RASUL-RASUL EKUGWA WENE 26

Ar Paulus nen Agripa uwagam erakde mbalarige wene

1Ar Agripa nen, ar Paulus yoga dogolir, “Yogondak wene kar kerakde mbalau paga, o telek erogo bagagi o,” yiluk yorige. Yorigemo, ar Paulus nen inggi ilik bega lagagerek, wene erakde mbalarige mende yi o,

2“Ae, nombae Agripa kendaga mbogor o! O yogondak yi paga, nombae kuwagam ya, wene ap Yahudi nen noba bega mende yokirik o; 3Nombae kar eti, akuni Yahudi mende erir tagwi inobabur mondok dik togon kilu kala arar o. Etiar ma, an wene noba bega mende, kilka paga ya, nerakde mbalagin ma, karuk kolek dogu nggino yigi o. 4An elege awan paga, o Yerusalem mondok dogolir eka lagi mende, ir ap Yahudi mende obogar inilu agiyarik o. An elege auwan paga, o Yerusalem etoma, ir akuni inalebunu an mende ninom welagagi mende eti, ir inilu ar o. 5#Kis. 23:6; Flp. 3:5Etoma dogolir, an ap Farisi mende arar welagagi o. Nen wene agama nir mende paga kindirik paga, obarne ambik mende etoma eka lagagi mende, ir inilu ar ma, ir nen yugun o. 6Ar Allah nen, nir ninumbui wene warogo inoba birige eti, etagagemo araro. An wene ebe eti awene mende yorar nega paga, nande bagaluwok nen yiluk, wene mbalitagama yoma bani wagiya o. 7Wene warogo birigemo, oba mbektek agorik yi paga, o pagane etoma nen, nir ap Yahudi inalebunu dua belas paga yi nen, yabongga wene nena mende etarigin o, yiluk iniliti dulik agiyarik mende yi paga, wene yi noba wurabi tagwi o, Agripa nombae o, wa. 8Ir akuni Yahudi mende nogari yi, Ar Allah nen akuni warek mende iniluk erinabigin dek yiluk, nenaluk kinakla andar tagwi?

9 # Kis. 8:3, 22:4-5 An nen nenggerogo yokerakbuk o. Ir akuni nen, Ar Yesus ai o Nazaret mende awene yugwi eti, an nakla paga nen, wene obogar etoma nggi kwak erumo, ir eti nggodo mbalinaburak, yiluk eka lagagi werek an arar o.

10An o Yerusalem etoma dogolir, ir ap imam-imam inewai nen, ir akuni Allah akburi pulik mende etoma, warinabir lan o, yoknugwi kalok; akuni Allah akburi pulik mende, inebe kede warogo ngganggokla malinaka, amberak mondok min warinaka, eka lagagi werek nebe yi arar o. 11An nanini kumbuk togo, ir akuni Allah akburi pulik mende eti, ir Yahudi tamban erir tagama nen mep dagik dagok erinaka, kode akuni inuma wedekma lagunem, mugurek kwarinabir laga, eka lagagi o,” yiluk yorige.

Ar Paulus ekige mende mbilikige wene.

(Kis. 9:1-19, 22:6-16)

12“Etegerogo yiluk, ir ap imam-imam inewai nen, an diru mbalogo wornirugwama, wolok o Damsyik arar lagagi o. 13Ma, akerak tuan taga laganem, o odo kirogo, molinggi akbinak kwak dek ar, akbinak nggok mondok ar, an noba inom, nen ir akuni an ninom mende yanogo inoba inom, akbinak yibadogo kwi ndede erogo wurabi wagage o. Ae Agripa nombae. 14Etegerogo erninaka kigik, nir obogar yuk puk nggilarir lagagu o. Yuk puk etarir lagunem ar, ane mbogor paga nen Ibrani wene paga yonega dogolir, ‘Saulus, Saulus! Kar an nenaluk mep dagalnabir waritagan? Kar Kombae nen erir waga kigik, nggodo mbalir waga agandik ma, kar kagakdo aik kigin o.’ 15Yornirigi nanggige, an nen, ‘Nombae kar ta kane yorniri tagan?’ yiluk yorigi o. Yorigimo Ar Tuhan nen, ‘An Yesus nagik, narir waritagan o. 16Kar yogondak kiluk atuk menarin o! Wene yogondak ya eka neyagen mende inom, yabongga eka kil neyagin mende inom etoma obogar, ir akuni wedek mende amberak inanduwan, wene yorar nega dogonok nen, yiluk menogo bagu paga, An nen kayonggo bigi o, yiluk yorige. 17An nen, kar ap Israel mende inake inom, ap inalebunu Yahudi dek mende inake inom, pulogo bagagi o. An nen kar ir inake inoba lakbagagin o. 18Kar nen ir inoba laga dogolir, inil mbuk mende pano erinaka, o amumo Iblis apma werek mende, Ar Allah akbinak paga ba wundi waga, erigin o. Erumo ir nen, an noba ebebar eberogo woknakwi kalok, an nen ir inomaduk mbo nambotna biluk, ir akuni pulik mende inake ndugurik mende eti wogoragin o.’ ”

Ar Paulus yabu ekige mende mbililkige wene

19“Nenaluk, wene edo ebe nil karigi eti paga ar, yegedek ma ndegedekma, Ar Allah oba tebe yiluk erir nega agarik o, Agripa nombae nggok mende wa. 20#Kis. 9:20,28-29Wene eti wolok nega dogolir, alep ir Yahudi o Yerusalem mende inom, o Yudea mende inom, akuni inalebunu Yahudi dek mende inom, ir nen maduk mbo inambotna dambe kalok, Allah apma ari watuk, ir iniliti ebebar andarugwa mende eti erir lagu dogowak nen yiluk, yorar nega lagagi o. 21Eti etegerogo erir neganem, Ar Tuhan Ai Palekma etoma ari unggirigirik mo, ir ap Yahudi mende yi nen, an pagago naruwok nen yiluk, ekugwa o. 22Ogwe yogondak ya kudi, Allah nen yamak nagemo, an niluk werekma kil neyagen o, lak. Ya dogolir, an nil karigi mende, akuni buk nggok obogar yorar lektaga o. Nen, wene an yorar lertaga yi, alep ar ap nabi-nabi nen yirugwa mende paga inom, nen ar Musa nen yirige inom; 23#Yes. 42:6, 49:6; 1Kor. 15:20wene yugu lagugwa enggen ebe eti, Raja Ndilinakwa ninewe menogo bigin yirige mende eti, oba mep dagalogo warogo bumo, kambiluk nen, akuni warek inakla nen, ar ndak iluk arigin o. Ar nen o akbinak wene, ir ap yi yoraga, nen ir ap nin mende yoraga, erigin o,” yiluk yugu lagugwa.

24Ar Paulus nen wene eka lagage mende obogar erakde mbalogo mbililkanem, ar ap Festus nen ane nggok ar obarnerogo yoga dogolir, “Paulus, kar kiliti mbalkena o! Ye wene nde wene ambik kilu agan endoma nen, kiliti mbalogo bagagemo o,” yiluk yorige. 25Ogwe ar Paulus nen wene onggo yoga dogolir, “Festus nombae kendaga mbogor o, an niliti mbalek nen yega dek o. An niliti werek nen ar, wene ebe karigi mende, ekigi mende, yitaga o. 26Ar Agripa endaga mbogor, an wene yitaga yoma ar obok ilu paga nen, an telekma bagalogo arar yoritaga o. An wene mbililir taga yoma, o idil bugudakma nen etagage mende dek ar o. Nen wene ya, ar aruk kulkikdek mende ambi yega, dek arar o. 27Agripa nombae, kar nen ap nabi wene yirugwa eti ebebar o, yiluk andagen a? An nakla paga nen, wene yirugwa eti kar nen ebebar andarigena keyagi o, lak,” yiluk yorige.

28Nen ar Agripa nen, “Wee, abeak, kar an we anggin dek yogondak ya arar Kristen etarurak paga andalok yegen a?” yiluk yorige. 29Yorigemo ar Paulus nen, “Yogondak ibar a, dogoluk nen ar a, kar inom, akuni amberak yoma ninom, an wene yeganem kinaruk kolalkop mende yoma obogar, an Ar Yesus ane waganggigi ndak-ndak waganubagik nen yiluk, an nen kir kinake tamban Allah nggino yoritaga o,” yiluk yoragage.

30Yanogo yoragi nanggige, ap endaga mbogor Agripa inom, ar Gubernur Festus inom, kwe Bernike inom, akuni wene mbalkunem obogar melagugwa. 31Ir menatuk wulku dogolir, ar ambi yogik yegerogo yirugwa: “Ap yi kede wakwi, ebe mondok min wakwi erukbuk mende kede warogo begama o,” yiluk yirugwa. 32Agripa nen “Festus wae, Ap yi muk kede pigalogo wulduwam, ar nen nawene Kaisar nen mbaluwak nen, ilik banurak yege paga, pago welagopma kigi o,” yiluk yirige.

Currently Selected:

RASUL-RASUL EKUGWA WENE 26: WLW

Highlight

Copy