LUKAS 12

Akuni wene tagalkwa mende inilu erogo yoragage wene

(Mat. 10:26-27)

1 # Mat. 16:6; Mrk. 8:15 Ir akuni inebe seribu biluk ogona nggwe negen ar, pedal-pedal yugu dogolir, amberak iniyok kendan mburak mbarak erogo barugwa. Nen ir akuni etoma inil onggolagik dagik, Ar Yesus nen, ir Ar mutok lagwi mende yoraga dogolir, “Kir nen ir ap Farisi mende ragi eti pik pak wogalkwi dogoni o. Nen wene ebe eti, ir inenggal mende, inobabur eritagwi yuak erir taga mende eti paga yigi o. 2#Mrk. 4:22; Luk. 8:17Kimago agarik mende, ambi kwak kenam agikdek, kimago mondok dogogin mondok dek o; Wene aburama birugwa mende ambi kwak, aburama dogogin mondok dek ar o. 3Kir nen wene kukbaga yirugup mende etoma, o dindaga inaruk muk kolalugun o; nen kir uma akman nggwe tu larogo dogolir, pok-pok yugu lagagup mende etoma, o ya nda etoma, inane anggu kunogo yugun o.”

Tuhan kinobade togon dogoni o, yoragage wene

(Mat. 10:28-31)

4“Wene yi kinami arugup o, nogari! Ir akuni nen ninebe ninagakdo yi warogo biluk, ir nen ambi inom eru inoba ndak dek mende eti, inoba kinobade dogogup o. 5Ogwe, An nen kir ta oba kwak kinobade arurak eti, ebe yi yiluk yokeragin o. Ma, ar oba kinobade dogu werek eti, Ar nen inebe inakbiluk, indu aikmo mbo onggol dau obatne werek, Ar etiar oba kinobade dogorak o. Wene yi ebebar yorkeragi o, ma, kir ar oba ar, kinobade dogoni o!

6Tewe pipit eti onggo kunuok nen yiluk kalok, uang we bugudak dua keping paga kuni tagwi etnogogi? Etia ogwe, tewe ebe omanggiar eti, Ar Allah nen oba mi erogo bigin mondok dek o. 7Kir kiniri kinaluakma agarik etoma ogwe, obogar wenago agarik o. Etiar ma, kir kinobade mondok arugup o. Ir tewe eti, inonggo bugudagar ogwe, Kir kinonggo kwak eti perak, mondok nggok mende arar o.”

Ar Kristus endaga telekma bugalogo yoraurak wene

(Mat. 10:32-33, 12:32, 10:19-20)

8“Kinilu togon o: akuni ta nen, an eti nebe Ar mutok lektaga mende arar yiluk, telekma yigin eti, ar Akuni Inakbur eti nen, Ar Allah mende malaikat-malaikat etoma inilka paga, akuni eti An nilu o, yiluk yigin o. 9Ogwe ir akuni inane telekma yugu dogolir, an Ar mutok lektaga mende dek o, yiluk yugun eti, Ar Akuni Inakbur eti nen, Ar Allah mende malaikat inilka paga, akuni eti an nunggukdek o, yiluk yigin o.

10Ir akuni nen Ar Akuni Inakbur eti, wene ambi aigak paga yugun kalok, ar eti omaduk onggo maga bigin o; ogwe ar eti nen, Roh Allah eti wene maduk mende yorigin kalok, ar eti omaduk korigin mondok dek arar o.

11 # Mat. 10:19-20; Mrk. 13:11; Luk. 21:14-15 Kir o tamban erir tagama binagi ungguluk, ir ap pemerintah, o ininggi pago mende inilka paga, kinaigak bagaluwok nen yiluk, wokinarek lagwi kalok, kir kinidi ekodaurak inom, wene nena yugun eti inom, kiniliti pirik parik erugup o. 12Nenaluk, wene kir nena yugun mende eti, Ar Roh Allah eti nen emekiragin o.”

Ap inggi werek mende oba lirogo yirige wene

13Ap ambi ir akuni nggok dogalek inakla nen, Ar Yesus yoga dogolir, “Guru Nombae o, Kar nen an nogar eti, ye mende nde mende ninombae inggi biluk mende, an munggu niruak nen, kane yorinde lak.”

14Ar Yesus nen onggo yoga dogolir, “Nogarak o, ar ap ta nen, An kir kimbirak kinamende, kinombae inggim biluk mende etoma ake paga; wene uwak dolka, nen ebe tumbukiraga, eka dogu baninggige dek o?” 15Yoga lagagerek, ir akuni wonggalek enogo obogar yoraga dogolir, “Kir kinebe, ye mende nde mende wadok nggirik mban ekinaka kau, kiniliti pik pak dikbiluk, nen kinoba kege paga dogoni o. Nenaluk, akuni iniluk dogir tagwi eti, ye mende nde mende ininggi werek, nen inamendek inoba nggilu-nggilu wuka eti paga mban, dek o.”

16Yoraga lagagerek, Ar Yesus wene yi, mbililogo yoraga dogolir, “Ar ap ambi, ar inggi werek arar welagage o. Ar mende eyabula nen enggen mbalek paga, inggi werek welagage. 17Ar ap inggi werek eti akla ebeka dogolir, ‘An nagar paga lurik mende, ye mende nde mende etoma burak, o telek dek arar etaga o. Yogondak an nakla nenggerogon eberik?’ 18Tuguluk akla ebeka lagagerek nen, ar engga werek yoga dogolir, ‘Yogo, an nakla nggagalek werek, ye mende nde mende enggen mbalek, biktagama etoma, takborogon miyalogo lakbiluk, nen o nggok kalok paligin, yiluk ebekige. Nen ebe etomala arar, ye mende nde mende bega, nengandum enggen mbalek bega erigin o, yiluk yirige. 19Nen tuguluk ar engga werek yoga dogolir: Yogo kar ondewerek arar etagan o! Ye mende nde mende pano mende obogar onde agan o, nen ye tahun nde tahun erigin etoma, namende dek arigin dek arar o! Kagi karom nengga wega dogolir, kar kadeknggen arar dogolir o,’ yiluk engga werek yorige. 20Ogwe Ar Allah nen yoga dogolir, ‘Ap ebe nggembu nok mende yi, yogondak kukbaga yi arar kar kambigin o, yiluk yoga kalok, kamindi kamende kuwak erogo batagin etoma, ta kwak onde arigin o?’

21Ir akuni inadik inake ininggi werek arurak mban eberir nugwi, nen Ar Allah ilka paga ininggi werek arurak kwarir nugwi dek kalok, etegerogon arar erugun o.”

Allah ebebar o yiluk andaurak wene

(Mat. 6:25-34)

22Yoraga lagagerek, Ar Yesus nen mutok lagwi mende yoraga dogolir, “Eti paga ma, An wene yi yokerek o, ‘kir kiniluk dogu paga, nir nena nugun, nen nir niniyom nena yitagun yiluk, kiniliti pirik parik erugup o.’ 23Nir niniluk agorik eti, nonggwa mende paga dek o. Ninebe pano eti, tu yiritagwi paga dek ar o. 24Ir tewe ongga paga yoma kinil bikdani o. Ir nen ai yari tagodek, nen enggen mbali tagodek, nen enggen mbalek birtagama ai palek, dek ar o. Ogwe, Ar Allah nen bagarek dogi taga o! Nen ir tewe dagik ar ogwe, Ar Allah nen bagarek dogi taga o, ma kir kwak eti harga nggok mondok mende arar o. 25Kir ya ta nen kwak, iliti pirik eka lagagerek, ar mende umur iluk dogu mende eti, we bugudagar kigik ogwe, idu erogo birige?#12:25: Umur iluk dogu mende we bugudagar kigik ogwe idu erogo birige: Umur iluk dogu mende we bugudagar kigik ogwe anggup lektogo erogo birige. 26Wene we bugudak eti ar ogwe, kir nen eru ndak dek eti kigik ar, nenaluk wene etoma ake paga kiniliti pirik ekwi agoktip? 27#1Raj. 10:4-7; 2Taw. 9:3-6Ongga wangi-wangi#12:27: Ongga wangi-wangi: Bakung eti onggama aburak wundi taga ogwe ebe bawang nggok ndak mende talek ma, enggen yika dogolir elok amberak putih yika nen amberak merah yika erir taga mende. eti anggup wundi taga kinil pipak birkani o; ongga eti nen yabu ekwi dek, Nen nenggen yegerogo yirigin o yiluk eri tagodek o. Ogwe, Raja Salomo eti, ebe ap endaga mbogor werek etiar ogwe, iyom elokte ongga wangi-wangi enggen elokte pano etoma talek ambi yika dogoluk dek arar o! 28Irikngga wangga onggakma etoma, o yogondak kwak aburak ar enggen yiketek ogwe, kubenen nggwe mbuk ari taga mende o. Ogwe, Ar Allah nen irikngga etoma elokte pani pano erogo biktaga o. Nen kir kwak eti, ebiluk mondok arar o! Ogwe kir nen kinakla ebebar andegekdek agokip o! 29Etiar ma, kir nen ninagi ninagarom ngga mende nugun, yiluk kiniliti pirik parik erugup o. 30Wene yegerogon mende eti, ir akuni Ar Allah inonggokdek mende nen kwarir nugwi o. Ma ebebar kwak eti, kir Kinombae nen, kir wadok ketagwi mende obogar etoma, Ar iluar dogitaga o. 31Ogwe kir kiniluk agotik mende yi, Ar Allah apma dogowak nen yiluk, oba bugwi kalok, Ar Allah nen, amberak etoma oba dulogo wokeragin o.”

Ninamende Mbogor paga lakbatagu dogorak wene

(Mat. 6:19-21)

32“Kir kinebe bugudak dogalek yi, kinobade arugup o! Nenaluk kir Kinombae iliti adeknggen paga, Nen Ar apma binagurak mende enogo wokeragin o. 33Kir kinamende onggo kuni lalok, uang eti akuni ininggi dek mende wogorano o. Kir kinadompet maduk ari tagodek mende eti, ye mende nde mende mbogor paga lakbatagu dogorak mende etiar o. Kinamende baktagun mende etoma, ibal bigin dek, nen akuni nen inimudu waganugun dek, nen nggon mbaligin mondok dek mban ar o. 34Kir kinamende werekma etoma, kiniliti etoma ar agarik o.

Yedoman mende pik puk erek dogorak wene

35 # Mat. 25:1-13 Ye wene nde wene etaganem, kinoba kege paga arar dogoni o. Kir kiniyom yugu mondok welagwi, nen kinagandu lampu eti yibalek mondok ar dogoni o. 36#Mrk. 13:34-36Walkigik negen yio, Ir yedoman mende, inombae kwe yikunem lagagerek waganem, aruam welagugwa. Ir inombae enogo watuk, tu puk-puk eka kalok, ir enogo ibar-ibar arar tu kur kugun o. 37Ir yedoman mende, mondok pik puk erek welagunem, inombae da warigin mende eti perak, inadeknggen o. Ma kir kinakla ebebar andani o: Ar inombae enogo waga dogoluk, obanggi obangge dik duk etega dogoluk, ir yedoman mende yemenogo obogar korek balok, ir yamakdagin o. 38Ir inombae eti, o kukbaga odo ki togon a, we odo ki togon dogoluk negen a, ar warigin mende, ir yedoman mende, eloktekma tuam welagunem, inombae da warigin eti perak, inadeknggen o. 39#Mat. 24:43-44Wene yi, kinakla eberek togon o! Ar ap ai werek mende eti, akuni inimodo nggar mende nen, jam nggi paga uma unggi warigin, yiluk ilu kwak dogomo, ar nen uma apmanggwe onggega kau, tuam pik pak warurak o. 40Eti ndak-ndak arar ma, kir ogwe tuam pik pak waku dogoni o. Nenaluk eti ndak-ndak, Ar Akuni Inakbur endago eti, kir yi paga warigin andagikdek ma arar, warigin o.”

Yedoman wene dik togon ekwa o nen dik togon erirtagodek o wene

(Mat. 24:45-51)

41Ar Petrus nen, Ar Yesus yoga dogolir, “Kar wene oba lirogo yegen eti, nir yiluk yegen a, akuni yoma obogar ninom yiluk yegen a?”

42Yorigemo, Ar Tuhan nen onggo yoga dogolir, “Ar yedoman mende ambi, ta nen yabu dik togon eka, nen akla nggagalek mondok eka kalok, ar tuan nen, Ar nen irinarom nau jam pulik ndak-ndak, wogoraga dogowak nen yiluk, ir yedoman mende amberak yemenogo inakepala mendigin o. 43Ar yedoman mende eti, yabu eru yiluk kudi warek ndak-ndak eka werek ma, ar tuan mende eti warigin kalok, ar ap eti adeknggen mondok arar o. 44Kinakla ebebar andani o: Ar ap tuan mende eti, amindik amendek obogar, ar yedoman mende eti onde waka dogowak nen yiluk, oba bigin o. 45Ogwe ar yedoman mende eti nen, akla andega dogolir, ‘Ah, ar tuan eti dogoluk ar warigin o,’ yiluk nen yedoman mende takborogon ndugi wakdalok, nen erom inom, i inom takbik takbok nengga, nen mabuk eka werekma, 46Ar tuan enogo o hari inom, jam inom, yi paga warigin yiluk, ar yedoman enogo onggokdek arar, warigin kalok, ar yedoman mende eti obabur werek mende il ka watuk, ndugi ndamuk pamuk#12:46: Ndugi ndamuk pamuk warogo: Mugogo abel tekman wuldigin o. warogo biluk, nen ar ebe yabu wogorige mende ernogo, ndilogo biluk, nen yedoman ernogo, ir akuni Ar Allah ane kolitagodek mende, inom ndak-ndak erogo bigin o.

47Ar yedoman mende nen, ar tuan mende wadok eti ilu ar ogwe, nen pik puk ekikdek, nen ar tuan mende wadok ndak-ndak ekikdek ar kalok, ar yedoman mende eti ndugi anggin werek mende arar warigin o. 48Ogwe, ar yedoman nen, ar tuan mende wadok inggukdek dogolir, maduk eka dogogin kalok, ar eti ndugi we anggin dek nenggen warigin o. Nenaluk, ar ap ambi, amende pakalok ar wogorigin kalok, ar eti oba nen, pakalok ar nggino yorigin o. Nen ar ap ambi yabu pakalok negen eruak nen yiluk, oba bigin kalok, ar eti oba nen pakalok ar nggino yorigin o.”

Maga bau mende dek ogwe, agorogo baurak mende wene

(Mat. 10:34-36)

49“An wagagi eti, agar paga yoma kali naurak mende kemam aruwak nen yiluk wagagi o. Indu ebe akda obok dagagemo kalok eti, pano mondok arar. 50#Mrk. 10:38Anggon panggon anggin nggok mende arar, An noba arurak mende eti, panggolek arar agarik o. Eti An noba etari wagikdek kigik, niliti anggin ambik arar kektaga o. 51Kir kinakla nen, An o agar paga yoma, dambulogo baurak mende wolok wagagi, yiluk anda tagwi a? Dambulik dogorak mende eti dek o, ogwe agorik agorek dogorak erogo baurak paga arar wagagi o. 52O yogondak kudi paga nen, ir keluarga#12:52 Keluarga, eti indonesia wene paga. Nen wene enggen eti: agwi inom, ombae inom, ewe awor inom, ar engga werek inom dambuk togo yiluk yugwi. ambi inebe lima paga kalok, ir nen agir agor etarugun o. Ir inebe dua nen, ir inebe tiga inom agor tagwi, nen ir inebe tiga nen, ir inebe dua inom agortagwi, erugun o. 53#Mi. 7:6Ombae nen, akbur ap imbirak aredo waka, nen akbur ap nen, ombae imbirak aredo waka, erugun o. Agwiya nen, ak kodak imbirak aredo waka, nen ak kodak nen, agwiya imbirak aredo waka, erugun o. Ar kwe ombak nen, kwe akbur imbirak aredo waka, nen kwe akbur nen, kwe ombak imbirak aredo waka, erugun o.”

O elokte inil waganggu dogorak mende wene

(Mat. 16:2-3)

54Ar Yesus nen akuni pakalok wonggalek ma, yoraga dogolir, “Kir nen agagona, o barat nggwe dagi laga kalok, kir nen yugu dogolir, ‘Miyo warigin yugwi o.’ Nen miyo eti ebebar wari taga o. 55Nen wiya, o selatan nggwe nen waga kalok, kir nen yugu dogolir, ‘O kibi dagagin yiluk yugwi o.’ Nen etegerogon ebebar etari taga o. 56Kir yi, akuni wene inilu nen ar ogwe, inenggokdek-inenggokdek ekwa mende arar o. Kir nen, o elokte miyo warigin a, kibi arigin a, yiluk, mbogor inom, agar inom, kinil lakigik mbenakwi ar o. Nen o yogondak elokte etari taga yoma, nenaluk kir nen kinil mbenar kikdek, nen yegerogon etarigin yiluk andagikdek agoktip?”

Akuni agorek mende inom dambulogo dogorak wene

(Mat. 5:25-26)

57“Wene ebebar mende kwak yi o, yiluk, kir nen wene mbalkikdek agoktip eti nenaluk? 58Ir akuni ambi nen, kir kinuwak doluok nen yiluk, pengadilan paga wokirek lagwi kalok, kir nen, wene ebe auwan mbali lagikdek kigik, kinobatni kinobarne togon, wene eti tuan paga nen arar mbalino o. nen dek kalok, ar nen, kir wokirek ap hakim oba binagi lamo, ar hakim nen, polisi inoba binagi ligin o. Nen ir polisi nen wokirek, kede warek baktagama, penjara etoma arar onggol binagagun o. 59Wene yi, kinakla ebebar andani o. Kir maduk onggo kinoba bugun mende eti, onggo auwan wogogikdek kinagik, penjara nen wuldinagagun mondok dek arar o.”

Currently Selected:

LUKAS 12: WLW

Highlight

Copy