LUKAS 8

Kumi nen Yesus yamakarugwa wene

1Etanogo dogoluk dek ar, Ar Yesus aworomi inebe dua belas enogo inom, o kota paga nggwe inom, nen o kampung nggwe etoma inom, wene Pano Wene wolok, Ar Allah ebe yogondak Raja talek arar menatuk, wene mbalir laga dogogin o, yiluk yorar lagugwa. 2#Mat. 27:55-56; Mrk. 15:40-41; Luk. 23:49Nen ir lagwi enogo inom, kumi u kunik mende nen irimbo inakla unggirige mende, pano erinakige mende inom arar lagugwa. Ir inebe eti, ar Maria yogu dogolir Magdalena yogu lagugwa eti (kugi irimbo eti inebe tujuh paga akla unggirugwarik ma nggigilogo wulinakige); 3kwe ambi eti Yohana, ap Khuza yabu istana raja Herodes werek ma erir taga mende agwe. Nen ambi endaga Susana, nen kumi amberak inebe pakalok ar inom lagugwa. Nen ir inamindik inamendek, Ar Yesus aworomi mutok lagwi mende nen yamak darugwa o.

Ai yumbukwi oba lirogo yorarige wene

(Mat. 13:1-9; Mrk. 4:1-9)

4Ir akuni o kota ya nda etoma nen, Ar Yesus oba kuwak ari wagik mban eku dogolir, inebe pakalok ar kuwak ari wagugwama, Ar nen wene oba lirogo mbililogo yoragage mende ebe yi o: 5Ap yabu ekwa mende ambi aingge ndulik nen yiluk lagagerek ndulka dogolir, aingge amberak tuan paga wukige. Wukige mende yemenogo amberak akuni iniyok paga mburalkwi nen amberak tewe nan nunggwi ekugwa. 6Nen amberak yigom nggirikmo wukige. Nen anggup arar wundir lagagerek mende, agar mbuk aga dogolir taber lagage. 7Nen aingge amberak wiridi adok werek mende akla wurar lagage. Ma wiridi adok werek mende enogo anggup imbirak ndak-ndak wulkigerek ma, digi dogo erogo birigemo watagage. 8Ogwe aingge amberak agar panoma wukigerek ma, anggup pano wulka lagagerek, enggen yika dogolir seratus kudi yungguk dagak yikige.

Wene oba lirogo eti yoraga lagagerek, Ar Yesus nen wene yoraga dogolir, “Kinaruk werek kalok, kolku dogoni o!”

Ar Yesus wene oba lirogo yirige eti nenaluk?

(Mat. 13:10-17; Mrk. 4:10-12)

9Ar Yesus aworomi mutok lagwi mende nen, wene oba lirogo yegen eti enggen mende mbililogo yoneran yiluk yorugwa. 10#Yes. 6:9-10Ar Yesus nen wene onggo yoraga dogolir, “Kir Ar Allah Raja talek menatuk wene mbaligin kimago mende eti, kinaburak kinilu aruwak nen yiluk wedek ar wokirage o. Ogwe ir akuni amberak eti perak, wene oba lirogo mban yoraurak o. Nen etegerogon yoramo, ir nen inil mbenakwi, ogwe nena arigin eti ir nen inunggukdek ar, nen inaruk kolalkwi, ogwe inakla andagun dek ar o.”

Ar Yesus nen ap aingge ndulir lagage mende wene enggen yoragige wene.

(Mat. 13:18-23; Mrk. 4:13-20)

11“Wene oba lirogo yigi mende enogo enggen yi o: Aingge eti ebe Ar Allah Ane arar o. 12Aingge tuan paga wurar lagage mende eti, ir akuni wene inaruk kolalkugwa mende eti arar o. Ogwe ar Iblis enogo waga lagagerek, akuni iniliti ebebar andamo, ir inebe ndilinabigin kigi yiluk, wene enogo inilitimo nen ndili wagage o. 13Nen aingge yigom nggirikmo wurar lagage mende eti, ir akuni wene eti inaruk kolalku lagugwarik, iniliti adeknggen paga arar waganggugwa eti ndak-ndak o. Nen ir iniliti ebebar andarugwa mende eti we dudu negen arar ma, nen inabur mbalka paga, wene enogo mi erogo mbo birugwa o. 14Aingge amberak wiridi adok werek mende akla wukige ernogo, ir akuni wene enogo abok inaruk kolalkugwa mende eti ndak-ndak, ogwe ir o agar paga ya, iniluk erekma waganekma, we adeknggen mban nugu dogu inakla ebeku dogolir, iniliti pirik parik ekwi arar o. Nen ebe eti nen arar nggidi nggedo erogo bagetekma, inenggen pipak kode togo yirurak ndak dek arar o. 15Aingge amberak aga mudi panoma wukige enogo eti, ir akuni wene abok enogo inaruk kolalkugwa mende eti arar o. Nen inaruk kolalku lagugwarik, nen inilitimo pano anda tagama nggwe inom nen wene ebebar mende yitagama nggwe inom, nggidik nggedek erogo batarugwa. Nen ir enogo pago mondok kigik enggen yiku lagugwa.”

Lampu yibalek walu paga tebelogo bugwi wene

(Mrk. 4:21-25)

16 # Mat. 5:15; Luk. 11:33 “Ir akuni ambi nen, indu lampu yibadogo nen walu paga tebelogo bugwi, nen noge yitagama o mbedago abutla bugwi eritagwi mondok dek o. Ar nen indu lampu yibadogo nen, lek togo tugunogo bugwi o, nenaluk ir akuni akbinak enogo inil ker unggi warurak paga o. 17#Mat. 10:26; Luk. 12:2Kimago agarik mende etoma ambi gwak kimago dogogin mondok dek o. Wene aborama lakbi lakbo mbalek mende ambi kenam agikdek nen inilu agikdek ambi dogogin mondok dek arar o yir.

18 # Mat. 25:29; Luk. 19:26 Etiar ma, wene kir kinaruk kolalkop mende etoma, pik pak kinakla enggedek togon o. Nenaluk, ir akuni onde ekodarugwa mende, ambi inom nggok togon ar wogoragin o, ogwe ir akuni onde dek mende, we bugudagar ambi batalok kalok, eti inom ar waganigin o.”

Ar Yesus agwiya o nen ogariyak o ekugwa wene

(Mat. 12:46-50; Mrk. 3:31-35)

19Ar Yesus agwiya o, nen ogariyak o, Ar oba wagugwa. Ogwe ir Ar oba ari lalok dek o, nenaluk akuni kuwak ekugwa pakalok mondok ar ma. 20Ma ar akuni ambi nen Ar Yesus yoga dogolir, “Abeak, Ninombae Kar kagwiya o, nen kogariyak o, tekman nggwe werek o. Nen ir Ninombae kar kinom abuk aruwok nen yiluk o.”

21Ogwe Ar Yesus nen wene onggo yoga dogolir, “Ir akuni Ar Allah ane kolalkwi nen kolalbiluk ekwi mende eti perak, ir eti An nagwiya nen An nogariyak o.”

Yesus nen wiya kakde abodok dek ekige wene

(Mat. 8:23-27; Mrk. 4:35-41)

22O ambi paga, Ar Yesus aworomi mutok lagwi mende inom, i to perahu paga dagagu lagugwarik, ar Yesus nen yega dogolir, “Nir alibagan nggwe eloma unda luwok o!” yiluk ir yorarige. Yiluk yirigemo, ir enogo arar unda lagugwa. 23Nen ir enogo undagu dogolir, Ar Yesus noge arar nggaruk togon yirige. Eta nogo inagur bikbak, wiya nggok mende arar i danau ima yemenogo nombalek kombalek eka, nen perahu akla yemenogo i onggega dogolir, ir enogo i tebelinaburak paga arar ekige. 24Nen ir Ar Yesus mutok lagwi mende yemenogo, Ar iluk ekbi lagugwarik yogu dogolir, “Guru wae, Guru wae, yogo nir maduk ago arar o!”

Nen Ar Yesus iluk atuk, wiya kakde inom nen i tarin pu dengga ekige enogo inom, wenemuk kwanaber darige. Nen wiya kakde inom, nen i tarin enogo inom, inabodok dek agugama, i danau enogo abodok dek arar etagage. 25Tuguluk Ar Yesus nen Ar aworomi mutok lagwi mende yoraga dogolir, “Kir kiniliti An noba ebebar andagik dek eti nenaluk?”

Ir enogo inobade atuk, bi waku dogolir, wene ar ambi yogik yugu dogolir, “Ar akuni yi ta kogo? Wiya inom nen i tarin inom ane yoragi nangge, Ar ane kolalka yi.”

Ar Yesus nen ap irimbo akla unggirige mende pano ekbirige wene

(Mat. 8:28-34; Mrk. 5:1-20)

26Ar Yesus aworomi mutok lagwi mende inom, to warogo o Gerasa#8:26: Gerasa: diru ibibir mbalkugwa mende paga eti: Gadara (Mat. 8:28 paga bikani); ambetak nen yugu dogolir eti Gergesa yugu lagugwa. etoma arar unda lagugwa. 27Unda lagugwarik nen te, Ar Yesus abuktaga arar wundi lagagerek mo, ar wedak ambi ar uma o kota mende, u irimbo akla unggirigerek ma, o paga negen ar tu yugudek nega dogolir, ar uma laurak a'ir nen, we kuburan akuni warek baktagama kwiyonla nggwe etoma mban nega werek ma, ar ap eti Yesus oba arar wagage. 28Waga lagagerek, Ar Yesus il kalok, ar ane nggok mondok naik yega lagagerek, endop yunggu yangga Yesus apma tebe yi lagagerek, yoga dogolir, “Yesus Allah Akbur Lektek Mende eti Kar arar o! An nenggerogon ernabik nen yiluk wagan? An anggon panggon ernakup o!” yiluk nggino yorige. 29Ar ap eti etegeron yirige eti, Ar Yesus nen irimbo eti, ap eti oba nen wundi lan, yiluk yorige paga o. Nen ar ap eti ninggibirngge u irimbo eti oba lakbi wagatekma, inggi iyok rantai paga kede warogo biluk, aruam waku lagatek, rantai #8:29: Rantai: Indonesia wene paga eti besi (mbuti omanggen) mende yonggal talek yago. yemenogo birik berok erogo lakbiluk, irimbo enogo nen wolok o todi anggup mban luk etuk lagagemo etoma laga lagage.

30Ma, Ar Yesus nen ap enogo yoga dogolir, “Kar kendaga ta?” yiluk yorige.

Yorigemo ar nen onggo yoga dogolir, “An nendaga ‘Legiun’ o, yiluk yorige.” Nenaluk, ar ap eti ilitimo etoma, irimbo inebe pakalok mondok arar ari unggirugwarik welagwi ma, yirige o. 31Ma ir irimbo yemenogo nen, Ar Yesus nen, akuni Kambiluk Nggar Wura Lektagama etoma mugogo lakbaga kau, nggino nggano togon yorugwa.#8:31: Kambiluk Nggar Wura Lektagama: Ir indonesia wene paga eti Jurang Maut. Ma, ir akuni nen andugu dogolir, ir irimbo eti inobok ar aduk wutila kogona etoma kede marek dagik, wene anggin mende inoba bigin kudi paga yiluk andugu lagugwa.

32Korok eta ar, kur lilu negen ma, ye wam nde wam nggonak ner nugunem, ir irimbo enogo nen, ir wam etoma inakla unggi lani yiluk yokneran o, ae, yiluk nggino yorugwa. Nen Ar Yesus akla nen ndak ar yiluk andarige. 33Nen ir irimbo yemenogo ar ap etnogo akla nen wulku lagugwarik, nen wam yemenogo inakla unggi lagugwa. Nen ir wam yemenogo kode mbugulku dogolir, kur lilu yemenogo nen nggilu-nggilu i danau ima wukugwama, i nen arar tebelinakige.

34Ir akuni wam inaruam welagwi mende ernogo, wam etagugwa mende enogo inil kalok, kode mbu agan o kota nggwe inom, desa nggwe inom, lagu dogolir wene enogo yorar lagugwa. 35Wene enogo yorar lagugwama, ir akuni yemenogo nena etaga yiluk inil kau paga uma nen wundir wagugwa. Nen ir Ar Yesus oba wagu lagugwa, ar ap irimbo akla nen nggigilogo wuldarige mende ernogo, iliti akuni dogi tagwi ndak-ndak werek atuk, nen iyom yugu, inil ka lagugwa. Inil kugu lagugwarik, ir inobade ambik arar etagugwa. 36Ir akuni wene eti etaga inil karugwa mende nen, ir akuni amberak nen, ar ap enogo oba u palka inil karugwa mende wene mbililogo yorarugwa. 37Nen ir akuni o Gerasa mende yemenogo obogar nen, wene etagage eti inobade etagu lagugwarik, Ar Yesus o yoma dambe binaniluk lan o, yiluk nggino yorugwa. Yorugwama Ar Yesus enogo perahu paga dagaluk lak nen yiluk ekige. 38Nen ar ap irimbo akla nen nggigilogo wulakige mende enogo nen, Ar Yesus nimbirak luok o, yiluk nggino yorige.

Ogwe Ar Yesus nen, kar lan o, yiluk yoga dogolir, 39“Kar Kombae Allah nen nena erogo bagage eti, kar nen mbililogo yora lan o.”

Yorigemo ar ap enogo nen, o kota nggwe inom, ye ai nde ai etoma obogar, Ar Yesus nen nena ekbirige mende enogo akuni yorar lagage.

Ar Yairus akbur iluk ekbirige inom nen Kwe ambi Ar Yesus iyom irep pakta lagage wene inom

(Mat. 9:18-26; Mrk. 5:21-43)

40Tuguluk Ar Yesus, i danau aik alibagan nggwe iyok paga unda lagagemo, ir akuni Ar Yesus torek tolakma welagugwa mende enogo nen, inadiknggin inadeknggen agu lagugwarik, agur malogo nen waganggugwa. 41Wokbiluk werekma, ap endaga Yairus, Allah Ai Palek agepala o eta paga mende, arar wagage. Waga lagagerek, Ar Yesus eloktekma endop yalogo tebe yega lagagerek, Ar Yesus ar uma bika lowak nen yiluk nggino nggano mondok ar yorige. 42Nenaluk, ar akbur kodak omanggi omangga ar, endago kigik umur 12 tahun agagerek ma, ebe u kunik kamburak panggolek arar ma o.

Nen Ar Yesus ar Yairus uma laga nggodek, ir akuni o ya nen, nda nen tuan andogon dombok obogar wagu lagugwarik tuan lau dibi erogo birugwa. 43Nen kwe ambi kumi tur akbur ketagama etoma nggwe u oba atuk, mep ekige mende eka ar kigik 12 tahun arar ekigerek ma, u eti dek ar arigin yiluk, amindik amendek dokter#8:43: U eti dek arigin yiluk, amindik amendek dokter inoba takbik-takbok ekige: Diru alep kwak mbalkugwa mende akla etoma dek. inoba takbik-takbok ekigerek ogwe, ir ambi nen oba u eti dek erogo biluk dek arar ma, ar kwe eti ir akuni yemenogo inakla inom lagugwa. 44Nen ar kwe eti, Ar Yesus oba ambotna tu panggo yi laga lagagerek, iyom yugu irep pata lagage. Etanogo paktega kigik ar, u amep eka lagage enogo eta ar mondok amburu berok togon dek arar etagage. 45Tuguluk Ar Yesus nen kinok yoraga dogolir, “Puk, kar ta nen an niyom ugu kinggi paktegen?”

Ir akuni obogar nen dek adek yirugwama, nen ar Petrus nen yega dogolir, “Abeak, akuni Ninombae Kar keragalu nombodu kombodu ponggogok keyar yomare, lak.”

46Ogwe Ar Yesus nen yega dogolir, “Ogwe, akuni ambi nen inggi paknake o. Nenaluk, An nilu, An nobatne nakla nen nggigilogo wulka kigi o.” 47Yugwi dalok, ar kwe ernogo, Ar ekige mende enogo obok inilu agama yiluk, akla ebetagage. Ma kwe enogo aganak ndilker Ar Yesus apma tebe yi wagage. Tebe yi waga lagagerek, ir akuni yemenogo inilka paga obogar, nenaluk Ar Yesus iyom pakta lagage mende enogo mbililogo yega, nen u oba mende enogo eta eka kigik ar dek aga o, yiluk mbililogo yoragage. 48Yigi nanggige Ar Yesus nen yega dogolir, “Nakbur o, kiliti An Noba ebebar andagen paga, koba u dek aga o. Ma kiliti adeknggen paga arar kuma lan o!” yiluk yorige.

49Ar Yesus wene yatnogo auwan yeganem ar, akuni yonggo lan mende ar ap Yairus uma nen arar wagage. Waga lagagerek ar Yairus yoga dogolir, “Aee, Nombae kar kakbur enogo arar kangge o. Ma, kar Ninombae Guru anggon panggon erogo bugup o,” yiluk yorige.

50Wene yoga Ar Yesus aruk kolalka lagagerek, ar Yairus yoga dogolir, “Kobade arugup o. Kiliti ebebar andan o, nen kar kakbur oba u dek arigin o.”

51Nen ir ar yairus uma arar ari lagu lagugwarik, Ir akuni obogar uma unggurak dek yoraga lagagerek, we ir Petrus o, nen Yohanes o, Nen Yakobus o, nen kodak enogo agwiya ombae o, inebe enda mban uma unggurak o yiluk yirige. 52Nen ir akuni yemenogo, de yugwi nen denggu makwi eku lagugwa. Ogwe ar Yesus nen yoraga dogolir, “De yurak mondok maga o. Elege eti kangge dek o, ar we noge yitaga o.”

53Nen ir akuni yemenogo Ar Yesus agandok kanggugwa. Nenaluk, ir ar elege eti ebebar mondok kanggige eti ir inilu ma o. 54Tuguluk Ar Yesus elege enogo inggi paktega lagagerek men yirige, “Nakbur a, ibar kiluk arin!” yiluk yorige. 55Nen ar elege enogo agurenggeakla unggi waga lagagerek, elege ebe arar metlagage. Metlagagerek mo ar Yesus nen, ir akuni yemenogo agarom wogokni o, yiluk yorarige. 56Nen ar elege enogo agwiya ombae nen, wi au yiluk bi wakugwa. Ogwe Ar Yesus nen wene etagage mende eti akuni yoragup arar o, yiluk wenemuk yirige.

Currently Selected:

LUKAS 8: WLW

Highlight

Copy