LUKAS 4
4
Iblis nen Ar Yesus abuk mbalkige wene
(Mat. 4:1-11; Mrk. 1:12-13)
1Ar Yesus akla, Roh Allah kerok togon yagartari wura waga lagagerek, Ar Roh Allah enogo nen, i Yordan ima dambe kalok, Ar ebe o ye dekma nde dekma telekma etoma arar wolok lagage. 2Laga lagagerek, Ar etomala empat puluh hari werekma, Iblis nen abuk mbalkige. O etoma dogolir, Ar yemende nde mende ninggikdek mondok arar ma, erom abu mondok arar eri wagage.
3Nonaik ekige etanogo paga, ar Iblis nen yoga dogolir, “Kar Allah akbur a, dek a? Nggir yi roti etaruwak nen yorin nda?” yiluk yorige.
4 #
Ul. 8:3
Yorigemo Ar Yesus nen wene onggo yoga dogolir, “Wene diru mbalek Alkitab paga nen yega dogolir, ‘Akuni iniluk welagwi eti, erom nenggetek paga mban dek o.’”
5Tuguluk, ar Iblis nen, Ar Yesus wolok o ambimo anggup idu paga dagaga lagagerek, ar Iblis nen yoga dogolir, Kerajaan #4:5: Kerajaan: Eti ap presiden dogi taga ndak-ndak ar ogwe, ar eti ane paga onggo mondok yi tagodek, akdikmo akuni ugunar menari tagodek, arte ar akbur manggwiya ap endago enogo mban bugwi eri taga mende. o agar paga yoma werek mende kil lakan nda, yiluk yorige. 6Tuguluk ar Iblis nen, Ar Yesus yoga dogolir, “Yogo an namindi namende inom, an nalon palek mende inom, Kar arar wokirigin o. Nenaluk etoma obogar an woknirigemo o, nen an nen ta wogorurak eti, nadik nakla andalok wogoraurak o. 7Nen Kar tebe yiluk, an wogok dangga kalok, etoma obogar, Kar kadik kamende arar etarigin o.”
8 #
Ul. 6:13
Ar Yesus nen onggo yoga dogolir, “Alkitab mbalek paga nen yega dogolir, ‘Kinombae Tuhan Allah adigar wogokdugwi dogolir, eyabu eku dogoni o,’” yiluk yirige o.
9Tuguluk ar Iblis nen Yesus wolok, o Yerusalem paga, Tuhan Ai palek kirin paga bi lagagerek yoga dogolir, “Kar Ar Allah Akbur ar enogogi? Etiar ma, yogondak Kar mbok wuran nda. 10Nenaluk Alkitab akla diru mbalek yega dogolir, ‘Ar Allah nen, ir malaikat mende, Kar karuam pik pak dogorak yiluk yoragin o. 11#Mzm. 91:12Nen ir malaikat mende nen, ininggi ndalek paga wokabugun o. Nen eti paga, kar nggir paga kiyok dik togon watagin dek o,’” yiluk yorige o.
12 #
Ul. 6:16
Yesus nen yoga dogolir, “Alkitab mbalek paga yega dogolir, ‘kar mende Tuhan Allah eti, abuk mbalka mondok maga o.’ ”
13Ar Iblis nen, Ar Yesus ye paga nde paga, abuk arar mbalka lagagerek, o telek nanonggal ambi kenam ari warigin ar o, yiluk, Ar Yesus dambe kalok lagage.
Yesus o Galilea paga etoma yabu edo paktarige wene
(Mat. 4:12-17; Mrk. 1:14-15)
14Tuguluk Ar Yesus iyok paga medaliluk Galilea paga arar lagage. Nen Ar oba Roh Allah eti kerok togon arar yagatari wura wagage o. Wene Ar ekige mende yemenogo, o etomala obogar wiga lagage. 15Nen Ar uma tamban erir tagama ai palekma dombok etoma, wene emerirar laga kigik, nen ir akuni obogar nen wogokdirugwa.
Ar Yesus o Nazaret etoma nen waganu dambe karugwa wene
(Mat. 13:53-58; Mrk. 6:1-6)
16Tuguluk, Ar Yesus o Nazaret, Ar ebe nggok agigemo etoma arar lagage. Nen, o hari Sabat paga, ir eritagwi ndak-ndak, Ar uma tamban erir tagama arar lagage. Lagagerek nen, Ar Alkitab endaga talik nen yiluk, menagige, 17nen buku Nabi Yesaya diru mbalek mende wogorugwa. Wogorugwama, Ar nen buku pirik-perek erek enogo mbigalka lagagerek, ayat yi endaga talkige,
18“Roh Tuhan An noba werek o,
Nenaluk Ar nen, An naluwak tebelkige eti,
Akuni iningi dek mende, Pano Wene yorar laurak paga.
Ar nen An mirnakige wene eti telekma yorawak nen yiluk,
Akuni inabukmo tebelek werek mende inadik telekma erogo bawak nen yiluk,
nen inil mbuk mende benggelogo bawak nen yiluk. Tuguluk
ir akuni yiduk maduk erinakwi mende eti, wender ugunar bawak nen yiluk,
19 #
Yes. 61:1-2
nen wene yoragu dogomo Tuhan waru panggo lari waga o.
Akuni Ar ane waganggwi mende inagap endarurak enogo, o arar panggo yi waga o,” yiluk diru endaga talkige.
20Diru endaga talbega lagagerek, tuguluk Ar Yesus nen buku enogo peralogo biluk, nen ir inamendek werek wogoraga lagagerek, nen Ar ebe kortagige.#4:20: kortagige: Akuni emeriraok nen yiluk kalok ir akuni Yahudi mende kotatuk nen emeriragu lagugwa. Ar arar kortagagemo, ir akuni uma tamban erir tagama etoma nen, inil Ar oba nggwe laktagugwa o. 21Nen Ar Yesus nen yoraga dogolir, “Ayat-ayat Alkitab yi, o yogondakne yi arar, wene erigin yugu kolalku lagop mende ndak-ndak arar etarir taga o,” yiluk yirige.
22Andema nen wene panindik panondak wulabi wari taga o yiluk, ir nen bi waku dogolir, Ar ebe yadekdirugwa. Tuguluk ir nen yugu dogolir, “Ar yi ap Yusuf akbur ebebar etnogogi?”
23Etegerogo yugwi agagemo, Ar Yesus nen ir yoraga dogolir, “Kir nen wene il warogo yi ndak-ndak, An Nabok yirtagwi o, ‘Dokter, Kar ndak koba u palan o. Nir ninaruk kolalku dogolir, Kar nen erukbuk elalin o Kapernaum eka lagan yega eti ndak-ndak, Kar kuma yoma etegerogon ar erin te, yiluk yornirugun o.’” 24#Yoh. 4:44Ar Yesus ambi inom ar yoraga dogolir, “Kinakla andani, ap Nabi ambi ar uma edo paga etoma nen, ar ap nggok o, yiluk yorir tagodek o. 25#1Raj. 17:1Ogwe kinaruk kolalini o: Elia werek paga, miyo wura wagikdek tiga setengah tahun ekige o, nen o kuri dombok etoma erom no nggok ar dagarige. Nen o Israel etoma, kumi togwe pakalok mondok welagugwa. 26#1Raj. 17:8-16Eta eterogon ar ma, Ar Allah nen Elia yoga dogolir, kar kumi togwe werek etoma inoba lano o, yiluk yorukdek ogwe, kwe togwe ambiar, o Sarfat Sidon agar paga werek enaga ar bika lano o, yiluk yorige. 27#2Raj. 5:1-14Ar ap Nabi Elisa werek paga, eta eterogon ar, ir o Israel etoma akuni pakalok inoba akadu ya mbalek nda mbalek inobade kaurak mendek were werek ar ogwe, ir etoma obogar u palinabukdek o. Ogwe Naaman o Siria mende eti kwak ar oba dek erogo birige o.”
28Ir akuni uma tamban erir tagama welagugwa mende etoma inaruk kolal biluk, obogar wenemuk pakalok yirugwa. 29Ir obogar menagu lagugwarik, Ar Yesus o kota etoma nen mugogo wulaku dogolir, Ar Ebe pederir wolok o nggar nggardiakma ado lilu, o kota palkugwama etoma ponggok togon wurabuwok nen yiluk andalok, ekugwa. 30Ogwe Ar Yesus akuni pakalok etoma ponggologo lakbalok arar lagage.
Akuni kugi irimbo akla unggirige mende mugogo wulakige wene
(Mrk. 1:21-28)
31Tuguluk Ar Yesus o Kapernaum Galilea paga etoma lagage. Etoma o hari Sabat paga, Ar nen wene emerirarige. 32#Mat. 7:28-29Nen Ar alon mbek togon ar dogolir wene emeriraga paga, ir nen wee yiluk bi warkugwa. 33Uma tamban erir tagama etoma akuni u obabur maduk mende kunik ambi welagage. Ar akuni enogo lirtagik wurtagik eka dogolir, 34“Dak Yesus, o Nazaret mende yi wae, Kar nir nenggerogon erninabik yiluk? Kar nir ninarik yiluk wagan a? Kar ta eti, An nilu o. Kar eti, Ar Allah nen lakbagi waga mende arar o!” yiluk yirige.
35Ar Yesus nen, irimbo enogo yoga dogolir, “Kane! Akuni yi akla nen wundi lan!” yiluk yorige nanggige, tuguluk ar irimbo enogo nen, ir obogar inil paga, akuni enogo yuk puk lakbiluk wulkugwa. Nen akuni enogo oba aik paik ekikdek, we dambe kalok arar wulkugwa o.
36Akuni obogar nen yugu dogolir, “We, Ane yege ninobade a, Ebe alon paga inom, Ane obarne paga inom, ir kugi irimbo mende wundilani yiluk yoragi nangge, ir arar wulka o,” yiluk bi warkugwa. 37Eti paga, Ar Yesus wene ekige mende abok eti, o kuri etomala obogar, wigalarir lagage o.
Ar Yesus akuni pakalok inoba u dek erinakige wene
(Mat. 8:14-17; Mrk. 1:29-34)
38Ar Yesus nen tamban erir tagama yemenogo dambe kalok, ar Simon uma etoma arar lagage. Ari lalok werek ma, kwe ar Simon akowan u togi-togi wakanem, akuni nen ar kwe enogo abok Ar Yesus yori wagugwa. 39Yorugwama, Ar Yesus kwe enogo noge yirtagama lagagerek, tuguluk u togi-togi enogo murogo wulak dirigemo, u enogo arar dek atuk, nen ar kwe Simon akowan enogo menaga lagagerek, ir inedado arar darkige o.
40Mo il wira-wira eta paga, akuni ye u nde u warek mende, Ar Yesus oba woginarek wagugwa. Ar Yesus inggi inadik ndik inadik ndak inaluwak paga inggi pakdar laga kigik, inoba u arar dek agugwa dek agugwa o. 41Ir irimbo, akuni pakalok inoba nen, wulku dogolir, inane yir mondok kode wulku dogolir, “Kar yi Allah akbur arar, o!” yiluk yorugwa.
Ogwe Ar Yesus nen kinane, bugudak ambi mondok yugup o yiluk yorarige. Ogwe ir inilu, Ap yi Raja inagap endaka enogo ebe yi arar o, yiluk yirugwa.
Ar Yesus nen wene tamban erir tagama nggwe yoraga lagage wene
(Mrk. 1:35-39)
42O mo il wira-wira, wuka eta paga, Ar Yesus o kota etoma dambe kalok, nen o akuni mondok dekma etoma arar lagage o. Ogwe ir akuni yemenogo, Ar kwarir lagugwa mende, ir obok inom abuk agu lagugwarik, ir nen, Ar binaniluk laganem o, yiluk ambigar ekugwa. 43Ogwe ar Yesus nen yega dogolir, “Pano Wene Ar Allah nen apma nenggerogon bagin yiluk abok wene eti, An nen o kota-kota wedekma nggwe etoma obogar yorar laurak ar o. Nenaluk wene ebe eti kalok, Ar Allah nen, An mirogo agar paga yoma lakbani wagage o, yiluk yorarige.”
44Eta eterogon paga, Ar Yesus nen, wene o tamban erir tagama nggwe, o Yudea paga nggwe etoma yorar nega lagage o.
Currently Selected:
LUKAS 4: WLW
Highlight
Share
Copy
Want to have your highlights saved across all your devices? Sign up or sign in
