalubak paga wul mokmok dabuk mbabuk ekbiluk dogolep o. 14O Irep Kudi eti paga, Ar Allah nen ir akuni o Sidon mende o nen o Tirus mende o, ir eti inomaduk dek erogo baurak eti perak, we anggin dek negen arar erigin kwe, kir perak, mondok anggin werek mende arar o. 15#Yes. 14:13-15Nen ki o Kapernaum mende yi! Kir kinakla nen, kir yadek togon mbogor paga negen binagi dagagin yiluk anda tanggwi a? Dek o! Kir kali aikmo etoma arar lakbinagagin o.

16 # Mat. 10:40; Mrk. 9:37; Luk. 9:48; Yoh. 13:20 Tuguluk Ar Yesus mutok lagwi mende yoraga dogolir, “Ir akuni kir wene yoragop kolalka mende eti, An yigi arar inaruk kolalka o. Ir akuni nen kir togok binagaga mende eti, an togok banengga arar o. Nen ir An togok banengga mende eti, An Nombae lakbani wagage mende arar togok bega o.”

Ir inebe tujuh puluh paga lakbarige enogo iniyok paga wagugwa wene

17Ar akuni inebe tujuh puluh paga lakbarige mende ernogo, Ar Yesus oba iniyok paga, inakla adeknggen ambik paga arar wagugwarik, yogu dogolir, “Tuhan wae, ir kugi inobabur maduk mende yemenogo, nir nen, Kar Tuhan kendaga paga wundi lani, yiluk yegetekma, ninane kolek arar kode wulku lagiya o.”

18Yiluk yorugu nanggugwa, “Ar Yesus nen wene onggo yoraga dogolir, ar Iblis mbogor paga nen bigalabok talek nggar wura waga kigi o. 19#Mzm. 91:13Eti ar ma, kinilu togon dogoni o! Kir An nobatne wokiragi eti, wado ebe paga kiniyok bugwi, nggin oba kiniyok bugwi, nen kinom ndugi mbalek mende etoma tebelinakwi, erir wagwi kigik, ar ambi nen kir maduk erogo binagurak paga, erurak ndak dek mondok arar o. 20Etiar ogwe, ir kugi inobabur maduk mende nen, ninane inaruk kolka yiluk kinadeknggen erugup o. Ate, kir kinendaga mbogor paga diru mbalek eti paga kwak kinadeknggen erurak o.”

Yesus adeknggen karige wene

(Mat. 11:25-27, 13:16-17)

21O eta paga, Ar Yesus Allah Agurengge nen #10:21: Roh Allah nen: Alkitab alep kwak mbalkugwa mende paga eti, Roh nen yiluk werek ar, nen Ar Roh akla paga nen yiluk werek ar o. oba lakbi wagagemo, akla adeknggen ambik arar ertatuk yega dogolir, “Nombae, mbogor inom, agar inom, Tuhan Kar ar kapma tebelek werek o. An Kar wa yiluk yokigi o. Nenaluk, ir akuni wene inilu mende inom, nen ir wene inakla nggagalek mende inom, wene ir inilu agunem yiluk kiragago birigen o. Nen ir akuni diru inunggukdek mende inake kenam erogo begen o. Eti paga, Nombae iliti adeknggen etari taga o.

22 # Yoh. 3:35, 10:15 Ye eru nde eru edo obogar, An Nombae nen noba birigemo o. Ir akuni amberak nen Akbur eti inunggukdek o, nen ilu eti, Nombae adigar ilu o. Nen ir akuni amberak nen, Nombae inunggukdek o, ilu eti, Akbur inom, Nen ir akuni tani-tani, Ar Akbur eti nen Ombae abok bugalogo yoragin eti mende, inadik mban inilu arugun o.”

23Tuguluk Ar Yesus il Ar mutok lagwi mende meda togon bikdaga lagagerek, inadik ar yoraga dogolir, “Kir kinadeknggen mondok arar o, nenaluk kir kinil nen yogondak etarirtaga mende yoma kinil ketagwi yi o. 24Nenaluk kinakla eberek togo o: Ir ap Nabi o nen raja o, menarir wagugwa etoma inom, kir yogondak kinil ketagwi yi, inil kau paga, wadok ambik arar karugwarik ogwe, kalokdek arar o. Kir nena kinaruk kolalkop yoma, ir inaruk kolalu wadok karugwa ar ogwe, ir inaruk kolalukdek o.”

Ap iliti pano Samaria mende oba lirogo yorarige wene

25 # Mat. 22:35-40; Mrk. 12:28-34 Tuguluk ar ap guru agama ambi menaga lagagerek, Ar Yesus abur mbalik nen yiluk, kinok wokega dogolir, “Guru Nombae o, An niluk mondok dogolir, nen nabedal kabedal erurak paga, nena erurak o?” yiluk yorige.

26Ar Yesus nen wene onggo yoga dogolir, “Alkitab akla etoma diru nena mbalek? Nen kar nen nena kakla anda tagan?” yiluk yorige.

27 # Im. 19:18; Ul. 6:5 “Ar akuni enogo nen wene onggo yega dogolir, ‘Kiliti apir ar paga inom, kaguringge apir ar paga inom, kobatne apir ar paga inom, nen kar kakla nggagalek apir ar paga inom, Ar Tuhan Allah etia ar kiliti kunik eka dogon o.’ Nen, ‘Kar kebe kiliti kunik etatagan eti ndak-ndak ar, ir akuni wedek mende, kiliti kunik ar erinaka dogon o.’ ”

28 # Im. 18:5 Yorigemo Ar Yesus nen onggo yoga dogolir, “Wene onggo yegen eti mondok ebebar o. Ma, eti ar eka dogon o, eti eka dogogin paga, kar kiluk dogogin o.”

29Ogwe ar ap guru agama enogo erakde mbalek nen yiluk yega lagagerek, yoga dogolir, “An ninom agarik mende eti tani?” yiluk kinok yorige.

30Ar Yesus nen onggo yoga dogolir, “Ar wedak ambi o Yerusalem nggwe nen, o Yerikho nggwe wura lagage. Nen wuragi nanggige, tuan obate paga, ir akuni maduk mende nen, ebe ndugi wakwi, nen amindik amendek ndilogo waganggwi, eku lagugwarik, ar ebe tuan paga warek ilpudu birigemo dambe kalok mbugulkugwa o. 31O etinem ar, ar ap imam ambi, tuan eti paga ar lagage o. Nen ap warek enogo il kega lagagerek, tuan akpirmo nggwe pungguk togon arar lagage. 32Etegerogon ar, ar ap Lewi mende ambi laga dogolir, akuni warek enogo il kega lagagerek, oba panggo togon ari lalok mbenakige. Ogwe tuguluk ar enogo tuan pungguk togon ar ari lagagerek nen, arar lagage. 33#2Taw. 28:15Ogwe ar ap ambi ai Samaria mende ma, tuan enogo paga ar lak nen yiluk laga lagage, ap enogo warek kalok, akba nen akla daguk togo etagage. 34Nen ar ap enogo arar oba panggo yi laga lagagerek, ndugi wakugwama umo mbalek ma yemenogo, anggur amburu paga i korogo bega, nen minyak amburu paga u palka eka dogolir, umo yemenogo dinggil bega ekige. Etbega lagagerek, akuni ernogo, ar mende keledai ambor paga ilik bega lagagerek, wolok akuni u palinabi tagama, arar wolok lagage. 35Nen kubenengge ar ap enogo nen, uang perak mbere wagangga lagagerek, ar ap ai werek enogo wogoga lagagerek, nen yoga dogolir, ‘Ap yi, pikpak iluguk dino o, nen onggo amberak burak werek arigin kalok, an nen yi paga waga dogolir kalok, onggo bigin o.’ ”

36Yega lagagerek, Ar Yesus wene oba likige enogo kudi bik nen yiluk, irep paga wene kinok yi yirige, “Ir akuni inebe tiga eti, ap warogo bega yi, an nogar ar o, yiluk akba eke, ap ta kwak yiluk kar kakla andagen?”

37Ar ap guru agama enogo nen onggo yoga dogolir, “Eti ar ap warek mende yamak kege eti arar o.”

“Etiar ma, kar kuma lalok, eti ndak-ndak ar eri lan o!” yiluk Ar Yesus nen yorige.

Ar Yesus nen kumi Marta Maria imbirak bikda lagage wene

38 # Yoh. 11:1 Tuguluk Ar Yesus enogo Ar mutok lagwi mende inom tuan ugu birugwa mende enogo arar lagugwa. Nen o desa ambila arar ari lagugwa o. Nen Etomala, kwe ambi endaga Marta, kwe eti nen Ar Yesus uma erom inom nau paga ayonggo birige. 39Nen ar Marta eti ogar kwe ambi endaga Maria eti imbirak welagugwa. Nen ar Maria yi, Ar Yesus iyokma korek latuk, wene yega yemenogo aruk kolek mondok welagage. 40Ogwe ar Marta ernogo, uma ar dogi taga paga, yi eka ndik eka, pakalok arar ekige. Tuguluk, Ar Yesus oba panggo yi lagagerek nen yoga dogolir, “Tuhan, Kar kakla nen ar Maria, an yabu nadik ar eka nagik agarik yi, ndak negen ar agarik kakla andagen a? Yabu an yamak neyawak nen yiluk yorin o!”

41Ar Tuhan nen onggo yoga dogolir, “Marta, Marta! Kar mondok, we yi paga eli paga kiliti nggok togon pirik parik erir tagan o. 42Nen wene ilitinggen negen mondok eti omanggi ar o, Ar Maria eti pano kwak nggi, yiluk obok il kege eti, ar inggimo nen ndilugun dek mende eti arar o.”

Currently Selected:

LUKAS 10: WLW

Highlight

Copy