YOHANES 6
6
Ar Yesus akuni lima ribu paga dado palinakige wene
(Mat. 14:13-21; Mrk. 6:30-44; Luk. 9:10-17)
1Ar Yesus welagagerek negen ar nen, i Danau Galilea aik alibagan nggwe, o endaga nin yugu dogolir, Danau Tiberias eti yugu lagugwa etomala arar lagage. 2Ar o etoma arar ari lagagerek paga, ir akuni etoma mende pakalok oba wonggalkugwa. Nenaluk eti, Ar erukbuk mende elalin pakalok eka, akuni u kunik mende inoba u dek erogo baga, ekige paga o. 3Ma Ar Yesus mutok lagwi mende inom, ir kur taga dagarugwarik korek etoma welagugwa o. 4O eti nem, ir ap Yahudi mende Hari Raya Paskah ake komakwi eti erurak obok panggo yi wagage. 5Tuguluk Ar Yesus Il Ar eragalilu yemenogo bik lagage mende, akuni duk-duk ninggituk oba wagwi il darige. Il Daga lagagerek, Ar Filipus yoga dogolir, “Ir akuni obogar yoma dado paluak nen, nonggwa mende nir ngga onggo mbalugun?” yiluk kinok yorige. 6(Wene ebe nena Ar erigin eti, Ar Yesus ilu dogolir ogwe, Filipus abur mbalik nen yega lagagerek, Ar wene etegerogon yirige.)
7Ar Filipus nen onggo yoga dogolir, “Roti onggo dua ratus uang perak #6:7: Uang perak: Uang perak eti ambiar kalok eti akuni yabu inggi o ambi paga ekwi kalok onggo wogoragwi lagugwa. (Mat. 20:2 Kinil bikani). mende ndak-ndak mende ma, ir akuni obogar yoma inake ndak dek o, nen we bugudak-bugudak wogoragun kigik ar ogwe, ndak arigin dek mban ar o,” yiluk yorige.
8Ar Yesus mutok lagwi mende ambi endaga Andreas, ar Simon Petrus ogar, ar nen yega dogolir, 9“Yoma elege wedak ambi amende roti lima nen ikan dua paga batalok werek o. Eti ogwe, akuni nggigilik yegedek yoma wogoramo, enggen degar o?”
10Yugu nanggugwa ar Yesus nen, “Yogo ir akuni etoma obogar korek taruak nen yorani o.” Nen o eta irikngga pakalok ma, akuni yemenogo irikngga paga yemenogo arar korek tagugwa. Nen inebe dambulik eti ap dombok lima ribu ndak-ndak. 11Tuguluk Ar Yesus roti enogo inggimo wagangga lagagerek, Allah Nombae wa, yiluk keyagi wakige. Eka lagagerek, roti enogo akuni pakalok yemenogo ugur-ugur erogo wogoragage o. Nen tuguluk Ar nen ikan enogo etegerogon ar noak nen yiluk tumburogo wogoragagemo, ir inelabur kerok togon arar narugwa. 12Ir obok nunggu lagugwarik inelabur agugwama, Ar Yesus mutok lagwi mende yoraga dogolir, “Ir inelabur nen ndinogo bega mende etoma, mbo lakbugunem o, ibar wonggalini o,” yiluk yoragige. 13Yoragagemo, roti 5 enogo mende ndinik, mburim tu yago dua belas paga akla, ande kerok togon arar yagadogo birugwa o.
14Ir akuni pakalok yemenogo, Ar Yesus elalin erukbuk mende ekige enogo inil kugu lagugwarik, ir nen yugu dogolir, “Ap Nabi warigin yiluk yugu lagugwa enogo, ebebar mondok, yi arar waga o.” 15Ir akuni yemenogo inakla paga nen, ninombae raja endaga nggok eti, Ar Yesus arar dogowak yiluk andagwi eti, Ar obok ilu agage o. Eterogo ilu atuk, Ar ebe wedek talek nomokbir, o ado paga nggwe yemenogo arar dagarige o.
Ar Yesus i agum paga iyok bir lagage wene
(Mat. 14:22-33; Mrk. 6:45-52)
16O arar kukbaga arigi nanggige, Ar Yesus mutok lagwi mende yemenogo Danau ima nggwe arar wukugwa. 17Wuku lagugwarik, ir perahu akla unggiluk, o Kapernaum nggwe arar unda lagugwa. Ogwe Ar Yesus ir inoba wagik dek kigik, o arar tebek yirige o. 18Etanogo ekwi dagik, wiya o tebe-tebe pul ka waga dogolir, i danau enogo tarin puk dengga pak dengga mondok ar ekige. 19Ir arar lagwi dagik, lima kilo meter negen a, enam kilo meter negen a, eta ndak-ndak ari lagugwarik paga, ir Ar Yesus i agum paga iyok bir waga inil lakarugwa. Waga kalok, ir inobade nen nggakbuk dida yirugwa o. 20Ogwe Ar Yesus nen yoraga dogolir, “Kinobade arugup o, yi An kinoba wari taga o!” yiluk yorarige. 21Eta nogo iniliti tiyo yiluk, inadeknggen paga perahu akla ilik birugwa. Nen ar iyok perahu akla dengge yi onggega kigik ar, muk alibagan nggwe arar ari lagugwa o.
Ir akuni pakalok Ar Yesus kwarir lagugwa wene
22O kubenengge kwak, ir akuni i alibagan nggwe yemenogo nen inakla andugu dogolir, i aik yoma nggwe perahu omanggi ar labek welaga enogo yiluk inakla eber lagage o. Nen perahu eti, ar Yesus mutok lagwi mende adek, Ar Yesus inom dek perahu eti paga unda lagiya enogo, yiluk ir inilu agage o. 23Tuguluk ir akuni o Tiberias nen perahu mende negen akla dogalek ar, ir akuni Ar Yesus nen, roti Allah wa yiluk keyagi waka lagagerek wogoragagemo inoba etanogo arar labi wagugwa. 24Nen ir akuni yemenogo inil bir lagugwa mende, Ar Yesus inom, Ar mutok lagwi mende inom, etoma dek arar dagu lagugwarik, ir akuni yemenogo perahu yemenogo paga dagaluk, kwaginabir o Kapernaum nggwe arar unda lagugwa o.
Roti akuni iniluk erinabi taga mende eti, Ar Yesus arar
25Ir akuni yemenogo, i alibagan nggwe Ar Yesus inom abuk agu lagugwarik, nen Ar yogu dogolir, “Ninombae Guru wae, Kar yoma menda unda wagan?” yiluk yorugwa.
26Ar Yesus nen onggo yoraga dogolir, “Wee, ebebar mondok o, kir an kwaknabir eti, wene elalin erukbuk mende eki yemenogo, wene edo nenaluk eke yiluk kinilu atuk kwak dek ogwe, erom kinelabur kigik ndinogo bigik nonggop enogo paga kwak, An kwaknabir wagop kinagi o. 27Kir nen yabu eruwok nen yiluk kalok, nonggwa mende pidi arir taga mende eti ake paga mban dek o. Ma, yabu eti nonggwa mende pidi ari tagodek mende ake, nen iniluk mondok dogolir nabedal kabedal dogorak mende ake mban yabu eku dogoni o. Nonggwa mende eti, Ar Akuni inakbur eti nen wokeragin o, nenaluk yabu eti ake paga, Ar Allah Ninombae nen, Ar obok alep tebelogo birigemo o,” yiluk yoragage o.
28Tuguluk ir nen onggo yogu dogolir, “Ar Allah akla andar taga ndak-ndak eru ake nen, nir nena eruwok o?” yiluk kinok yorugwa.
29Ar Yesus nen onggo yoraga dogolir, “Ar Allah kir erurak wadok ketaga eti yi o, Ar Allah nen Ar lakbi wagage mende, Ar oba kinakla ebebar andani o,” yiluk yorarige.
30Ir nen wene onggo yogu dogolir, “Yogo kalok, Ninombae Kar wene enggen werek negen ambi nena wokneragin? Nen nir eti ninil kalok nen arumo, nir ninakla Ninombae Kar koba ebebar andau mende ma o. Ma eti ake paga Ninombae kar nena erigin? 31#Kel. 16:4, 15; Mzm. 78:24Nir ninumbui ir erom mana eti o ye dekma nde dekma etoma, ‘Ar nen roti mbogor paga mende eti wogoragage,” yiluk Alkitab akla diru warek eti ndak-ndak o.
32Tuguluk Ar Yesus nen yoraga dogolir, “Kinakla ebebar andani o: Musa nen kwak dek ogwe, An Nombae nen kir#6:32: Ar Musa nen kir wokeragage dek o: kir wokirarige yogop eti Musa nen dek o. roti ebebar mbogor paga mende wokirarige o. 33Nenaluk roti Ar Allah wokirarige eti, Ar mbogor paga nen wura wagage eti arar o. Ma Ar nen ir akuni agar paga yoma iniluk erogo bartaga eti arar o,” yiluk yoragage.
34Ir nen yogu dogolir, “Ninombae o, roti yegen eti ar ninggi nanggi wokneraga dogon o,” yiluk yorugwa.
35Ar Yesus nen yoraga dogolir, “Roti iniluk erogo baktaga mende edo eti An Nebe arar o. Nen ir akuni An Noba warugun mende eti, nonggwa mende ake nonaik bagin dek mondok arar o. Nen ir akuni An noba ebebar andagun mende eti, inagi abu arugun dek mondok arar dogogun o.
36Ogwe An arar yorkeragi enogo talek ar, kir An kinil neya tagwi ogwe, kiniliti ebebar andagwi dek o. 37Ir akuni obogar Ar Nombae nen woknirigin mende eti An noba warugun ar o. Nen ta nen kwak, An noba warigin mende eti, An nen mbo togok bagin mondok dek o. 38Nenaluk An mbogor paga nen wura wagagi eti, An nakla wadok paga erurak yiluk dek o, ogwe Ar An lakbani wagage eti, Ar akla wadok mende wene eruak paga yiluk arar o. 39Nen Ar An lakbani wagage mende eti wadok eti yi arar o: Ir akuni An woknirigin mende etoma inobok ar, ambi bulaganem o; ogwe ir obogar O Aga Yobok paga iniluk erogo bagin o. 40An Nombae wadok eti ebe yi arar o: Ir akuni Ar Akbur inil kalok ebebar andagun mende eti, iniluk mondok nabedak kabedal ekwi, nen O Aga Yobok ari warigin eti paga, An nen iniluk erogo bagin o.”
41Nen wene, “An nebe roti mbogor paga mende wura wagagi eti An arar,” yiluk yirige eti paga, ir akuni Yahudi mende wene aredo Ar Yesus oba pakalok waku dogolir, 42“Puk, Ar Yesus yi, Yusuf akburak, Ar Agwiya Ombae nir ninilu etnogogi! Yogo An mbogor paga nen wura wagi yir taga kwak ya nenggerogon kogop?”
43Wene yugwi Ar Yesus yenggak daga lagagerek, ir yoraga dogolir, “Aredo warnakwi puk o. 44An Nombae nen An lakbani wagage dek dogolepma, akuni An noba watep mondok dek ar o. Nen ar eti wolok An Noba bi watep dek ar o. Etama, ta nen An noba warigin mende eti, O Aga Yobok paga, An nen iluk erogo mekbigin o. 45#Yes. 54:13Buku Nabi-nabi paga diru mbalek ambi eti yegerogon: ‘Ir akuni obogar, Ar Allah nen wene emeriragin o,’ yirige eti werekma, ir akuni Inombae ane inaruk koldiluk, Ar obabur emer tagun mende eti, An Noba warugun o. 46Wene eta ake paga, ir akuni etoma nen Nombae inil karugwa yiluk etegerogon dek o. Ar Il karige werek eti, Ar Allah imbirak nen wagage mende eti arar o.
47Wene yi kinilu togon dogoni o: Ir akuni ebebar o yiluk andagun mende eti, iniluk mondok nabedal kabedal ekwi arar kodagun o. 48An Nebe eti roti iniluk erinabi taga mende arar o. 49Kir kinumbu kinomba roti mbogor paga mende eti, o ye dekma nde dekma telekma etoma ner wagugwarik ogwe, kambi wagugwa mban ar o. 50Ogwe roti mbogor paga nen wagage mende yi etegerogon dek o, roti yi nugun mende wartarugun mondok dek o. 51An Nebe eti roti iniluk erinabi taga mende, roti mbogor paga nen wura wagage mende eti arar. Ir akuni roti yi nugun mende, iniluk mondok dogogun o. Roti akuni iniluk dogorak mende, An nen wogoragin eti, An Nuno eti arar o.”
52Wene eti yigi nanggige, ir akuni Yahudi mende ir-ir aredo wartagu dogolir, “Puk, yogok dogomo, akuni yi Ar Uno nir nenggerogon wokniramo nugun nda?” yiluk yirugwa.
53Yugwi agagemo Ar Yesus nen yoraga dogolir, “Yogo kinakla ebebar andani o: Kir Akuni Inakbur eti Ar Uno inom, Ar Amep inom, kir nugun mondok dek kalok, ebebar kiniluk dogogun mondok dek o. 54Ir akuni An Nuno nugun mende inom, nen ir akuni An Namep nugun mende inom, ir eti iniluk mondok nabedal kabedal arar kodagun o. Nen O Aga Yobok paga, An nen iniluk erogo bagin o. 55Nenaluk An Nuno eti nonggwa mende arar o, nen An Namep eti i nonggwa mende ebebar o. 56Nen ir akuni An Nuno inom nen Namep inom nugun mende eti, ir An ninom dambulik nen An ir ninom dambulik, etegerogo mondok dogogun o. 57An Nombae iluk eti nen, An lakbani wagage o. Nen An ogwe Ar Nombae eti paga nen, niluk agarik o. Wene ebe etegerogon arar, ir akuni An Nuno nugun mende eti, ir An paga iniluk dogogun o. 58Roti mbogor paga nen wura wagage enogo ebe yi arar o: Ogwe roti yi kir kinumbui narugwa mende enogo talek dek o. Nenaluk roti eti narugwa kigik ar ogwe inebe watlagugwa ar o. Ogwe ir akuni roti yi nugun mende iniluk mondok nabedal kabedal erugun o.”
59Wene etoma obogar, Ar Yesus o tamban erir tagama, o Kapernaum etoma emeriragage mende arar o.
Wene iniluk nabedal kabedal eku dogorak mende wene
60Ar Yesus wene yirige enogo inaruk kolalku lagugwarik, ir Ar mutok lagwi mende enogo ambetak nen yugu dogolir, “Wene emeknirage yoma anggin werek mende arar o. Ma yogo, ta nen kwak waganurak kogop,” yiluk yirugwa.
61Nen Ar Yesus Engga werek nen, ir Ar mutok lagwi mende yemenogo wene enogo paga aredo wakwi ilu agage. Ilu atuk nen, ir yoraga dogolir, “An wene yigi etoma paga, kir kinakla paga nen wenemuk andagop a? 62Nen kir Ar Akuni Inakbur eti iyok paga, Ar Akdipmo o alep welagagemo etoma dagi laga kinil kalok kwak andagun nenggerogon? 63Ir akuni iniluk erogo baktaga mende eti, Ar Allah mende Roh eti nen o. Akuni inakber mende eti we enggen dek mende arar o. Wene An Nane yokerar taga yi, Ar Allah mende Roh eti arar ane yokera taga o. Nen wene ane yege eti nen arar, akuni iniluk erogo baktaga mende o. 64Ogwe kir amberak nen eti kinakla ebebar andagwi dek agoktip o.” (Ar Yesus ibibir mondok ar laga dogolir, ta nen ebebar andau a'ir, nen ta nen ar onggo nggeraligin eti Ar ilu ar welagage o.) 65Tuguluk ar Yesus wene ambi inom yega dogolir, “Etiar ma, An wene ambi yokirak o, Ar An Nombae eti nen, akuni ambi an noba waruwak nen yiluk erogo bilep dek dogolepma, ar akuni eti An noba watep mondok dek arar o.”
66Yogo eta yirige kudi nen, akuni Ar mutok pakalok lagu lagugwa mende, ir amberak arar dambe kalok mbugulkugwa. 67Tuguluk Ar Yesus nen Ar mutok lagwi mende, ir inebe dua belas enogo inoba kinok yoraga dogolir, “Kir ogwe etegerogon ar An dambek baniluk lugun a?”
68 #
Mat. 16:16; Mrk. 8:29; Luk. 9:20 Ar Simon Petrus nen yega dogolir, “Tuhan,” wae, “Ar Tuhan Ane eti, nir niniluk mondok dogolir, nabedal kabedal dogorak mende wene arar ma, nir ta kwak oba lugun o? 69Kar eti Tuhan koba maduk dek mende, Ar Allah nen lakbagi wagage o, yiluk nir ebebar andago o,” yiluk yorige.
70Yirigemo, Ar Yesus nen onggo yega dogolir, “Kir kinebe dua belas paga yi obogar, An nen pulkinaki mende etnogogi, a? Ogwe ar kir kinanggedekla ambi eti perak, monggar arar o!” 71Ar Yesus akla paga andarige eti, ar Yudas ap Simon Iskariot akbur ernogo yiluk. Nenaluk ar Yudas eti ir dua belas denek, Ar Yesus mutok lagwi mendek ar ogwe, ar nen Ar Yesus onggo nggeralkige o.
Currently Selected:
YOHANES 6: WLW
Highlight
Share
Copy
Want to have your highlights saved across all your devices? Sign up or sign in
