LUKAS 3

Yohanes ima wurinaka lagage wene

(Mat. 3:1-12; Mrk. 1:1-8; Yoh. 1:19-28)

1Ar ap Kaisar Tiberius menatuk werek kigik, tahun lima belas paga arar ekugwa. Nen o eta paga, Ar Pontius Pilatus eti Gubernur o Yudea paga welagage, nen ar Herodes eti o Galilea paga inewe wene pago welagage, nen Filipus ar Herodes ogar eti, o Iturea o, nen o Trakhonitis o, etoma paga inewe wene pago welagage. Nen ar Lisanias eti o Abilene etoma paga inewe wene pago welagage. 2Nen yabu Imam Agung eti, ar ap Hanas o, nen Kayafas o,#3:2: Hanas o Kayafas: Hanas eti Kayafas akbur agun ma, ar yabu imam paga arar kor birugwarik ogwe, ar alon palek mende ar welagage. imbirak pago welagugwa. O tahun eti paga, Ar Allah nen ap Zakharia akbur Yohanes enogo imbirak wene mbalka, o waganekma ye dekma ndek dekma etoma welagage. 3Eti paga nen, ar Yohanes i Yordan aik paga etoma dagak-dagak erir nega dogolir, Allah nen wene yirige mende yorar nega dogolir, “Kir maduk eku lagop mende bugalogo mbo biluk, kinebe ima wukbinagurak o. Nen eti erugun paga, Ar Allah kinomaduk dek erogo binagaluk, maga binagagin o.” 4#Yes. 40:3-5Etama, wene yi Nabi Yesaya yirige diru mbalek ndak-ndak yi o:

“Akuni ambi o waganekma, ye dek ma nde dek ma etoma nen, ane nggomorir nega dogolir,

‘Ar Tuhan aruan pik pak yaku dogoni o,

nen Ar aruan elagik wuragik kalok, enagago yakwi, eku dogoni o.

5Adukmo kurla kalok, agar yulogo tebelkwi,

kur ado werekma kalok, yulogo ndak-ndak enakwi,

Tuwan nombok kombok kalok, mor-mor erogo yakwi,

Nen tuwan wulkik unggigik kalok mor-mor yakwi.

6Ir akuni o agar paga yoma dogitagwi mende nen,

Ar Allah nen ndilinaka inil kugun o!’ ”

7 # Mat. 12:34, 23:33 Ir akuni pakalok ar, Ar Yohanes nen ima wukbinanuwak nen yiluk, oba wagu lagugwa o. Wagwi kalok, ar Yohanes nen ir yoraga dogolir, “Kir akuni maduk ekwa yi, kir Ar Allah nen hukuman yabongga kinoba bigin eti, wogalugun yiluk, ta nen yokiragemo? 8Kir kinobabur maduk mende, mbo arar bogo o, yiluk yenggak kinawak nen ernio. Nir ninumbu eti ar Abraham o, yiluk yurak mondok maga o. Dikbini o: Nggir yoma ogwe, Ar Allah nen, ar Abraham paga wigalek yiluk erogo bamo ndak ar o. 9#Mat. 7:19Yaga andugun, o edo lok omanggen kudi, mugogo lakbik nen yiluk, panggolek arar agarik o. O edo dombok enggen pano mende yikikdek kalok, edo mugogo indumo lakbigin o.”

10Nen ir akuni yemenogo nen, ar Yohanes yogu dogolir, “Nir erurak kwak nena, yiluk yorugwa?”

11Yohanes nen onggo yoraga dogolir, “Akuni ta nen iyom baju mbere werek kalok, iyom ambi kwak ogarak iyom dek mende wogorurak o; nen akuni ta nen agarom nau mende werek kalok, tumburiraurak ar o.”

12 # Luk. 7:29 Ir penagih pajak#3:12: Penagih pajak: Eti ir akuni pemerintah inake paga, akuni inoba wene yugu ndak-ndak lurogo wogora lagwi mende. erir taga mende, Yohanes nen ima wukdinanuwak nen o, yiluk oba wagugwa. Ir nen kinok yogu dogolir, “Ninombae Guru wae, Nir eru mende nena kwak kegen?” 13Yohanes nen yoraga dogolir, “Pajak onggo bini yoraurak kalok, kudi mbalek welaga kigik, kir ambi inom yoragup o.”

14Nen ir ap tentara ambetak nen kinok yogu dogolir, “Nen nir kwak nenggerogon nda? Nir nen nena erurak kegen?”

Yohanes nen onggo yoraga dogolir, “Akuni inagarek ndilku dogogup, nen ambi akuni inauang wene dek kigik kinenggal yoralok waganugup. Kir yabu ekwi onggo wokera tagwi eti paga, werek erogo dogono o!”

15Etanogo paga, ir akuni yomanogo nen kinok-kinok yugu dogolir, e puk! Ar Yohanes yi, Raja Ndilninakwa warigin yiluk ir torketagwi enogo arar kwa yiluk, kinok-kinok yirugwa. 16Eti paga, ar Yohanes nen, ir obogar yoraga dogolir, “An nen, kir i wedek i paga, ima wurkinabir taga o, ogwe Ar Akuni yabongga ambi nggok negen warigin o. Nen Ar eti iyok ogi sepatu kede pigalu ogwe, an nen eru ndak dek o. Nen Ar watuk perak, kir Roh Allah paga inom, nen indu paga inom ima wukbinagagin o. 17Ar inggimu o nyiru #3:17: Nyiru: Mburim loyan talek mende, gandum a, beras a, amomol inom nen agakdo inom, puli taga mende endaga. gandum ebe pulu paga wolok warigin o. Nengandum kalok karung adigar yagaka, nen agakdo nggolalek mende waganogo, indu akda naguk yi tagodek ma etoma kali kunigin o!”

18Ma, ar Yohanes nen, Pano Wene yorar nega dogolir, ye paga nde paga, oba lirogo wene emeriraga lagage o. 19#Mat. 14:3-4; Mrk. 6:17-18Ogwe ar Herodes eti, o Galilea paga etoma ap nggok menek dogolir, ye maduk nde maduk akpir ar eka dogolir, ar ogar agwe kwe endaga Herodias eti waganggigerek ma, ar Yohanes nen, enggadi wakbiluk wenemuk yorige. 20Ogwe ar Herodes enogo ye maduk nde maduk, ibiluk nggok negen ar eka dogolir, ar Yohanes enogo kede warogo penjara arar birige.

Ar Yesus ima wukbirige wene

(Mat. 3:13-17; Mrk. 1:9-11)

21Akuni etoma obogar ima wukbalok, Ar Yesus inom ar ima wukbirige. Nen Ar auwan tamban ekanem, mbogor keyalka lagagerek, 22#Kej. 22:2; Mzm. 2:7; Yes. 42:1; Mat. 3:17; Mrk. 1:11; Luk. 9:35Roh Allah tewe merpati talek oba wura wagage. Nen Ar Allah Ane yega inaruk kolalku dogolir, “Kar An nakbur niliti kunik arar o. Kar An niliti adeknggen erogo banenggen o,” yiluk yega aruk kolkige.

Yesus umbui endak tarir wagugwa wene

(Mat. 1:1-17)

23Ar Yesus yabu erik nen yiluk, Ar mende umur tiga puluh tahun paga arar ekige. Nen ir akuni nen yugu dogolir, Ar eti Yusuf akbur, Eli akbur, 24Matat akbur, Lewi akbur, Malkhi akbur, Yanai akbur, Yusuf akbur, 25Matica akbur, Amos akbur, Nahum akbur, Hesli akbur, Nagai akbur, 26Maat akbur, Matica akbur, Simei akbur, Yosekh akbur, Yoda akbur, 27Yohanan akbur, Resa akbur, Zerubabel akbur, Sealtiel akbur, Neri akbur, 28Malkhi akbur, Adi akbur, Kosam akbur, Elmadam akbur, Er akbur, 29Yesua akbur, Eliezer akbur, Yorim akbur, Matat akbur, Lewi akbur, 30Simeon akbur, Yehuda akbur, Yusuf akbur, Yonam akbur, Elyakim akbur, 31Melea akbur, Mina akbur, Matata akbur, Natan akbur, Daud akbur, 32Isai akbur, Obed akbur, Boas akbur, Salmon akbur, Nahason akbur, 33Aminadab akbur, Admin akbur, Arni akbur, Hezron akbur, Peres akbur, Yehuda akbur, 34Yakub akbur, Isak akbur, Abraham akbur, Terah akbur, Nahor akbur, 35Serug akbur, Rehu akbur, Peleg akbur, Eber akbur, Salmon akbur, 36Kenan akbur, Arpakhsad akbur, Sem akbur, Nuh akbur, Lamekh akbur, 37Metusalah akbur, Henokh akbur, Yared akbur, Mahalaleel akbur, Kenan akbur, 38Enos akbur, Set akbur, Adam akbur, Allah akbur, yiluk yugu lagugwa.

Currently Selected:

LUKAS 3: WLW

Highlight

Copy