LUKAS 13

Inomaduk onggo nen anggon panggon erugun mende inom wene

1O eti paga, ir akuni nen wene Ar Yesus mbililugu dogolir, ir akuni o Galilea mende amberak, Allah ake buok nen yiluk bugunem, Ar Pilatus nen inakige o yiluk, mbililogo yorugwa. 2Wene onggo Ar Yesus nen yoraga dogolir, “Ir akuni o Galilea mende inakugwa etegerogon eti paga, kir kinakla andagu dogolir, ir eti kwak inomaduk nggok mondok, nen ir akuni o Galilea mende amberak kwak etegerogon dek, yiluk kinakla andartagwi a? 3Dek mondok arar o! Ogwe kinakla eberek togon o: Nen kir kinomaduk bugalogo mbo bigikdek kalok, kir ogwe etegerogon ar kambugun o. 4Yogo ir akuni kolam Siloam aik paga inebe delapan belas paga, o mbedago ndugulogo laga dogolir inakige enogo nenggerogo kogop? Ir eti kwak inomaduk nggok mondok, nen ir akuni o Galilea welagwi mende amberak kwak etegerogon dek, yiluk kinakla andartagwi ar a? 5Etegerogo mondok dek arar o! Ambi inom ar yokerak o: Nen kir kinomaduk bugalogo mbo bigikdek kalok, kir ogwe etegerogon ar kambugun o.”

O ara enggen yugu dek mende oba lirogo yirige wene

6Etegerogon yoraga lagagerek, Ar Yesus nen wene oba lirogo yoraga dogolir, “Ar akuni ambi eyabula anggur ai yagoma etoma, o ara ai yago welagage. Na ambi paga, o ara enogo enggen yugu kau kwarir lagage mende, enggen ambiar ogwe yugu mondok dek arar il ka lagage. 7Kalok ir yedoman eyabu mende wai yoralok yega dogolir, ‘o yi kinil kani, ar o ara yi enggen yugu mo, ka warigin talek mende, ninggi tahun tiga paga eki o. Ogwe enggen ambiar yugu ka watukdek mondok arar o. Ma, o yi mugogo arar lakbini! Ar ebe we agar amburu yoma elamarogo takboli taga o!’ 8Ogwe ar yabu ekwa enogo nen yoga dogolir, ‘Ae Nombae, we tahun omanggi yi paga arar dogowak o. An o edoma etoma agar dumbulogo nen pupuk etoma mudi aruwak nen bigin o. Etegerogon erumo, tahun yabungga paga enggen yiru kigik mururak o. 9Etegerogon erugun mende, enggen yika dek ar kalok, Nombae kar nen yogo murni o yiluk yoneranok nen o.’ ”

Ar Yesus nen kwe abugur kulik ambi hari Sabat paga u palkige wene

10O hari Sabat paga, Ar Yesus nen wene o tamban erir tagama emeriragage. 11Etoma kwe ambi irimbo ambi akla unggirigemo, u kunik kigik delapan belas tahun ekige mende welagage. 12Ar Yesus nen kwe enogo il kega lagagerek, Ar ane nggok ar yoga dogolir, “Kar kwe yi, kar koba u obok dek arar etaga o!” yiluk yorige. 13Yega lagagerek, Ar Yesus inggi kwe enogo oba dengge birige. Nen kwe enogo etanogo ar ambor mendok togon menagagerek. Menaga lagagerek, kwe ernogo, Ar Allah endaga wogok birige.

14 # Kel. 20:9-10; Ul. 5:13-14 Ar ap o tamban erir tagama akepala nen, wenemuk mbalka dogolir, o hari Sabat paga kigik, Ar Yesus akuni u palke yi maduk eke o. Yega lagagerek, akuni yemenogo yoraga dogolir, “Yabu eku dogu denek eti enam hari arar; ma hari Sabat paga eti, ye eru nde eru mondok maga arar o!” yiluk yirige.

15Ar Tuhan nen onggo yoga dogolir, “Akuni wene abel dagalkwa maduk mende eti kir arar o! O hari Sabat paga eti ar, ir akuni nen inanggumi lembu a, keledai a, dabula nen inagi inarom noak nen yuluk kurogo wogorek wulkwi. 16Etiar ma, yogondak ya nen yoma, kwe yi ar Abraham umbu wigalek mende werek o. Nen ar kwe yi Iblis nen kede marek pago werek kigik, inggi delapan belas tahun arar ekige o. Ma, ar kwe yi hari Sabat yi paga kede pigalogo burak eti maga a?” 17Ar Yesus wene onggo yirige enogo paga, ir wene aredo warinakige werek mende inenggadi pakalok arar karugwa. Ogwe ir akuni amberak eti, elalin ekige kwak enogo paga, inakla adeknggen pakalok arar karugwa.

O sawi enggen oba lirogo yirige wene

(Mat. 13:31-32; Mrk. 4:30-32)

18Ar Yesus nen kinok yega dogolir, “Ar Allah apma binanurak paga eka dogolir, o elokte nenggerogon etarigin? An nen nena oba walkaurak o? 19O elokte etarigin mende ebe, wene oba lirogo yigin yi talek o. Ar akuni ambi nen o sawi eti enggen ambi wagangga lagagerek, ai ar eyabula arar yakige. O ai enogo anggup wulka lagagerek, o nggok arar etagage o. Nen enggalokbak paga etoma ir tewe nen inai palkugwa o.”

Ragi oba lirogo yirige wene

(Mat. 13:33)

20Ar Yesus ambi inom ar kinok yega dogolir, “Ar Allah apma binanurak paga erigin eti, An nena paga elokte etarigin mende etoma, il walkigik yokerak o? 21Etarigin eti yi ndak-ndak. Ar kwe ambi ragi eti wokbiluk, nen empat puluh liter tepung paga inom yidak wudak erogo bumo, nggok kado pirogo wundi taga eti ndak-ndak erigin o.”

Tukande bugudagar mende wene

(Mat. 7:13-14,21-23)

22Ar Yesus o Yerusalem laga dogolir, o kota nggwe, nen o kampung nggwe, etoma wulkik unggigik erir laga dogolir, akuni wene emerirar lagage. 23Ar wene emerirar laga agagemo, ar akuni ambi nen wene kinok yoga dogolir, “Ai Ambo, akuni inebe ndilinabigin eti we bugudak mban arar a?”

Ar Yesus nen wene onggo yoga dogolir, 24#Mat. 7:13-14“Tukande bugudak ma nggwe unggi laurak ake paga mban eku dogoni o. Nenaluk, Kinakla eberek togon o! Akuni pakalok unggi laurak paga erugun ogwe, unggugun dek o. 25Ar ap ai werek enogo iluk atuk tu arar larogo bumo, kir tekman nggwe mendek onggolagik kininggi puk-puk eku dogolir, ‘Tuan mende wae, Nir tu kurneran nde!’ Yorumo, Ar Tuan mende nen onggo yega dogolir, ‘Kir o nggoma nen wagop eti an nunggukdek o!’ 26#Mat. 7:22-23Yokiramo kir nen onggo yogu dogolir, ‘Nir Tuan Kar ninom i nunggwi, erom nunggwi, nen Tuan kar nen, wene o kota nir werek ma etoma tuan paga emernirarigen enogo o!’ 27#Mzm. 6:9 Ogwe ar Tuan eti nen onggo yega dogolir, ‘Kir o nggoma mende eti An nunggukdek o. Kir natukande ma nen, arar lani o. Kir yi nen ar ye maduk nde maduk erir nugu lagop o!’ yiluk yoragage. 28#Mat. 22:13, 25:30 #Mat. 8:11-12 Ir Abraham o, Isak o, Yakub o, nen ir nabi-nabi mende inom, Agar Ngger Agubak Kigirogo Bigin mo etoma ari lalok, inadeknggen ambik arar ekwi kalok, kir enogo mugogo wuldinagumo, de yugu dogolir kiniliti watugwi nen kener ambigar waku dogogun o. 29Ir akuni o timur nggwe inom nen barat nggwe nen inom, utara nggwe nen inom, selatan nggwe nen inom, warugun o. Nen ir Agar Ngger Agubak Kigirogo Bigin mo etoma ari unggiluk dogolir, inadeknggen ambik arar eku dogogun o. 30#Mat. 19:30, 20:16; Mrk. 10:31Wene yi ebebar etarigin o, ir akuni yabongga mende eti inalep arugun, nen ir akuni inalep mende eti yabongga arugun o.”

Ar Yesus nen o Yerusalem akba karige wene

(Mat. 23:37-39)

31O etinem ar, ir akuni Farisi mende inebe wenagongge ar, Ar Yesus oba wagu lagugwarik yogu dogolir, “O yoma dogogup o! O wedekma nggwe ibar lan o, nenaluk ar Herodes nen Kar karik nen yiluk yege o.”

32Ar Yesus nen wene onggo yoraga dogolir, “Akuni we elamarogo mende eti, kir yori lani o, ‘o hari yogondak inom nen kubenen inom, akuni u warek mende palinaka, nen ir irimbo inakla onggolabek mende nggigilogo wuldaga erigin o. Nen kibirngge hari tige eri lugun eti paga, an neyabu erurak mende werok togon arar erigin o.’ 33Ebe eta etegerogon arar ogwe, An yogondak inom, kubenen o nen kibirnggwe o, tuan ugu bigi mende ligin ar o. Nenaluk, ar ap nabi mende eti, o Yerusalem abel tekman nggwe warurak eti maduk arar o.

34Ae Yerusalem o, Ae Yerusalem o! Kar nen ap nabi-nabi inakigen o! Ar Allah nen ir wene wolok lakba wagage mende, kar nen nggir paga ndamuk pamuk mondok min inakigen. Ar tewe ayam agwi agakabur abura laborogo balok dogi taga ndak-ndak, An nen ir akuni etoma agarik mende obogar laborogo bagarek dogu yiluk, ekigi waganggigi ogwe, kar ka'ir ar o! 35#Mzm. 118:26Eti paga ma, Ar Allah nen pakinarek dogogin dek o. Dikbin o, yogondak kudi nen, kar An kil neyagikdek mondok kigik, ‘Ar Allah endaga paga waga eti adeknggen oba binek o,’ ” yiluk kar nen yigin eti kudi paga arar o.

Currently Selected:

LUKAS 13: WLW

Highlight

Copy