RASUL-RASUL EKUGWA WENE 4

Ar Petrus Yohanes imbirak ap Mahkamah Agama inuwagam nen ekugwa wene

1Ar Petrus o, nen ar Yohanes o, ir akuni inom wene mbalugu nanggugwa, ap imam-imam inakepala inom, Tuhan Ai Palek tuam dogir taga mende komandan inom, ap saduki mende inom, Petrus, Yohanes inoba wagugwa. 2Petrus o, Yohanes o nen yugu dogolir, Ar Yesus arar iluk aga o, yiluk yugwi inaruk kuliluk, ir winimuk ambik yirugwa. Eti paga nen, ir akuni warek mende iniluk arugun eti edo ebebar mondok o. 3Ir nen Petrus Yohanes imbirak kede warogo lembaga malinakugwa. O arar ki agagemo, Petrus Yohanes imbirak ngganggokla pagarek welagugwa. 4Ir akuni ir rasul wene yugunem waganggugwa mende ambigar, ir iniliti Yesus oba panggolkugwa. Ir inebe lima ribu ar etagugwa.

5Kubenengge, ir ap Mahkamah Agama wene onde inom, Yahudi inewai inom, guru-guru agama inom, Yerusalem nomalkugwa. 6Ir imbirak ap Imam nggok mende Hanas inom, Kayafas inom, Yohanes Aleksander inom, wene mbaluwok yiluk akunikeluarga#4:6 Keluarga, eti indonesia wene paga. Nen wene enggen eti: agwi inom, ombae inom, ewe awor inom, ar engga werek inom dambuk togo yiluk yugwi. imam mende inom unggirugwa. 7Petrus Yohanes wogorek inoba lagugwa. Ir nen Petrus, Yohanes kinok wokdagu dogolir, “Kir nen nenggerogon ap ago ndalek mende eti pano ekop? Kir nen nena obarne paga, ta obarne paga ekop?” yiluk yorarugwa.

8Ar Petrus Roh Allah akla malabek enogo paga nen wene yoraga dogolir, “Kir ap kinanggok inom, kir agama wene pago werek mende inom, an wene yokerak o! 9Nir yogondak ya, ap ago ndalek mende iyok pano eko paga, kir ap kinanggoknak mende nen, ap eti nena paga pano eka yiluk, kir kinilu arurak ake paga, nir mbenak ninabir tagwi o. 10Yogo nombaelak kir obok kinilu agwi, ir akuni Israel mende obok nen inilu agwi, erugun eti ap yi ebe pano, obarne werek kinuwagam mendek kogop enda arar. Ar ebe Yesus Kristus ai Nazaret mende enogo obarne paga, menogo bogo o. Nombaelak kir nen, Ar Yesus arar warogo o paga menogo bogop mende, Ar Allah nen arar iluk erogo begemo o. 11#Mzm. 118:22Ar Yesus yi ake, ayat Alkitab yi paga yega dogolir,

‘Kir ap o palkwa mende nen, nggir kir nen mbo dambe karugup mende,

ar ebe yigom ukbula pano mende arar ertagama o.’

12Ebe Ar Yesus paga mban, ir akuni yoma ndilinaburak o. O agar taga yoma obogar, ap adik ambi endaga paga, inagap endarigin o yiluk, Ar Allah nen obatne wogorige mende dek arar o,” yiluk yorarugwa.

13Ir akuni sidang pengadilan inom ekugwa mende nen, ir Petrus Yohanes imbirak inoba inobade mondok dek arar agagemo, wadigi, Petrus Yohanes akuni sekolah nggok erudek ar ogwe, wene yega o, yiluk bi warinakugwa. Nen ir nen Petrus Yohanes imbirak yi, Ar Yesus aworomi inom wogorek nega laga mende enogo ar o, yiluk inilu agugwa. 14Ogwe ir akuni yemenogo nen, wene ambi yurak inakla mondok dek ar agage o. Nenaluk Petrus Yohanes ineragalu eti, ar ap pano ekugwa mende enogo inom mendek welagage o. 15Ir ap wene pago mende nen, ar Petrus Yohanes imbirak wundilani o, yiluk wuldalok, yogo nir nenggerogo eginabuwok yiluk wene mbalkugwa. 16Ir nen yugu dogolir, “Wadigi, ap yi nir nenggerinabugun kogop? Ir ap yi imbirak nen wene elalin eka yi, akuni o Yerusalem mende obogar inilu aga o. Nir nen dek yurak ndak dek arar aga o. 17Yogo wene yi wigaliluk wulkunem, ir imbirak inagudi wari nabuwok o, yiluk yirugwa. Ir nen akuni inaruk paga, Ar Yesus endaga mondok yugup o yiluk yorawok o, yirugwa.”

18Petrus Yohanes imbirak wai yoralok uma malinakugwa. Ir nen yogondak Yesus endaga akuni yoragu dogorak mondok dek o.

19Ir Petrus Yohanes imbirak nen, wene onggo yugu dogolir, “Kir kiniliti eberni nda, Ar Allah ilka paga pano kwak erurak eti, kir kinane mutok laurak a, Ar Allah ane yugu mutok laurak a. 20Nir nen ninil karugu mende, yoragakdek dogorak dek o.” 21Ir akuni Mahkamah Agama enogo nen, Ar Petrus, Yohanes imbirak inoba hukuman wurabu wene edo mondok dek arar agage o. Etama, ir ap rasul mbere enogo yoragu dogolir, kir kinebe Ar Yesus endaga kwak eti mondok yugup o, yiluk yoragu lagugwarik, ir imbirak kede pigalogo lani o, yiluk wuldarugwa. Nenaluk wene edo eti ir ekugwa eti arar. Eti paga nen, ir akuni obogar nen Ar Allah pogorakugwa. 22Ap ago ndalek welagage eti, ar ebe umur empat puluh tahun ndak-ndak negen arar warek welagage mende ma, elalin ar u palkugwa o.

Akuni ebebar andagwi mende tamban ekugwa wene

23Ar Petrus Yohanes imbirak wulda wagugwama, ir inogariyak inoba lagugwarik, imam-imam kepala inom, Yahudi inewai inom, wene yirugwa mende obogar mbililogo yorarugwa o. 24#Kel. 20:11; Neh. 9:6; Mzm. 146:6Ir inogariyak inaruk kulku lagugwarik, iniliti ambi ar atuk, Ar Allah nggino yogu dogolir, “Tuhan wae, kar nen mbogor agar yoma walkega, laut ima akla werek mende inom Kar nen kenam ekbirigena o. 25#Mzm. 2:1-2 Kar Kaguringge paga, nir ninumbu Daud, ar Kar kayedoman eti oba, wene Kar nen yorigen mende yi,

‘Ir akuni Ar Allah inonggokdek mende nen, nenaluk ir wenemuk yirtagwi,

Nenaluk ir ap inai ya nda etoma nen, ye nde pano aru dek mende eberir tagwi?

26Ir ap raja-raja nggok ndak nen wim pik puk ekwi,

Ar Tuhan Raja Ndilinakwa mende eti inom wim eru paga,

ir ap nggaindak dambulir wagwi.’

27 # Mat. 27:1-2; Mrk. 15:1; Luk. 23:1,7-11; Yoh. 18:28-29 Herodes inom, Pontius Pilatus inom, akuni Ar Tuhan inunggukdek mende inom, ir akuni Israel mende o kota yila werek mende inom, ir inane dambulku dogolir, Kar kayedoman oba maduk labek dek mende Ar Yesus, Raja Ndilinakwa mende dogowak nen yiluk menogo begen enogo, Ar inom wim burak wene mbalka o. 28Ir inebe ambiar ertatuk, ir eru inakla andarugwa mende ertoma, Kar nen pagane kwak obogar kologo bega dogolir, etoma obogar etaruak yiluk kakla andarigen mende ar o. Nen wene eta ebe Kar kobarne paga inom nen Kar wadok paga inom, obogar kologo birigena o. 29Yogo, Tuhan wae, yogondak ir nen kinane yugup o, yiluk kudi binanengga yi kil ninan o. Kar nen nir kayedoman mende yi, Kar kane ninobade dek paga mondogar, yorar mugu dogu paga, telek erogo binanin o. 30Ar Yesus Kar Kayedoman oba maduk labek dek mende eti endaga paga inom, nen Ar obarne paga inom, nir nen akuni u warek mende iniluk erinakwi, elalin erukbuk mende elalir lagwi, erurak paga yamarninan o,” yiluk tamban ekugwa.

31Ir tamban arar ekugwama, o ir kuwak erek werek ma yemenogo abodok luk lak yirige. Ir obogar Ar Allah aguringge wogoragagemo, ir nen Ar Allah Ane inobade dek paga mondogar, yorar lagu-lagugwa.

Iniliti ambi inebe ambi inande ambi, welagugwa wene

32Ir akuni ebebar andarugwa mende enogo iniliti ambi, inebe ambi, inamende ambi welagugwa. Ir nen an nadik namende yigikdek. Ir inamendek werek mende, ir ndak-ndak tumburogo kodagu lagugwa.#Kis. 2:44-45 33Ir rasul-rasul nen, Ar Yesus obogar iluk aga o yiluk, inebe inobarne nen inalon paga arar yorar lagu-lagugwa. Etegerogon ekwi paga, Ar Allah adenggen inoba nggok togo arar barige o. 34Ir etoma ambi amendek dek nen dida yilukdek mondok o. Nenaluk ir inagar werek mende inom, nen ir inao palek werek mende inom, ir nen onggo kuni lalok, uang onggo kunik mende, 35ir rasul-rasul inoba wonggalku lagugwa. Nen uang enogo ir rasul-rasul nen, ir akuni amberak ina mende dek kalok, inake wogoragwi eku lagugwa. 36Mar ar Yusuf nen etegerogo ar ekige o. Ar agar onggo kungga lagagerek, uang ebe wolok rasul-rasul inoba wolok bi lagage o. 37Ar Yusuf yi ebe ap lewi mende wigalek, ar ai o Siprus mende, nen ir rasul-rasul nen ar endaga Barnabas yogu lagugwa eti(Barnabas ebe nir ninane paga iniliti aik ware).

Currently Selected:

RASUL-RASUL EKUGWA WENE 4: WLW

Highlight

Copy